1 Əmə, Shemɔ Piarə, tə əyïkosəra də əzü-awla nə̂ Jezu Kristə kə ta ngrowô səye kə azü ə̂në əndje sɔ̂tə̂ kʉtə̂ əpʉ lɔsu bale ə̂në ə sə tə âgbɔ̂ ərə wââ kɔ mata ənə̂ əzə̂ kɔ, tə̂ äwä kə mbrə ərə də äwänə nə̂ Ndjapä nə̂ əzə̂ də Awoshe əzə̂, Jezu Kristə. 2 Ndjapä mbrə̈ ə̂rɔ̂tə̂ ye kə e ə zä blatshe kə e gâ pâ nə gâ pâ nə mbrə ə̂në e yêrɔ Ndjapä nə də Jezu, Âgbɔ̂ Əyïngerə nə̂ əzə̂ nə kɔ!

3 Də awlra nə̂ ye, Ndjapä nə kô aərə nɔ̂ ə̂në ə lï kɔ kə əzə̂ gâ ye ndə kə pa a sə də sorô ə tɔ popo Ndjapä nə, mbrə ə̂në tshə mbrə̂ â a wusə̂ ətshə ə̂në tshə ê əzə̂ də ə̂tə̂ ye də ə̂yî ye də awlra nə̂ ye gâ ye kɔ. 4 Tə̂ äwä ə̂yî ye nə də awlra nə̂ ye nə, tshə kô aə̂rɔ̂ aərə ə̂në ə sə tə aâgbɔ̂ aərə lə ala ye kɔ, ə̂në tshə zâ ama də əpʉ nə ətshinə gâ ye kɔ kə əzə̂ gâ ye, kanika e tɔ lə aərə tshepashɔ səye ə̂në ə ndɨ azü tə̂ äwä aəmbrʉ aəgo kɔ ka e mbrə tə̂ e ə lï də ənə̂ Ndjapä nə. 5 Mbrə əpʉ səkɔ ndje, e mbrə̈ nɔ̂ ndə kə pa, gâ pâ əpʉ lɔsu e nə, e za əpʉ kə mbrə aərə tə ə̂rɔ̂nə; gâ pâ əpʉ kə mbrə ərə tə ə̂rɔ̂nə, e zä əpʉ djatra kə wusə̂ ərə; 6 gâ pâ əpʉ djatra kə wusə̂ ərə nə, e zä əpʉ kə wusə̂ kə ru tshelə e tə̂ aərə; gâ pâ əpʉ kə ru tshelə e tə̂ aərə nə, e zä əpʉ kə ru ə ru lə aərə nɔ̂; gâ pâ əpʉ kə ru ə ru lə aərə nɔ̂ nə, e zä əpʉ kə tɔ popo Ndjapä; 7 gâ pâ əpʉ kə tɔ popo Ndjapä nə, e zä əpʉ kə yi tə̂ tə alaye; gâ pâ əpʉ kə yi tə̂ tə alaye nə, e zä əpʉ kə yi tə̂. 8 Mbrə ə̂në, kədə e sə də aə̂rɔ̂ aərə səkɔ, â ə zu ə zu lə e, ə sə kə mbrə ndə kə pa e sə tə azü kə mbrə aərə â ə sə kə za äwä kə e ndə kə pa e yerɔ Âgbɔ̂ Əyïngerə nə̂ əzə̂ də Jezu Kristə nə rô pâ nə. 9 Bale, əzü ə̂në tshə sə sə də aə̂rɔ̂ aərə səkɔ lə ye ne, tshə sə tə əyïbula gâ ye; tshə lishi li ngrʉ̂ ne â kə yutu aangbrɔ anyaka nə̂ ye ə̂në Ndjapä yûtu gâ ye kɔ, ə̂sə̂ əpʉ nə djêrə ətshə gâ ye.

10 Âdârə ə̂në, alaye, e mbrə̈ nɔ̂ kwatə̂-e ə ro ənə̂ ətshinə ndə kə pa e yisə̂ nə gashu ə pa e yində kə e e ə̂në Ndjapä nə ê e kɔ də kə ke e ə̂në tshə kê e kɔ gâ ye. Mbrə ə̂në kədə e sə kə mbrə rə, e sə sə kə te gâ lə əmbrʉ ərə alɔ bale ne. 11 Â rə də̂ äwä kə li gâ lə Əgɔngerə ə̂në ə daka pə piii kɔ, nə̂ Âgbɔ̂ Əyïngerə nə̂ əzə̂ də Awoshe əzə̂ də Jezu Kristə, sə kə krɔ gerətshe gashe kə e.

12 Âdârə ə̂në mə sə kə pa ndə aərə səkɔ alɔnɔ̂ kə e ndə kə pa e li tshelə e gâ pâ nə, ə̂në e wûsə̂ nə tə ə̂rɔ̂nə gâ ye â e gbɔ̂gbɔ tə̂ e lə djatra əpʉ gâ ye ə̂në e wusə̂ nə kpəsəye kɔ. 13 Bale, ə̂në mə daka pə pâ ashɔ kɔ, mə wu lə ala əmə tə ə̂rɔ̂nə ndə kə pa e li tshelə e tə̂ aəpʉ səkɔ ka e sə də ə̈kü ala e. 14 Mbrə ə̂në mə wusə̂ nə ngâ, mata ə̂në Âgbɔ̂ Əyïngerə nə̂ əzə̂ də Jezu Kristə də ə̂tə̂ ye yîsə̂ nə kə əmə gâ ye kɔ, ə pa alɔ kə tshi akwa kuzu səye tʉ ndô trö gâ ye. 15 Bale, mə sə kə mbrə nɔ̂ ndə kə pa, mandâ kə ro əmə ndje, e sɔtə̂ äwä kə li tshelə e alɔnɔ̂ gâ pâ aərə səkɔ ə̂në mə yîsə̂ kɔ.

16 Ngâ, ə də̂ tə̂ äwä andəmaterə ə̂në azü sɔ̂ kpə lə kumu əndje ə wûtu də nə kɔ də̂ ä yîsə̂ əpʉ awlra nə̂ Âgbɔ̂ Əyïngerə nə̂ əzə̂ də Jezu Kristə nə də alɔ kə gu ətshə kə e kɔ ne. Bale, ä wû ətshə lə əgerə tə̂ ye də ala ä də ə̂tə̂ ä. 17 Mbrə ə̂në Abä də Ndjapä zâ kə lʉ ətshe də kə mbe ətshe kə ətshə, alɔ ə̂në tshema tô lə ə̂yî ə̂në ə rô pâ nə gâ ye kɔ ə pâ kə ətshə ə pa: «Ɨrɨ əmə ə̂në mə yində ye rô pâ nə kɔ kə səye, əmə, tshelə əmə mɔ tə̂ ye tə bandanə.» 18 Ä-ä də ə̂tə̂ ä, ä djî tshema səkɔ ə̂në ə tô mâ lafɔ kɔ, alɔ ə̂në ä də aəndje sə̂ mâ pâ kaga ə̂në ə sə kpî kɔ.*1.17-18 Wu Mat 17.1-5; Mar 9.2-7; Luk 9.28-35.

19 Gâ pâ nə ndje, ä wu ə pa əpʉ ə̂në aawopandəma Ndjapä pâ kɔ, ə daka pə kpə mandânə, â e mbrə̂ tə ə̂rɔ̂nə ndə kə pa e dra ətu e ndə nə, mbrə ə̂në əpʉ nə̂ əndje nə sə mata lamba ə̂në əwo nə sə kə tshe lə əbutshe kɔ, ʉrrr ətshe vɔtə̂ kə kra nə ka təmble tshe tə̂ lɔsu e. 20 Angbʉlînə, e wüsə̂ nə ə pa ə̈bə̈ əzü bale lï lï ndə kə pa tshə yisə̂ tshelə âdâ ndəma Ndjapä ə̂në əndje tâ gâ lə Fraka nə̂ Ndjapä kɔ kʉ ndə kumu ye ne. 21 Mbrə ə̂në ə̈bə̈ əzü bale a afɔ ndə tshelə ye alɔ bale ə pa ndəma Ndjapä ne. Bale, Âgbɔ̂ Yîrə̂ kə yisə̂ əpʉ nə â azü ə pa ndəma Ndjapä nə kɔ.