1 Əmə, Palɔ də Silasə gâ ndə Timɔte, ä wla ngrowô səye kə azü Laglizə gala Tesalɔnikə, ə̂në əndje sə tə azü nə̂ Abä əzə̂ də Ndjapä gâ ndə Âgbɔ̂ Əyïngerə Jezu Kristə kɔ.

2 Abä əzə̂ də Ndjapä gâ ndə Âgbɔ̂ Əyïngerə Jezu Kristə mä ə̂rɔ̂tə̂ əndje kə e ə zä blatshe kə e!

3 Alaye, ä lï ndə kə za mərshe alɔnɔ̂ kə Ndjapä mbrə e, â ə sə də äwänə, mbrə ə̂në lɔsu e sə kə gerə nə â kə yi tə̂ e nɔ̂ lə takpa tə̂ e sə kə gerə nə alɔnɔ̂. 4 Äwä bale ndje, ä sə kə da əkro ä tə̂ e lə Alaglizə nə̂ Ndjapä, mbrə ə̂në e sə kə ru tshelə e ə sə kə bata lɔsu e lə aəyo nɔ̂ ə̂në azü gi tə̂ e də aərə əyo ə̂në e ro lə nə kɔ.

5 Aərə səkɔ yisə̂ nə gashu ə pa kə wa ngbanga nə̂ Ndjapä sə də äwänə, ndə kə pa ə mbrə e tə azü ə̂në e lï də Əgɔngerə nə̂ Ndjapä, ə̂në e wu əyo mbrə nə kɔ. 6 Mbrə ə̂në ə sə də äwänə lə ala Ndjapä ndə kə pa tshə gi əyo tə̂ azü mandâ əyo ə̂në əndje gi tə̂ e kɔ, 7 ə za äwä kə e, e-e ə̂në e sə kə wu əyo kɔ, ndə kə pa e wu tə̂ e, a də a-e, alɔ ə̂në Âgbɔ̂ Əyïngerə Jezu sə kə afɔ mâ lafɔ ndə kə gu nə də alayïworɔgbɔ atrawaya nə̂ ye. 8 Tshə sə kə gu nə lə ala əwo ndə kə gi əyo tə̂ azü ə̂në əndje wusə̂ Ndjapä wu ne kɔ*1.8 Wu Eza 66.15. də əndje ə̂në əndje mbrə tə̂ əndje mbrə ə lï də Ə̂rɔ̂ Əpʉ nə̂ Âgbɔ̂ Əyïngerə nə̂ əzə̂ Jezu ne kɔ. 9 Ndjapä sə kə wa ngbanga kuzu gâ pâ əndje gbrä ə̂në ə sə də äwänə kɔ, əndje sə kə sə ngrʉ̂ ətshi Âgbɔ̂ Əyïngerə, ndje tə̂ awlra nə̂ ye ə̂në ə sə də ə̂yî kɔ, 10 alɔ ə̂në tshə sə kə gu nə, tə̂ alɔ nə səkɔ, ndə kə pa azü nə̂ ye nɔ̂ mbe ətshə â azü nɔ̂ ə̂në əndje zâ lɔsu əndje kə ətshə gâ ye kɔ sə kə wu ətshə də amɔ tshelə əndje. E-e ndje, e sə kə sə ndje tə alaye, e sə kə sə lə takpa tə̂ azü nə mbrə ə̂në e yində əpʉ ə̂në ä yîsə̂ nə kə e kɔ gâ ye.

11 Âdârə ə̂në ä sə kə yu Ndjapä alɔnɔ̂ mbrə e, ndə kə pa Ndjapä nə̂ əzə̂ mbrə e tə azü ə̂në e lï də kə e e ə̂në tshə ê e kɔ, kanika tshə mbrə lə takpa tə̂ e, də awlra, aə̂rɔ̂ aərə nɔ̂ ə̂në tshə yində kə mbrə nə lə ə̂rɔ̂tə̂ ye kɔ də kosəra ə̂në e sə kə mbrə nə tə̂ äwä lɔsu kɔ. 12 Rə də̂ azü ə mbe əɨrɨ Âgbɔ̂ Əyïngerə nə̂ əzə̂ tə̂ äwä e, ndje e-e tə̂ äwä ye, Lïndə̂ ə̂rɔ̂tə̂ Ndjapä nə̂ əzə̂ də Âgbɔ̂ Əyïngerə Jezu Kristə nə.