1 Ndə kə nglɔ əpʉ nə, alaye, e yü Ndjapä mbrə ä kanika Əpʉ nə̂ Âgbɔ̂ Əyïngerə za ətshe nɔ̂ na na ye ka azü mbe Əpʉ nə mata ə̂në əndje sə kə mbrə nə mâ ndə e je kɔ. 2 E yü Ndjapä ndje kanika tshə tshɔ ä lə kəna azü ə̂në kə ma tə̂ əndje sə sə də äwänə ne kɔ gâ ndə aəmbrʉ azü, mbrə ə̂në ə də̂ azü nɔ̂ də̂ kə za lɔsu əndje kə Ndjapä kɔ ne.

3 Bale, Âgbɔ̂ Əyïngerə sə tə awombrə tshelə ndəma ye, tshə sə kə gbɔgbɔ lɔsu e ə sə kə bata e â djablo sə sə kə ma ə̈bə̈ ərə tə̂ e bale ne.* 4 Ä za lɔsu ä nɔ̂ kə e lə əpʉ nə̂ Âgbɔ̂ Əyïngerə ə pa ərə ə̂në ä za ama də nə kə e kɔ, e sə kə mbrə nə â e mbrə je.

5 Âgbɔ̂ Əyïngerə dö lɔsu e gâ tə̂ äwä kə yində Ndjapä də äwä kə kânga lɔsu e mata ə̂në Kristə kânga lɔsu ye gâ ye kɔ!

6 Alaye, ä sə kə za ama kə e də əɨrɨ Âgbɔ̂ Əyïngerə nə̂ əzə̂ də Jezu Kristə ndə kə pa e na na trö gâ tə̂ aye nɔ̂ ə̂në tshə mbrə tə̂ ye mbrə də äwänə ne kɔ* ə̂në ə mbrə tə̂ ye kpî tə̂ ərə ə̂në ä yîsə̂ nə kə e gâ ye kɔ. 7 E-e də ə̂tə̂ e, e wûsə̂ äwä ə̂në e lï ndə kə mbrə tə̂ e mata ä kɔ gâ ye, mbrə ə̂në ä mbrə̂ tə̂ ä mbrə̂ lə takpa tə̂ e tə̂ äwä laga ne. 8 Ä zɨ̂ rəgo nə̂ ə̈bə̈ əzü zɨ̂ tə ambanə ne. Bale, sɔ də tsheləbu sɔ də alɔ, ä wû əyo ə mbrə̂ kosəra ngbatshe ndə kə pa ä sə̂ sə̂ tə kongbɔ pâ ə̈bə̈ əzü bale lə takpa tə̂ e ne.* 9 Ä lî kəmə ndə kə pa ä yû tshuku aərə lə kəna e, bale ä yîndə kə pa ä mbrə̂ rə kanika e mbrə ərə mata ä. 10 Mbrə ə̂në alɔ ə̂në ä sə̂ mâ ndə e je kɔ, ä zâ ama kə e də əpʉ səye: kədə ə̈bə̈ əzü kə yi yində kə mbrə kosəra ne, tshə zɨ̈ ndje ərə zɨ̈ ne.*

11 Kandää, ä dji ə pa alabə̈ azü lə takpa tə̂ e sə tə azü ə̂në əndje mbrə ərə mbrə də äwänə ne kɔ*, əndje yi yində kə mbrə kosəra ne, bale əndje sə kə yi kʉtə̂ ama əndje gâ lə əpʉ nə̂ azü. 12 Ä sə kə za ama kə azü səkɔ ə pa əpʉ kə əndje də əɨrɨ Âgbɔ̂ Əyïngerə Jezu Kristə ə pa əndje sə ngboo ə mbrə kosəra ə zɨ rəgo nə̂ əndje də ə̂tə̂ əndje.

13 Ənə̂ e, alaye, e kä kätə̂ kə mbrə ə̂rɔ̂ ərə ne. 14 Kədə ə̈bə̈ əzü kə mbrə tə̂ ye mbrə ə lï də əpʉ səye, ə̂në ä pa gâ lə ngrowô səye kɔ ne, ala e sə̈ tə̂ ye, e nä nä trö də ətshə ne kanika gana mbrə ətshə. 15 E wü ətshə wü tə əyïkowɔ ne, bale e pä əpʉ kə ətshə mata aye əzü.

16 Âgbɔ̂ Əyïngerə tə kumungû blatshe də ə̂tə̂ ye zä blatshe kə e alɔnɔ̂, lə aərə nɔ̂! Âgbɔ̂ Əyïngerə sə̈ də e nɔ̂!

17 Əmə Palɔ kə ta aəpʉ səke də kəna əmə â bla e kɔ. Äwä kə za kəna əmə gâ pâ angrowô nə̂ əmə nɔ̂ kə sə̂. Äwä kə ta ngrowô nə̂ əmə kə sə̂.

18 Ə̂rɔ̂tə̂ Âgbɔ̂ Əyïngerə nə̂ əzə̂ də Jezu Kristə sə̈ də e nɔ̂!