1 Əmə, âgbɔ̂ əzü, mə ta ngrowô səye kə Gayusə ə̂në mə yində ye ngbatshe kɔ, ə̂në, əmə, mə yində ye tə djatra əpʉ kɔ.

2 Aye əmə ə̂në mə yində zə ngbatshe kɔ, mə yində nə ə pa aərə nə̂ zə nɔ̂ na də äwänə, tshelə akwa zə sə tə ə̂rɔ̂nə, mata ə̂në djoko lə zə bə sə tə ə̂rɔ̂nə kɔ.

3 Mə sə̂ də âgbɔ̂ ə̂rû tə̂ lɔsu əmə, alɔ ə̂në alabə̈ alaye tô ə nâ ə pâ ə̂rɔ̂ əpʉ ə pa djatra əpʉ sə tə̂ lɔsu zə â pâ ndje ndə äwä ə̂në, əbə, bə sə kə mbrə tə̂ zə Lïndə̂ djatra əpʉ nə kɔ. 4 Mə sə də âgbɔ̂ ə̂rû ngbatshe ə rô aərə nɔ̂ ndə kə dji ə pa aneshe nə̂ əmə sə kə mbrə tə̂ əndje Lïndə̂ djatra əpʉ.

5 Aye əmə ə̂në mə yində zə ngbatshe kɔ, bə sə kə mbrə ərə ə lï də əpʉ lɔsu lə aərə nɔ̂ ə̂në bə mbrə kə alaye, ndje kə azü ə̂në əndje sə tə atshângâ kɔ. 6 Əndje pâ ndə əpʉ kə yində əndje ə̂në bə yîndə əndje kɔ gâ ətshi Laglizə. Kədə bə ko aərə ə̂në əndje ma əgo nə mbrə ana nə̂ əndje nə kɔ kə əndje, tə̂ äwä ə̂në ə fʉ lə ala Ndjapä kɔ, bə mbrə tə ə̂rɔ̂nə. 7 Mbrə ə̂në, mbrə əɨrɨ Kristə nə də̂ əndje âfɔ â nâ ana nə kɔ, â kô aərə kô bale lə kəna adulu ne kɔ. 8 Bale rəkɔ, əzə̂, a lï ndə kə pa a yi kəna əzə̂ kə marä tə̂ azü rə, kanika a də aəndje mbrə kosəra mvrɔ mbrə djatra əpʉ nə.

9 Mə tâ ə̈bə̈ ə̈ndö əpʉ gâ lə ngrowô kə Laglizə nə. Bale, Diɔtrafə ə̂në tshə yində kə sə tə əlî əzü lə takpa tə̂ azü nə nɔ̂ kɔ, tshə dji əpʉ ama ä dji bale ne. 10 Âdârə ə̂në, kədə mə na mâ je, mə sə kə pa ndəma aərə nɔ̂ ə̂në tshə sə kə mbrə nə, də aəmbrʉ aəpʉ ə̂në tshə sə kə pa nə gâ tə̂ ä kɔ. Aərə sə̂ ə̂në tshə mbrə kɔ lï lï tə̂ ye ne, ətshə də ə̂tə̂ ye, tshə ko alaye ə̂në əndje na kɔ ko gâ tə̂ ye ne, â azü ə̂në əndje ma əgo ndə kə pa əndje ko alaye nə gâ tə̂ əndje kɔ, tshə sə kə gbɔ tə̂ äwä tə̂ əndje ə sə kə grɔ əndje lə Laglizə nə.

11 Aye əmə ə̂në mə yində zə ngbatshe kɔ, zä äwä əmbrʉ ərə zä ne, bale zä äwä ə̂rɔ̂ ərə. Əzü ə̂në tshə mbrə ə̂rɔ̂ ərə, tshə sə tə əzü nə̂ Ndjapä; əzü ə̂në tshə mbrə əmbrʉ ərə, tshə wûsə̂ Ndjapä wû ne.

12 Azü nɔ̂ sə kə pa ə̂rɔ̂ əpʉ nə̂ Demetriyusə, â djatra əpʉ nə də ə̂tə̂ ye sə kə pa ə̂rɔ̂ əpʉ mbrə ətshə. Ä-ä ndje, ä sə kə pa ə̂rɔ̂ əpʉ nə̂ ye, â bə wusə̂ nə ə pa əpʉ ə̂në ä sə kə pa nə kɔ sə tə djatra əpʉ.

13 Mə sə̂ kəmə də aəpʉ ngbatshe ndə kə pa nə gâ lə ngrowô nə kə əbə, bale mə yi yində kə ta ə ta də ayɔ ngrowô gâ lə fraka nə ne. 14 Mə wusə̂ nə ə pa mə wu əbə katshä katshä səye je, â a wu tshitshi əzə̂ ə pa tshema əzə̂ je.

15 Blatshe sə̈ də əbə! Agbɔbəngâ bla əbə. Blä agbɔbəngâ kə ä, əzü bale bale də əɨrɨ ye.