1 Rəkɔ, ə̂në e də a-Kristə shê gâ ye kɔ, e prä äwä aərə tshelafɔ, tə̂ ətshe ə̂në Kristə nə sə gâ tʉ tə̂ nə tə̂ ndəkɔ Ndjapä kɔ. 2 E tëgbɔ kumu e gâ pâ aərə ə̂në ə sə mâ lafɔ kɔ, bale e tëgbɔ kumu e tëgbɔ gâ pâ aərə ə̂në ə sə pâ ashɔ kɔ ne. 3 Mbrə ə̂në e tshû gâ ye â sorô e də a-Kristə zâ tə̂ əndje wû lə Ndjapä gâ ye. 4 Alɔ ə̂në Kristə nə sə kə bʉ nga gashu, ətshə ə̂në tshə sə tə sorô e kɔ, bale e-e ndje, e sə kə ma tə̂ e gashu də aəndje lə ə̂yî.

5 Rəkɔ, e wö aərə nɔ̂ ə̂në ə sə lə e tə ənə̂ tshepashɔ kɔ gâ ye, mata kə mbrə ə̂trû, də kə mbrə ərə kene, də aəgo yïrə̈, də aəmbrʉ aəgo tə̂ lɔsu, gâ ndə əgo kə sɔtə̂ aərə, ə̂në ə sə tə ə̈bə̈ äwä kə vrɔ aamba andjapä kɔ. 6 Mbrə marä tə̂ aərə rəke də̂ əkɔ nə̂ Ndjapä ə te gâ pâ azü ə̂në əndje wəra tə̂ əndje ndə kə dji əpʉ ama Ndjapä nə kɔ. 7 Leme-e, e-e ndje, e sə̂ kə mbrə marä tə̂ aərə rə, alɔ ə̂në aərə səkɔ dâka pə tə aərə akwa e kɔ.

8 Bale kpəsəye, e wə̈ra tə̂ e tə̂ aərə səkɔ nɔ̂: əkɔ, də koshe, də əmbrʉ ərə, də kə pa əmbrʉ əpʉ də əɨrɨ əzü wala aəmbrʉ aəpʉ ə̂në ə sho lɔsu azü kɔ. 9 E pä əpʉ əterə pä lə takpa tə̂ e ne, mbrə ə̂në e djɔ̂ tə̂ e lə angbrɔ kə sə e nə̂ əzü gâ ye də äwä kə mbrə tə̂ e gâ ye, 10 â bale, e yî tafa kə sə əzü gâ tə̂ e gâ ye. Tafa kə sə e tə əzü nə sə kə do tə̂ ye alɔnɔ̂ tə tafa nə ndə kə pa ə ko Ndjapä, tə Awombrə əzü nə, kanika e wusə̂ Ndjapä nə tə ə̂rɔ̂nə. 11 Ə̂në a lə ye, əpʉ Juwufu wala əzü ə̂në tshə sə sə tə Juwufu ne kɔ sə sə je kwatə̂ye ne, wala əzü ə̂në tshə wâ gandja gâ ye wala əzü ə̂në tshə wâ gandja wâ ne kɔ sə sə je kwatə̂ye ne, əpʉ atshângâ wala azü tshelə kpɔkɔ sə sə je kwatə̂ye ne, əpʉ akanga wala aamba azü sə sə je kwatə̂ye ne. Bale, kʉtə̂ əpʉ Kristə kə sə je, ə̂në tshə sə gâ pâ ərə nɔ̂ â sə tə̂ lɔsu azü nɔ̂ kɔ.

12 Rəkɔ, mata ə̂në Ndjapä kê e gâ ye, ə̂në e dô tə̂ e tə azü nə̂ ye gâ ye â tshə yîndə e gâ ye kɔ, e zä əgo kə wu əyo azü də kə mbrə ə̂rɔ̂tə̂ gâ tə̂ e, e mbrə̈ tə̂ e tə aəngʉ azü, e wüsə̂ kə mbrə tə̂ e lə zɨtɨnə ə wüsə̂ kə kânga lɔsu e. 13 E rü tshelə e tə̂ angâ e lə takpa tə̂ e, â kədə ə̈bə̈ əzü kə sə də əpʉ də ə̈bə̈ ngâ nə, e gbä tshelə əpʉ lə kumu angâ e lə takpa tə̂ e; mata ə̂në Âgbɔ̂ Əyïngerə gbâ tshelə əpʉ lə kumu e gâ ye kɔ, e-e ndje, e mbrə̈ mata ətshə. 14 Bale, gâ pâ ə̂dû ərə nɔ̂, e yï tə̂ e, kə yi tə̂ sə tə̂ äwä kə ngbo azü gâ tə̂ nə ə̂në ə rô aərə nɔ̂ kɔ. 15 Blatshe nə̂ Kristə, ə̂në Ndjapä ê e ndə nə ndə kə pa e sə tə tshekotə̂ kʉ bale kɔ, sə̈ tə̂ lɔsu e nɔ̂! E wüsə̂ kə za mərshe kə Ndjapä. 16 Əpʉ nə̂ Kristə nə də aə̂rɔ̂ aərə tshelə nə nɔ̂ sə̈ lə e. E yïsə̂ ərə kə angâ e lə takpa tə̂ e ə mʉ̈ əpʉ kə angâ e lə takpa tə̂ e tə̂ äwä kə wusə̂ ərə nɔ̂ ə vï aamba aətshi, də aətshi kə vrɔ Ndjapä də aətshi ə̂në Âgbɔ̂ Yîrə̂ ə ko kə e kɔ də lɔsu e nɔ̂ ndə kə za mərshe kə Ndjapä nə. 17 Aəpʉ nɔ̂ ə̂në e sə kə pa nə, wala aərə nɔ̂ ə̂në e sə kə mbrə nə kɔ, e mbrə̈ də əɨrɨ Âgbɔ̂ Əyïngerə Jezu, e zä mərshe kə Abä də Ndjapä də əɨrɨ ye.

18 Ayashe, əzü bale bale mbrə̈ tə̂ ye teashe gâ tshekudu äkɔ̈ nə, ə lï də kə mbrə ərə nə̂ azü nə̂ Âgbɔ̂ Əyïngerə.

19 Akoshe, əzü bale bale yïndə əwɔ nə ə ngä ngä kə ətshə ne.

20 Aneshe, e djï əpʉ ama alabä e də alayï e lə aərə nɔ̂, mbrə ə̂në ə fʉ ə fʉ tə̂ Âgbɔ̂ Əyïngerə.

21 Alabä, e mä ərə mä ndə kə za əkɔ gâ tə̂ lɔsu aneshe nə̂ e ne, ka lɔsu əndje te te ne.

22 Akanga, e djï əpʉ ama alayïnga e pâ ashɔ səye lə aərə nɔ̂. Ə də̂ kʉ də ala əndje də̂ e mbrə kosəra kə əndje ne, ndə kə pa e za ə̂rû gâ tə̂ lɔsu azü ne, bale də lɔsu bale, e mbrə̈ kosəra nə̂ əndje mbrə ə̂në e sə kə kpe rawa Âgbɔ̂ Əyïngerə kɔ. 23 Kosəra nɔ̂ ə̂në e sə kə mbrə nə, e mbrə̈ də lɔsu e nɔ̂, a pa də e mbrə mbrə Âgbɔ̂ Əyïngerə, ə də̂ mbrə azü də̂ ne. 24 E wüsə̂ nə ə pa e sɔtə̂ aə̂rɔ̂ aərə, tshemandâ nə, lə kəna Âgbɔ̂ Əyïngerə nə je, aə̂rɔ̂ aərə ə̂në tshə gâmba mbrə azü nə̂ ye gâ ye kɔ. Âgbɔ̂ əzü nə ə̂në e sə kə mbrə kosəra nə kə ətshə kɔ kə də̂ Kristə nə. 25 Mbrə ə̂në əzü ə̂në tshə mbrə əmbrʉ ərə, tshə sɔtə̂ əmbrʉ ərə tshemandâ nə ə lï də əmbrʉ ərə ə̂në tshə mbrə̂ gâ ye kɔ je, mbrə ə̂në Ndjapä wu tshelə azü wu ə wu ne.