1 Əmə, Palɔ, ə̂në mə sə tə əyïkânga nə̂ Jezu Kristə, gâ ndə aye əmə də Timɔte kə wla ngrowô səye kə Filəmɔ, gbɔbəngâ kosəra nə̂ ä ə̂në ä yində ye tə bandanə kɔ. 2 Ä wla ndje ngrowô səye kə kobɔ ä də Apia, də Arshipə, gbɔbəngâ kowɔ nə̂ ä gâ ndə azü Laglizə ə̂në əndje sə kə ngbo tə əndje gâ lə anda nə̂ zə kɔ. 3 Abä əzə̂ də Ndjapä gâ ndə Âgbɔ̂ Əyïngerə Jezu Kristə mbrə̈ ə̂rɔ̂tə̂ əndje kə e ə zä blatshe kə e!

4 Filəmɔ, mə sə kə pa ndə zə alɔnɔ̂ lə əpʉ kə yu Ndjapä nə̂ əmə â sə kə za mərshe kə Ndjapä nə̂ əmə mbrə əbə, 5 mbrə ə̂në mə dji ndə əpʉ kə yində azü nə̂ Ndjapä ə̂në bə yində əndje kɔ gâ ndə əpʉ lɔsu zə ə̂në bə za kə Âgbɔ̂ Əyïngerə Jezu kɔ gâ ye, ə̂në bə sə kə yisə̂ nə gashu kɔ. 6 Mə yu Ndjapä ndə kə pa əpʉ lɔsu ə̂në ə ngbo əzə̂ də aəmə gâ tə̂ nə kɔ, ə mbrə ndə kə pa azü wusə̂ aə̂rɔ̂ aərə ə̂në a sə kə mbrə nə mbrə Kristə kɔ. 7 Rəkɔ, lɔsu əmə sə̂ də âgbɔ̂ ə̂rû ə gbɔ̂gbɔ tə̂ ye mbrə kə yində azü ə̂në bə yində əndje kɔ, mbrə ə̂në, tə̂ äwä zə, aye əmə, lɔsu azü nə̂ Ndjapä zɨ̂tɨ gâ ye.

8 Ə̂në Kristə zâ äwä kə əmə gâ ye ndə kə pa mə za ama kə əbə ndə kə mbrə ərə kɔ, 9 mə yi ənə̂ əmə ndə kə yu əbə tə̂ ə̈bə̈ ərə, mbrə kə yi tə̂ əzə̂; ə̂në mə sə ye, əmə Palɔ, tə yawaza, â gâ pâ nə ndje, tə əyïkânga mbrə Jezu Kristə kpəsəye kɔ. 10 Mə tegbɔ ə̈nü zə mbrə əgblə nə̂ əmə, Ɔnezimə, ə̂në, lə anda kânga, mə sə tə abä nə kɔ. 11 Leme-e, tshə sə̂ sə̂ tə ə̈bə̈ ə̂rɔ̂ əzü mbrə əbə ne, bale kpəsəye, tshə sə tə ə̂rɔ̂ əzü* mbrə əzə̂ də aəmə. 12 Mə wla əndʉ ye kə əbə, ətshə ə̂në tshə sə mata ə̈bə̈ ərə tshekotə̂ əmə də ə̂tə̂ əmə kɔ. 13 Mə sə̂ kəmə də əgo ndə kə bata ətshə gâ ngotə̂ əmə, ndə kə pa tshə mbrə kosəra tə̂ ə̂sə̂ zə kə əmə, ə̂në mə daka pə lə anda kânga mbrə Ə̂rɔ̂ Əpʉ kɔ. 14 Bale, mə yî yîndə ndə kə mbrə ə̈bə̈ ərə bale ne, ə̂në mə te te pa ə dji əpʉ tshelə zə ne kɔ, ndə kə pa ə də̂ də awlra də̂ bə mbrə ə̂rɔ̂ ərə kə əmə ne, bale bə mbrə ndə tshelə zə. 15 Tshelə takpa tə̂ e də Ɔnezimə nə sɔ̂ əte kʉ mbrə ə̈bə̈ alɔ, ndə kə pa bə sɔtə̂ ye kwatə̂zə, e də ətshə daka pə piii, 16 ə də̂ kwatə̂ye tə kanga də̂ ne, bale tshə rô kanga gâ ye, tshə sə tə aye ə̂në a yində ye tə bandanə. Tshə sə rə mbrə əmə rô pâ nə, tshə sə sə ndje rə mbrə əbə ə rô əmə ne atâ, ə̂në tshə sə tə aye lə əzü â sə ndje tə aye lə Âgbɔ̂ Əyïngerə kɔ! 17 Kədə bə wu əmə tə gbɔbəngâ kosəra nə̂ zə, zä ətshə gâ tə̂ zə tə ə̂rɔ̂nə a pa də əmə kə sə̂. 18 Kədə tshə mbrə̂ ə̈bə̈ əmbrʉ ərə kə əbə wala kədə ködä nə̂ zə sə lə kumu ye, zä gâ lə kumu əmə. 19 Əmə Palɔ, mə sə kə ta əpʉ səke də kəna əmə, əmə də ə̂tə̂ əmə, mə piyi nə kə əbə je. Bale, mə yi yində kə pa kə əbə ə pa əbə ndje, bə sə də ködä nə̂ əmə lə kumu zə, ködä nə kə də̂ əbə də ə̂tə̂ zə. 20 Ayî, aye əmə, mbrə̈ ərə səke kə əmə, mbrə Âgbɔ̂ Əyïngerə, zɨ̈tɨ lɔsu əmə lə əpʉ Kristə nə. 21 Ə̂në mə za lɔsu əmə gâ pâ zə ə wusə̂ nə ə pa bə sə kə dji əpʉ ama əmə kɔ də̂ mə ta ngrowô səye kə əbə kɔ, â mə wusə̂ nə ə pa bə sə kə mbrə ərə ə ro ənə̂ sə̂ ə̂në mə pa ndə nə kə əbə kɔ. 22 Kʉ pə kôto ndje, gämba ə̈bə̈ ə̂sə̂ əlo mbrə əmə, mbrə ə̂në mə za lɔsu əmə gâ pâ əpʉ kə yu Ndjapä ə̂në e yu ətshə kɔ ə pa əndje sə kə katə̂ əmə ndə kə pa mə gu gâ lə takpa tə̂ e.

23 Epafrasə, gbɔbəngâ əmə də̂ əyïkânga mbrə Jezu Kristə, bla əbə, 24 ndje gâ ndə Markə, də Arisətarkə, də Demasə gâ ndə Luki, tə agbɔbəngâ kosəra nə̂ əmə. 25 Ə̂rɔ̂tə̂ Âgbɔ̂ Əyïngerə Jezu Kristə nə sə̈ də e!