1 Rəkɔ, alaye əmə ə̂në mə yində e ngbatshe, ə sə də əgo e tə bandanə kɔ, e-e ə̂në tshelə əmə sə də ə̂rû mbrə e â mə sə kə da əkro əmə tə̂ e kɔ, agbɔbəngâ əmə, e kä kpirə̂ gâ pâ Âgbɔ̂ Əyïngerə.

2 Mə sə kə mʉ əpʉ kə Evɔdi gâ ndə Satishə ndə kə pa əndje dji tə̂ əndje lə Âgbɔ̂ Əyïngerə nə. 3 Ayî, əbə ndje, djatra gbɔbəngâ kosəra nə̂ əmə, yï kəna zə kə əndje, əndje ə̂në ä də aəndje mbrə̂ awlra mbrə Ə̂rɔ̂ Əpʉ gâ ye kɔ, də Klema gâ ndə ə̂dû agbɔbəngâ kosəra nə ə̂në əɨrɨ əndje sə lə fraka sorô kɔ.

4 Tshelə e sə̈ də ə̂rû alɔnɔ̂ lə Âgbɔ̂ Əyïngerə nə! Mə pa kwatə̂mə kə e, tshelə e sə̈ də ə̂rû!

5 Azü nɔ̂ wüsə̂ ə̂rɔ̂ kə mbrə tə̂ e! Âgbɔ̂ Əyïngerə nə sə trö ndə kə gu nə. 6 E lï lï tshelə e gâ tə̂ ə̈bə̈ ərə bale ne, bale lə aərə nɔ̂, e yïsə̂ aərə ə̂në e ma əgo nə kɔ kə Ndjapä tə̂ äwä kə yu ətshə ə kɨ̈ ə̂sə̂ əyo tə̂ e kə ətshə də kə za mərshe kə ətshə. 7 Â blatshe nə̂ Ndjapä nə ə̂në ə rô aərə nɔ̂ ə̂në əzü ə tegbɔ kumu ye gâ pâ nə kɔ, sə kə bata lɔsu e də kə wusə̂ ərə nə̂ e lə Jezu Kristə nə.

8 Ə̂dû əpʉ nə, alaye əmə, aəpʉ kə tegbɔ kumu e sə̈ gâ pâ aərə nɔ̂ ə̂në ə sə tə djatra aərə kɔ, gâ pâ aərə nɔ̂ ə̂në ə lï kɔ, gâ pâ aərə nɔ̂ ə̂në ə sə də äwänə kɔ, gâ pâ aərə nɔ̂ ə̂në ə sə mvo kɔ, gâ pâ aərə nɔ̂ ə̂në əzü yində nə də lɔsu ye kɔ, gâ pâ aərə nɔ̂ ə̂në ə lï ndə kə pa əzü yində əpʉ nə kɔ, gâ pâ ərə ə̂në ə sə tə ə̂rɔ̂ nə kɔ, ə̂në ə lï ndə kə pa əzü ta ə tra kɔ. 9 Ərə ə̂në mə yîsə̂ nə kə e gâ ye kɔ, ə̂në e sɔ̂tə̂ nə ndə əmə kɔ, əpʉ ə̂në e djî lə ama əmə də ərə ə̂në e wû əmə də kə mbrə nə gâ ye kɔ, e mbrə̈ ərə Lïndə̂ nə. Â Ndjapä nə ə̂në tshə za blatshe kɔ sə kə sə də e.

10 Tshelə əmə mɔ̂ tə bandanə lə Âgbɔ̂ Əyïngerə ə̂në mə wû dââ ə pa e yîsə̂ nə kwatə̂-e gashu ə pa lɔsu e sə gâ pâ əmə kɔ. Lɔsu e nə sə̂ ngâ gâ pâ əmə gâ ye, bale äwä kə yisə̂ nə gashu kə sə sə je ne kɔ. 11 Mə pa pa rə mbrə ə̂në mə ma əgo ə̈bə̈ ərə kɔ ne; mbrə ə̂në əmə, mə wûsə̂ kə sə də amɔ tshelə əmə lə kə sə əmə ə̂në mə sə ye. 12 Mə wûsə̂ äwä kə sə lə əyo də äwä kə sə də aərə ngbatshe gâ ye. Lə aərə nɔ̂, tə̂ ətshe nɔ̂, mə wusə̂ äwä ndə kə pa tshelə əmə su də äwä ndə kə pa əgo mi əmə, ndə kə sə də aərə ngbatshe də kə sə sə də ərə bale ne. 13 Mə lï də ərə nɔ̂ lə ətshə nə ə̂në tshə gbɔgbɔ əmə kɔ. 14 Bale, e mbrə̂ tə ə̂rɔ̂nə ndə kə pa e te gâ ndə əmə lə əyo nə̂ əmə nə.

15 E-e, azü gala Flipə, e wusə̂ nə ə pa, alɔ ə̂në mə vɔ̂tə̂ kə mʉ Ə̂rɔ̂ Əpʉ lə takpa tə̂ e kɔ, ə̂në mə âfɔ lə əgɔ Masedwanə kɔ, ə̈bə̈ Laglizə bale tê tê gâ ndə əmə ə yî kəna ye kə əmə ne; kʉtə̂ e tshî kə mbrə̂ rə kɔ. 16 Mbrə ə̂në, mâ Tesalɔnikə, äwä bishi nɔ̂, e wlâ ərə ə̂në mə mâ əgo nə kɔ kə əmə gâ ye. 17 Ə də̂ əpʉ kə pa mə sə kə pra äwä aâkrâ də̂ kə sə̂ ne; ərə ə̂në mə pra äwä nə kɔ kə də̂ kə pa aərə ə̂në e mbrə kɔ ə ngba ə ngba də əɨrɨ e. 18 Mə sə də aərə nɔ̂ ə̂në mə lï ndə kə sə də nə kɔ â mə sə də aərə ngbatshe. Mə sɔ̂tə̂ ərə ə̂në e wlâ lə kəna Epafrɔditə kɔ gâ ye â mə sə də aərə rô pâ nə gâ ye; aâkrâ nə̂ e nə sə mata yombo ə̂në ə fu tə ə̂rɔ̂nə, mata əkrɔ ə̂në e tô kə Ndjapä, ə̂në tshə yîndə nə gâ ye â ə fʉ ə fʉ lə ala ye kɔ. 19 Bale, Ndjapä nə̂ əmə ə ko aərə nɔ̂ ə̂në e ma əgo nə kɔ kə e je Lïndə̂ arishi nə̂ ye nə ə̂në ə rô pâ nə gâ ye kɔ, tə̂ äwä Jezu Kristə nə. 20 A mbë Abä əzə̂ də Ndjapä nə də ə̂ngû də ə̂ngû piii! Asərəmə!

21 E blä azü nə̂ Ndjapä nɔ̂ lə Jezu Kristə kə ä. Alaye ə̂në əndje sə ngotə̂ əmə kɔ, əndje bla e. 22 Azü nə̂ Ndjapä nɔ̂ bla e, dîrî dîrî azü ə̂në əndje mbrə kosəra lə bəngʉ nə̂ âgbɔ̂ əyïngerə əgɔ kɔ.

23 Ə̂rɔ̂tə̂ Âgbɔ̂ Əyïngerə Jezu Kristə nə sə̈ də e!