1 Əmə, Palɔ, əzü-awla, kə ta ngrowô səye kə e kɔ. Ə də̂ azü də̂ kə mbrə əmə tə əzü-awla nə kɔ ne, wala ə də̂ tə̂ äwä ə̈bə̈ əzü bale də̂ ne, bale, tə̂ äwä Jezu Kristə də̂ Abä də Ndjapä, ə̂në tshə shê ətshə lə takpa tə̂ akuzu kɔ, mbrə̂ əmə tə əzü-awla nə kɔ. 2 Əmə gâ ndə alaye nɔ̂ ə̂në əndje sə gâ ngotə̂ əmə kɔ, ä ta fraka səye kə azü Laglizə əgɔ Galasi.

3 Abä əzə̂ də Ndjapä gâ ndə Âgbɔ̂ Əyïngerə Jezu Kristə mbrə̈ ə̂rɔ̂tə̂ əndje kə e ə zä blatshe kə e! 4 Jezu Kristə nə kâ ə̂tə̂ ye də ə̂tə̂ ye mbrə anyaka nə̂ əzə̂, ndə kə pa tshə djɔ əzə̂ lə əmbrʉ tshepashɔ səye, tə̂ äwä ə̂në tshelə Abä əzə̂ də Ndjapä nə yində nə kɔ. 5 A mbë Ndjapä nə də ə̂ngû də ə̂ngû piii! Asərəmə!

6 Kumu əmə kpe pâ əndu əmə mbrə ə̂në e tshi äwä Ndjapä ə̂në tshə ê e tə̂ äwä ə̂rɔ̂tə̂ Kristə kɔ tʉ kʉ diawû rə, ndə kə pa e ro gâ tə̂ ə̈bə̈ Ə̂rɔ̂ Əpʉ kpî kɔ! 7 Tə djatra əpʉ, ə̈bə̈ ata Ə̂rɔ̂ Əpʉ kpî sə sə je ne, bale, alabə̈ azü sə je ə̂në əndje sə kə djingli tshelə akrɔ e â yində kə do tshelə Ə̂rɔ̂ Əpʉ nə̂ Kristə nə ə do. 8 Bale, kədə ä-ä də ə̂tə̂ ä, wala kədə ə̈bə̈ trawaya nə̂ Ndjapä mâ lafɔ kə mʉ ə̈bə̈ ata Ə̂rɔ̂ Əpʉ kpî tə̂ ənə̂ sə̂ ə̂në ä mʉ̂ əpʉ nə kə e gâ ye kɔ, Ndjapä drä ətshə gâ ye! 9 Ä pâ ndə əpʉ nə kə e ətshinə gâ ye, â mə sə kə kwatə̂mə ə pa ndə nə kpəsəye kə e: kədə ə̈bə̈ əzü kə mʉ ə̈bə̈ ata Ə̂rɔ̂ Əpʉ kpî kə e tə̂ ənə̂ sə̂ ə̂në e djî gâ ye kɔ, Ndjapä drä ətshə gâ ye!

10 Bale, kpəsəye mə sə kə pra äwä ndə kə pa mə mbrə ərə ə̂në tshelə azü yində nə kɔ, wala ərə ə̂në tshelə Ndjapä yində nə kɔ a? Mə sə kə pra äwä ndə kə pa mə mbrə ərə ə fʉ lə ala azü a? Kədə mə yində kə pa mə daka pə kə mbrə ərə ə fʉ lə ala azü kəmə, mə sə sə kə sə kəmə tə əyïkosəra nə̂ Kristə ne.

11 Alaye əmə, mə pa kə e ə pa Ə̂rɔ̂ Əpʉ nə ə̂në mə mʉ̂ kə e gâ ye kɔ, ə sə sə kʉ tə ənə̂ əzü ne, 12 mbrə ə̂në əmə də ə̂tə̂ əmə, mə sɔ̂tə̂ nə sɔ̂ tə̂ äwä ə̈bə̈ əzü ne, wala ə də̂ ə̈bə̈ əzü də̂ kə yîsə̂ nə kə əmə kɔ ne, bale Jezu Kristə də ə̂tə̂ ye kə yîsə̂ nə gashu kə əmə kɔ.

13 Mbrə ə̂në e djî ndə əpʉ äwä kə mbrə tə̂ əmə leme-e ə̂në mə sə̂ pə kə vrɔ Ndjapä mata ənə̂ Ajuwufu kɔ gâ ye: mə sə̂ kə gi əyo tə̂ azü Laglizə nə̂ Ndjapä rô pâ nə â sə̂ kə pra äwä ndə kə liwu əndje. 14 Lə əpʉ kə vrɔ Ndjapä nə̂ Ajuwufu nə, mə rô angâ əmə də Ajuwufu nə ə̂në ə̂ngû ä də aəndje sə bale kɔ tə bandanə, mbrə ə̂në əgo kə bata mandʉ ərə nə̂ alätä sə̂ tə̂ lɔsu əmə rô pâ nə â mə sə̂ kə ma manda nə.

15 Bale, alɔ ə̂në Ndjapä nə, ə̂në tshə kê əmə pə lə əyï əmə â ê əmə lə ə̂rɔ̂tə̂ ye gâ ye kɔ, 16 tshə wû tə ə̂rɔ̂nə lə ala ye ndə kə pa tshə yisə̂ Ɨrɨ nə gashu kə əmə, ndə kə pa mə mʉ əpʉ ye lə takpa tə̂ azü ə̂në əndje sə̂ sə̂ tə Ajuwufu ne kɔ. Â trale mandânə, mə yû ə̈bə̈ əzü yû də ə̈bə̈ əpʉ bale ne, 17 â mə nâ nâ mâ Jeruzalamə gâ tə̂ əndje ə̂në əndje sə tə azü-awla angbʉlînə tə̂ əmə kɔ ne, bale, mə nâ mâ lə ashɔ əgɔ Arabi. Mandânə, mə gû kwatə̂mə mâ lə gala Damasə. 18 Ə̂ngû vəta mandânə, mə nâ mâ Jeruzalamə ndə kə pa mə wu Piarə* ə yerɔ ətshə kpro, â mbrə̂ əlo grʉvəta mâ ndə ye je. 19 Bale, mə wû ə̈bə̈ əzü-awla kpî wû ne, kʉtə̂ Zake, aye Âgbɔ̂ Əyïngerə də̂ mə wû ətshə.

20 Əpʉ sə̂ ə̂në mə ta kə e lə fraka səye kɔ, mə pa lə ala Ndjapä â pa kɔ, ə də̂ əterə də̂ mə pa kɔ ne.

21 Mandânə, mə nâ mâ lə ashɔ aəgɔ Siri də Silisi. 22 Kandää, azü Laglizə nə̂ Kristə, ə̂në əndje sə̂ lə ashɔ əgɔ Jude kɔ, əndje wû ala əmə wû alɔ bale ne. 23 Əndje djî kʉtə̂ ndə nə ə pâ: «Ətshə ə̂në, leme-e, tshə gî əyo tə̂ əzə̂ kɔ, kpəsəye tshə sə kə mʉ əpʉ lɔsu ə̂në tshə yîndə kə liwu əpʉ nə leme-e kɔ.» 24 Â əndje mbê Ndjapä mbrə əmə.