1 Ha! E-e azü əgɔ Galasi, aəndɨ! Əde kə frɔ̂ e kɔ? E-e ə̂në əndje yîsə̂ əpʉ Jezu Kristə ə̂në tshə tshû la masheyɔ kə e gâ ye kɔ? 2 Əpʉ ə̂në mə yində kə dji nə tshî lə ama e kɔ kə səye: tə̂ äwä kə mbrə aərə Lïndə̂ âgbɔ̂ əpʉ nə̂ Mayïzə də̂ e sɔ̂tə̂ Âgbɔ̂ Yîrə̂ nə̂ Ndjapä nə kɔ wala mbrə ə̂në e djî Ə̂rɔ̂ Əpʉ â yində nə də lɔsu e kɔ a? 3 E ndɨ atâ â ndɨ rə kɔ? Ərə ə̂në e vɔ̂tə̂ nə tə̂ äwä Âgbɔ̂ Yîrə̂ nə̂ Ndjapä nə kɔ, e yində nə ə pa ə nglɔ tə̂ äwä awlra nə̂ e də ə̂tə̂ e a? 4 Aərə sə̂ nɔ̂ ə̂në e wûsə̂ nə gâ ye kɔ, ə sə kʉ rə ambanə a? Ə lï lï ndə kə pa ə sə kʉ ambanə ne. 5 Ndjapä ə̂në tshə zâ Âgbɔ̂ Yîrə̂ nə kə e â sə kə mbrə aərə ə̈lü lə takpa tə̂ e kɔ, tshə mbrə rə mbrə ə̂në e sə kə mbrə aərə ə lï də âgbɔ̂ əpʉ wala mbrə ə̂në e djî Ə̂rɔ̂ Əpʉ â yîndə nə də lɔsu e gâ ye kɔ a?

6 Rə də̂ Əpʉ Ndjapä pâ əpʉ gâ pâ Abraamo ə pâ: «Abraamo zâ lɔsu ye kə Ndjapä â mbrə nə Ndjapä nə wû ətshə tə ə̂rɔ̂ əzü lə ala ye.»* 7 Rəkɔ, e lï ndə kə wusə̂ nə ə pa: azü ə̂në əndje sə tə asorô tə̂ äwä lɔsu kɔ, əndje kə sə tə djatra aləvu Abraamo nə. 8 Fraka nə̂ Ndjapä pâ ətshinə kerə gâ ye ə pa Ndjapä ə mbrə amarä ə̂në əndje sə sə tə Ajuwufu ne kɔ tə aə̂rɔ̂ azü lə ala ye je tə̂ äwä əpʉ lɔsu əndje. Âdârə ə̂në Ndjapä nə pâ ə̂rɔ̂ əpʉ səye ətshinə kə Abraamo nə gâ ye ə pâ: «Mə to ngwarə gâ pâ amarä nɔ̂ mbrə əbə je.»* 9 Â azü nɔ̂ ə̂në əndje za lɔsu əndje kə Ndjapä nə kɔ, tshə sə kə to ngwarə gâ pâ əndje də a-Abraamo nə, ə̂në tshə zâ lɔsu ye kə Ndjapä nə kɔ.

10 Bale, azü nɔ̂ ə̂në əndje sə kə mbrə aərə Lïndə̂ âgbɔ̂ əpʉ nə̂ Mayïzə kɔ, Ndjapä nə drâ əndje gâ ye, mbrə ə̂në Əpʉ Ndjapä pâ: «Ndjapä drä əzü ə̂në tshə mbrə aərə mbrə alɔnɔ̂ ə lï də aəpʉ nɔ̂ ə̂në əndje tâ gâ lə âgbɔ̂ əpʉ kɔ ne.»* 11 Ə̈bə̈ əzü bale lï lï ndə kə do tə̂ ye tə ə̂rɔ̂ əzü lə ala Ndjapä tə̂ äwä âgbɔ̂ əpʉ ne, əpʉ nə sə orâ gâ ye, mbrə ə̂në Əpʉ Ndjapä pâ: «Ə̂rɔ̂ əzü sə kə sə də sorô tə̂ äwä lɔsu.»* 12 Kandää, âgbɔ̂ əpʉ nə ka ka gâ pâ əpʉ lɔsu əzü nə ne; bale Fraka nə̂ Ndjapä nə pâ: «Əzü ə̂në tshə mbrə ərə Lïndə̂ aəpʉ ə̂në ə sə lə âgbɔ̂ əpʉ kɔ sə kə sə də sorô tə̂ äwä nə.»*

13 Âgbɔ̂ əpʉ nə nâ də əpʉ kə dra ətshe gâ pâ əzə̂ ə̂në a mbrə aərə nɔ̂ mbrə Lïndə̂ nə ne kɔ. Kristə nə pîyi ndogɔ nə ndə kə pa tshə djɔ əzə̂ lə kə dra ətshe nə gâ ye. Mbrə ə̂në tshə dô tə̂ ye tə ərə kə dra nə gâ ə̂sə̂ əzə̂ gâ ye kɔ, mbrə ə̂në Əpʉ Ndjapä pâ: «Ndjapä drä əzü nɔ̂ ə̂në əndje kû ətshə gâ lafɔ pâ ayɔ gâ ye kɔ.»* 14 Ə sə rə də̂ əpʉ kə to ngwarə ə̂në Ndjapä zâ ama də nə kə Abraamo nə kɔ, sə ndje mbrə amarä ə̂në əndje sə sə tə Ajuwufu ne kɔ tə̂ äwä Jezu Kristə nə, â əzə̂ nɔ̂ sɔtə̂ Âgbɔ̂ Yîrə̂ ə̂në Ndjapä zâ ama də əpʉ nə gâ ye kɔ tə̂ äwä lɔsu əzə̂.

15 Alaye əmə, mə yində kə pa mə yisə̂ ə̈bə̈ əpʉ gâ tə̂ ə̈bə̈ ərə ə̂në azü sə kə mbrə kɔ: kədə ə̈bə̈ əzü kə ta aəpʉ tshelə ye gâ lə fraka Lïndə̂ äwä kə mbrə nə gâ ye, ə̈bə̈ əzü bale lï lï ndə kə pa tshə wəra tə̂ ye tə̂ nə, wala tshə za ə̈bə̈ ata əpʉ gâ pâ nə ne. 16 Ə sə ndje äwä bale rə tə̂ aəpʉ ə̂në Ndjapä zâ ama də nə kə Abraamo, ndje kə angwa ye kɔ. Əpʉ Ndjapä nə pa pa ndə aangwa ye a pa də azü nə sə ngbatshe ne, bale ə pa: «ndje kə angwa zə», ə pa ndə kʉtə̂ əzü bale, ə̂në ətshə kə də̂ Kristə nə kɔ. 17 Əpʉ ə̂në mə yində kə pa nə kɔ kə səye: Ndjapä mbrə̂ ə̈bə̈ mbʉkʉ də äwänə gâ ye ə zâ ama də əpʉ nə gâ ye, â âgbɔ̂ əpʉ nə̂ Mayïzə nə, ə̂në ə wûtu ə̂ngû ngbangbo vəna də zazü bale də morofo (430) gâ mandânə kɔ, lï lï ndə kə pa ə gba tshelə əpʉ mbʉkʉ sə̂ ka ə liwu əpʉ nə ə̂në Ndjapä nə zâ ama də nə kɔ ne. 18 Mbrə ə̂në kədə aərə ə̂në Ndjapä nə ə ko kə azü kɔ kə sə tə̂ äwä âgbɔ̂ əpʉ nə, bale ə sə sə kə sə tə̂ äwä əpʉ ama ə̂në Ndjapä nə zâ kɔ ne. Kandää, tə̂ äwä əpʉ nə ə̂në Ndjapä nə zâ ama də nə kɔ də̂ tshə mbrə̂ ə̂rɔ̂tə̂ ye kə Abraamo nə kɔ.

19 Rəkɔ, âdâ âgbɔ̂ əpʉ nə̂ Mayïzə nə kə də̂ yea? Âgbɔ̂ əpʉ sə ndje tə ə̈bə̈ ərə gâ pâ nə ndə kə pa ə yisə̂ aərə ə̂në ə sə kpî tə̂ ərə ə̂në tshelə Ndjapä yində nə kɔ kə azü, ʉrrr ndjɔ gâ tə̂ alɔ kə zu angwa Abraamo nə səkɔ, ə̂në Ndjapä nə zâ ama də əpʉ nə mbrə ətshə kɔ. Atrawaya nə̂ Ndjapä, tə̂ äwä ə̈bə̈ əzü, kə sə̂ â wutu də âgbɔ̂ əpʉ nə gashu kɔ. 20 Kandää, əzü səkɔ ə̂në atrawaya nə̂ Ndjapä nə mbrə̂ ərə nə tə̂ äwä ye kɔ sə sə kʉ mbrə əzü bale ne, bale Ndjapä nə sə kʉ bale.

21 Rəkɔ, âgbɔ̂ əpʉ nə sə kpî tə̂ aəpʉ ə̂në Ndjapä nə zâ ama də nə kɔ a? Bale ne! Kədə Ndjapä kə za ə̈bə̈ âgbɔ̂ əpʉ ə̂në ə lï ndə kə pa əzü sə də sorô tə̂ äwä nə kɔ, də̂ ne, əzü lî kəmə ndə kə pa tshə sə tə ə̂rɔ̂ əzü lə ala Ndjapä nə tə̂ äwä âgbɔ̂ əpʉ nə. 22 Bale, Fraka nə̂ Ndjapä nə pâ əpʉ ə pa azü tshepashɔ nɔ̂ sə gâ tshekudu awlra nyaka, ndə kə pa Ndjapä nə za ərə ə̂në tshə zâ ama də əpʉ nə gâ ye kɔ kə azü ə̂në əndje zâ lɔsu əndje kə ətshə tə̂ äwä Jezu Kristə nə gâ ye kɔ.

23 Əlînə ndə kə pa əpʉ lɔsu nə wutu, âgbɔ̂ əpʉ nə bâta əzə̂ gâ tshekudu ye tə alayïkânga, ndə kə ka mbrə alɔ ə̂në Ndjapä nə sə kə yisə̂ əpʉ lɔsu nə gashu tə̂ nə kɔ. 24 Rəkɔ, âgbɔ̂ əpʉ nə sə̂ tə ərə kə lishi pa əzə̂ ʉrrr ndjɔ gâ tə̂ alɔ kə na Kristə nə, ndə kə pa əzə̂ sə tə aə̂rɔ̂ azü lə ala Ndjapä nə tə̂ äwä lɔsu əzə̂. 25 Bale, kpəsəye ə̂në əpʉ lɔsu nə wûtu gâ ye kɔ, a sə sə kwatə̂zə tshekudu ərə kə lishi pa əzə̂ səkɔ ne.

26 Mbrə ə̂në e sə nɔ̂ tə aləvu Ndjapä tə̂ äwä əpʉ lɔsu e lə Jezu Kristə nə. 27 Djatra əpʉ, e-e nɔ̂ ə̂në e zâ batamo də əɨrɨ Kristə nə gâ ye kɔ, e yî Kristə nə gâ tə̂ e gâ ye. 28 Rəkɔ, əpʉ Juwufu wala əpʉ ə̈bə̈ əzü lə marä kpî sə sə je kwatə̂ye ne, əpʉ kanga wala əpʉ amba əzü sə sə je kwatə̂ye ne, əpʉ koshe wala əpʉ yashe sə sə je kwatə̂ye ne, mbrə ə̂në e-e nɔ̂, e sə kʉ bale lə Jezu Kristə nə. 29 Â kədə e sə tə azü nə̂ Kristə nə, bale e sə tə aləvu Abraamo nə â e sɔtə̂ ərə nə ə̂në Ndjapä nə zâ ama də əpʉ nə gâ ye kɔ je.