1 Kristə nə djɔ̂ əzə̂ lə kanga gâ ye ndə kə pa a sə yera ambanə. Rəkɔ, e kä gbʉ gbʉ gbʉ, e kwätə̂-e kwä ə yï əgʉ e gâ lə ə̂wû kanga nə ne.

2 Əmə Palɔ, mə pa kə e ə pa kədə e wa tə̂ e də gandja, Kristə nə sə sə kə sə tə ə̈bə̈ ərə bale mbrə e ne. 3 Bale, mə pa kwatə̂mə kə əzü nɔ̂ ə̂në tshə yində nə ndə kə pa əndje wa ətshə də gandja kɔ ə pa: tshə lï ndə kə pa tshə mbrə tə̂ ye ə lï də aəpʉ lə âgbɔ̂ əpʉ nə nɔ̂. 4 E-e ə̂në e sə kə pra äwä ndə kə pa e sə tə aə̂rɔ̂ azü lə ala Ndjapä tə̂ äwä âgbɔ̂ əpʉ nə̂ Mayïzə nə kɔ, tshelə takpa tə̂ e də a-Kristə nə sɔ̂ gâ ye; äwä ə̂rɔ̂tə̂ Ndjapä nə yû tə̂ e gâ ye. 5 Ənə̂ ä, ä za lɔsu ä gâ pâ Ndjapä ndə kə pa tshə mbrə ä tə aə̂rɔ̂ azü lə ala ye mbrə lɔsu ä. Tə̂ äwä Âgbɔ̂ Yîrə̂, ä sə kə ka mbrə ətshə də lɔsu ä ndə kə pa ərə nə wutu. 6 Mbrə ə̂në, lə Jezu Kristə nə, ərə ə̂në ə sə tə âgbɔ̂ ərə lə ala Ndjapä nə kɔ kə də̂ kə sə də lɔsu ə̂në ə sə kə mbrə kosəra tə̂ äwä kə yi tə̂ kɔ, ə də̂ əpʉ kə wa gandja wala kə wa gandja wa ne kə sə tə âgbɔ̂ ərə nə ne.

7 E sə kə kpe ärɔ̈ ətshinə tə ə̂rɔ̂nə. Əde kə pa e ka â kânga äwä tə̂ e ndə kə pa e mbrə tə̂ e mbrə ə lï də djatra əpʉ nə ne kɔ? 8 Əpʉ kə kânga äwä tə̂ e nə səkɔ ə to to mâ ndə Ndjapä nə ə̂në tshə ê e kɔ ne. 9 Azü pa: «Əyï mapa kʉ teashe kə sə̂ â omɔ mbəde ndjuwu mapa nə nɔ̂ kɔ.» 10 Ənə̂ əmə, mə za lɔsu əmə nɔ̂ gâ pâ e, lə Âgbɔ̂ Əyïngerə: mə wusə̂ nə ngâ ə pa e sə sə kə li tshelə e tə̂ ə̈bə̈ ərə kpî ne. Bale, əzü nə ə̂në tshə djingli tshelə akrɔ e kɔ, tshə â sə kəmə tə əde, Ndjapä ə wa ngbanga gâ lə kumu ye je.

11 Ənə̂ əmə, alaye əmə, kədə mə daka pə kə mʉ kəmə əpʉ kə wa gandja, mbrə yekɔ də̂ azü ə daka pə tə̂ kə gi əyo kəmə tə̂ əmə? Kədə mə daka pə kə mʉ əpʉ gandja nə, əpʉ masheyɔ nə̂ Kristə nə sə sə kwatə̂ye tə ə̈bə̈ ərə ndə kə pa əzü te tə̂ nə bale ne. 12 Əndje nə ə̂në əndje djingli tshelə akrɔ e nə kɔ, əndje na ʉrrr ndjɔ ə wa aərə tshekotə̂ əndje nə nɔ̂ gâ ye kane!

13 Alaye əmə, Ndjapä ê e ndə kə pa e sə yera; kʉtə̂ ərə bale, əpʉ kə sə e yera nə dö tə̂ ye dö tə ə̈bə̈ ərə kə za äwä kə e ndə kə pa e mbrə ərə ə̂në tshelə e yində nə kɔ ne. Bale, tə̂ äwä kə yi tə̂ e, e mbrə̈ tə̂ e tə alayïkosəra nə̂ angâ e lə takpa tə̂ e. 14 Mbrə ə̂në ndəma âgbɔ̂ əpʉ nɔ̂ nə̂ Mayïzə ngbo gâ tə̂ nə lə əpʉ bale səye: «Yïndə ngâ zə mata ə də̂ əbə də ə̂tə̂ zə.»* 15 Bale, kədə e sə kə lo tə̂ e, ə sə kə zɨ tə̂ e lə takpa tə̂ e, ala e gbɔ̈ ndə kə pa e wo tə̂ e wo nɔ̂ lə takpa tə̂ e ne. 16 Mə pa ənə̂ əmə kə e ə pa: e kätə̂ Âgbɔ̂ Yîrə̂ tshə yisə̂ äwä kə e, kanika e mbrə ərə ə̂në tshelə əzü yində̂ nə kɔ mbrə ne. 17 Mbrə ə̂në əndu əzü sə də əgo aərə ə̂në ə sə kpî tə̂ aənə̂ Âgbɔ̂ Yîrə̂ nə, â Âgbɔ̂ Yîrə̂ nə sə də əgo aərə ə̂në ə sə kpî tə̂ aənə̂ əndu əzü nə kɔ. Aərə ə̂në ə̈bə̈ nə ma əgo nə kɔ sə kpî tə̂ aənə̂ bale nə, â e lï lï ndə kə pa e mbrə ərə ə̂në tshelə e yində nə kɔ ne. 18 Bale, kədə Âgbɔ̂ Yîrə̂ nə kə sə kə yisə̂ äwä kə e, e sə sə tshekudu âgbɔ̂ əpʉ nə ne.

19 Kandää, a wûsə̂ aərə ə̂në əndu əzü nə ə mbrə kɔ gâ ye: əpʉ kə ma ə̂trû, kə sə sə mvo ne, kə pra ayashe wala akoshe kpî tə̂ əwo zə wala äkɔ̈ zə, 20 kə vrɔ aamba andjapä, əpʉ ayɔ, əpʉ aawlra, akəpʉ, kə za tshelə gâ tə̂ azü, aəkɔ, kə mbrə ərə tə alayïnga azü, kə ia ətshe, kə sɔ tshelə takpa tə̂ azü, 21 kə ma əgo aərə nə̂ azü, kə ndju ə̂pî rô pâ nə, kə zɨ rəgo rô pâ nə gâ ndə alabə̈ aərə ə̂në ə sə ndje gu ndə nə rə kɔ. Mə pa kə e ətshinə gâ ye kane, mata ə̂në mə pâ ətshinə gâ ye kɔ: azü ə̂në əndje sə kə mbrə marä tə̂ aərə səke, əndje sə sə kə sɔtə̂ ətshe lə Əgɔngerə nə̂ Ndjapä ne.

22 Bale, ərə ə̂në Âgbɔ̂ Yîrə̂ nə sə kə mbrə nə lə əzü kɔ kə də̂: kə yi tə̂, ə̂rû, blatshe, kə ru tshelə, ə̂rɔ̂ lɔsu, ə̂rɔ̂tə̂, kə sə tə əzü ə̂në tshə lï ndə kə pa azü za lɔsu nɔ̂ kə ətshə, 23 kə mbrə tə̂ əzü lə zɨtɨ nə, kə wusə̂ äwä kə ru tə̂ əzü; âgbɔ̂ əpʉ wəra tə̂ ye wəra tə̂ marä tə̂ aərə səke ne. 24 Bale, azü ə̂në əndje sə tə azü nə̂ Jezu Kristə nə kɔ, əndje wô əndu əzü nə gâ ala masheyɔ gâ ye də aəmbrʉ aərə nɔ̂ ə̂në əzü nə ə ma əgo nə kɔ. 25 Kədə̂ əzə̂ sə tə asorô tə̂ äwä Âgbɔ̂ Yîrə̂ nə, a kätə̂ Âgbɔ̂ Yîrə̂ nə tshə yisə̂ äwä kə əzə̂ ndje.

26 A dö tə̂ əzə̂ dö tə̂ azü kə da əkro əzə̂ ne! A kätə̂ äwä kə pra əpʉ lə takpa tə̂ əzə̂ gâ ye ə kätə̂ kə za tshelə əzə̂ gâ tə̂ angâ əzə̂ lə takpa tə̂ əzə̂ gâ ye.