1 Əmə, Zudə, əyïkosəra nə̂ Jezu Kristə, ə̂në mə sə ndje tə aye Zake kɔ, mə wla ngrowô səke kə azü ə̂në Abä də Ndjapä ê əndje gâ ye kɔ, ə sə kə yində əndje ə sə kə bata əndje mbrə Jezu Kristə kɔ.

2 Ndjapä wü əyo e, ə zä blatshe kə e ə yïndə e, gâ pâ nə gâ pâ nə!

3 Alaye əmə ə̂në mə yində e tə bandanə kɔ, mə za tə̂ əmə nɔ̂ ndə kə pa mə ta ngrowô kə e gâ pâ əpʉ kə she əzə̂ lə kuzu ə̂në ə wu əzə̂ nɔ̂ kɔ. Ə̈bə̈ ərə za əmə ndə kə pa mə ta ngrowô nə kə e ə gbɔgbɔ e ndə kə pa e mbrə awlra mbrə əpʉ lɔsu ə̂në Ndjapä zâ kə azü nə̂ ye äwä bale gbrä gâ ye kɔ. 4 Mbrə ə̂në alabə̈ azü lî gâ lə takpa tə̂ e gə̂lê gâ ye; əndje sə tə aəmbrʉ azü ə̂në əndje sə kə do ə̂rɔ̂tə̂ Ndjapä nə̂ əzə̂ tə̂ äwä kə mbrə ərə ə̂trû nə̂ əndje kɔ, ə sə kə wəra tə̂ əndje tə̂ Jezu Kristə, Makɔndji də Âgbɔ̂ Əyïngerə nə̂ əzə̂ kʉ kpiabale kɔ. Əndje tâ əpʉ ngbanga ə̂në Ndjapä ə wa gâ pâ əndje je kɔ gâ lə fraka kerə gâ ye kɔ.

5 E-e ə̂në e wûsə̂ aərə sə̂ nɔ̂ gâ ye kɔ, mə yində nə ə pa e li tshelə e ə pa leme-e, Əyïlingû*, mandânə ə̂në tshə djɔ̂ azü əgɔ Isərayalə lə əgɔ Ejipətə gâ ye kɔ, mbrə̂ â azü ə̂në əndje wə̂ra tə̂ əndje ndə kə za lɔsu əndje kə ətshə kɔ, əndje tshû nɔ̂. 6 Alabə̈ atrawaya nə̂ Ndjapä ndje ə̂në əndje tshî əgerə ətshe də ə̂sə̂ əlo ə̂në Ndjapä kô əndje gâ tə̂ nə kɔ tʉ gâ ye kɔ, Ndjapä nə î əndje gâ ye ə bata əndje kʉ rə gbrä, mâ budu nə lə əbutshe mbrə âgbɔ̂ əlo ngbanga. 7 Äwä bale ndje, azü aəgɔ Sɔdɔmə də Gɔmɔrə də azü agala ə̂në ə sə̂ ngotə̂ nə kɔ*, əndje mbrə̂ ndje kʉ rə ə zâ tə̂ əndje nɔ̂ gâ tə̂ əpʉ ə̂trû ə prâ äwä kə sho də ətshe ə̂në ə sə sə də äwänə ne kɔ. Ndjapä nə wâ ngbanga əwo ə̂në ə sə kə ju nə piii kɔ gâ pâ əndje, â ə sə tə ə̈bə̈ ərə ndə kə pa azü wu.

8 Äwä bale ndje, azü sə̂ ə̂në əndje lî gâ lə takpa tə̂ e kɔ sə kə mbrə kʉ rə, əndje wû aərə tə aə̈lü â na də əndje ndə kə pa əndje ko tshekotə̂ əndje ə mbrə də əmbrʉ ərə, ə wu əpʉ ngerə nə̂ Âgbɔ̂ Əyïngerə tə amba ərə lə ala əndje ə gu asorô ə̂në əndje sə lə ə̂yî mâ lafɔ kɔ. 9 Kandää, Mishalə*, makɔndji nə̂ atrawaya nə̂ Ndjapä ndje, alɔ ə̂në, leme-e tshə sə̂ kə shera əpʉ lə ama djablo â sə̂ kə pa ashera də ətshə gâ pâ əpʉ əko Mayïzə* kɔ, wâ wâ ngbanga ə gû ə̂gû gû ne. Bale tshə pâ tshî ə pa: «Əyïlingû wä ngbanga gâ lə kumu zə!» 10 Bale, ənə̂ azü səkɔ, əndje sə kə gu ə̂gû tə̂ ərə ə̂në əndje wusə̂ nə wu ne kɔ; â ərə ə̂në əndje wusə̂ nə kʉ tə̂ äwä kə wusə̂ ərə mata aagia, ə̂në əndje wusə̂ ərə wu ne kɔ, ə tə nə kə sə kə ndɨ əndje. 11 Əyo gâ pâ əndje! Mbrə ə̂në əndje zâ äwä ə̂në Kayinə zâ kɔ gâ ye; mbrə əgo ngendja, əndje zâ əmbrʉ äwä ə̂në Balamə zâ kɔ gâ ye; Ndjapä ə wa ngbanga gâ pâ əndje je ə̂në əndje âfɔ də əpʉ mata Kɔre kɔ.* 12 Azü səkɔ sə mata grishi lə arəgo ə̂në e zɨ tə alaye lə takpa tə̂ e kɔ, əndje sə sə kə zɨ rəgo də gana ne ə wu kʉtə̂ tshelə əndje. Əndje sə mata tshelafɔ yavrɨ ə̂në ə afɔ ʉrrr ə ni ni ne, ə̂në əyi rô də nə kɔ, mata aayɔ ə̂në ə le le ne ʉrrr ndjɔ gâ tə̂ ama tshekɨ kə le aayɔ kɔ, əndje tshû äwä bishi gâ ye, əndje ɔ̂ əshe əndje gâ ye. 13 Əndje sə mata aəmbrʉ akplaka ə̂ngû əngbrʉ ə̂në ə ko frʉtshɔ aəmbrʉ aərə nə̂ əndje ve gashu kɔ. Əndje sə mata aambrepe ə̂në ə sə kə na kʉ ngbaa lafɔ kɔ, ə̂në əbutshe ə̂në ə sə shiwu kɔ sə kə ka mbrə əndje piii kɔ.

14 Əndje də̂ Enɔkə*, tə mindû amanə bishi ätä əzü ə vɔ̂tə̂ nə mâ tə̂ Adamə kɔ, pâ əpʉ gâ pâ əndje leme-e tə awopandəma Ndjapä ə pa: «Əyïlingû nâ də atrawaya nə̂ ye sake morofo sake morofo sake morofo 15 ndə kə pa tshə wa ngbanga gâ lə kumu azü nɔ̂ ə mbrə gana tə̂ əndje mbrə aəmbrʉ aərə nɔ̂ ə̂në əndje mbrə̂ kɔ, ndje mbrə aə̂gû ə̂në alayïnyaka ə̂në əndje wə̂ra tə̂ əndje tə̂ ye gâ ye kɔ gû ətshə də nə kɔ.» 16 Azü səkɔ sə tə azü ə̂në tshelə əndje mɔ̂ mɔ̂ alɔ bale ne, ə̂në əndje sə kə dɨ tshelə ama əndje alɔnɔ̂, ə̂në əndje sə kə mbrə ərə kʉ Lïndə̂ aəmbrʉ aəgo lɔsu əndje kɔ. Əndje sə kə pa kʉtə̂ aəpʉ wuma, kandää əndje pa əpʉ kə azü ndə kə frɔ əndje ka ə sɔtə̂ aərə.

17 Bale ənə̂ e, alaye əmə ə̂në mə yində e ngbatshe kɔ, e lï tshelə e tə̂ əpʉ ə̂në azü-awla nə̂ Âgbɔ̂ Əyïngerə nə̂ əzə̂ də Jezu Kristə pâ ətshinə gâ ye kɔ. 18 Əndje pâ kə e ə pa: «Tə̂ ə̂dû alɔ tshepashɔ, alayïamɔ sə kə sə je, ə̂në əndje sə kə mbrə ərə kʉ Lïndə̂ aəmbrʉ aəgo lɔsu əndje, tə azü ə̂në əndje sə ngrʉ̂ tə̂ Ndjapä kɔ.» 19 Əndje kə sə̂ â na də əpʉ kə sɔ tshelə takpa tə̂ azü kɔ, â əpʉ lɔsu əndje sə kʉ tə aamba aəpʉ nə̂ azü, â əndje sə sə də Âgbɔ̂ Yîrə̂ ne. 20 Bale ənə̂ e, alaye əmə ə̂në mə yində e tə bandanə kɔ, e gämba kə sə e gâ pâ əpʉ lɔsu e ə̂në ə sə kpî kɔ. E yü Ndjapä tə̂ äwä Âgbɔ̂ Yîrə̂. 21 E däka pə lə kə yində əzə̂ ə̂në Ndjapä yîndə əzə̂ kɔ ka ə ka mbrə ə̂rɔ̂tə̂ Âgbɔ̂ Əyïngerə nə̂ əzə̂ də Jezu Kristə nə mbrə sorô nə̂ alɔnɔ̂ nə.

22 E wü əyo azü ə̂në əndje sə pə də ashera tə̂ lɔsu əndje kɔ; 23 ənə̂ alabə̈ əndje, e djɔ̈ əndje lə ala əwo ə she əndje lə kuzu; ənə̂ alabə̈ aata əndje nə, e wü əyo əndje, e mbrə̈ ndje awa ə wə̈ra tə̂ e də lɔsu e nɔ̂ tə̂ ərə ə̂trû nə̂ əndje nə ʉrrr ndjɔ ə goro aləba nə̂ əndje ə̂në əndje tshê gâ ye kɔ goro ne.

24 Ndjapä ə̂në tshə lï ndə kə bata e ndə kə pa e te te ne kɔ ə ko e, e na ə ka gâ ətshi ye lə ə̂yî, də ə̈bə̈ əpʉ lə kumu e bale ne kɔ, də âgbɔ̂ ə̂rû kɔ, 25 ətshə tshî, Awoshe əzə̂ tə̂ äwä Jezu Kristə, Âgbɔ̂ Əyïngerə nə̂ əzə̂ kɔ, kə mbe ətshe, də əgerətshe, də awlra, gâ ndə əpʉ ngerə sə̈ kʉ mbrə ətshə, ə vɔ̂tə̂ nə pə leme-e kerə, kpəsəye, ndje də ə̂ngû də ə̂ngû piii! Asərəmə.