1 Ndə tshekra əlo sandaga Pakə nə ə lï, Jezu wûsə̂ nə ə pa alɔ ndə kə pa əne katə̂ tshepashɔ səye ə gu mâ ndə Abä lî gâ ye kɔ, ətshə ə̂në tshə yîndə azü nə̂ ye ə̂në əndje sə̂ pâ ashɔ nə kɔ, tshə yîndə əndje ʉrrr ndjɔ gâ tə̂ ama nə.

2 Tə̂ alɔ kə zɨ rəgo, bale, ə̂në djablo zâ gâ tə̂ lɔsu Judasə, ɨrɨ Shemɔ Isəkariɔtə ndə kə pa tshə ka Jezu nə kɔ, 3 Jezu nə ə̂në tshə wûsə̂ nə ə pa Abä kô aərə nɔ̂ gâ lə kəna əne gâ ye kɔ, ə̂në tshə âfɔ mâ ndə Ndjapä â nâ kɔ â sə̂ kə gu na ye mâ ndə Ndjapä nə kɔ, 4 tshə âfɔ tə̂ ama rəgo nə, ə wlêrə aləba tə̂ ye gâ tʉ, ə zâ ə̈bə̈ ləba ə î gâ lə ye. 5 Mandânə, tshə sɨ̂ ə̂ngû gâ lə ə̈bə̈ âgbɔ̂ sambe â vɔ̂tə̂ kə yutu aə̈nü atrawaya nə̂ ye â trû də ləba nə ə̂në tshə î gâ lə ye nə kɔ. 6 Bale, tshə wûtu gâ tə̂ Shemɔ Piarə, â Shemɔ Piarə nə pâ kə ətshə ə pa: «Əbə, Âgbɔ̂ Əyïngerə, bə yutu ə̈nü əmə a?» 7 Jezu kîrə əpʉ kə ətshə ə pa: «Ərə ə̂në, əmə, mə sə kə mbrə nə kɔ, əbə, bə wusə̂ âdâ nə wu kpəsəye ne, bale bə wusə̂ âdâ nə tala je.» 8 Piarə nə pâ kə ətshə ə pa: «Bale ne, bə sə sə kə yutu ə̈nü əmə bale ne.» Jezu kîrə əpʉ kə ətshə ə pa: «Kədə mə yutu ə̈nü zə yutu ne, bə sə sə kə sə də ə̈bə̈ ərə nə̂ zə ndə əmə bale ne.» 9 Shemɔ Piarə nə pâ kə ətshə ə pa: «Âgbɔ̂ Əyïngerə, yü yütu kʉtə̂ aə̈nü əmə ne, bale yütu ndje akəna əmə gâ ndə kumu əmə.» 10 Jezu pâ kə ətshə ə pa: «Əzü ə̂në tshə yɔ̂ tə̂ ye gâ ye kɔ, tshə sə də əgo ndə kə yutu kʉtə̂ aə̈nü ye tshî, tshə sə mvo tshegege gâ ye; kandää e-e, e sə mvo gâ ye, bale ə də̂ e nɔ̂ də̂ ne.» 11 Mbrə ə̂në tshə wûsə̂ əzü ə̂në tshə ka ətshə je kɔ gâ ye; âdârə ə̂në tshə pâ əpʉ ə pa: «Ə də̂ e nɔ̂ də̂ kə sə mvo kɔ ne.»

12 Mandânə ə̂në Jezu nə yûtu aə̈nü əndje nə gâ ye â yî aləba nə̂ ye gâ ye kɔ, tshə gû ə sə̂ gâ tʉ gâ tə̂ ama rəgo nə ə pâ kə əndje ə pa: «E wusə̂ âdâ ərə sə̂ ə̂në mə mbrə̂ kə e kɔ a? 13 E-e, e sə kə e əmə "Awoyisə̂ ərə" də "Âgbɔ̂ Əyïngerə", â e pa də äwänə, mbrə ə̂në mə sə tə ətshə. 14 Rəkɔ kədə, əmə ə̂në mə sə tə Âgbɔ̂ Əyïngerə nə də Awoyisə̂ ərə nə kɔ, mə yûtu aə̈nü e, e-e ndje, e lï ndə kə pa e yutu aə̈nü e lə takpa tə̂ e; 15 mbrə ə̂në mə mbrə̂ rə kanika, e-e ndje, e wu ə mbrə mata ə̂në mə mbrə̂ kə e kɔ. 16 Djatra əpʉ, mə pa kə e, əyïkosəra ro ro âgbɔ̂ əzü nə̂ ye ne, wala əyïawla ro ro əzü ə̂në tshə wlâ ətshə kɔ ne. 17 Ə̂në e wûsə̂ ərə sə̂ gâ ye kɔ, ənə̂ e tə ə̂rɔ̂nə kədə e mbrə ərə ə lï də nə.

18 «Ə də̂ e nɔ̂ də̂ mə pa ndə e kɔ ne; əmə, mə wusə̂ azü ə̂në mə kê əndje kɔ gâ ye. Bale, ə lï ndə kə pa ndəma Fraka nə̂ Ndjapä mbrə, ə̂në ə pâ: "Əzü ə̂në a də ətshə sə kə zɨ rəgo kɔ, tshə zâ ə̈nü gâ lafɔ ndə kə dɔ əmə də nə."*13.18 Wu Ətsh 41.10. 19 Ə̂në a ləye, mə pa kə e gâ ye kane, angbʉlînə ndə kə pa ərə nə wutu, kanika alɔ ə̂në ərə nə â wutu, e wusə̂ nə mâ tə̂ lɔsu e ə pa "Əmə, mə sə je". 20 Djatra əpʉ, mə pa kə e, ətshə ə̂në tshə wəra əzü ə̂në mə wla ətshə kɔ tə ə̂rɔ̂nə, əmə də̂ tshə wəra əmə tə ə̂rɔ̂nə kɔ. Â əzü ə̂në tshə wəra əmə tə ə̂rɔ̂nə, ətshə ə̂në tshə wlâ əmə kɔ də̂ tshə wəra ətshə kɔ.»

21 Mandânə ə̂në Jezu nə pâ əpʉ nə rə gâ ye kɔ, blatshe sə̂ sə̂ tə̂ lɔsu ye ne â tshə pâ əpʉ səye ə pa: «Djatra əpʉ, mə pa kə e, ə̈bə̈ əzü bale lə takpa tə̂ e sə kə ka əmə.» 22 Atrawaya nə lîshi gâ lə ala əndje lə takpa tə̂ əndje â yû tə̂ əndje ə pa əde də̂ tshə pâ əpʉ nə tə̂ ye kɔ. 23 Ə̈bə̈ trawaya nə̂ ye nə bale, ətshə ə̂në Jezu nə yîndə ye kɔ, tshə sə̂ gâ tʉ gâ tə̂ ama rəgo nə trö də Jezu nə. 24 Shemɔ Piarə mâ kəna ye kə ətshə ə pa tshə yu ətshə ə pa əde də̂ tshə pâ əpʉ nə tə̂ ye kɔ? 25 Bale, trawaya səkɔ têrə gâ ala əkro Jezu nə ə yû ətshə ə pa: «Âgbɔ̂ Əyïngerə, əde kə sə̂?» 26 Jezu kîrə əpʉ kə ətshə ə pa: «Əzü ə̂në mə sə kə ndru ə̈ndö mapa lə rəgo nə â za kə ətshə kɔ, ətshə kə sə̂.» Bale, Jezu nə ndrû ə̈ndö mapa nə lə rəgo nə ə zâ kə Judasə Isəkariɔtə nə, ɨrɨ Shemɔ Isəkariɔtə. 27 Pa nə ə̂në Judasə nə zâ ə̈ndö mapa nə kɔ, Sataa lî gâ lə ye. Jezu pâ kə Judasə nə ə pa: «Ərə ə̂në bə sə kə mbrə nə kɔ, mbrə̈ katshä.»

28 Bale, ə̈bə̈ əzü bale lə takpa tə̂ əndje ə̂në əndje də a-Jezu nə sə̂ kə zɨ rəgo nə kɔ djî tshelə âdâ əpʉ sə̂ ə̂në tshə pâ kə ətshə kɔ djî bale ne. 29 Ə̂në Judasə nə kə bâta ngendja kɔ, alabə̈ azü nə pâ ənə̂ əndje ə pa Jezu pâ kə ətshə ə pa: «Nä ə yɔ̈ ərə ə̂në ə sə mbrə sandaga nə kɔ», wala: «Nä ə kö alabə̈ aərə kə alayïəyo.» 30 Judasə nə zâ ə̈ndö mapa nə rə ə wûtu trale. Də tsheləbu kə sə̂.

31 Alɔ ə̂në Judasə nə wûtu gashu gâ ye kɔ, Jezu pâ: «Ə̂në a ləye, Ndjapä yîsə̂ ə̂yî Əgblə nə̂ Əzü gashu gâ ye, â Ndjapä sɔ̂ ndje tə̂ ə̂yî tə̂ äwä ye gâ ye. 32 [Kədə Ndjapä kə sɔ̂tə̂ ə̂yî tə̂ äwä ye,]*13.32 Əpʉ səke sə sə lə alabə̈ aangbrɔ afraka Ndjapä də ama grakə ne. Ndjapä ndje sə kə yisə̂ ə̂yî Əgblə nə̂ Əzü nə gashu lə ye də̂ Ndjapä nə də ə̂tə̂ ye, â tshə sə kə mbrə nə katshä katshä səye. 33 Aneshe nə̂ əmə, mə daka pə teashe lə takpa tə̂ e. E pra əmə je, â mata ə̂në mə pâ kə Ajuwufu ə pa: "Ətshe ə̂në, əmə, mə sə kə na gâ tə̂ nə kɔ, e-e, e lï lï ndə kə na gâ tə̂ nə ne" kɔ, mə pa ndje kə e rə kpəsəye. 34 Mə za ə̈bə̈ tafa âgbɔ̂ əpʉ kə e: e yï tə̂ e lə takpa tə̂ e; mata ə̂në mə yində e kɔ, e-e ndje, e yï tə̂ e lə takpa tə̂ e. 35 Kədə kə yi tə̂ kə sə lə takpa tə̂ e, azü nɔ̂ sə kə wusə̂ nə ə pa e sə tə atrawaya nə̂ əmə.»

36 Shemɔ Piarə nə pâ kə Jezu ə pa: «Âgbɔ̂ Əyïngerə, bə sə kə na mâta a?» Jezu kîrə əpʉ kə ətshə ə pa: «Ətshe ə̂në mə sə kə na gâ tə̂ nə kɔ, bə lï lï ndə kə za äwä əmə ə̂në a ləye ne; bale bə za äwä əmə tala je.» 37 Piarə nə pâ kə ətshə ə pa: «Âgbɔ̂ Əyïngerə, mə lï lï ndə kə za äwä zə, ə̂në a ləye, ne mbrə yekɔ? Mə sə trö ndə kə pa mə ka tə̂ əmə də sorô əmə nɔ̂ mbrə əbə.» 38 Jezu kîrə əpʉ ə pa: «Bə sə trö ndə kə pa bə ka tə̂ zə də sorô zə nɔ̂ mbrə əmə? Djatra əpʉ, mə pa kə əbə, kɔngatə ə kɨ kɨ ne, â bə sə kə vʉsə̂ nə ə pa bə wusə̂ əmə wu ne äwä vəta.»