1 Alɔ ə̂në Jezu sə̂ kə ro nə, tshə wû ə̈bə̈ koshe ə̂në əndje zû ətshə tə əyïbula kɔ. 2 Atrawaya nə̂ ye yû ətshə ə pa: «Awoyisə̂ ərə, əde kə mâ nyaka â əndje zû koshe səye tə əyïbula kɔ? Ətshə kə mâ nyaka nə wala alabä nə a?» 3 Jezu kîrə əpʉ ə pa: «Ə də̂ mbrə nyaka ə̂në ətshə wala alabä mbrə̂ də̂ ne. Ə sə ndə kə yisə̂ aərə ə̂në Ndjapä sə kə mbrə nə kɔ gashu kə azü lə ye. 4 Ə̂në alɔ sə pə kə tɔ nə kɔ, ə lï ndə kə pa a ma kosəra nə̂ ətshə ə̂në tshə wlâ əmə kɔ. Ətshe ndô trö ndə kə bu nə gâ ye, ə̂në əzü bale lï lï ndə kə ma ə̈bə̈ kosəra bale ne kɔ. 5 Ə̂në mə daka pə pâ ashɔ kɔ, mə sə tə ə̂yîəwo tshepashɔ nə.»

6 Mandânə ə̂në tshə pâ əpʉ səkɔ gâ ye kɔ, tshə kû ngrusu gâ tə̂ ashɔ, ə dja kpata də ngrusu ye nə ə mbrə̂ gâ tə̂ ala əyïbula nə 7 ə pa kə ətshə ə pa: «Nä ə yütu ala zə mâ la ə̂ngû Silɔwe.» Âdâ Silɔwe nə kə də̂ «Əyïawla.» Tshə nâ mâ je ə yûtu ala ye nə. Alɔ ə̂në tshə sə̂ kə do tə̂ ye kɔ, tshə lîshi ngbʉ̂ʉ̂.Ə̈bə̈ əyïbula də Jezu

8 Azü tshe ngotə̂ ye gâ ndə azü ə̂në əndje wû ətshə ətshinə də kə e ətshe ndə aərə kɔ pâ əpʉ ə pa: «Ə də̂ ətshə koye də̂ kə sə̂ gâ tʉ ə sə̂ kə e ətshe ndə aərə kɔ ne a?» 9 Alabə̈ nə pâ: «Ayî, ətshə kə sə̂.» Alabə̈ əndje pâ: «Ə’ə ne, əzü nə ko ətshə ə ko.» Bale, ətshə də ə̂tə̂ ye pâ: «Əmə əmə kə sə̂.» 10 Rəkɔ, əndje pâ kə ətshə ə pa: «Ə mbrə atâ â ala zə nə sɔ̂ kɔ?» 11 Tshə kîrə əpʉ ə pa: «Koshe ə̂në əndje ê ətshə Jezu kɔ kə sə̂ â mbrə̂ kpata â mbrə̂ gâ tə̂ ala əmə, ə pâ kə əmə ə pa: "Nä ə yütu ala zə mâ la ə̂ngû Silɔwe." Mə nâ mâ je ə yûtu ala əmə nə rə, â vɔ̂tə̂ kə lishi kɔ.» 12 Əndje pâ kə ətshə ə pa: «Tshə sə kotâ, koshe nə?» Tshə kîrə əpʉ ə pa: «Mə wusə̂ nə wu ne.»

13 Bale, əndje zâ koshe nə ə̂në tshə sə̂ ətshinə tə əyïbula nə kɔ ə nâ də ətshə kə Afariza. 14 Kandää, tə̂ ə̈bə̈ əlo saaba də̂ Jezu nə mbrə̂ kpata nə â tshê gâ tə̂ ala koshe nə â ala ye nə sɔ̂ kɔ. 15 Afariza nə ndje yû koshe nə tə̂ äwä ə̂në ala ye nə sɔ̂ kɔ. Bale, tshə pâ kə əndje ə pa: «Tshə mbrə̂ kpata gâ tə̂ ala əmə, mə yûtu ala əmə nə â lishi kɔ.» 16 Kôto, alabə̈ Afariza nə pâ: «Koshe səye tô tô mâ ndə Ndjapä ne, mbrə ə̂në tshə bata əlo saaba bata ne.» Bale, alabə̈ əndje pâ: «Əzü ə̂në tshə sə tə əyïnyaka, tshə lï ndə kə ma marä tə̂ aərə ə̈lü rəke atâ a?» Â Afariza nə djî tə̂ əndje djî ne.

17 Əndje pâ kwatəndje kə əyïbula nə ə pa: «Əbə, bə pa atâ gâ pâ əpʉ nə̂ ye, mbrə ə̂në ətshə kə mbrə â ala zə sɔ̂ kɔ?» Tshə kîrə əpʉ ə pa: «Awopandəma Ndjapä kə sə̂.»

18 Amakɔndji nə̂ Ajuwufu nə wə̂ra tə̂ əndje ndə kə yində əpʉ nə ə pa koshe səkɔ sə̂ tə əyïbula â lishi kpəsəye kɔ. Âdârə ə̂në əndje ê alabä nə də əyï nə 19 ə yû əndje ə pa: «Ətshə koye sə tə ɨrɨ e, e-e, ə̂në e pâ əndje zû ətshə tə əyïbula kɔ a? Rəkɔ, ə mbrə atâ â tshə lishi kpəsəye kɔ?» 20 Alabä nə də əyï nə kîrə əpʉ ə pa «Ä wusə̂ nə ə pa ɨrɨ ä kə sə̂, â ä zû ətshə tə əyïbula. 21 Bale, ərə ə̂në ə mbrə̂ â tshə lishi kpəsəye kɔ, ä wusə̂ nə wu ne, wala əde kə mbrə̂ â ala ye nə sɔ̂ kɔ, ä wusə̂ nə wu ndje ne. E yü ətshə! Âgbɔ̂ ətshə ke sə̂, tshə sə kə pa əpʉ də ə̂tə̂ ye gâ pâ ərə ə̂në ə wu ətshə kɔ.» 22 Alabä nə pâ əpʉ rə mbrə ə̂në awa amakɔndji nə̂ Ajuwufu nə mbrə̂ əndje ə mbrə̂. Mbrə ə̂në amakɔndji nə̂ Ajuwufu nə djî tə̂ əndje gâ ye ə pa kədə ə̈bə̈ əzü kə pa Jezu sə tə Kristə nə, əndje sə kə grɔ ətshə lə anda aangbɔ. 23 Âdârə ə̂në alabä də əyï koshe səkɔ pâ əpʉ ə pa: «Âgbɔ̂ ətshə kə sə̂, e yü ətshə» kɔ kə sə̂.

24 Tə bishi nə, Afariza nə ê koshe nə ə̂në tshə sə̂ ətshinə tə əyïbula nə kɔ ə pâ kə ətshə ə pa: «Pä djatra əpʉ lə ala Ndjapä! Ä-ä, ä wusə̂ nə ə pa koshe səkɔ sə tə əyïnyaka.» 25 Tshə kîrə əpʉ ə pa: «Kədə tshə sə tə əyïnyaka, mə wusə̂ nə wu ne; bale, mə wusə̂ kʉtə̂ ərə bale: mə sə̂ tə əyïbula, â kpəsəye mə sə kə lishi kɔ.» 26 Əndje pâ kə ətshə ə pa: «Tshə mbrə̂ yekɔ tə̂ zə? Tshə mbrə̂ atâ â ala zə nə sɔ̂ kɔ?» 27 Tshə kîrə əpʉ kə əndje ə pa: «Mə pâ ndə əpʉ nə kə e gâ ye, â e djî əmə djî ne kɔ. E yində kə dji əpʉ nə kwatəndje mbrə yekɔ? E-e ndje, e yində kə do tə̂ e tə atrawaya nə̂ ye a?»

28 Əndje gû ətshə ə pâ: «Əbə kə sə tə trawaya nə̂ ye nə, ä-ä, ä sə tə atrawaya nə̂ Mayïzə. 29 Ä-ä, ä wusə̂ nə ə pa Ndjapä pâ əpʉ kə Mayïzə; bale, ətshə koye, ä wusə̂ ətshe ə̂në tshə âfɔ tə̂ nə ə nâ kɔ wu ne.» 30 Koshe nə kîrə əpʉ kə əndje ə pa: «Ərə ə̂në ə rô pâ kumu əzü kɔ kə sə̂. Ətshə ə̂në tshə mbrə̂ â ala əmə nə sɔ̂ kɔ, e wusə̂ ətshe ə̂në tshə âfɔ tə̂ nə ə nâ kɔ wu ne! 31 A wusə̂ nə ə pa Ndjapä sə sə kə dji alayïnyaka ne. Bale, kədə ə̈bə̈ əzü kə sə kə kpe rawa Ndjapä â sə kə mbrə ərə ə̂në tshelə ye yində nə kɔ, Ndjapä nə sə kə dji əpʉ nə̂ ye. 32 A djî djî alɔ bale ə pa ə̈bə̈ əzü mbrə̂ â ala əzü ə̂në əndje zû ətshə tə əyïbula kɔ sɔ̂ ne. 33 Kədə koshe sə̂ kə tô tô mâ ndə Ndjapä ne, tshə lî lî ndə kə ma ə̈bə̈ ərə bale ne.» 34 Əndje kîrə əpʉ kə ətshə ə pa: «Əbə, əndje zû əbə tshegege lə nyaka â əbə kə sə̂ â yisə̂ ərə kə ä!» Â əndje grɔ̂ ətshə gashu.

35 Jezu djî ə pa Afariza nə grɔ̂ koshe səkɔ gashu gâ ye. Tshə nâ ə tê ətshə ə pâ kə ətshə ə pa: «Əbə, bə za lɔsu zə kə Əgblə nə̂ Əzü a?» 36 Koshe nə kîrə əpʉ ə pa: «Âgbɔ̂ Əzü, tshə də̂ əde â mə za lɔsu əmə kə ətshə?» 37 Jezu nə pâ kə ətshə ə pa: «Bə wû ətshə gâ ye. Ətshə ə̂në tshə sə kə pa əpʉ nə kə əbə kɔ, ətshə kə sə̂.» 38 Bale, koshe nə pâ: «Âgbɔ̂ Əyïngerə, mə yində nə də lɔsu əmə gâ ye.» Â tshə zâ kumu ye su ashɔ gâ ətshi Jezu nə.

39 Mandânə Jezu pâ əpʉ ə pa: «Əmə, mə nâ gâ pâ ashɔ səye ndə kə pa ngbanga sə je, kanika azü ə̂në əndje lishi li ne kɔ, əndje lishi, ka azü ə̂në əndje sə kə lishi kɔ, əndje do tə̂ əndje tə alayïbula.» 40 Alabə̈ Afariza nə ə̂në əndje sə̂ gâ ngotə̂ ye kɔ, djî əpʉ səkɔ, ə yû ətshə ə pa: «Ä-ä ndje, ä sə tə alayïbula a?» 41 Jezu kîrə əpʉ kə əndje ə pa: «Kədə e sə̂ kəmə tə alayïbula, nyaka sə sə kə sə kəmə lə kumu e ne. Bale, kpəsəye ə̂në e pa: "A sə kə lishi" kɔ, nyaka nə̂ e daka pə je.»