1 Jezu pâ kə atrawaya nə̂ ye ə pa: «E lï lï tshelə e ne, e zä lɔsu e kə Ndjapä ə zä lɔsu e ndje kə əmə. 2 Aətshe kə sə tə̂ nə sə ngbatshe mâ lə anda nə̂ Abä əmə. Də̂ ne, mə pa kə e ə pa: "Mə sə kə na ndə kə gamba ə̈bə̈ ətshe mbrə e a?" 3 Rəkɔ, kədə mə na â gamba ətshe nə kə e gâ ye, mə sə kə do tə̂ əmə ə gu ə ko e gâ ngotə̂ əmə, kanika ətshe ə̂në, əmə, mə sə tə̂ nə, e-e ndje, e sə kə sə tə̂ nə. 4 Â ətshe ə̂në mə sə kə na gâ tə̂ nə kɔ, e wusə̂ äwä nə gâ ye.» 5 Toma pâ əpʉ kə ətshə ə pa: «Âgbɔ̂ Əyïngerə, ä wusə̂ ətshe ə̂në bə na gâ tə̂ nə kɔ wu ne; ä sə kə wusə̂ äwä nə atâ a?» 6 Jezu pâ kə ətshə ə pa: «Əmə, mə də̂ äwä nə, djatra əpʉ nə gâ ndə sorô nə. Ə̈bə̈ əzü bale sə sə kə na gâ tə̂ Abä tə̂ ə̈bə̈ äwä kpî tə̂ əmə ne. 7 Kədə e wusə̂ əmə, e sə kə wusə̂ Abä əmə ndje. Â ə̂në a ləye, e wusə̂ ye â wû ətshə gâ ye.» 8 Flipə pâ kə ətshə ə pa: «Âgbɔ̂ Əyïngerə, yïsə̂ Abä kə ä, ə sə kə lï də ä.» 9 Jezu pâ kə ətshə ə pa: «Flipə, kerə ə̂në a də a-e sə kɔ, bə wusə̂ əmə wu ne! Əzü ə̂në tshə wû əmə, tshə wû Abä gâ ye. Bə lï ndə kə pa əpʉ atâ â pa: "Yïsə̂ Abä kə ä kɔ?" 10 Bə yində əpʉ nə ə̂në ə pa, əmə, mə sə lə Abä â Abä sə lə əmə kɔ də lɔsu zə ne a? Aəpʉ ə̂në, əmə, mə sə kə pa kə e kɔ, mə pa pa ndə kumu əmə ne; Abä ə̂në tshə sə lə əmə kɔ, ətshə kə mbrə akosəra nə̂ ye kɔ. 11 E yïndə əpʉ nə̂ əmə nə də lɔsu e: əmə, mə sə lə Abä â Abä sə lə əmə. Də̂ ne, e zä lɔsu e kə əmə kʉ mbrə akosəra ə̂në mə sə kə mbrə kɔ.

12 «Djatra əpʉ, mə pa kə e, əzü ə̂në tshə za lɔsu ye kə əmə, ətshə ndje, tshə sə kə mbrə akosəra ə̂në, əmə, mə sə kə nə mbrə kɔ; tshə sə kə mbrə aâgbɔ̂ aərə ə̂në ə ro aənə̂ sə̂ ə̂në mə mbrə kɔ, mbrə ə̂në, əmə, mə sə kə gu mâ ndə Abä. 13 Â aərə nɔ̂ ə̂në e sə kə yu tshuku nə də əɨrɨ əmə, mə sə kə mbrə nə, kanika Abä sɔtə̂ ə̂yî lə Ɨrɨ nə. 14 Kədə e yu tshuku ə̈bə̈ ərə kə əmə də əɨrɨ əmə, mə sə kə mbrə nə.»

15 «Kədə e yində əmə, e sə kə bata aəpʉ lə âgbɔ̂ əpʉ nə̂ əmə. 16 Â əmə, mə sə kə yu Abä ndə kə pa tshə za ə̈bə̈ ata Awotɨ azü kə e kanika tshə sə də e piii, 17 Yîrə̂ djatra əpʉ kə sə̂. Azü tshepashɔ lï lï ndə kə sɔtə̂ ye ne, mbrə ə̂në əndje wu ətshə wu ne â yerɔ ətshə yerɔ ne. Bale, ənə̂ e, e wusə̂ ye gâ ye, mbrə ə̂në tshə sə lə takpa tə̂ e â sə lə e.

18 «Mə sə sə kə katə̂ e tə ayasoro ne, mə sə kə gu gâ tə̂ e. 19 Ə daka pə teashe, azü tshepashɔ sə sə kə wu əmə ne; bale e-e, e sə kə wu əmə mbrə ə̂në, əmə, mə sə tə sorô â e-e ndje, e sə kə sə tə asorô. 20 Tə̂ alɔ nə səkɔ, e sə kə wusə̂ nə ə pa, əmə, mə sə lə Abä əmə â e-e, e sə lə əmə â, əmə, mə sə lə e.

21 «Əzü ə̂në tshə wusə̂ aəpʉ lə âgbɔ̂ əpʉ nə̂ əmə â mbrə tə̂ ye ə lï də nə, əzü ə̂në tshə yində əmə kɔ kə sə̂. Əzü ə̂në tshə yində əmə, Abä əmə sə kə yində ye, əmə ndje, mə sə kə yində ye â mə sə kə yisə̂ tə̂ əmə gashu kə ətshə.» 22 Bale, Zudə, ə də̂ Isəkariɔtə nə də̂ ne, pâ kə ətshə ə pa: «Âgbɔ̂ Əyïngerə, mbrə yekɔ də̂ bə sə kə yisə̂ tə̂ zə gashu kʉ kə ä â ə də̂ kə azü tshepashɔ də̂ ne kɔ?» 23 Jezu kîrə əpʉ kə ətshə ə pa: «Kədə ə̈bə̈ əzü kə yində əmə, tshə sə kə bata əpʉ nə̂ əmə â Abä əmə sə kə yində ye; ä sə kə na gâ tə̂ ye â mbrə ə̂sə̂ ä mâ ndə ye. 24 Əzü ə̂në tshə yində əmə yi ne, tshə sə sə kə bata aəpʉ nə̂ əmə ne. Â əpʉ ə̂në e sə kə dji nə kɔ, ə sə sə tə ənə̂ əmə ne, bale ə sə tə ənə̂ Abä ə̂në tshə wlâ əmə kɔ. 25 Mə pâ əpʉ sə̂ kə e rə ə̂në mə daka pə ngotə̂ e kɔ. 26 Bale, Awotɨ azü nə, Âgbɔ̂ Yîrə̂ nə ə̂në Abä ə wla ətshə də əɨrɨ əmə je kɔ, ətshə kə sə̂ â yisə̂ aərə nɔ̂ kə e je, â mbrə ndə kə pa lɔsu e te gâ pâ aərə nɔ̂ ə̂në, əmə, mə pâ ndə əpʉ nə kə e gâ ye kɔ je.

27 «Mə katə̂ blatshe kə e, mə za blatshe nə̂ əmə kə e. Əmə, mə za za kə e mata ə̂në azü tshepashɔ ə za kɔ ne. E li li tshelə e ne, awa mbrə e mbrə ne. 28 E djî əpʉ ə̂në, əmə, mə pâ kə e ə pa: "Mə sə kə gu na ye, bale mə sə kə do tə̂ əmə ə gu gâ tə̂ e je." Kədə e yîndə əmə kəmə, e sə̂ kə sə kəmə də ə̂rû mbrə ə̂në mə sə kə gu mâ ndə Abä kɔ, mbrə ə̂në Abä rô əmə gâ ye. 29 Mə pâ ndə əpʉ aərə sə̂ kə e kpəsəye gâ ye, angbʉlînə ndə kə pa aərə nə wutu, kanika, alɔ ə̂në ə wutu, e za lɔsu e kə əmə. 30 Mə sə sə kə pa əpʉ kwatə̂mə ngbatshe kə e ne, mbrə ə̂në əyïngerə tshepashɔ səye sə kə na gu nə. Tshə sə sə də ə̈bə̈ ərə nə̂ ye bale lə əmə ne. 31 Bale, ə lï ndə kə pa azü tshepashɔ wusə̂ nə ə pa mə yində Abä â mə sə kə mbrə ərə ə̂në Abä zâ ama də əpʉ nə kə əmə kɔ. E äfɔ gâ lafɔ, a rö!»