1 Tə̂ angbʉlî əlo dəmashi nə, Marə̂ əzü əgɔ Magədala nâ mâ tə̂ manda ə̂dû nə pə-ê də əzɨ ə̂në ətshe sə̂ pə kə bu nə kɔ. Tshə wû ə pa əndje gî əkpʉ nə ə̂në ə sə̂ tə̂ manda ə̂dû nə kɔ gashe gâ ye. 2 Tshə kpê ärɔ̈ gu nə ə tê Shemɔ Piarə də ə̈bə̈ trawaya nə, ətshə ə̂në Jezu yîndə ye wââ kɔ, ə pâ kə əndje ə pa: «Əndje zâ Âgbɔ̂ Əyïngerə lə ə̂dû nə gâ ye, â ä wusə̂ ətshe ə̂në əndje zâ ətshə tə̂ nə kɔ wu ne!»

3 Rəkɔ, Piarə nə də trawaya səkɔ rô ə nâ mâ tə̂ ə̂dû nə je. 4 Əndje bishi nɔ̂ sə̂ kə kpe ärɔ̈ nə mvrɔ na na ye, bale trawaya ətshə nə səkɔ kpê ärɔ̈ nə diawû diawû ə rô Piarə nə ə yî kumu ye ətshinə mâ tə̂ manda ə̂dû nə je. 5 Tshə têrə gâ tʉ ə wû aama aləba ə̂në ə sə̂ tə̂ ashɔ nə kɔ, bale tshə lî lî gâ lə ə̂dû nə ne. 6 Shemɔ Piarə nə, ə̂në tshə sə̂ mandâ ye kɔ, yî kumu ye. Tshə lî gâ lə ə̂dû nə ə wû aama aləba nə ə̂në ə sə̂ tə̂ ashɔ nə kɔ 7 gâ ndə ləba ə̂në əndje kânga kumu Jezu nə də nə kɔ; ləba nə səkɔ sə̂ ənə̂ ye kpî tə̂ ə̈bə̈ ətshe, tə̂ aama aləba nə, əndje wû wûru gâ tə̂ nə. 8 Bale, trawaya ətshə nə səkɔ, ə̂në tshə yî kumu ye ətshinə gâ tə̂ ama ə̂dû nə kɔ, lî ndje gâ lə ə̂dû nə. Tshə wû â yîndə nə də lɔsu ye. 9 Mbrə ə̂në əndje tê tê pa ə dji tshelə âdâ Fraka nə̂ Ndjapä ə̂në ə pâ Jezu lï ndə kə she lə takpa tə̂ akuzu kɔ ne. 10 Bale, atrawaya nə dô tə̂ əndje ə gû na ye gâ ndə əndje.

11 Bale, Marə̂ kâ mashu-e, trö də ə̂dû nə â sə̂ kə kɨ nə. Ə̂në tshə sə̂ kə kɨ nə kɔ, tshə têrə gâ tʉ ndə kə lishi gâ lə ə̂dû nə. 12 Bale, tshə wû atrawaya nə̂ Ndjapä bishi ə̂në əndje yî aə̂mbî aləba kɔ. Əndje sə̂ gâ tʉ gâ tə̂ ətshe ə̂në əko Jezu nə sə̂ tə̂ nə ətshinə kɔ, ə̈bə̈ nə gâ ə̂sə̂ kumu ye â bale nə gâ ə̂sə̂ ə̈nü ye. 13 Əndje pâ kə ətshə ə pa: «Yashe, bə kɨ mbrə yekɔ?» Tshə kîrə əpʉ kə əndje ə pa: «Mbrə ə̂në əndje zâ Âgbɔ̂ Əyïngerə nə̂ əmə gâ ye, â mə wusə̂ ətshe ə̂në əndje zâ ətshə tə̂ nə kɔ wu ne.»

14 Alɔ ə̂në tshə pâ əpʉ səkɔ, tshə dô tə̂ ye â wû Jezu ə̂në tshə kâ gâ lafɔ kɔ; bale tshə wûsə̂ nə wû ə pa Jezu nə kə sə̂ ne. 15 Jezu nə pâ kə ətshə ə pa: «Yashe, bə kɨ mbrə yekɔ? Əde də̂ bə pra ətshə kɔ?» Tshə wû ənə̂ ye ə pa də əyïnga kəndɨ nə kə sə̂ ə pâ kə ətshə ə pa: «Âgbɔ̂ əzü, kədə əbə kə zâ ətshə â rô də ətshə, yïsə̂ ətshe ə̂në bə zâ ətshə tə̂ nə kɔ kə əmə, mə na ə za ətshə.» 16 Jezu nə pâ kə ətshə ə pa: «Marə̂!» Tshə dô tə̂ ye ə pâ kə ətshə də ama ebrʉ ə pa: «Rabuni!» Tshelə âdâ nə də̂: Awoyisə̂ ərə.

17 Jezu nə pâ kə ətshə ə pa: «Tëgbɔ əmə tëgbɔ ne, mbrə ə̂në mə te te pa ə o na ye gâ ndə Abä əmə ne. Bale gü gâ tə̂ alaye əmə ə pä kə əndje ə pa: "Mə sə kə o na ye gâ ndə Abä əmə, ə̂në tshə sə ndje tə Abä e kɔ, gâ tə̂ Ndjapä nə̂ əmə ə̂në tshə sə ndje tə Ndjapä nə̂ e kɔ."»

18 Marə̂ tshe Magədala nə gû ə pâ kə atrawaya nə ə pa əne wû Âgbɔ̂ Əyïngerə, â pâ ndəma əpʉ nə ə̂në tshə pâ kə ətshə kɔ kə əndje.

19 Kʉ də lɔkədɨ nə, tə̂ əlî əlo dəmashi nə səkɔ, atrawaya nə ngbô tə̂ əndje gâ lə ə̈bə̈ anda â tshû amanda nə gâ tə̂ nə də krele, mbrə ə̂në awa amakɔndji nə̂ Ajuwufu mbrə̂ əndje ə mbrə̂. Jezu nâ ə kâ gâ lə takpa tə̂ əndje, ə pâ kə əndje ə pa: «Blatshe sə̈ də e!»

20 Alɔ ə̂në tshə pâ əpʉ səkɔ, tshə mâ asheku lə akəna ye də ənə̂ əkro ye kə əndje. Tshelə atrawaya nə sə̂ də ə̂rû mbrə ə̂në əndje wû Âgbɔ̂ Əyïngerə nə kɔ. 21 Jezu kwâtə̂ye ə pâ kə əndje ə pa: «Blatshe sə̈ də e! Mata ə̂në Abä wlâ əmə kɔ, əmə ndje, mə wla e.»

22 Mandâ aəpʉ səkɔ, tshə ûru əyi gâ pâ əndje ə pâ kə əndje ə pa: «E sɔ̈tə̂ Âgbɔ̂ Yîrə̂. 23 Azü ə̂në e sə kə gba tshelə ködä anyaka lə kumu əndje, tshelə anyaka nə sə kə gba lə kumu əndje. Â azü ə̂në e wəra tə̂ e ndə kə gba tshelə ködä anyaka lə kumu əndje, anyaka sə kə daka pə lə kumu əndje.»

24 Kandää, Toma, ə̂në əndje ê ətshə ə pa Mêya kɔ, tə ə̈bə̈ əzü-awla nə lə takpa tə̂ əndje morofo amanə bishi nə kɔ, sə̂ sə̂ je lə takpa tə̂ əndje alɔ ə̂në Jezu nə nâ kɔ ne. 25 Rəkɔ, ə̂dû atrawaya nə pâ kə ətshə ə pa: «Ä wû Âgbɔ̂ Əyïngerə!» Bale, Toma nə pâ kə əndje ə pa: «Kədə mə wu ə̂sə̂ aəku nə wu lə akəna ye ne, â kədə mə yi yi kəna əmə lə ə̂sə̂ aəku nə ə yi kəna əmə lə əkro ye nə ne, mə sə sə kə yində nə də lɔsu əmə ne.»

26 Əlo mindû amanə vəta mandânə, atrawaya nə̂ Jezu nə kwâtə̂ndje ə ngbô tə̂ əndje gâ tə̂ nə lə anda nə, â Toma nə sə̂ je lə takpa tə̂ əndje. Əndje tshû amanda nə gâ tə̂ nə də krele gâ ye, bale Jezu nâ ə kâ gâ lə takpa tə̂ əndje, ə pâ kə əndje ə pa: «Blatshe sə̈ də e!» 27 Mandânə, tshə pâ kə Toma nə ə pa: «Yï kəna zə gâ əmə, ə wü akəna əmə, yï kəna zə nə gâ əmə koye ə yï lə əkro əmə nə. Kätə̂ kə shera ashera, ə yïndə əpʉ nə də lɔsu zə!» 28 Toma nə kîrə əpʉ kə ətshə ə pa: «Âgbɔ̂ Əyïngerə nə̂ əmə də Ndjapä nə̂ əmə!» 29 Jezu nə pâ kə ətshə ə pa: «Mbrə ə̂në bə wû əmə gâ ye kɔ də̂ bə yində nə də lɔsu zə nə kɔ a? Ənə̂ əndje tə ə̂rɔ̂nə, azü ə̂në əndje wû ərə wû ne â yində nə də lɔsu əndje kɔ!»

30 Jezu mâ ndje alabə̈ aata aərə ə̈lü ngbatshe ətshi atrawaya nə̂ ye, ə̂në əndje tâ əpʉ nə tâ gâ lə fraka səye ne kɔ. 31 Bale, aərə sə̂ ə̂në əndje tâ əpʉ nə kɔ, ə sə ndə kə pa e yində nə də lɔsu e ə pa Jezu sə tə Kristə nə, tə Ɨrɨ Ndjapä, â tə̂ äwä kə yində nə də lɔsu e nə, e sə də sorô də əɨrɨ ye.