1 Kandää, ə̈bə̈ əzü sə̂ je lə takpa tə̂ Afariza, tə ə̈bə̈ makɔndji nə̂ Ajuwufu, əɨrɨ ye kə də̂ Nikɔdamə. 2 Tshə nâ də tsheləbu ə tê Jezu ə pâ kə ətshə ə pa: «Awoyisə̂ ərə, ä wusə̂ nə ə pa bə sə tə awoyisə̂ ərə ə̂në Ndjapä wlâ əbə ndə kə pa bə yisə̂ ərə kə ä. Mbrə ə̂në ə̈bə̈ əzü bale lï lï ndə kə mbrə aərə ə̈lü ə̂në, əbə, bə mbrə kɔ ne, kədə Ndjapä sə sə də ətshə ne.» 3 Jezu pâ əpʉ kə ətshə ə pa: «Djatra əpʉ, mə pa kə əbə, kədə əndje zu ə̈bə̈ əzü zu kwatəndje* ne, tshə lï lï ndə kə wu Əgɔngerə nə̂ Ndjapä ne.» 4 Nikɔdamə nə yû ətshə ə pa: «Alɔ ə̂në əzü gbɔ̂ gâ ye, əndje lï ndə kə zu ətshə kwatəndje atâ? Tshə lï ndə kə li gâ lə əyï nə tə bishi nə ndə kə pa tshə zu ətshə a?» 5 Jezu kîrə əpʉ kə tshə ə pa: «Djatra əpʉ, mə pa kə əbə, kədə əndje zu ə̈bə̈ əzü zu tə̂ äwä ə̂ngû də Âgbɔ̂ Yîrə̂ ne, tshə lï lï ndə kə li gâ lə Əgɔngerə nə̂ Ndjapä ne. 6 Ərə ə̂në əzü kə zû kɔ sə tə əzü, â ərə ə̂në Âgbɔ̂ Yîrə̂ kə zû kɔ sə tə yîrə̂. 7 Kumu zə kpe kpe pâ əndu zə ne mbrə ə̂në mə pa kə əbə ə pa: "Ə lï ndə kə pa əndje zu e kwatəndje kane kɔ." 8 Əyi yi tə̂ ətshe ə̂në tshelə ye yində nə kɔ, â bə sə kə dji əsərɨ nə, bale bə sə sə kə wusə̂ ətshe ə̂në ə afɔ tə̂ nə wala ətshe ə̂në ə sə kə na tə̂ nə kɔ ne. Ə sə ndje kʉ rə mbrə azü nɔ̂ ə̂në Âgbɔ̂ Yîrə̂ kə zû əndje kɔ.» 9 Nikɔdamə nə zâ əpʉ ə pa: «Ərə nə lï ndə kə mbrə nə atâ a?» 10 Jezu kîrə əpʉ kə ətshə ə pa: «Bə sə tə âgbɔ̂ awoyisə̂ ərə ə̂në azü wûsə̂ zə lə əgɔ Isərayalə, â bə wusə̂ ərə səye wu ne a? 11 Djatra əpʉ, mə pa kə əbə, ä sə kə pa əpʉ ə̂në ä wusə̂ nə, â sə kə pa ndə əpʉ ərə ə̂në ä wû də ala ä gâ ye; bale e yində əpʉ nə ə̂në ä sə kə pa nə kɔ yi ne. 12 Kədə e yində əpʉ nə yi də lɔsu e ne alɔ ə̂në mə pâ əpʉ aərə tshepashɔ kə e kɔ, alɔ ə̂në mə sə kə pa əpʉ aərə tshelafɔ kə e, e sə kə yində nə atâ a? 13 Ə̈bə̈ əzü bale ô ô mâ lafɔ-e ne, də̂ ne kʉtə̂ Əgblə nə̂ Əzü ə̂në tshə tô mâ lafɔ nə ə jêrə kɔ. 14 Â mata ə̂në Mayïzə kânga əkrɔ ədrô kowɔ gâ lafɔ lə ngbûndû kɔ, äwä bale ndje, ə lï ndə kə pa əndje za Əgblə nə̂ Əzü tɔ gâ lafɔ, 15 kanika əzü nɔ̂ ə̂në tshə za lɔsu ye kə ətshə, tshə sə də sorô nə̂ alɔnɔ̂. 16 Mbrə ə̂në Ndjapä yîndə azü tshepashɔ wââ â zâ Ɨrɨ nə kʉ kpiabale kɔ, kanika əzü nɔ̂ ə̂në tshə za lɔsu ye kə ətshə, tshə sə sə kə tshu nə ne, bale tshə sə də sorô nə̂ alɔnɔ̂. 17 Ngâ, Ndjapä nə wlâ Ɨrɨ nə wlâ gâ pâ ashɔ ndə kə wa ngbanga gâ pâ azü tshepashɔ nə ne, bale ndə kə pa azü tshepashɔ nə tshɔ lə kuzu tə̂ äwä ye. 18 Əzü ə̂në tshə za lɔsu ye kə ətshə, Ndjapä wâ ngbanga wâ gâ lə kumu ye ne. Bale, əzü ə̂në tshə za lɔsu ye za kə ətshə ne, Ndjapä wâ ngbanga gâ lə kumu ye gâ ye, mbrə ə̂në tshə zâ lɔsu ye zâ kə Ɨrɨ Ndjapä kʉ kpiabale kɔ ne.

19 «Â əpʉ ngbanga nə kə səye: ə̂yîəwo nâ gâ pâ ashɔ, â azü yîndə əbutshe ə rô ə̂yîəwo nə, mbrə ə̂në aərə ə̂në əndje mbrə kɔ sə tə əmbrʉ nə. 20 Mbrə ə̂në əzü nɔ̂ ə̂në tshə sə kə mbrə əmbrʉ ərə, tshelə ye sə kə wəra tə̂ ye tə̂ ə̂yîəwo, tshə sə sə kə na gâ tə̂ ə̂yîəwo nə ne, ndə kə pa azü wu aəmbrʉ aərə ə̂në tshə mbrə kɔ wu ne. 21 Bale əzü ə̂në tshə sə kə mbrə ərə tə̂ äwä djatra əpʉ, tshə sə kə na gâ tə̂ ə̂yîəwo nə, kanika azü nɔ̂ wusə̂ nə ə pa aərə ə̂në tshə sə kə mbrə nə kɔ, ə sə tə̂ äwä Ndjapä.»

22 Mandâ ərə səkɔ, Jezu də atrawaya nə̂ ye nâ mâ lə ashɔ əgɔ Jude. Əndje də aəndje sə̂ kôto gâ tə̂ ə̈bə̈ əlo â tshə sə̂ kə za batamo kə azü. 23 Zââ ndje sə̂ kə za batamo kə azü mâ Enɔ, trö də tshelagɔ Salimə, mbrə ə̂në ə̂ngû sə̂ kôto ngbatshe. Azü nâ gâ tə̂ ye â tshə sə̂ kə za batamo kə əndje. 24 Mbrə ə̂në tə̂ alɔ nə səkɔ, əndje tê tê pa ə wli Zââ nə gâ lə anda kânga ne.

25 Kandää ə̈bə̈ ashera âfɔ lə takpa tə̂ atrawaya nə̂ Zââ nə də ə̈bə̈ Juwufu gâ pâ əpʉ kə yɔ tə̂ ə sə mvo. 26 Əndje nâ ə tə̂ Zââ nə ə pâ kə ətshə ə pa: «Awoyisə̂ ərə, ətshə ə̂në e də ətshə sə̂ mâ ətshî Jurda kɔ, â ə̂në bə pâ əpʉ gâ pâ əpʉ nə̂ ye kɔ, wü-a, tshə sə kə za batamo kə azü â azü nɔ̂ sə kə na gâ tə̂ ye.» 27 Zââ nə kîrə əpʉ ə pa: «Əzü lï ndə kə sɔtə̂ kʉtə̂ ərə ə̂në tshelafɔ zâ kə ətshə kɔ. 28 E-e, e sə je də ə̂tə̂ e â mə pâ: "Əmə, mə sə sə tə Kristə nə ne, bale əndje wlâ əmə ətshi ye." 29 Əzü ə̂në yashe ə̂në əndje tô ətshə kɔ sə mâ ndə ye kɔ də̂ äkɔ̈ yashe nə. Bale, gbɔbəngâ äkɔ̈ yashe nə ə̂në tshə ka gâ ngotə̂ ye ə sə kə dji ətshə kɔ, tshə sə də âgbɔ̂ ə̂rû tə̂ lɔsu ye ndə kə dji tshema äkɔ̈ yashe nə; marä tə̂ ə̂rû rə kə sə tə ə̂rû ə̂në mə sə də nə kɔ â ə lï nɔ̂. 30 Ə lï ndə kə pa, ətshə, tshə mbrə tə âgbɔ̂ əzü â, əmə, mə mbrə tə əngʉ əzü.»

31 «Ətshə ə̂në tshə to mâ lafɔ ə na, tshə sə gâ pâ azü nɔ̂. Ətshə ə̂në tshə sə tə əzü tshepashɔ, tshə sə tə ənə̂ tshepashɔ, â tshə sə kə pa əpʉ aərə tshepashɔ. Ətshə ə̂në tshə to mâ lafɔ ə na, tshə sə gâ pâ azü nɔ̂, 32 tshə sə kə pa əpʉ aərə ə̂në tshə wû ə djî əpʉ nə gâ ye kɔ, â ə̈bə̈ əzü bale yində əpʉ ə̂në tshə pa kɔ yi ne. 33 Əzü ə̂në tshə yində əpʉ nə ə̂në tshə sə kə pa nə kɔ, tshə yisə̂ nə gashu ə pa Ndjapä sə kə pa djatra əpʉ. 34 Mbrə ə̂në ətshə ə̂në Ndjapä wlâ ətshə kɔ, tshə sə kə pa aəpʉ nə̂ Ndjapä, mbrə ə̂në Ndjapä nə za Âgbɔ̂ Yîrə̂ za ə vo tə̂ ye ə vo ne.

35 «Abä yində Ɨrɨ nə â kô aərə nɔ̂ gâ lə kəna ye gâ ye. 36 Əzü ə̂në tshə za lɔsu ye kə Ɨrɨ Ndjapä nə, tshə sə də sorô nə̂ alɔnɔ̂. Əzü ə̂në tshə wəra tə̂ ye tə̂ kə za lɔsu ye kə Ɨrɨ Ndjapä nə, tshə sə sə kə wu sorô ne, bale əkɔ nə̂ Ndjapä daka pə pâ ye.»