1 Mandâ aərə səkɔ, ə̈bə̈ sandaga nə̂ Ajuwufu sə̂ je, â Jezu nâ mâ Jeruzalamə. 2 Kandää, mâ Jeruzalamə nə je, trö də tshelə manda Andalimi, ə̈bə̈ danga sə̂ je ə̂në əndje ê də ama ebrʉ ə pa Betəzata*5.2 Betəzata: Lə alabə̈ aangbrɔ afraka Ndjapä də ama grakə, əndje tâ ə pa Betesəda., ə̂në atshekudu anda nə sə̂ mindû kɔ. 3 Tshekudu aanda nə səkɔ, ə̂kpû alayïrəka shô gâ tʉ kôto: alayïbula, də alayïgbanu gâ ndə alayïwurtʉ. [Əndje sə̂ kə katə̂ kə meme ə̂ngû nə. 4 Mbrə ə̂në ə̈bə̈ trawaya nə̂ Əyïlingû sə̂ kə jerə ndə ə̈bə̈ alɔ gâ lə danga nə ə même ə̂ngû nə. Bale, angbʉlî əzü ə̂në tshə jêrə gâ lə nə mandânə ə̂në əndje même ə̂ngû nə gâ ye kɔ, rəka nə̂ ye sə kə nglɔ nə, rəka nə â sə kəmə atâ.]*5.3-4 Əpʉ səke sə sə lə alabə̈ aangbrɔ afraka Ndjapä də ama grakə ne. 5 Ə̈bə̈ koshe sə̂ je kôto ə̂në tshə sə̂ də rəka ə mâ ə̂ngû zazü bale də grʉvəta amanə vəta. 6 Jezu wû ətshə ə̂në tshə shô gâ tʉ kɔ, ə wûsə̂ nə ə pa tshə sə̂ kôto əndʉ nə dɨ̂ gâ ye kɔ, tshə pâ kə ətshə ə pa: «Bə yində nə ə pa rəka nə̂ zə nə nglɔ a?» 7 Əyïrəka nə kîrə əpʉ kə ətshə ə pa: «Âgbɔ̂ Əyïngerə, mə sə sə də ə̈bə̈ əzü bale ndə kə pa tshə jerə də əmə gâ lə danga nə alɔ ə̂në ə̂ngû nə même gâ ye kɔ ne. Â alɔ ə̂në, əmə, mə sə kə na na ye, ə̈bə̈ əzü jerə əlînə tə̂ əmə gâ ye.» 8 Jezu pâ kə ətshə ə pa: «Äfɔ ə zä klekpa nə̂ zə ə nä ana.» 9 Trale, rəka nə̂ koshe nə nglɔ̂ gâ ye. Tshə zâ klekpa nə̂ ye nə ə vɔ̂tə̂ kə na ana.

Kandää, alɔ nə səkɔ sə̂ tə əlo saaba. 10 Rəkɔ, aâgbɔ̂ azü nə̂ Ajuwufu pâ əpʉ kə ətshə nə ə̂në rəka nə̂ ye nə nglɔ̂ gâ ye kɔ ə pa: «Əlo saaba kə sə̂, âgbɔ̂ əpʉ zâ äwä zâ kə əbə ndə kə pa bə za klekpa nə̂ zə ne!» 11 Tshə kîrə əpʉ kə əndje ə pa: «Əzü ə̂në tshə grɔ̂ rəka tə̂ əmə kɔ kə pâ kə əmə ə pa: "Zä klekpa nə̂ zə ə nä ana."» 12 Əndje yû ətshə ə pa: «Koshe əde kə pâ kə əbə ə pa: "Zä klekpa nə̂ zə ə nä ana kɔ?"» 13 Bale, ətshə nə ə̂në rəka nə̂ ye nə nglɔ̂ gâ ye kɔ wûsə̂ əzü nə wû ne; mbrə ə̂në Jezu nə yû lə ə̂kpû azü nə ə̂në əndje sə̂ je tə̂ ətshe səkɔ gâ ye. 14 Mandâ aərə səkɔ, Jezu tê ətshə mâ lə Anda Ndjapä â pâ kə ətshə ə pa: «Wü-a! Rəka nə̂ zə nglɔ̂ gâ ye; kwatə̂zə kwa ə ma nyaka ne, kanika ə̈bə̈ əmbrʉ ərə ə̂në ə rô ənə̂ səkɔ wu wutu gâ tə̂ zə ne.» 15 Koshe nə nâ ə pâ kə aâgbɔ̂ azü nə̂ Ajuwufu nə ə pa Jezu kə sə̂ â grɔ̂ rəka nə tə̂ əne kɔ. 16 Âdârə sə̂ ə̂në aâgbɔ̂ azü nə̂ Ajuwufu nə vɔ̂tə̂ kə pra Jezu nə də əpʉ kɔ kə sə̂, mbrə ə̂në tshə mbrə̂ ərə səkɔ tə̂ əlo saaba. 17 Bale, Jezu kîrə əpʉ kə əndje ə pa: «Abä əmə sə kə mbrə kosəra ʉrrr ndjɔ kpəsəye, â əmə ndje, mə sə kə mbrə kosəra.» 18 Mbrə ərə səkɔ, aâgbɔ̂ azü nə̂ Ajuwufu nə prâ äwä kwatəndje rô pâ nə ndə kə pa əndje wo ətshə, ə də̂ kʉ mbrə ə̂në tshə bâta əlo saaba bâta ne kɔ, bale mbrə ə̂në tshə kwâtə̂ye ə pâ Ndjapä sə tə djatra Abä əne, ə sə̂ kə mbrə tə̂ ye də ə̂tə̂ ye rə ə lï də Ndjapä nə.

19 Rəkɔ, Jezu kîrə əpʉ kə əndje ə pa: «Djatra əpʉ, mə pa kə e, Əgblə nə lï lï ndə kə mbrə ə̈bə̈ ərə bale ndə kumu ye də ə̂tə̂ ye ne. Bale, tshə sə kə mbrə kʉtə̂ ərə ə̂në tshə wû Abä də kə mbrə nə kɔ; mbrə ə̂në ərə ə̂në Abä sə kə mbrə nə, Ɨrɨ nə ndje sə kə mbrə kʉtə̂ nə tshî. 20 Mbrə ə̂në Abä yində Ɨrɨ nə â sə kə yisə̂ aərə nɔ̂ ə̂në ətshə də ə̂tə̂ ye sə kə mbrə nə kɔ kə ətshə. Tshə yisə̂ aâgbɔ̂ akosəra ə̂në ə rô aənə̂ səke gâ ye kɔ kwatəndje kə ətshə je, kanika, e-e, kumu e kpe pâ əndu e. 21 Mbrə ə̂në, mata ə̂në Abä sə kə she akuzu â sə kə mbrə əndje tə asorô kɔ, Ɨrɨ nə sə kə mbrə əzü ə̂në tshelə ye yində nə kɔ tə sorô rə ndje. 22 Gâ pâ nə kwatəndje, Abä sə sə kə wa ngbanga gâ lə kumu ə̈bə̈ əzü bale ne, bale tshə kâtə̂ əpʉ kə wa ngbanga nə nɔ̂ gâ lə kəna Ɨrɨ nə gâ ye, 23 kanika azü nɔ̂ lʉ Ɨrɨ nə mata ə̂në əndje sə kə lʉ Abä kɔ. Əzü ə̂në tshə lʉ Ɨrɨ Abä nə lʉ ne, tshə lʉ ndje Abä ə̂në tshə wlâ ətshə kɔ lʉ ne.

24 «Djatra əpʉ, mə pa kə e, əzü ə̂në tshə dji əpʉ nə̂ əmə â za lɔsu ye kə ətshə ə̂në tshə wlâ əmə kɔ, tshə sə də sorô nə̂ alɔnɔ̂. Əndje sə sə kə wa ngbanga gâ lə kumu ye ne, bale tshə rô lə kuzu gâ tə̂ sorô gâ ye. 25 Djatra əpʉ, mə pa kə e, alɔ sə kə na gu nə, â ə tə nə kə səke, ə̂në asorô ə̂në əndje sə mata akuzu lə ala Ndjapä kɔ, sə kə dji tshema Ɨrɨ Ndjapä, â əndje nə ə̂në əndje sə kə dji tshema ye nə â za lɔsu əndje kə ətshə kɔ, əndje sə kə sə tə asorô piii. 26 Mbrə ə̂në mata ə̂në Abä sə tə əyïnga sorô kɔ, tshə za äwä kə Ɨrɨ nə ndə kə pa tshə sə ndje tə əyïnga sorô. 27 Â tshə za awlra kə ətshə ndə kə pa tshə wa ngbanga, mbrə ə̂në tshə sə tə Əgblə nə̂ Əzü. 28 Kumu e kpë kpë pâ əndu e ne, mbrə ə̂në alɔ sə kə na gu nə, ə̂në azü nɔ̂ ə̂në əndje sə lə aə̂dû kɔ sə kə dji tshema ye 29 â wutu gashu je. Â əndje ə̂në əndje mâ ə̂rɔ̂ ərə kɔ sə kə she mbrə sorô, â əndje ə̂në əndje mâ əmbrʉ ərə kɔ, əndje sə kə she mbrə ndə kə pa əndje wa ngbanga gâ pa əndje.»

30 «Əmə, mə lï lï ndə kə pa mə mbrə ə̈bə̈ ərə bale ndə kumu əmə də ə̂tə̂ əmə ne. Mə sə kə wa ngbanga ə lï də äwä əpʉ ə̂në mə sə kə dji lə ama Abä kɔ, â kə wa ngbanga nə̂ əmə nə sə də äwänə, mbrə ə̂në mə sə sə kə pra ərə ə̂në tshelə əmə yində nə kɔ ne, bale mə sə kə pra ərə ə̂në tshelə ətshə ə̂në tshə wlâ əmə kɔ yində nə kɔ.

31 «Kədə əmə kə pa əpʉ gâ pâ əpʉ nə̂ əmə də ə̂tə̂ əmə, əpʉ nə̂ əmə nə sə sə tə djatra əpʉ ne. 32 Bale, ə̈bə̈ əzü kpî kə pa əpʉ gâ pâ əpʉ nə̂ əmə kɔ, â mə wusə̂ nə ə pa əpʉ nə ə̂në tshə sə kə pa gâ pâ əpʉ nə̂ əmə nə kɔ, ə sə tə djatra əpʉ. 33 E-e kə wlâ azü kə Zââ kɔ, â tshə pâ əpʉ gâ pâ djatra əpʉ nə gâ ye kɔ. 34 Əmə, ə də̂ əzü də̂ kə sə̂ â pa əpʉ gâ pâ əpʉ nə̂ əmə ne; bale mə pa əpʉ səkɔ, kanika, e-e, e tshɔ lə kuzu. 35 Zââ nə sə̂ tə lamba ə̂në əndje za əwo gâ lə nə â sə kə tshe nə kɔ, â e-e, tshelə e yində kə sə də ə̂rû teashe mbrə ə̂yî nə kɔ.

36 «Bale, əmə, mə sə də əpʉ gâ pâ əpʉ nə̂ əmə ə̂në ə rô ənə̂ Zââ nə gâ ye. Mbrə ə̂në akosəra ə̂në Abä kô kə əmə ndə kə mbrə nə kɔ, akosəra nə ə̂në mə sə kə mbrə nə kɔ, ə tə nə ndje də̂ ə sə kə pa əpʉ gâ pâ əpʉ nə̂ əmə nə â sə kə yisə̂ nə gashu ə pa Abä kə wlâ əmə kɔ. 37 Â Abä ə̂në tshə wlâ əmə kɔ, ətshə də ə̂tə̂ ye pâ əpʉ gâ pâ əpʉ nə̂ əmə gâ ye. E djî tshema ye djî alɔ bale ne, wala e wû ala ye wû alɔ bale ne, 38 â əpʉ nə̂ ye sə sə tə̂ lɔsu e ne, mbrə ə̂në e za lɔsu e za kə ətshə nə ə̂në tshə wlâ ətshə kɔ ne.

39 «E sə kə pra tshelə âdâ Fraka nə̂ Ndjapä mbrə ə̂në, e-e, e wusə̂ nə ə pa e sə kə sɔtə̂ sorô nə̂ alɔnɔ̂ lə nə. Kandää, Fraka nə̂ Ndjapä nə kə pa əpʉ gâ pâ əpʉ nə̂ əmə nə kɔ. 40 Bale, e yi yində kə na gâ tə̂ əmə ndə kə sɔtə̂ sorô ne!

41 «Mə pa pra äwä kə mbe ətshe nə̂ azü ne. 42 Bale, mə wûsə̂ e gâ ye: mâ tə̂ lɔsu e, e yində Ndjapä yi ne. 43 Əmə, mə nâ də əɨrɨ Abä əmə â nâ kɔ, â e yində əpʉ nə̂ əmə yi ne kɔ. Kədə ə̈bə̈ ata əzü kə na də əɨrɨ ye də ə̂tə̂ ye, e sə kə yində əpʉ nə̂ ye! 44 E lï ndə kə za lɔsu e kə Ndjapä atâ a? E-e, ə̂në e yində kə mbe tə̂ e lə takpa tə̂ e kɔ, â sə sə kə pra äwä kə mbe ətshe ə̂në ə to mâ ndə Ndjapä tshî kɔ ne kɔ?

45 «E wu wu ənə̂ e ə pa əmə kə sə̂ â lea e ətshi Abä je ne. Ətshə ə̂në tshə lea e je kɔ kə də̂ Mayïzə, ətshə ə̂në e zâ lɔsu e gâ pâ ye kɔ. 46 Kədə e zâ kəmə lɔsu e kə Mayïzə nə, e sə kə za kəmə ndje lɔsu e kə əmə, mbrə ə̂në gâ pâ əpʉ nə̂ əmə də̂ tshə tâ fraka kɔ. 47 Bale, kədə e za lɔsu e za gâ pâ aəpʉ ə̂në tshə tâ kɔ ne, e sə kə yində aəpʉ nə̂ əmə nə atâ a?»