1 Mandânə, Jezu sə̂ pə kə na ana lə ashɔ əgɔ Galile, tshə yî yîndə kə na lə ashɔ əgɔ Jude ne, mbrə ə̂në amakɔndji nə̂ Ajuwufu sə̂ kə pra äwä ndə kə wo ətshə. 2 Sandaga nə̂ Ajuwufu ə̂në əndje ê ə pa sandaga Agbafa kɔ ndô trö gâ ye. 3 Alaye nə pâ kə ətshə ə pa: «Äfɔ kotəye ə nä mâ lə əgɔ Jude kanika atrawaya nə̂ zə wu ndje aərə ə̂në bə sə kə mbrə nə kɔ. 4 Kədə əzü â yində nə ndə kə pa azü wusə̂ ye, tshə sə sə kə mbrə ərə lə angbanə ne. Kədə bə sə kə mbrə aərə səye, ma tə̂ zə gashu ndə kə pa azü tshepashɔ nɔ̂ wu əbə.» 5 Mbrə ə̂në alaye nə ndje zâ lɔsu əndje zâ kə ətshə ne. 6 Bale, Jezu pâ kə əndje ə pa: «Alɔ nə̂ əmə te te pa ə lï ne. Bale, ənə̂ e, ə̂rɔ̂ alɔ sə je alɔnɔ̂. 7 Tshelə azü tshepashɔ lï lï ndə kə wəra tə̂ əndje tə̂ e ne, bale əmə, tshelə əndje wəra tə̂ əndje tə̂ əmə, mbrə ə̂në mə sə kə pa əpʉ gâ pâ əpʉ nə̂ əndje ə pa aərə ə̂në əndje sə kə mbrə nə kɔ sə tə aəmbrʉ aərə. 8 E-e, e nä ndə sandaga nə. Əmə, mə sə sə kə na ndə sandaga səkɔ ne, mbrə ə̂në alɔ nə̂ əmə te te pa ə lï ne.»

9 Mandânə ə̂në tshə pâ əpʉ səkɔ kə əndje gâ ye kɔ, ətshə, tshə dâka pə mâ Galile je. 10 Bale, alɔ ə̂në alaye nə nâ na ye ndə sandaga nə gâ ye kɔ, ətshə ndje, tshə nâ na ye, bale ə mâ tə̂ ye mâ gashu ne, ə nâ lə glenə.

11 Tə̂ alɔ sandaga nə, amakɔndji nə̂ Ajuwufu nə sə̂ kə pra ətshə â pa: «Tshə sə kotâ a?» 12 Bale, lə ə̂kpû azü nə, azü sə̂ kə pa aəpʉ ngbatshe gâ pâ əpʉ nə̂ ye. Alabə̈ nə pâ: «Ə̂rɔ̂ əzü kə sə̂.» Bale, alabə̈ əndje pâ: «Bale ne, tshə sə kə djingli ə̂kpû azü nə.» 13 Bale, ə̈bə̈ əzü bale pâ ndə əpʉ ye pâ gashu ne, mbrə ə̂në awa amakɔndji nə̂ Ajuwufu nə mbrə̂ əndje ə mbrə̂. 14 Sandaga nə wûtu gâ ə̂grû nə gâ ye, alɔ ə̂në Jezu nâ mâ lə Anda Ndjapä ə vɔ̂tə̂ kə yisə̂ ərə kə azü kɔ. 15 Kumu amakɔndji nə̂ Ajuwufu nə kpê pâ əndu əndje â əndje yû tə̂ əndje ə pa: «Tshə wusə̂ Fraka nə̂ Ndjapä nə atâ ə̂në tshə mânda fraka mandâ ne kɔ?» 16 Jezu kîrə əpʉ kə əndje ə pa: «Kə yisə̂ ərə nə ə̂në mə yisə̂ nə kɔ, ə to to ndə əmə ne, bale ə to mâ ndə ətshə ə̂në tshə wlâ əmə kɔ. 17 Bale, kədə ə̈bə̈ əzü kə yində kə mbrə ərə ə̂në tshelə Ndjapä nə yində nə, tshə sə kə wusə̂ nə ə pa kə yisə̂ ərə ə̂në mə sə kə yisə̂ nə kɔ to mâ ndə Ndjapä, wala mə sə kə pa aəpʉ nə ndə kumu əmə də ə̂tə̂ əmə. 18 Əzü ə̂në tshə sə kə pa aəpʉ ndə kumu ye də ə̂tə̂ ye, tshə sə kə pra äwä ndə kə pa azü mbe ətshə ə mbe. Bale, əzü ə̂në tshə sə kə pra äwä ndə kə pa azü mbe əzü nə ə̂në tshə wlâ ətshə kɔ, tshə sə tə djatra əzü, ə̈bə̈ əpʉ əterə bale sə sə lə ye ne. 19 Mayïzə zâ zâ âgbɔ̂ əpʉ kə e ne a? Bale, ə̈bə̈ əzü bale lə takpa tə̂ e ma ma ndəma âgbɔ̂ əpʉ nə ne. E sə kə pra äwä ndə kə wo əmə mbrə yekɔ?» 20 Ə̂kpû azü nə kîrə əpʉ kə ətshə ə pa: «Bə sə də afrɔ yîrə̂ lə zə. Əde kə pra äwä ndə kə wo əbə?» 21 Jezu kîrə əpʉ kə əndje ə pa: «Mə mâ kʉtə̂ ə̈bə̈ ərə bale â kumu e nɔ̂ kpê pâ əndu e mbrə nə. 22 Mayïzə zâ ama kə e də əpʉ kə wa gandja, bale əpʉ kə wa gandja nə tô tô mâ ndə Mayïzə nə ne, mbrə ə̂në ə tô mâ ndə alätä. Bale, e sə kə wa əzü də gandja tə̂ əlo saaba. 23 Kədə əndje wa ə̈bə̈ əzü də gandja tə̂ əlo saaba, ndə kə mbrə ndəma âgbɔ̂ əpʉ nə̂ Mayïzə nə, mbrə yekɔ də̂ e ma əkɔ tə̂ əmə mbrə ə̂në mə grɔ̂ rəka lə akwa ə̈bə̈ koshe nɔ̂ tə̂ əlo saaba kɔ? 24 E wä ngbanga wä mbrə aərə ə̂në ala e ə wu kɔ ne, bale e wä ngbanga ə̂në ə sə də äwänə kɔ.»

25 Alabə̈ azü tshelə Jeruzalamə nə pâ əpʉ ə pa: «Ə də̂ ətshə ə̂në əndje sə kə pra äwä ndə kə wo ətshə kɔ də̂ kə səye ne a? 26 Ətshə kə sə̂ â sə kə pa əpʉ lə ala azü nɔ̂ kɔ, â əndje pa əpʉ pa bale kə ətshə ne! Amakɔndji nə wusə̂ nə ngâ ə pa ətshə kə sə tə Kristə nə a? 27 Bale, ətshə koye, a wusə̂ ətshe ə̂në tshə âfɔ tə̂ nə ə nâ kɔ gâ ye; bale Kristə nə, alɔ ə̂në tshə sə kə na nə, ə̈bə̈ əzü bale sə sə kə wusə̂ ətshe ə̂në tshə afɔ tə̂ nə kɔ ne.»

28 Bale, Jezu nə ə̂në tshə sə̂ kə yisə̂ ərə kə azü lə Anda Ndjapä nə kɔ tâ râwâ ə pa: «E wûsə̂ əmə, ə wûsə̂ ətshe ə̂në mə âfɔ tə̂ nə ə nâ kɔ gâ ye! Bale, ə də̂ ndə kumu əmə də̂ mə nâ kɔ ne; ətshə ə̂në tshə wlâ əmə kɔ, tshə lï ndə kə pa e za lɔsu e nɔ̂ kə ətshə. E-e, e wusə̂ ye wu ne. 29 Əmə, mə wusə̂ ye, mbrə ə̂në mə tô mâ ndə ye â nâ kɔ, â ətshə kə wlâ əmə kɔ.»

30 Rəkɔ, əndje sə̂ kə pra äwä ndə kə tegbɔ ətshə, bale ə̈bə̈ əzü bale lî lî ndə kə za ətshə ne, mbrə ə̂në alɔ ye tê tê pa ə lï ne. 31 Bale, lə takpa tə̂ ə̂kpû azü nə, azü ngbatshe zâ lɔsu əndje kə ətshə. Əndje pâ əpʉ ə pa: «Alɔ ə̂në Kristə nə â na, tshə sə kə mbrə aərə ə̈lü ngbatshe ə ro aənə̂ sə̂ ə̂në ətshə koye, tshə mbrə̂ kɔ a?»

32 Afariza nə djî əpʉ ə̂në ə̂kpû azü nə sə̂ kə pa nə lə wâyâ gâ pâ Jezu nə kɔ. Bale, aâgbɔ̂ azü nə̂ aawotokrɔ gâ ndə Afariza nə wlâ atrugu ndə kə pa əndje na ə za ətshə. 33 Jezu nə pâ əpʉ ə pa: «Mə daka pə teashe lə takpa tə̂ e. Â mə sə kə gu mâ ndə ətshə ə̂në tshə wlâ əmə kɔ. 34 E pra əmə je, bale e sə sə kə sɔtə̂ əmə ne. Ətshe ə̂në, əmə, mə sə kə sə tə̂ nə kɔ, e-e, e lï lï ndə kə na gâ tə̂ nə ne.» 35 Ajuwufu nə pâ lə takpa tə̂ əndje ə pa: «Tshə sə kə na mâta ndə kə pa, əzə̂, a sɔtə̂ ye sɔ ne? Tshə sə kə na mâ ndə Ajuwufu ə̂në əndje krû tshelə əndje lə takpa tə̂ Agrakə kɔ ə yisə̂ ərə kə Agrakə nə a? 36 Əpʉ sə̂ ə̂në tshə pâ: "E pra əmə je, bale e sə sə kə sɔtə̂ əmə ne. Ətshe ə̂në mə sə kə sə tə̂ nə kɔ, e lï lï ndə kə na gâ tə̂ nə ne." Âdâ nə də̂ yekɔ?»

37 Tə̂ ə̂dû əlo sandaga nə ə̂në ə sə̂ tə âgbɔ̂ əlo nə kɔ, Jezu kâ gâ lafɔ ə tâ râwâ ə pa: «Kədə əgo ə̂ngû kə mi ə̈bə̈ əzü, tshə nä gâ ndə əmə ə ndju ə̂ngû. 38 Əzü ə̂në tshə za lɔsu ye kə əmə, "kola ə̂ngû ə̂në ə za sorô kə əzü kɔ sə kə gu lə ye" mata ə̂në Fraka nə̂ Ndjapä pâ ndə nə kɔ.»

39 Tshə pâ əpʉ səkɔ gâ pâ əpʉ Âgbɔ̂ Yîrə̂ ə̂në azü ə̂në əndje za lɔsu əndje kə ətshə kɔ ə sɔtə̂ ye je kɔ, mbrə ə̂në Âgbɔ̂ Yîrə̂ nə tê tê pa ə na ne, ə̂në Ndjapä nə tê tê pa ə yisə̂ ə̂yî Jezu nə gashu ne kɔ.

40 Lə ə̂kpû azü nə, alabə̈ azü nə ə̂në əndje djî aəpʉ səkɔ pâ əpʉ ə pa: «Djatra əpʉ, ətshə də̂ Awopandəma Ndjapä nə!» 41 Alabə̈ əndje pâ: «Kristə nə kə sə̂!» Alabə̈ aata əndje pâ: «Kristə nə lï ndə kə to mâ Galile â na a? 42 Fraka nə̂ Ndjapä pâ pâ əpʉ ə pa Kristə nə ə to lə angwa Davidə ə to mâ Beteləyamə, tshelagɔ nə̂ Davidə nə â na ne a?» 43 Rəkɔ, mbrə Jezu nə, tshelə ə̂kpû azü nə krû. 44 Alabə̈ azü nə lə takpa tə̂ əndje yîndə kə tegbɔ Jezu nə, bale əzü bale lî lî ndə kə za ətshə ne.

45 Atrugu nə dô tə̂ əndje ə gû gâ ngotə̂ aâgbɔ̂ azü nə̂ aawotokrɔ nə gâ ndə Afariza nə â əndje yû əndje ə pa: «E gû gû də ətshə ne mbrə yekɔ?» 46 Atrugu nə kîrə əpʉ ə pa: «Alɔ bale ə̈bə̈ əzü pâ əpʉ pâ mata koshe sə̂ ne!» 47 Afariza nə yû əndje ə pa: «E-e ndje, tshə djîngli tshelə akrɔ e gâ ye a? 48 Ə̈bə̈ əzü lə takpa tə̂ amakɔndji nə̂ əzə̂ wala lə takpa tə̂ Afariza zâ lɔsu ye kə ətshə gâ ye a? 49 Bale, ə̂kpû azü səkɔ ə̂në əndje wûsə̂ âgbɔ̂ əpʉ nə̂ Mayïzə wû ne kɔ, Ndjapä drâ əndje gâ ye.»

50 Nikɔdamə, ə̂në tshə nâ ə tê Jezu angbʉlînə gâ ye kɔ, ə̂në tshə sə tə ə̈bə̈ Fariza nə kɔ, pâ kə əndje ə pa: 51 «Âgbɔ̂ əpʉ nə̂ əzə̂ za äwä kə əzə̂ ndə kə pa a wa ngbanga gâ lə kumu ə̈bə̈ əzü angbʉlînə ndə kə pa a dji ətshə ə wusə̂ ərə ə̂në tshə mbrə kɔ a?» 52 Əndje kîrə əpʉ kə ətshə ə pa: «Bə sə kəmə tə əzü tshe Galile, əbə ndje a? Prä lə Fraka nə̂ Ndjapä ə wü, bə sə kə wu ə pa ə̈bə̈ awopandəma Ndjapä bale a afɔ mâ Galile ə na ne.»

*[53 Mandânə, əzü bale bale gû na ye gâ lə manda nə̂ ye.