1 Alɔ ə̂në əndje ndô trö də gala Jeruzalamə, trö də tshelagɔ Betəfaje gâ ndə Betani, gâ tə̂ kaga aayɔ ɔlivə kɔ, Jezu wlâ alabə̈ atrawaya nə̂ ye bishi 2 ə pâ kə əndje ə pa: «E nä mâ lagɔ ə̂në ə sə ətshi e kɔ. Alɔ ə̂në e sə kə yi kumu e gâ lagɔ nə, e sə kə sɔtə̂ ə̈bə̈ aya kunda ə̂në əndje dû ətshə, ə̂në əzü bale te te pa ə o gâ pâ ye ne kɔ. E wöra ətshə ə gü də ətshə kə əmə. 3 Kədə ə̈bə̈ əzü yu e ə pa: "E sə kə ma ərə rəke mbrə yekɔ?", e pä kə ətshə ə pa: "Âgbɔ̂ Əyïngerə yində ye. Tshə sə kə katə̂ ye katshä ndə kə pa e gu də ətshə mâtəye."»

4 Əndje nâ na ye ə sɔ̂tə̂ ə̈bə̈ aya kunda ə̂në əndje î ətshə gashu gâ lə ə̈bə̈ manda tə̂ äwä. Əndje wôra ətshə. 5 Alabə̈ azü ə̂në əndje sə̂ je kɔ pâ kə əndje ə pa: «Ərə yekɔ də̂ e mbrə kɔ? E wora aya kunda səye ndə yekɔ?»

6 Əndje kîrə əpʉ mata ə̂në Jezu nə pâ kɔ. Azü nə kâtə̂ əndje â əndje gû na ye. 7 Əndje gû də aya kunda nə kə Jezu nə. Əndje kô aləba nə̂ əndje gâ pâ kunda nə â Jezu nə ô gâ pâ ye. 8 Alabə̈ azü ə̂në əndje ngbâ ə ngbâ kɔ sâka aləba nə̂ əndje gâ ala äwä nə, alabə̈ əndje gʉ̂ atəyu kako ə̂në əndje ngɔ̂ lə güsü kɔ gâ ala äwä nə. 9 Azü ə̂në əndje sə̂ gâ ətshi nə də əndje ə̂në əndje sə̂ gâ mandâ Jezu nə kɔ tâ râwâ ə pa:

«A mbë Ndjapä!

Ndjapä tö ngwarə gâ pâ ətshə ə̂në tshə sə kə na də əɨrɨ Əyïlingû kɔ!

10 Əyïlingû tö ngwarə gâ pâ əgɔngerə ə̂në ə na gu nə kɔ, əgɔngerə nə̂ Davidə, abä əzə̂!

A mbë Ndjapä ə̂në tshə sə mâ ngâ lafɔ kɔ!»*

11 Jezu lî gâ lə gala Jeruzalamə ə nâ mâ lə Anda Ndjapä. Tshə wû aərə nɔ̂, mandânə, tshə nâ mâ lagɔ Betani də atrawaya nə̂ ye morofo amanə bishi nə, mbrə ə̂në ətshe vɔ̂tə̂ kə bu nə gâ ye.

12 Tshe nə krâ, alɔ ə̂në əndje sə̂ kə afɔ lagɔ Betani nə kɔ, əgo mî Jezu. 13 Tshə wû ə̈bə̈ ayɔ figə ə̂në akako nə sə̂ tə̂ nə kɔ ngrʉ̂. Tshə nâ ndə kə wu ə pa əte əne sɔ̂tə̂ aleyɔ nə je. Bale, tshə nâ trö tə̂ ayɔ nə ə wû kʉtə̂ akako nə, mbrə ə̂në tshekɨ kə le aayɔ figə sə̂ pə je. 14 Bale, Jezu pâ kə ayɔ figə nə ə pa: «Ə̈bə̈ əzü sə sə kə zɨ ə̂lê zə mandânə səye bale ne!» Atrawaya nə̂ ye nə djî əpʉ nə ə̂në tshə pâ kɔ.

15 Əndje yî kumu əndje mâ Jeruzalamə. Jezu lî gâ lə Anda Ndjapä ə vɔ̂tə̂ kə grɔ azü ə̂në əndje sə̂ kə ka aərə də azü ə̂në əndje sə̂ kə yɔ aərə lə Anda Ndjapä nə kɔ. Tshə gêta agbarə ə̂në aawoshandje ngendja sə̂ kə shandje angendja nə̂ əndje pâ nə kɔ ə gêta angende nə̂ aawoka aplejɔ nɔ̂ gâ tʉ. 16 Tshə kâtə̂ ə̈bə̈ əzü kâ bale ndə kə pa tshə za ə̈bə̈ ərə ə ro də nə lə Anda Ndjapä nə ne. 17 Tshə yîsə̂ əpʉ kə əndje ə pa: «Fraka nə̂ Ndjapä pâ: "Əndje sə kə e Anda nə̂ əmə tə anda kə yu Ndjapä lə nə mbrə amarä nɔ̂." Bale e-e, e dô tə grokpɔ alayïangba.»*

18 Aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə djî əpʉ nə ə̂në Jezu nə pâ kɔ, â əndje prâ äwä ndə kə wo ətshə. Əndje mâ awa ye mbrə ə̂në kə yisə̂ ərə nə̂ ye zâ lɔsu ə̂kpû azü nə. 19 Də lɔkədɨ nə, Jezu də atrawaya nə̂ ye nə wûtu lə gala nə.

20 Də əzɨ nə, ə̂në əndje sə̂ kə ro nə kɔ, atrawaya nə wû ayɔ figə nə ə ôrɔ sɔ tə̂ aəshe nə nɔ̂ kɔ. 21 Ə̂sə̂ ərə sə̂ ə̂në ə mâ kɔ tê gâ lə Piarə â tshə pâ kə Jezu nə ə pa: «Awoyisə̂ ərə, wü ayɔ figə nə ə̂në bə drâ kɔ ə ôrɔ gâ ye.» 22 Bale, Jezu zâ əpʉ ə pâ kə atrawaya nə ə pa: «E zä lɔsu e kə Ndjapä! 23 Djatra əpʉ, mə pa kə e: kədə ə̈bə̈ əzü kə pa kə kaga səye ə pa: "Äfɔ kotəye ə të gâ lə ə̂ngû əngbrʉ", â kədə tshə sə sə də ashera tə̂ lɔsu ye ne, â wusə̂ nə mâ tə̂ lɔsu ye ə pa əpʉ nə ə̂në əne pâ kɔ ndəma nə sə kə mbrə nə, ndəma nə sə kə mbrə nə ngâ. 24 Âdârə ə̂në, mə pa kə e: Ərə nɔ̂ ə̂në e sə kə yu tshuku nə tə̂ äwä kə yu Ndjapä, e wüsə̂ nə mâ tə̂ lɔsu e ə pa e sɔ̂tə̂ nə gâ ye. Ndjapä sə kə za ərə səkɔ kə e. 25 Alɔ ə̂në e ka gâ lafɔ ndə kə yu Ndjapä, kədə e sə də ə̈bə̈ əpʉ də ə̈bə̈ əzü, e gbä tshelə əpʉ nə lə kumu ye kanika Abä e ə̂në tshə sə mâ lafɔ kɔ, tshə gba ndje tshelə aəpʉ nə̂ e lə kumu e. [26 Bale, kədə e gba tshelə aəpʉ gba lə kumu angâ e ne, Abä e ə̂në tshə sə mâ lafɔ kɔ, tshə sə sə kə gba tshelə aəpʉ nə̂ e lə kumu e bale ne.]*»

27 Əndje dô tə̂ əndje kwatəndje ə gû mâ Jeruzalamə. Ə̂në Jezu sə̂ kə na dji ətshe lə Anda Ndjapä nə kɔ, aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə gâ ndə aâgbɔ̂ azü nâ gâ tə̂ ye. 28 Əndje yû ətshə ə pa: «Əde kə zâ äwä kə əbə â bə ma aərə səkɔ? Əde kə zâ ama kə əbə â bə ma aərə səkɔ?» 29 Jezu kîrə əpʉ kə əndje ə pa: «Mə sə kə yu e də əpʉ bale, e kirə əpʉ kə əmə ka mə yisə̂ əzü nə ə̂në tshə zâ ama kə əmə â mə mbrə də aərə səkɔ. 30 Əde kə wlâ Zââ â tshə zâ batamo kə azü kɔ? Ndjapä wala azü kə wlâ ətshə kɔ a? E kïrə əpʉ kə əmə.»

31 Bale, əndje pâ lə takpa tə̂ əndje ə pa: «Kədə a kirə əpʉ ə pa: "Ndjapä kə wlâ Zââ", tshə sə kə yu əzə̂ ə pa: "Mbrə yekɔ də̂ e yîndə əpʉ nə̂ ye nə yî ne kɔ?" 32 Kədə a kirə əpʉ ə pa: "Azü kə wlâ Zââ kɔ", bale…» Bale, əndje mâ awa azü əgɔ nə ə mâ, mbrə ə̂në azü nɔ̂ wûsə̂ Zââ nə tə djatra awopandəma Ndjapä. 33 Bale, əndje kîrə əpʉ kə Jezu nə ə pa: «Ä wusə̂ nə wu ne.» Jezu pâ kə əndje ə pa: «Əmə ndje, mə sə sə kə yisə̂ əzü ə̂në tshə zâ äwä kə əmə ndə kə mbrə aərə səkɔ kə e ne.»