1 Ə dâka pə əlo bishi ndə kə pa əlo sandaga Pakə də ənə̂ mapa ə̂në əndje mâ mâ də əyï nə ne kɔ ə lï. Aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə sə̂ kə pra äwä ə̂në əndje lï ndə kə pa əndje tegbɔ Jezu tə̂ nə tə̂ äwä afrɔ ə wo ətshə. 2 Mbrə ə̂në əndje pâ lə takpa tə̂ əndje ə pa: «A zä zä ətshə tə̂ alɔ sandaga ndə kə pa azü a afɔ də awlra ne.»

3 Jezu sə̂ mâ lagɔ Betani lə anda nə̂ Shemɔ, əyïbroma. Tshə sə̂ gâ tʉ ə sə̂ kə zɨ rəgo â ə̈bə̈ yashe lî də anga ə̂në əndje mbrə̂ də ə̈bə̈ əkpʉ ə̂në əɨrɨ nə kə də̂ aləbatrə kɔ, yombo nə̂ əgerə ndogɔ ə̂në əndje mbrə̂ kʉ də narə* kɔ sə̂ lə nə. Yashe nə ngɔ̂ ama anga nə â sɨ̂ yombo nə gâ lə kumu Jezu. 4 Alabə̈ azü ə̂në əndje sə̂ je lə anda nə kɔ, tshelə əndje kô əndje â əndje pâ lə takpa tə̂ əndje ə pa: «Əndje ndɨ yombo səye rə ndə yekɔ? 5 Əndje lî kəmə ndə kə pa əndje ka də deniye* ngbangbo vəta (300) ə ko ngendja nə kəmə kə alayïəyo.»

Əndje pâ tə̂ yashe səkɔ ʉrrr. 6 Bale, Jezu pâ əpʉ ə pa: «E kätə̂ ye! E za ama e gâ pâ ye mbrə yekɔ? Ərə ə̂në tshə mbrə̂ kə əmə kɔ ə sə tə ə̂rɔ̂ ərə. 7 Mbrə ə̂në alayïəyo sə kə sə lə takpa tə̂ e alɔnɔ̂. E lï ndə kə pa e ma ə̂rɔ̂ ərə kə əndje tə̂ əlo nɔ̂ ə̂në tshelə e yində nə. Bale, əmə, mə sə sə kə sə pə lə takpa tə̂ e alɔnɔ̂ ne. 8 Tshə mbrə̂ ərə ə̂në tshə lî ndə kə pa tshə mbrə nə kɔ. Tshə sɨ̂ yombo gâ tə̂ əmə angbʉlînə ndə kə pa əndje shi əmə. 9 Djatra əpʉ, mə pa kə e, tə̂ ətshe nɔ̂ ə̂në əndje sə kə yisə̂ Ə̂rɔ̂ Əpʉ pâ ashɔ nɔ̂, əndje sə kə pa ndje ndəma ərə nə ə̂në yashe səye mbrə̂ kɔ ndə kə pa ə̂sə̂ ye djerə azü djerə ne.»

10 Judasə Isəkariɔtə, ə̈bə̈ əzü-awla bale lə takpa tə̂ əndje morofo amanə bishi nə, nâ ə wû aâgbɔ̂ azü nə̂ aawotokrɔ ndə kə pa tshə ka Jezu kə əndje. 11 Tshelə əndje mɔ̂ ə̂në əndje djî əpʉ səkɔ â əndje zâ ama ndə kə ko ngendja kə ətshə. Judasə nə sə̂ kə pra ə̈bə̈ ə̂rɔ̂ äwä ndə kə pa tshə ka ətshə kə əndje.

12 Tə̂ angbʉlî əlo sandaga mapa ə̂në əndje mâ mâ də əyï nə ne kɔ, tə̂ əlo kə wo aaya andalimi mbrə rəgo Pakə nə, atrawaya nə̂ Jezu nə yû ətshə ə pa: «Bə yində nə ə pa ä na ə gamba rəgo Pakə nə kə əbə mâta a?» 13 Bale, tshə wlâ alabə̈ atrawaya nə̂ ye bishi ə pâ kə əndje ə pa: «E nä mâ lə gala, e sə kə te ə̈bə̈ koshe ə̂në tshə zâ ləsû ə̂ngû gâ lə kumu ye kɔ, e zä äwä ye, 14 anda ə̂në tshə sə kə li gâ lə nə kɔ, e pä kə əyïnga anda nə ə pa: "Awoyisə̂ ərə pa: Tshelə anda ə̂në əmə də atrawaya nə̂ əmə sə kə zɨ rəgo Pakə lə nə kɔ ə sə kotâ a?" 15 Ətshə, tshə sə kə yisə̂ ə̈bə̈ əgerə tshelə anda kə e djoko lafɔ ə̂në əndje gâmba tshelə nə ə kô agbarə gâ lə nə nɔ̂ gâ ye kɔ. Kôto də̂ e sə kə gamba rəgo Pakə nə lə nə mbrə əzə̂.» 16 Atrawaya nə nâ na ye ə yî kumu əndje mâ lə gala nə mâ je. Əndje sɔ̂tə̂ aərə nə Lïndə̂ əpʉ ə̂në tshə pâ kə əndje kɔ â gâmba rəgo Pakə nə.

17 Ə̂në alɔ dɨ̂ gâ ye kɔ, Jezu yî kumu ye də azü-awla nə̂ ye morofo amanə bishi nə. 18 Alɔ ə̂në əndje sə̂ gâ tʉ ə sə̂ kə zɨ rəgo nə kɔ, Jezu pâ əpʉ ə pa: «Djatra əpʉ, mə pa kə e, ə̈bə̈ əzü bale lə takpa tə̂ e ə̂në ä də ətshə sə kə zɨ rəgo kɔ, tshə sə kə ka əmə.» 19 Əndje vɔ̂tə̂ kə sə də əyo tə̂ lɔsu əndje â əzü bale bale yû ətshə ə pa: «Əmə a?» 20 Tshə kîrə əpʉ kə əndje ə pa: «Ə̈bə̈ ngâ e bale lə e morofo amanə bishi ə̂në ä də ətshə yi kəna ä äwä bale gâ lə sambe rəgo nə kɔ kə sə̂. 21 Əgblə nə̂ Əzü sə kə tshu nə mata ə̂në Fraka nə̂ Ndjapä pâ ndə əpʉ nə gâ ye kɔ. Bale, əyo gâ pâ əzü nə ə̂në tshə sə kə ka Əgblə nə̂ Əzü nə kɔ! Ə sə tə ə̂rɔ̂nə mbrə əzü nə səkɔ ndə kə pa əndje zû kəmə ətshə zû ne.»

22 Alɔ ə̂në əndje sə̂ kə zɨ rəgo nə kɔ, Jezu zâ mapa â mandânə ə̂në tshə ê ə̂rɔ̂ əpʉ gâ pâ nə gâ ye kɔ, tshə ngɔ̂ tshelə nə ə kô kə əndje ə pâ: «E kö ə zɨ̈, ə sə tə tshekotə̂ əmə.» 23 Mandânə, tshə zâ kopo duva ə zâ mərshe kə Ndjapä ə zâ kə əndje â əndje nɔ̂ ndjû. 24 Tshə pâ kə əndje ə pa: «Ə sə tə ə̈ndjï əmə, ə̈ndjï mbʉkʉ nə̂ Ndjapä ə̂në ə tû mbrə ə̂kpû azü kɔ. 25 Djatra əpʉ, mə pa kə e, mə sə sə kə ndju kwatə̂mə ə̂ngû ə̂lê vinyə mandânə səye ne ʉrrr ndjɔ gâ tə̂ əlo ə̂në mə sə kə ndju kwatə̂mə mâ lə Əgɔngerə nə̂ Ndjapä.»

26 Mandânə ə̂në əndje vî aətshi lə fraka Aətshi gâ ye kɔ, əndje nâ mâ pâ kaga aayɔ ɔlivə. 27 Jezu pâ kə atrawaya nə̂ ye nə ə pa: «E sə kə tshi əmə tʉ nɔ̂, mbrə ə̂në Fraka nə̂ Ndjapä pâ:

"Mə sə kə wo awobata aagia nə

â andalimi nə sə kə ndjɔ tshelə əndje."*

28 Bale, mandâ kə she əmə, mə sə kə ka mbrə e mâ lə ashɔ əgɔ Galile-e.» 29 Piarə pâ kə ətshə ə pa: «Alɔ ə̂në azü nɔ̂ tshi əbə tʉ, mə sə sə kə tshi əbə tʉ ne.» 30 Bale, Jezu pâ kə ətshə ə pa: «Djatra əpʉ, mə pa kə əbə, kpəsəye, kʉ də tsheləbu səye, angbʉlînə ndə kə pa kɔngatə kɨ äwä bishi, bə sə kə vʉsə̂ nə ə pa bə wusə̂ əmə wu ne äwä vəta.» 31 Bale, Piarə nə kâ gâ pâ əpʉ nə̂ ye səkɔ ngâ ə pâ: «Â lï kəmə ndə kə pa a də aəmə tshu, mə sə sə kə vʉsə̂ əpʉ nə̂ zə bale ne.» Â əndje nɔ̂ pâ kʉtə̂ əpʉ səkɔ.

32 Mandânə, əndje nâ gâ tə̂ ə̈bə̈ ətshe ə̂në əɨrɨ nə kə də̂ Jetəsemane kɔ â Jezu pâ kə atrawaya nə̂ ye ə pa: «E sə̈ gâ tʉ kotəye, mə sə kə na ə yu Ndjapä.»

33 Tshə ko a-Piarə də Zake gâ ndə Zââ gâ ndə ye. Awa vɔ̂tə̂ kə mbrə ətshə â rô pâ ye. 34 Tshə pâ kə əndje ə pa: «Mə sə də əyo tə̂ lɔsu əmə wââ a pa də mə sə kə tshu ə tshu. E sə̈ pə kotəye ə lö lö ne.» 35 Tshə nâ ngrʉ̂ teashe ə tê gâ tə̂ ashɔ ə yû Ndjapä ndə kə pa, ə də̂ äwä nə â sə je, alɔ əyo səye gi tə̂ ye gashe tə̂ əne. 36 Tshə pâ: «Abba! Abä, bə lï ndə kə pa bə mbrə aərə nɔ̂. Gï kopo əyo səye gashe tə̂ əmə. Lə aərə nɔ̂, ə də̂ ərə ə̂në tshelə əmə yində kɔ də̂ ka bə mbrə ne, bale, ərə ə̂në tshelə zə yində nə kɔ.»

37 Tshə dô tə̂ ye gu nə gâ tə̂ atrawaya nə vəta nə ə wû əndje, əndje lô na ye gâ ye. Tshə pâ kə Piarə nə ə pa: «Shemɔ, bə lô gâ ye a? Bə lï lï ndə kə pa bə sə də ə̈kü ala zə kʉ mbrə ə̈nü alɔ bale ne a? 38 E lö lö ne, e yü Ndjapä kanika ə te te lə afrɔ ərə ne. Yîrə̂ əzü sə də əgo ndə kə ma ə̂rɔ̂ ərə, bale, əndu əzü nə sə sə də awlra ne.»

39 Tshə gî tə̂ ye kwatə̂ye ngrʉ̂ ə yû Ndjapä ə pâ kʉtə̂ əpʉ səkɔ. 40 Tshə gû kwatə̂ye gâ tə̂ atrawaya nə, əndje lô na ye gâ ye, mbrə ə̂në əlo rô pâ əndje gâ ye. Əndje wûsə̂ ə̈bə̈ əpʉ ə̂në əndje pa kə ətshə kɔ wû ne.

41 Tshə dô tə̂ ye ə gû tə̂ äwä vəta nə kwatə̂ye ə pâ kə əndje ə pa: «E sə pə kə lo əlo nə a? E sə pə kə wu tə̂ e a? Ə lî gâ ye! Alɔ nə tɔ̂ gâ ye. E wü-a! Əndje kâ Əgblə nə̂ Əzü gâ lə kəna alayïnyaka gâ ye. 42 E äfɔ, a rö! E wü-a! Əzü ə̂në tshə sə kə ka əmə kɔ ndô trö gâ ye.»

43 Jezu sə̂ pə kə pa əpʉ â Judasə, ə̈bə̈ əzü-awla lə takpa tə̂ əndje morofo amanə bishi nə, yî kumu ye də ə̂kpû azü ngotə̂ ye. Azü nə kô aə̈ngrʉ̈ akamba də aayɔ gâ lə kəna əndje. Aâgbɔ̂ azü nə̂ aawotokrɔ də aawoyisə̂ âgbɔ̂ əpʉ nə̂ Mayïzə də aâgbɔ̂ azü kə wlâ əndje kɔ. 44 Judasə nə, ətshə ə̂në tshə kâ Jezu nə kɔ, yîsə̂ ə̈bə̈ ərə ə̂në tshə sə kə mbrə nə kɔ kə ə̂kpû azü nə. Tshə pâ kə əndje ə pa: «Əzü ə̂në mə sə kə ɔ ama ye kɔ, ətshə kə sə̂! E tëgbɔ ətshə ə gü də ətshə ə kö ala e tə̂ ye tə ə̂rɔ̂nə.» 45 Alɔ ə̂në Judasə nə yî kumu ye kɔ, tshə nâ gâ tə̂ Jezu ə pâ kə ətshə ə pa: «Awoyisə̂ ərə!» Mandânə, tshə ɔ̂ ama ye. 46 Bale, azü nə têgbɔ ətshə ə zâ ətshə. 47 Ə̈bə̈ əzü bale lə takpa tə̂ azü nə ə̂në əndje sə̂ je kɔ gbə̂tɔ ə̈ngrʉ̈ kamba nə̂ ye lə akwa nə ə dê əyïkosəra nə̂ âgbɔ̂ awotokrɔ â dê ətu ye kprû wli gâ tʉ. 48 Jezu zâ əpʉ ə pâ kə əndje ə pa: «E nâ də aə̈ngrʉ̈ akamba də aayɔ ndə kə za əmə a pa də e nâ ndə kə za əyïangba. 49 Mə sə̂ lə takpa tə̂ e alɔnɔ̂, mə yîsə̂ əpʉ lə Anda Ndjapä, e zâ əmə zâ ne. Bale, ərə səye mâ ndə kə pa əpʉ ə̂në Fraka nə̂ Ndjapä pâ kɔ ndəma nə ma.»

50 Bale, atrawaya nə nɔ̂ tshî ətshə tʉ ə kpê gâ ye. 51 Ə̈bə̈ mɔdɔ sə̂ kə za äwä Jezu nə ə î kʉtə̂ kako ləba gâ tə̂ ye. Əndje têgbɔ ətshə, 52 bale, tshə tshî ləba nə tʉ ə kpê kpɔnderɔ.

53 Əndje gû də Jezu nə mâ ndə âgbɔ̂ awotokrɔ, ə̂në ə̂dû aâgbɔ̂ azü nə̂ aawotokrɔ nə nɔ̂ də aâgbɔ̂ azü də aawoyisə̂ âgbɔ̂ əpʉ nə̂ Mayïzə ngbô tə̂ əndje gâ tə̂ nə mâ je kɔ. 54 Piarə nə zâ äwä Jezu nə ə sə̂ ngrʉ̂ ʉrrr ndjɔ mâ lə bəngʉ nə̂ âgbɔ̂ awotokrɔ nə je. Tshə sə̂ gâ tʉ gâ ndə atrugu gâ ndʉ əwo.

55 Aâgbɔ̂ azü nə̂ aawotokrɔ nə də aangbɔ ngbanga nə̂ Ajuwufu nə nɔ̂ sə̂ kə pra ə̈bə̈ əpʉ ndə kə pa əndje za gâ lə kumu Jezu kanika ə wo ətshə. Bale, əndje sɔ̂tə̂ əpʉ nə sɔ̂ ne. 56 Alabə̈ azü nə pâ aəpʉ əterə gâ lə kumu ye, bale, aəpʉ nə ngbô tə̂ əndje ngbô gâ tə̂ nə ne. 57 Alabə̈ əndje âfɔ ə pâ əpʉ əterə gâ lə kumu ye ə pa: 58 «Ä djî ətshə tshə pâ: "Mə sə kə ngɔ Anda Ndjapä səye ə̂në azü mbrə̂ kɔ gâ tʉ â lə aəlo vəta mə sə kə mbrə ata nə ə̂në ə də̂ kəna əzü də̂ kə sə kə mbrə nə ne."» 59 Bale, gâ pâ əpʉ sə̂ ndje, aəpʉ nə̂ əndje nə sə̂ sə̂ äwä bale ne. 60 Bale, âgbɔ̂ awotokrɔ nə âfɔ lə ala azü nə nɔ̂ ə yû Jezu nə ə pa: «Bə sə sə də ə̈bə̈ əpʉ bale ndə kə pa nə ne a? Əpʉ yekɔ də̂ azü səye ə pa gâ lə kumu zə kɔ?» 61 Jezu sə̂ kʉ ngboo ə kîrə əpʉ kîrə bale ne. Âgbɔ̂ awotokrɔ nə yû ətshə kwatə̂ye ə pa: «Bə sə tə Kristə*, Ɨrɨ Ndjapä ə̂në azü ə vrɔ ətshə kɔ a?» 62 Jezu kîrə əpʉ ə pa: «Mə də̂ ətshə. E sə kə wu Əgblə nə̂ Əzü ə̂në tshə sə kə sə gâ tʉ gâ ndə ndəkɔ Ndjapä tə Əyïworɔgbɔ nɔ̂ kɔ. Tshə sə kə to mâ lafɔ ə gu lə andra.»

63 Bale, âgbɔ̂ awotokrɔ nə sûru tshelə aləba nə̂ ye ə pâ: «A sə də əgo ndə kə pa a yu ə̈bə̈ əzü də ə̈bə̈ əpʉ kwatə̂zə a? 64 E djî ə̂gû ə̂në tshə gû Ndjapä də nə kɔ gâ ye. E wü ənə̂ e atâ a?» Azü nə nɔ̂ wâ ngbanga gâ lə kumu ye ə pâ tshə lï də kuzu.

65 Alabə̈ azü nə vɔ̂tə̂ kə ku ngrusu gâ tə̂ ye ə zâ ləba gâ ətshi ye ə dû ətshə də kəna əndje ə pâ kə ətshə ə pa: «Tə awopandəma Ndjapä, djï əɨrɨ əzü ə̂në tshə dû əbə kɔ!» Aawolishi tə̂ ye nə zâ ətshə â da ngâlâ ye ʉrrr.

66 Piarə nə sə̂ pə ənə̂ ye djoko tʉ lə bəngʉ nə. Ə̈bə̈ əyïkosəra nə̂ âgbɔ̂ awotokrɔ nə bale tə yashe nâ. 67 Tshə wû Piarə nə ə̂në tshə sə̂ gâ ndʉ əwo nə kɔ ə shêkɔ ətshə kpə ətshi ye ə pâ kə ətshə ə pa: «Əbə ndje, bə sə tə̂-e gâ ngotə̂ Jezu, əzü əgɔ Nazaratə nə.» 68 Bale, Piarə nə blê əpʉ ə pa: «Mə wusə̂ əpʉ ə̂në bə yində kə pa nə kɔ wu ne, mə wu âdâ nə wu ne.»

Mandânə, tshə wûtu gashu ə nâ gâ tə̂ manda tshelə bəngʉ nə. Kɔngatə kɨ̂. 69 Əyïkosəra nə tə yashe səkɔ, wû ətshə ə vɔ̂tə̂ kə pa kə azü ə̂në əndje sə̂ je kɔ ə pa: «Koshe səye sə tə ə̈bə̈ azü səkɔ.» 70 Piarə nə kwâtə̂ye ə blê əpʉ nə.

Teashe mandânə, azü nə ə̂në əndje sə̂ je kɔ, pâ kə Piarə nə kwatəndje ə pa: «Ngâ, əbə ndje, bə sə tə ə̈bə̈ azü səkɔ, mbrə ə̂në bə sə tə əzü əgɔ Galile.» 71 Bale, tshə vɔ̂tə̂ kə dra tə̂ ye ə drâ ama ye ə pa: «Mə wusə̂ koshe nə ə̂në e pa ndə ye kɔ wu ne!» 72 Kʉ pə kôto, kɔngatə kɨ̂ tə̂ äwä bishi nə â ə̂sə̂ əpʉ sə̂ ə̂në Jezu pâ kə Piarə nə kɔ tê gâ lə ye, ə̂në ə pâ: «Angbʉlînə ndə kə pa kɔngatə kɨ äwä bishi, bə sə kə vʉsə̂ əpʉ əmə äwä vəta.» Bale, Piarə nə vɔ̂tə̂ kə kɨ nə.