1 Lə alabə̈ aəlo mandânə, Jezu dô tə̂ ye ə gû mâ Kaprənayɔmə. Ə̂në azü wûsə̂ nə ə pa tshə sə̂ lə anda kɔ, 2 ə̈bə̈ əgerə ə̂kpû azü ə̂në tshelə anda nə lî lî də əndje ne sɔ lə manda nə kɔ, ngbô tə̂ əndje gâ tə̂ nə. Jezu yîsə̂ Əpʉ Ndjapä kə əndje. 3 Alabə̈ azü vəna zâ ə̈bə̈ wurtʉ ə nâ də ətshə kə Jezu nə. 4 Ə̂në əndje lî lî ndə kə na də ətshə gâ ətshi Jezu nə mbrə ə̂kpû azü nə ne kɔ, əndje sɔ̂ kumu anda nə tə̂ ətshe ə̂në Jezu nə sə̂ tə̂ nə kɔ ə jêrə də klekpa ə̂në wurtʉ nə sə̂ gâ pâ nə kɔ. 5 Ə̂në Jezu nə wû lɔsu əndje kɔ, tshə pâ kə wurtʉ nə ə pa: «Əgblə nə̂ əmə, tshelə anyaka nə̂ zə gbâ gâ ye.»

6 Alabə̈ aawoyisə̂ âgbɔ̂ əpʉ nə̂ Mayïzə sə̂ gâ tʉ mâ je â sə̂ kə pa nə mâ tə̂ lɔsu əndje ə pa: 7 «Mbrə yekɔ də̂ koshe səye ə pa əpʉ rə kɔ? Tshə sə kə gu Ndjapä! Əde kə lï ndə kə gba tshelə anyaka a? Kʉtə̂ Ndjapä tshî!» 8 Kʉ pə kôto, Jezu wûsə̂ əpʉ ə̂në ə sə̂ tə̂ lɔsu əndje kɔ ə pâ kə əndje ə pa: «Mbrə yekɔ də̂ e sə də âkâ əpʉ rə tə̂ lɔsu e kɔ? 9 Ndə kə pa kə wurtʉ nə ə pa: "Tshelə anyaka nə̂ zə gbâ gâ ye", wala: "Äfɔ ə zä klekpa nə̂ zə ə nä ana", ənə̂ta kə gbɔ gbɔ ne? 10 Bale, mə yində kə yisə̂ nə kə e ə pa Əgblə nə̂ Əzü sə də awlra pâ ashɔ səye ndə kə gba tshelə anyaka.» Bale, Jezu pâ kə wurtʉ nə ə pa: 11 «Mə za ama kə əbə, äfɔ ə zä klekpa nə̂ zə ə gü na ye gâ ndə zə!»

12 Trale, koshe nə âfɔ ə zâ klekpa nə̂ ye nə ə wûtu lə ala azü nə nɔ̂ â kumu əndje nɔ̂ kpê pâ əndu əndje â əndje mbê Ndjapä ə pâ: «A wû marä tə̂ aərə rəke wû alɔ bale ne!»

13 Jezu kwâtə̂ye ə nâ mâ tə̂ ama dala ə̂ngû əgɔ Galile nə. Ə̂kpû azü nâ gâ tə̂ ye â tshə sə̂ kə yisə̂ ərə kə əndje. 14 Alɔ ə̂në tshə sə̂ kə ro na na ye kɔ, tshə wû Levi ɨrɨ Alfe, ə̂në tshə sə̂ gâ tʉ gâ ə̂sə̂ kosəra nə̂ ye tə aworɔ ngendja lapɔ kɔ. Jezu pâ kə ətshə ə pa: «Zä äwä əmə!» Levi nə âfɔ â zâ äwä ye.

15 Alɔ ə̂në Jezu nâ ndə kə zɨ rəgo mâ lə anda nə̂ Levi kɔ, ə̂kpû aaworɔ ngendja lapɔ də alayïnyaka sə̂ kə zɨ ərə ndje də ətshə gâ ndə atrawaya nə̂ ye. Mbrə ə̂në azü nə ə̂në əndje zâ äwä ye kɔ ngbâ tə bandanə. 16 Ə̂në Jezu sə̂ kə zɨ rəgo nə kɔ, alabə̈ Afariza ə̂në əndje sə̂ tə aawoyisə̂ âgbɔ̂ əpʉ nə̂ Mayïzə kɔ wû ə pa Jezu sə̂ kə zɨ rəgo äwä bale də aaworɔ ngendja lapɔ də alayïnyaka, əndje pâ kə atrawaya nə̂ ye nə ə pa: «Mbrə yekɔ də̂ tshə sə kə zɨ ərə də aaworɔ ngendja lapɔ də alayïnyaka bale kɔ?»

17 Jezu djî əpʉ nə ə̂në əndje pâ kɔ ə pâ kə əndje ə pa: «Azü ə̂në tshelə akwa əndje sə yera ambanə kɔ, əndje sə sə də əgo ndə kə na gâ ndə awombrə ayɔ rəka ne. Bale, kʉtə̂ alayïrəka kə sə də əgo ndə kə na gâ ndə ye. Mə nâ nâ ndə kə e aə̂rɔ̂ azü ne, bale, mə nâ ndə kə e alayïnyaka.»

18 Ndə ə̈bə̈ alɔ, atrawaya nə̂ Zââ Batistə də aəndje nə̂ Afariza sə̂ kə ru tshelə əndje tə̂ rəgo ndə kə yu Ndjapä. Alabə̈ azü nâ ə yû Jezu ə pa: «Mbrə yekɔ də̂ atrawaya nə̂ Zââ Batistə də aəndje nə̂ Afariza sə kə ru tshelə əndje tə̂ rəgo â atrawaya nə̂ zə ru tshelə əndje ru tə̂ rəgo ne kɔ?» 19 Jezu kîrə əpʉ ə pa: «Azü ə̂në əndje ê əndje ndə sandaga kə ko tə̂ koshe də yashe ə̂në koshe nə daka pə lə takpa tə̂ əndje kɔ lï ndə kə ru tshelə əndje tə̂ rəgo a? Bale ne! Kədə äkɔ̈ yashe nə kə daka pə lə takpa tə̂ əndje, əndje lï lï ndə kə ru tshelə əndje tə̂ rəgo ne. 20 Bale, ə̈bə̈ alɔ sə je ə̂në əndje sə kə za äkɔ̈ yashe nə ndə kə ro də ətshə. Tə̂ alɔ nə səkɔ də̂ azü nə lï ndə kə ru tshelə əndje tə̂ rəgo nə.

21 «Ə̈bə̈ əzü wa ama tafa ləba wa ndə kə su gâ tə̂ əku angbrɔ ləba ne. Mbrə ə̂në ama tafa ləba nə sə kə suru tshelə angbrɔ ləba nə â ala əku ləba nə sə kə gerə nə kwatə̂ye rô pâ nə. 22 Ə̈bə̈ əzü sɨ ndje tafa duva sɨ gâ lə angbrɔ anga akwa ne. Kədə əzü kə ma marä tə̂ ərə rə, tshelə anga akwa nə sə kə sɔ nə. Duva nə sə kə tu gâ tə̂ ashɔ â anga nə sə kə ndɨ nə. Bale, əndje sɨ tafa duva gâ lə tafa anga akwa.»

23 Tə̂ ə̈bə̈ əlo saaba, Jezu rô tɔ lə akəndɨ ble*2.23 Ble sə tə ə̂lê rəgo ə̂në ə sə mata rɔsɔ.. Lə ana nə, atrawaya nə̂ ye vɔ̂tə̂ kə kra kumu ble nə ə̂në ə sə tə ama äwä nə kɔ. 24 Alɔ ə̂në Afariza nə wû ərə nə rəkɔ, əndje pâ kə Jezu ə pa: «Wü-a, mbrə yekɔ də̂ atrawaya nə̂ zə sə kə mbrə ərə ə̂në âgbɔ̂ əpʉ zâ äwä zâ ndə kə pa əzü ma tə̂ əlo saaba ne kɔ?*2.24 Kə mbrə kosəra tə̂ əlo saaba sə tə ərə ə̂në âgbɔ̂ əpʉ nə̂ Mayizə kânga äwä tə̂ nə gâ ye.» 25 Jezu kîrə əpʉ kə əndje ə pa: «E dɨ̂ əpʉ ərə ə̂në Davidə də agbɔbəngâ nə mbrə̂ alɔ ə̂në əgo mî əndje ə̂në əndje sə̂ sə̂ də ərə kə zɨ nə ne kɔ dɨ̂ ne a?*2.25 Wu 1Sam 21.2-7. 26 Tshə lî gâ lə gbafa Ndjapä tə̂ alɔ ə̂në Abiatarə sə̂ tə âgbɔ̂ awotokrɔ kɔ ə kô amapa ə̂në əndje tô də əkrɔ kə Ndjapä kɔ ə zɨ̂ ə kô ndje kə azü nə̂ ye, əndje zɨ̂, mapa ə̂në âgbɔ̂ əpʉ zâ ama ndə kə pa kʉtə̂ aawotokrɔ kə lï ndə kə zɨ nə kɔ.» 27 Mandânə, Jezu pâ kə əndje ə pa: «Əndje mâ saaba mbrə əzü, bale, əndje mâ əzü mâ mbrə saaba nə ne. 28 Âdârə ə̂në Əgblə nə̂ Əzü sə ndje tə əyïnga saaba nə kɔ kə sə̂.»