1 Jezu də atrawaya nə̂ ye wûtu djoko ətshî ə̂ngû əgɔ Galile, lə ashɔ əgɔ Jeraza. 2 Pa nə ə̂në Jezu jêrə lə əgerə âgbâ nə gâ ye kɔ, ə̈bə̈ koshe tô mâ pâ aə̂dû ə nâ ndə kə te ətshə. Koshe səkɔ sə̂ də ə̈bə̈ afrɔ yîrə̂ lə ye. 3 Tshə shô kʉ gâ pâ aə̂dû nə. Ə̈bə̈ əzü ndə kə i ətshə də ə̂wû wala də ə̂wû kowɔ gûta gû bale ne. 4 Äwä ngbatshe, əndje kô kowɔ gâ lə aə̈nü ye ə î akəna ye də ə̂wû kowɔ. Bale, tshə sɔ̂ tshelə ə̂wû kowɔ nə ə ngɔ̂ tshelə kowɔ nə nɔ̂. Ə̈bə̈ əzü ndə kə sə də awlra ndə kə pa tshə tegbɔ ətshə ka tshə sə ngboo kɔ gûta gû bale ne. 5 Də alɔ də tsheləbu, tshə sə̂ kʉ gâ pâ aə̂dû, gâ pâ akaga â sə̂ kə ta râwâ â sə̂ kə tshɔ tshekotə̂ ye də badja də aəku.

6 Ə̂në tshə wû Jezu ngrʉ̂ kɔ, tshə kpê ärɔ̈ ə nâ ə gbə̂te gâ tshekudu ye 7 ə tâ râwâ tə âgbɔ̂ ə pa: «Jezu, Ɨrɨ Ndjapä ə̂në tshə sə mâ ngâ lafɔ kɔ, ərə yekɔ nə̂ zə tə̂ əmə? Mə kɨ kə əbə də əɨrɨ Ndjapä, gï gï əyo tə̂ əmə ne!» 8 Koshe nə pâ rə mbrə ə̂në Jezu pâ kə afrɔ yîrə̂ nə ə pa: «Afrɔ yîrə̂, wütu lə koshe səye!» 9 Jezu yû ətshə ə pa: «Əɨrɨ zə kə də̂ əde?» Tshə kîrə əpʉ ə pa: «Əɨrɨ əmə kə də̂ "Ə̂kpû" mbrə ə̂në ä ngba ə ngba.» 10 Tshə kɨ̂ ə̂sə̂ əyo tə̂ ye kə Jezu nə ndə kə pa tshə grɔ aafrɔ ayirə̂ nə grɔ ngrʉ̂ lə əgɔ nə ne.

11 Kandää, ə̈bə̈ ə̂kpû akɔsɔ sə̂ mâ je trö pâ kaga nə ə sə̂ kə zɨ ərə. 12 Aafrɔ ayirə̂ nə kɨ̂ ə̂sə̂ əyo tə̂ əndje kə Jezu nə ə pa: «Wlä ä gâ lə ə̂kpû akɔsɔ səye, ä li gâ lə əndje!» 13 Tshə yîndə nə kə əndje. Aafrɔ ayirə̂ nə wûtu lə koshe nə ə lî gâ lə akɔsɔ nə â ə̂kpû akɔsɔ nə nɔ̂ âfɔ də ärɔ̈ tə̂ matshi kaga nə ə yɔ̂ gâ lə ə̂ngû nə ə tshû nɔ̂. Əndje sə̂ mata sake bishi (2 000).

14 Aawobata akɔsɔ nə kpê ə gû ə pâ ndə əpʉ nə kə azü lə gala nə də aaya aəgɔ. Azü âfɔ ə nâ ndə kə wu ərə nə ə̂në ə wûtu kɔ. 15 Əndje nâ gâ ngotə̂ Jezu nə ə wû koshe nə ə̂në ə̂kpû aafrɔ ayirə̂ nə sə̂ lə ye â wûtu kɔ. Tshə sə̂ gâ tʉ ə yî ləba gâ tə̂ ye ə sə̂ də ə̂rɔ̂ akwa ye. Awa zâ əndje. 16 Azü nə ə̂në əndje wû ərə nə də ala əndje kɔ, əndje pâ ndə əpʉ ərə nə ə̂në ə wûtu gâ tə̂ koshe nə kɔ də ərə ə̂në ə wûtu gâ tə̂ akɔsɔ nə kɔ kə əndje. 17 Bale, əndje vɔ̂tə̂ kə kɨ ə̂sə̂ əyo tə̂ əndje kə Jezu nə ndə kə pa tshə ro lə ashɔ əgɔ nə̂ alane nə.

18 Ə̂në Jezu ô gâ lə əgerə âgbâ ndə kə ro nə kɔ, koshe nə ə̂në aafrɔ ayirə̂ nə wûtu lə ye gâ ye kɔ yû ətshə ə pa: «Mə kɨ kə əbə, kätə̂ əmə, mə sə pə gâ ngotə̂ zə.» 19 Bale, Jezu wə̂ra tə̂ ye ə pâ kə ətshə ə pa: «Gü na ye gâ lə manda nə̂ zə, gâ ndə alayɔ zə ə yïsə̂ əpʉ aərə nɔ̂ ə̂në Âgbɔ̂ Əyïngerə mâ kə əbə tə̂ äwä ə̂rɔ̂tə̂ ye kɔ kə azü.» 20 Koshe nə gû na ye ə vɔ̂tə̂ kə mʉ əpʉ ərə nə ə̂në Jezu mâ kə ətshə kɔ lə Əgɔ-agala morofo. Kumu azü nə nɔ̂ kpê pâ əndu əndje.

21 Jezu gbô ə̂ngû nə də əgerə âgbâ ə yî kumu ye djoko ətshî. Tshə sə̂ gâ tə̂ ama ə̂ngû nə â ə̈bə̈ əgerə ə̂kpû azü sə̂ gâ ngotə̂ ye. 22 Bale, ə̈bə̈ makɔndji anda aangbɔ ə̂në əɨrɨ ye kə də̂ Jaruwusə kɔ tô ə nâ. Alɔ ə̂në tshə wû Jezu nə kɔ, tshə tê gâ tshekudu ye 23 ə kɨ̂ ə̂sə̂ əyo tə̂ ye kə ətshə ʉrrr ə pa: «Əgblə yashe nə̂ əmə ndo trö ndə kə tshu nə, nä ə zä kəna zə gâ pâ ye ndə kə pa tshə she lə kuzu ə sə tə sorô.» 24 Əndje də Jezu nâ na ye. Ə̈bə̈ əgerə ə̂kpû azü zâ äwä Jezu nə â sə̂ kə za tə̂ əndje trɔ ətshə.

25 Kandää, ə̈bə̈ yashe sə̂ je ə̂në rəka ə̈ndjï sə̂ tə̂ ye ə mâ ə̂ngû morofo amanə bishi gâ ye. 26 Tshə wû əyo tə bandanə lə kəna ə̂kpû aawombrə ayɔ rəka â ndɨ̂ aərə nə̂ ye nɔ̂ kə əndje, â rəka nə̂ ye nə kâtə̂ nə kâ bale ne. Bale, tshə wû əyo kwatə̂ye rô pâ nə. 27 Tshə djî ndə Jezu nə. Tshə nâ ə lî gâ lə ə̂kpû azü nə, trö mandâ Jezu nə ə gôro ama ləba nə̂ ye. 28 Mbrə ə̂në tshə pâ mâ lə ye ə pa: «Kədə mə goro kʉtə̂ ama ləba nə̂ ye, rəka nə̂ əmə sə kə nglɔ nə.» 29 Trale, rəka ə̈ndjï nə kâtə̂ nə, tshə wûsə̂ nə ə pa tshelə akwa əne sə̂ yera ambanə. 30 Kʉ pə kôto səkɔ, Jezu wûsə̂ nə ə pa ə̈bə̈ awlra wûtu tə̂ əne gashu. Tshə dô tə̂ ye gâ tə̂ ə̂kpû azü nə ə yû ətshe ə pa: «Əde kə gôro ləba nə̂ əmə kɔ?» 31 Atrawaya nə̂ ye nə pâ kə ətshə ə pa: «Bə wu ə̂kpû azü nə kə sə̂ â sə kə za tə̂ əndje trɔ əbə kɔ, bə kwatə̂zə ə pa: "Əde kə gôro əmə kɔ?"» 32 Bale, Jezu lîshi dji ətshə ndə kə wu əzü nə ə̂në tshə mbrə̂ ərə səkɔ. 33 Yashe nə gûgu də awa mbrə ə̂në tshə wûsə̂ ərə nə ə̂në ə wûtu gâ tə̂ ye kɔ gâ ye. Bale, tshə nâ ə tê gâ tshekudu Jezu nə ə pâ djatra əpʉ nɔ̂ kə ətshə. 34 Bale, Jezu pâ kə ətshə ə pa: «Əgblə yashe nə̂ əmə, lɔsu zə tshɔ̂ əbə gâ ye. Gü na ye lə blatshe, rəka nə̂ zə nə nglɔ̂ gâ ye.»

35 Alɔ ə̂në Jezu sə̂ pə kə pa əpʉ nə kɔ, alabə̈ azü tô mâ lə anda nə̂ makɔndji anda aangbɔ nə ə nâ ə pâ: «Əgblə yashe nə̂ zə nə tshû gâ ye, bə sə kə ka kumu awoyisə̂ ərə nə mbrə yekɔ?» 36 Bale, Jezu zâ lɔsu ye zâ gâ pâ əpʉ nə ə̂në əndje pâ kɔ ne, tshə pâ kə makɔndji anda aangbɔ nə ə pa: «Kätə̂ awa ə zä kʉtə̂ lɔsu zə kə Ndjapä.» 37 Tshə zâ äwä zâ kə ə̈bə̈ əzü ndə kə pa tshə za äwä ye ne, kʉtə̂ Piarə də Zake gâ ndə Zââ aye Zake nə. 38 Alɔ ə̂në əndje yî kumu əndje mâ lə anda nə̂ makɔndji anda aangbɔ nə gâ ye kɔ, Jezu wû ə̂kpû azü nə ə̂në əndje sə̂ kə pa əpʉ tə bandanə â sə̂ kə kɨ nə â sə̂ kə ta râwâ tə âgbɔ̂ kɔ. 39 Tshə lî gâ lə anda nə ə pâ kə azü nə ə pa: «Mbrə yekɔ də̂ e sə kə pa əpʉ â sə kə kɨ nə kɔ? Əgblə nə tshû tshû ne, bale, tshə lô na ye ə lô.»

40 Bale, əndje mɔ̂ ətshə də amɔ. Tshə pâ azü nə nɔ̂ wutu gashu. Tshə kô abä əgblə nə də əyï nə gâ ndə atrawaya nə vəta nə ə̂në əndje zâ äwä ye kɔ gâ ngotə̂ ye ə lî gâ lə anda nə tə̂ ətshe ə̂në əgblə nə sə̂ tə̂ nə kɔ. 41 Tshə têgbɔ kəna əgblə nə ə pâ kə ətshə ə pa: «Talita kumi!» âdâ nə kə də̂: «Əgblə yashe, mə pa kə əbə, äfɔ!»

42 Kʉ pə kôto, əgblə yashe nə âfɔ â vɔ̂tə̂ kə na ana, mbrə ə̂në tshə sə̂ də ə̂ngû morofo amanə bishi. Kumu azü nə kpê pâ əndu əndje tə bandanə. 43 Jezu ngâ kə əndje tə bandanə ndə kə pa əndje pa ndə əpʉ nə pa kə ə̈bə̈ əzü bale ne. Mandânə, tshə pâ kə əndje ə pa: «E kö rəgo kə ətshə tshə zɨ.»