1 Əmə Palɔ, əyïkosəra nə̂ Ndjapä, ə̂në mə sə ndje tə əzü-awla nə̂ Jezu Kristə kɔ.

Ndjapä wlâ əmə kə azü ə̂në tshə kê əndje gâ ye kɔ, ndə kə pa mə yisə̂ äwä əpʉ lɔsu kə əndje də äwä kə wusə̂ djatra əpʉ, ə̂në ə lï də äwä kə tɔ popo Ndjapä nə kɔ. 2 Tshə wlâ əmə rə kanika əndje za lɔsu əndje gâ pâ əpʉ sorô ə̂në ə sə piii kɔ. Ndjapä ə̂në tshə pa əterə pa ne kɔ, tshə zâ ama də əpʉ nə kerə gâ ye angbʉlînə tə̂ alɔ kə mbrə tsheshu. 3 Ə̂në alɔ nə lî gâ ye kɔ, Ndjapä nə, tə̂ Awoshe əzə̂, yîsə̂ əpʉ nə̂ ye gashu, tə̂ äwä əpʉ ə̂në tshə zâ gâ lə ama əmə â zâ ama kə əmə ndə kə mʉ nə kɔ.

4 Titə, adjera əgblə nə̂ əmə lə əpʉ lɔsu bale ə̂në a sə lə nə kɔ, mə wla ngrowô səye kə əbə. Abä də Ndjapä gâ ndə Jezu Kristə, Awoshe əzə̂, mbrə̈ ə̂rɔ̂tə̂ əndje kə əbə ə zä blatshe kə əbə!

5 Mə tshî əbə tʉ mâ Kratə ndə kə pa bə gamba ə̂dû ərə ə̂në ə daka pə ndə kə gamba nə kɔ də äwänə ə ko aâgbɔ̂ azü gâ tə̂ kumu Laglizə lə gala bale bale, ə lï də ərə ə̂në əmə də ə̂tə̂ əmə, mə zâ ama də əpʉ nə kə əbə gâ ye kɔ. 6 Âgbɔ̂ əzü kumu Laglizə lï ndə kə pa ə̈bə̈ əpʉ bale sə sə lə kumu ye ne, tshə sə̈ kʉ də yashe bale, ə sə̈ də aneshe ə̂në əndje zâ lɔsu əndje kə Jezu gâ ye, ə̂në azü lea əndje lea tə̂ əpʉ ə̂trû ne wala əndje sə sə tə aawodji əpʉ dji ne. 7 Mbrə ə̂në ə lï ndə kə pa əzü ə̂në tshə sə tə̂ kumu Laglizə, əpʉ bale sə̈ sə̈ lə kumu ye ne, ə̂në tshə sə tə awobata aərə nə̂ Ndjapä kɔ; tshə sə̈ sə̈ tə əyïgbama wala tə əyïəkɔ wala tə awondju ərə wala tə awombrə koshe wala tə əzü ə̂në tshə sə sə də əgo kə sɔtə̂ aərə tə̂ äwä aərə gana ne. 8 Bale, tshə sə̈ tə əzü kə ko ayirə gâ tə̂ ye tə ə̂rɔ̂nə, tə əzü kə yində ə̂rɔ̂ ərə, tə əzü kə tegbɔ kumu ye, tə əzü kə mbrə ərə də äwänə, tə əzü ə̂në tshə sə kpî mbrə Ndjapä kɔ, tə əzü ə̂në tshə wusə̂ kə ru aəgo tshekotə̂ ye. 9 Tshə lï ndə kə pa tshə ka tshî gâ pâ djatra əpʉ Ndjapä nə ə̂në əndje yîsə̂ nə gâ ye kɔ, kanika ə gbɔgbɔ lɔsu azü tə̂ äwä kə yisə̂ kʉtə̂ əpʉ nə tshî, ka ə wəra tə̂ ye tə̂ aəpʉ nə̂ azü nə ə̂në əndje pa əpʉ ənə̂ əndje nə kpî kɔ.

10 Ngâ, azü ə̂në əndje dji əpʉ dji ne kɔ də aawopa əpʉ tshelə ama ə̂në ə tɔ tɔ gâ tə̂ ə̈bə̈ ərə ne kɔ gâ ndə aawofrɔ azü də aamba aəpʉ kɔ ngba ə ngba, aga nə lə takpa tə̂ Ajuwufu ə̂në əndje dô tə̂ əndje tə azü nə̂ Kristə gâ ye kɔ. 11 Ə lï ndə kə pa bə ngbo ama əndje gâ tə̂ nə, mbrə ə̂në əndje sə kə yisə̂ ərə ə̂në əzü lï lï ndə kə pa tshə yisə̂ nə ne kɔ, mbrə kə sɔtə̂ aərə tə̂ äwä ərə gana, â sə kə djingli tshelə akrɔ azü nɔ̂ lə abəngʉ kɔ. 12 Ə̈bə̈ əzü bale lə takpa tə̂ azü əgɔ Kratə, tə ə̈bə̈ awopandəma ndjapä nə̂ əndje də ə̂tə̂ əndje pâ: «Azü əgɔ Kratə sə tə alayïəterə, tə aəmbrʉ aagia, tə aawozɨ rəgo fro fro, tə alayïadɔ.» 13 Əpʉ sə̂ ə̂në tshə pâ kɔ, ə sə tə djatra əpʉ. Mbrə nə, ngä kə əndje tə bandanə, kanika əndje sə də əpʉ lɔsu ə̂në ə sə yera, 14 ə ro ndə kə pa əndje za lɔsu əndje gâ pâ andəmaterə nə̂ Ajuwufu də aəpʉ ama ə̂në azü kə zâ kɔ ə̂në ə tshî äwä djatra əpʉ nə tʉ gâ ye kɔ. 15 Aərə nɔ̂ sə mvo mbrə azü ə̂në lɔsu əndje sə mvo kɔ. Bale, ə̈bə̈ ərə bale sə sə mvo mbrə azü ə̂në əndje sə lə aəmbrʉ aərə ə za lɔsu əndje za kə Ndjapä ne kɔ ne. Kə wusə̂ ərə nə̂ əndje də lɔsu əndje sə tə əmbrʉ nə gâ ye. 16 Əndje pa lə ama əndje ə pa alane wusə̂ Ndjapä, bale aərə ə̂në əndje sə kə mbrə nə kɔ, yisə̂ nə gashu ə pa əndje wə̂ra tə̂ əndje tə̂ Ndjapä nə gâ ye. Əndje sə tə aərə kene, tə azü kə dji əpʉ dji ne ə lï lï ndə kə mbrə ə̈bə̈ ə̂rɔ̂ ərə bale ne.