1 Iwi nino, mwananhulumyana wangu, sima muchipiwo chimo munaKristo Jesu, 2 akale zwiwakawha kwandili mbeli kwabasumikiji banji zwilondotese banhu balobimbika akale bachatubula kulayija bamwebo.

3 Iwi tambula kujiila sondwi umbuyanana waKristo Jesu. 4 Apana undwi unoti elipa nshingo unongwinila zwinotiwa nabanhu koga, nokuti chinangwa chiche ngichokuguncha wakompanshingo. 5 Unkwikwiji atoombajwa chilemba kuzhe kokuti ekwikwije zwimo mumulawo. 6 Undimi unoshinga nesimba ndiye unokwelela kutanga kuwana unkobe wezwilyo. 7 Yeyesesa pezhulu pezwandinoleba, nokuti Tezi unookupa kuwhisisa muzwinhu zwose yezwi.

8 Kumbulukwa Jesu Kristo, wakamuswa mubafi, unzekululu waDavidi, sezwino bhaunulwa mundebo imbuya yangu, 9 indebo imbuya yandimuyabisilwa ndakasungwa namaketani sombipisi. Koga iwhi lyaMwali alijilosungwa namaketani. 10 Nokudalo ndozwimilila zwose kutila kuti baloshalwa, neebo bewane luchijo munaKristo Jesu bewane kungaima kusinopela. 11 Isumo ine chokomende kuti,

kana tafa naye,

toolalama naye.

12 Tingosimilila,

tootonga naye,

kana tingoondamba,

iye neebo, unootilamba,

13 kana, tisilobimbika,

iye unolamba akabimbika,

nokuti, aangazwilambe, nokukwe.

14 Ubakumbuluje yezwi zwinhu, akale ubalaye pambeli paMwali kuti belekeje kunyenyejana nozwa mabala, zwisinobhancha, koga zwipalaja banowhilila. 15 Ute zwose zwimo mumasimba awo kuti uzwipile kunaMwali sonhu ulovumilwa, unshingi usilokwelela kuba neshoni, unolayija iwhi lyechokomende zwilokwelela. 16 Iba kule nokukwejisa zwisina bumwali, nokuti zwinotungamilila banhu mukusotya Mwali kasakasa, 17 akale indebo yabo inopalalila sechilonda chisino chila. Mukati mwabo muna naHayimaneyasi naFiletasi, 18 ibo babhuda muchokomende beti kumuka kubafi kwakatikana kale. Bamubulaya kudimbwa kwabamwe. 19 Koga chimisikilo chaMwali chimile chisimu nemhande yamabala yawa "Tezi unobaziba babe," akale, "Wose unoshoba izina lyaTezi ebhude mububi."

20 Mungumba ihulwana amuna chete zwibigilo zwendalama nesiliva koga munowanikwabo zwezwi kunyana nozwevu, akale zwimwe zwemishingo mikulwana, zwimwe zwemishingo ipasi. 21 Kana aani angozwichenesa muzwinhu zwibi, unoba chibigilo chezwinokujwa, chilo cheneswa akale china nshingo kunaTezi wengumba, chilo milila kana upi zwawo unshingo umbuya. 22 Nokudalo tizha zwilakamilo zwobutukutuku unange bululami, kudimbwa, ludo, nolunyalalo, pamwempela naabo banoshomeja Tezi nomwoyo unchena. 23 Nokudalo bhuda mukunyenyejana kuna bulema kusina maano, kwaunoziba kuti kunozwala kukakabajana. 24 Akale unshingi waTezi aatokwelela kuba wokukakabajana koga uneshe kunhu wose, unotubula kulayija, unamwoyo undefu, 25 elulamisa banounyenyeja zwinyolonyolo. Umwe unshaji Mwali angabata kuti beshanduke akale bezibe ichokomende, 26 Akale bangoobwilila mundangalilo jabo imbuya kova bepunyuka mukalabwi kaGuluzhanje, kuva mubuzike bubwe bokuta chido chiche.