MAKOWE 6

Ayangatiyi saba ba atumilwe

1 Mumasu’ba galu' bu’kana na isabu ya banamasi' mwaiyongekeyage muno, ngakupitya maku’ku’li’ko kati ya au’bi’lya ba Kiyunani na au’bi’lya ba Kiyahudi. Baatiku’ku’li’ka kwa mwanjaa alwawa awi’li’ka ba Kiyunani baatilibalilwa nsimu wo baganilwa ilyo ya kila lisu’ba. 2 Kwa nyo balu' atumilwe ku’mi na abi’li' ngabakema kitamo sa ipi’nga yoti ya banamasi' na kwabakia, "Yaalu’a nogelelyali twenga kotoka ala mayi’gi’yo ga Nnu’ngu', kwa kitumbu sa lyengo lya kwabagana ilyo. 3 Kwa nyo mwaalongo, musawe nkati yinu bandu saba babatanganikwe panga batwi’li’yilwe na Loo Mpeleteu na bene ikima. Abo tuwesa kwapeya lyengo li’no, 4 na twenga tubinia yendelya lu’ba Nnu’ngu' no ala liyi’gi’yo lyake."

5 Galu' gabaagalongei ngagayi’ki’ti’lwa na bandu boti, nabembe ngabaasawa Sitefano, mundu ywatwi’li’yilwe imani na Loo Mpeleteu na Pilipi, Plokolo, Nikanoli, Timoni, Pamena na Nikola ywa Antiokia ywaagalambwike panga Nnyahudi. 6 Ngabaaleta bandu bo nnu’ngi' ya atumilwe, nabembe ngabaabi’kya maboko panani yabe kwalu’bya.

7 Liyi’gi’yo lya Nnu’ngu' ngaliyendelya bamba, na isabu ya banamasi' ngaiyongekeya muno mu Yelusalemu ata api’ndo bambone ba dini ya Kiyahudi ngabamwu’bi’lya Yesu.

Boyolwa kwa Sitefano

8 Bai, Sitefano aai apeyilwe ngu’ngu' na makakala bu’ka kwa Nnu’ngu', aapangite myasu na mangelongelo maku’lu' kwa bandu. 9 Lakini ngakupitya bandu nsi’si' ngabataukana nakwe Sitefano. Bandu bo baai munyumba ya kunnu’ba Nnu’ngu' yaitanganikwe kwa lina lya "Bandu Ulu" nabembe baaumi ilambo ya Kilene na Alesandulia na bi’ngi' bu’ka mumili’ma ya Kilikia na Asia. Bandu bo ngabayendelya taukana na Sitefano. 10 Lakini bankombwili, kwa mwanjaa ya ikima yake na Loo Mpeleteu ywannongoyage longela. 11 Ngabaapeya mbanje bandu nsi’si', li’nga bakong’ondeli ubu’su' panga, "Tunnyu’wine Sitefano kaala mayi’gi’yo go kupulu kwa Musa na Nnu’ngu'." 12 Ngabaasopa bandu, api’ndo na balimu ba salya, nabembe ngabammoywa Sitefano na kumpeleka ku Balasa Liku’lu'. 13 Ngabaaleta akong’ondeli ba ubu’su' babaabaite, "Mundu yu' akotokali baya mayi’gi’yo go kupulu Nyumba ya Nnu’ngu' witu mpeleteu pamope na salya ya Musa. 14 Tunnyu’wine kabaya panga ayu' Yesu ywa ku Nasaleti, alu’a paalabiya pandu papeleteu no galambwa mimu yatupeyilwe na Musa." 15 Bandu boti babaabile palu' pakitamo sa balasa bammu’nju’li minyo Sitefano, ngabammona kuminyo yake kugalambwike, kubile kati malaika.