Puro 26

Taragula mala Yahweh

1 <<Sǝ Taragula mǝnana awu nǝ pàk ka, pàk ɓālǝi nǝ alagìr lum mǝnana à teǎ nǝ nkonggúr-linǝn mana à pyauwì ka andǝ nkonggúr ɗà’ndíng mǝlùre, andǝ mǝwanye, andǝ mǝbangŋe. Mǝ’sǝlǝ pakkiagir ɓǝ̀ peǎ sǝ ɓǝ̀ tà pǎ mala acerup ɓǝà lǝmdǝa arǝia. 2 Amǝnia yì alagìr lum ngga, ɓǝà kārǝa; sauwa malea ɓǝ̀ pàk ɓakusǝu lumi-ine nǝ mǝsǝi ɓari, sǝ tangŋa malea ka ɓǝ̀ pàk ɓakusǝu tongno-nong-mwashat. 3 Tongno atà alagìr mǝnia ka, awu nǝ kpapia sǝ awu nǝ swària a kunarǝia ɓǝà duk lagìr mǝsauwe mwashat. Anggo gbal sǝ awu nǝ pangnǝ acilia mǝno tongno ka. 4 Awu nǝ pakkì atǝkrǝk nǝ nkonggúr ɗà’ndíng mǝlùre, sǝ awu nǝ ɗúrkia a nkanggari arǝia a gírí-kún komǝye atà alagìr mǝsake mǝno ka. 5 Awu nǝ ɗúrki atǝkrǝk nkonggúr lumi-tongno a gírí-kún mwashat atà alagìr amǝsake mǝno ka; anggo gbal ɓè man mwashat ka ɗúrkì wi atǝkrǝk nkonggúr male lumi-tongno mǝnana à nǝ̀ cam a nkāɓe gǝ̀rgǝ̀r andǝ amǝno à ɗúrkia arǝ gírí-kún lagìr mǝdǝmbe ka. 6 Awu nǝ pàk anlǐ-bwalkúngir lumi-tongno nǝ bolo-njengǝlan. Bwalki atǝkrǝk gírí-kún lagìr mǝsauwe man mwashat ka, wu kpapia a kúnarǝ atǝkrǝk gírí-kún ɓe lagìr mǝsauwe mǝno ka nǝ anlǐ-bwalkúngir, ace mǝnana yì alagìr mǝsake ka ɓǝà duk mwashat. Anggo sǝ nǝ̀ do ama Taragula ka, lagìr mwashat na à pè nǝi ka.

7 <<Awu nǝ pàk alagìr-nggû nǝ anggu-mbulpǝndǝa lum-nong-mwashat ace kùmsǝ múr Taragula. 8 Amǝnia yì anggu-mbulpǝndǝa lum-nong-mwashat ka ɓǝà kārǝa; sauwa mala komǝye ka ɓǝ̀ pàk ɓakusǝu lumi-ine bwamdǝ tongno, sǝ tangŋa mala komǝye ka ɓǝ̀ pàk ɓakusǝu tongno-nong-mwashat. 9 Tongno ateà ka awu nǝ kpapia sǝ awu nǝ swària a kunarǝia ɓǝà duk lagìr-nggû mǝsauwe mwashat, sǝ aman tongno-nong-mwashat ka swària gbal a kunarǝia ɓǝà duk ɓaria lagìr-nggû mǝsauwe mwashat. Tongno-nong-mwashatia nggu-mbulpǝndǝa mǝnana masǝlǝì aɓî a kún lagìr-nggû mǝnia ka, kàrrì aɓalǝarǝia ɓari ɓǝ̀ gyare a ɓadǝm Tara-mǝfele. 10 Awu nǝ ɗúrki atǝkrǝk nkonggúr lumi-tongno a nkanggari arǝia a gírí-kún komǝye atà alagìr-nggû amǝsake mǝnia ka. 11 Awu nǝ pàk anlǐ-bwalkúngir nǝ bolo-bángŋá, yia lumi-tongno. Awu nǝ oasǝkia aɓalǝ atǝkrǝk gírí-kún alagìr-nggû amǝsake mǝnia ɓari ka, sǝ awu nǝ kpapia a kúnarǝia ɓǝà duk lagìr-nggû nggea mǝgule mwashat, ace mǝnana ɓǝà gìrna múr Tara-mǝfele nǝi ka. 12 Cili lagìr-nggû mǝnana ueo sǝ à lǝpì ka, ɓǝà nyesǝi ɓǝ̀ gyare a nzǝm Taragula. 13 Cili sauwa mala lagìr-nggû, ɓakusǝu mwashat nǝ incì tongno-nong-mwashat mǝnana ueo sǝ sùlǝî múr Taragula a koya bumban male ka, nyia ɓǝa gyare arǝ abumban, ace mǝnana ɓǝà gìr múr Taragula kat-kat.

14 <<Awu nǝ pàk aɓea lagìr-nggû kàm ɓari ɗǝm ace kùmsǝ múr Taragula. Man mwashat ka pè nǝ nggú ka gam mǝnana à bangsǝi ka, sǝ ɓè man, mǝnana nǝ̀ masǝlǝi aɓî nǝ̀ sarǝa amúrià a kùli ka, pè nǝ nggú mǝɓǝlke mala ambulpǝndǝa.

Anggun mala Taragula

15 <<Awu nǝ̀ pàk anggun-tara ace Taragula nǝ akpamgbang mala nggun-akasiya mǝnana à sárǝ́ pǝrapǝra ka. 16 Koya nggun-tara ka dāh’rya male ɓǝ̀ duk ɓakusǝu lum-bwamdǝ-tongno, sǝ tangŋa male ka, ɓǝ̀ duk ɓakusǝu ɓari nǝ incì tàrú. 17 Akpamgbang ɓari nǝ kúnià kǝla ankpako na awu nǝ kpapia a nkanggari rǝarǝia ɓǝà pàk nggun-tara mwashat ka. Anggo sǝ awu nǝ pàk anggun-tara mala Taragula kat. 18 Awu nǝ pàk anggun-tara lumi-ɓari ace bumban mala Taragula mǝnana sǝn njar-kunmur ka. 19 Awu nǝ pàk agumtǝli-tǝrtà anggun-tara lumi-ine nǝ bolo-azǝrfa. Agumtǝli-tǝrtè ɓari, komǝye ka nǝ tūli male arǝì, à nǝ̀ pà aɓata koya nggun-tara, ace bwal akusǝ akpamgbang amǝ pyalpyalni ɓari mala nggun-tara. 20 A bumban mala Taragula mǝnana sǝn njar-nza ka, awu nǝ tsǝk anggun-tara lumi-ɓari, 21 aɓalǝ agumtǝli-tǝrteà mǝnana à pea nǝ bolo-azǝrfa ka lumi-ine, ɓari a kusǝ koya nggun-tara. 22 Sǝ a nzǝm Taragula, yì bumban male mǝnana sǝn njar-nzali ka, awu nǝ̀ tsǝk anggun-tara kam tongno-nong-mwashat. 23 Awu nǝ pàk aɓea nggun-tara ɓari ɗǝm ace koya bankara a nzǝm Taragula. 24 Anggun-tara ɓari-ɓari mǝnana à nǝ̀ cam a koya bankara a nzǝm Taragula ka, awu nǝ kpapi tǝrtea ɓǝà cam a ban mǝ’mwashati, sǝ múrià ka kùria nǝ gbalmo kàngkàng ɓǝà duk mwashat. Yì anggun-tara arǝ abankara mǝno ɓari ka anggo sǝ awu nǝ pangnǝia. 25 Lǝmdǝ ama ɓǝà kpapia kat ka, nzǝm Taragula nǝ̀ pangnǝ anggun-tara tongno-nong-tàrú aban came aɓalǝ agumtǝli-tǝrteà lum-bwamdǝ-tongno-nong-mwashat, mǝnana à peǎ nǝ bolo-azǝrfa ka; koya nggun-tara ka, kusǝi nǝ̀ pà aɓalǝ agumtǝli-tǝrtè ɓari.

26 <<Awu nǝ pàk anggun-gangndea lum-bwamdǝ-tongno nǝ akpamgbang mala nggun-akasiya ace kpapiki anggun-tara. Tsǝk tongno ɓǝà kpapi anggun-tara mala Taragula a bumban male mǝnana sǝn njar-nza ka, 27 tongno ɓǝà kpapi anggun-tara a bumban mala Taragula mǝnana sǝn njar-kunmur ka, sǝ tongno ka ɓǝà kpapi anggun-tara a bumban mala Taragula a nzǝmi, yì bumban mǝnana sǝn njar-nzali ka. 28 Nggun-gangndea mǝnana nǝ̀ gangndǝi a tsùrú mala anggun-tara ka, nǝ̀ tite arǝ nggun-tara mǝnana nda a masǝlǝata kún-bân, sǝ nǝ̀ sarǝa aban ká ɓè masǝlǝata kún-bân mala Taragula ka. 29 Anggun-tara ka awu nǝ tasǝ rǝia nǝ bolo-njengǝlan, sǝ awu nǝ kùrkia wia agbalmò bolo-njengǝlan ace bwal anggun-gangndea mǝnana à nǝ̀ oasǝkia aɓalǝia ka. Yià anggun-gangndea ka awu nǝ tasǝ rǝia gbal nǝ bolo-njengǝlan. 30 Awu nǝ loasǝ mǝnia yì Taragula ka a pě mǝnana ǝn lǝmdǝo amúr nkono ka.>>

Lagìr-kasǝbân aɓa Taragula

Mǝtalabangŋo bang ama:

31 <<Awu nǝ pàk lagìr-kasǝbân nǝ nggubyau-linǝn ace gau ɓá Taragula. Mǝ’sǝlǝ pakkiagir ɓǝ̀ pàktúró nǝ nkonggúr ɗà’ndíng mǝlùre, andǝ mǝwanye, andǝ mǝbangŋe andǝ mala nkonggúr-linǝn mǝɓǝlke mana à pyauwì ka, ɓǝ̀ tagìr mala acerup ɓǝà lǝmdǝ arǝì. 32 Awu nǝ gyar mǝnia yì lagìr-kasǝbân ngga, nǝ anlǐ-gyargìr mala bolo-njengǝlan, a kún anggun-ɓalǝu ine mala kpamgbang-akasiya, mǝnana à tasǝ rǝia nǝ bolo-njengǝlan, sǝ à camgi aɓalǝ agumtǝli-tǝrteà mala bolo-azǝrfa ka. 33 Awu nǝ bwalki kún lagìr-kasǝbân mǝnia ka nǝ anlǐ-bwalkúngir ɓǝ̀ gyare a kùli arǝ múr Taragula, sǝ awu nǝ tsǝk Akwati mala Acau-nakûn aɓalǝi nǝ nzǝm lagìr-kasǝbân, mǝnana gau Ban Mǝfele andǝ Ban Nggea Mǝfele ka. 34 Awu nǝ tsǝk gìrkún Akwati mala Acau-nakûn, mǝnana nda buno sǝntǝ̀r ka, amur Akwati Kùrcau sǝ awu nǝ tamsǝì aɓa Ban Nggea Mǝfele. 35 A nza nǝ Ban Nggea Mǝfele aɓa Taragula ka, awu nǝ tsǝk kpamgbang mala tsǝk bǝredi ɓǝ̀ cam a nkanggariban nǝ njar-nza; sǝ a nkāɓe male nǝ njar-kunmur ka, awu nǝ tsǝk gìr-tàmsǝ apitǝla.

36 <<Awu nǝ pàk lagìr-gbarban ace bankutio aɓa mǝno yì tara ka. Pè nǝ nkonggúr linǝn mǝɓǝlke mǝnana à pyauwì ka. Mǝ’sǝlǝ tagìr nǝ bù ɓǝ̀ nbákí rǝì nǝ ankonggúr ɗà’ndíng mǝlùre, andǝ mǝwanye, andǝ mǝbangŋe. 37 Awu nǝ pàk anggun-ɓalǝu nǝ kpamgbang-akasiya amǝsake tongno, sǝ awu nǝ tasǝ rǝia nǝ bolo-njengǝlan. Awu nǝ tamsǝ komǝye ka aɓa gumtǝli-tǝrtè mǝnana à pè nǝ bolo-bángŋá ka, sǝ awu nǝ gyar mǝnia yì lagìr-gbarban ngga arǝia nǝ anlǐ-gyargìr mala bolo-njengǝlan.