Ɓakuli nacau nǝ mburkun amǝ’ɓangnǝa male
1 A pwarian ngga, Ɓakuli nacau nǝ aká sǝm kusǝ pas arǝ anjargula ɗàngɗáng, nǝ mburkun amǝ’ɓangnǝa male. 2 Sǝ a masǝlǝata nza man ngga, yi nacau nǝ sǝm, nǝ mburkun Muni, mǝnana twali ɓǝ̀ yì duk mǝliɓala na amur girbunda kat, sǝ nǝ́ yi sǝ pusǝ kuli andǝ nzali ka. 3 Yì Muna mala Ɓakuli ka, nda tǎlaban mala ɓoarɓwa mala Ɓakuli, andǝ purban male yì Ɓakuli. Nǝ́ cau male mǝ’rǝcandǝe sǝ bwal agirbunda kat a banɓwáná.
Anzǝm mana yi langŋǝna acauɓikea ma’sǝm ngga, pǝlǝa do a kùli a bù-mǝlì mala Ɓakuli mǝnana Karban kat ka.
4 Anggo sǝ Muna mala Ɓakuli ka yi kum gulo kútì amǝturonjar, kǝla mǝnana lullǝu mana Tárrí pe wi ka, kútì malea ka.
Gulo mala Yesu amur amǝturonjar
5 Yana ɗe atà amǝturonjar mala Ɓakuli, mǝnana Ɓakuli ne wi àkǝ̀ pwari ama,
<<A nda Munem, yalung ngga,
ǝn dumǝna Tárró>> ka?1:5 Ɓalli gbal aɓa: Ang 2:7.
Ko báng gbal amur ɓekǝ mǝturonjar ama,
<<Mǝ nǝ duk Tárrí,
sǝ yì ka, nǝ̀ duk Munem>> ngga1:5 Ɓalli gbal aɓa: 2Sam 7:14; 1.?
6 Ɗǝm ngga, mǝnana Ɓakuli yinǝ Muna-dǝmba male a ɓanza ka, na ama,
<<Amǝturonjar mala Ɓakuli kat ka,
ɓǝà peri a baní.>>1:6 Ɓalli gbal aɓa: Nggur 32:43.
7 Aɓa cau male amur amǝturonjar ka, Ɓakuli bang ama,
<<Kǝ tsǝk amǝturonjar male ɓǝà pǝlǝ gung,
sǝ amǝtúró male ka, lasǝ bǝsa.>>1:7 Ɓalli gbal aɓa: Ang 104:4.
8 Sǝama amur Muni ka, bang ama,
<<Domurǝm mo, we Ɓakuli ka,
masǝlǝate pà kàm ɗang,
sǝ gara-murǝm mala domurǝm mò ka,
nda do amur mǝsǝcau.
9 We ka, a earce ɓealɓoarna,
sǝ a ɓinǝce ɓealɓikea;
ace mani ka, Ɓakuli, yì Ɓakuli mô,
loasǝo tsǝio amur aɓio
yì mǝnana yí ɗārǝo nǝ
mùrú mala bumpwasǝa ka.>>1:9 Ɓalli gbal aɓa: Ang 45:6-7.
10 Nyar ɗǝm na ama,
<<We Mǝtalabangŋo, a tite ka,
a nda a kwakita ɓanza,
sǝ a pak kùli nǝ abuo ka.
11 Yia ka, tea nǝ̀ twalo,
sǝ We ka, a nda àkǝ̀ banì,
a pà nǝ gǝshi ɗang;
yia ka, à nǝ̀ tsǝuri
kǝla eakǝna lagir.
12 We ka, a nǝ kàrria kǝla kàr lagir;
à nǝ̀ nggáɗiǎ kǝla nggubyau.
Sǝ mo ka, a pà nǝ nggaɗi ɗang,
apǝlǝa mo pà nǝ̀ mal ɗang.>>1:12 Ɓalli gbal aɓa: Ang 102:25-27.
13 Atà amǝturonjar ka, yana Ɓakuli ne wi àkǝ̀ pwari ama,
<<Do a buam-mǝlì, she ɓǝ̀ ǝn nyesǝna
aɓio amǝbura à pǝlǝna
buno’tsǝk-kusǝu a ɓakusǝo ka?>>1:13 Ɓalli gbal aɓa: Ang 110:1.
14 Nggearǝ amǝturonjar kat ka, abangŋo na mǝnana à pàkkiyi túró, à kǝ túriá ɓǝà kǝ ɗenyinǝ aɓwana mǝnana à nǝ̀ kum amsǝban ngga re?