1 Mūgula cau mǝnana sǝm nakiyi ka, nda mǝnana ama, sǝm ndanǝ mǝno yì Pǝris Mǝgule mǝnana nda aban do a bù-mǝlì mala buno-murǝm mala Ɓakuli mǝnana karban kat ka, a kùli. 2 Akanó sǝ kǝ pak túró male mala Pǝris Mǝgule, aɓa Ban Nggea Mǝfele, yì Taragula mǝɓafoe mǝnana Mǝtalabangŋo nǝ̀ ɓè, ɓwapǝndǝa na raka.

3 Sǝ acemǝnana koya Pǝris Mǝgule ka, à twali ace mǝnana ɓǝ̀ kǝ pà agir-nkila andǝ aɓoro aban Ɓakuli ka, anggo gbal sǝ mǝnia yì Pǝris Mǝgule ma’sǝm ngga, dumǝna ama she nǝ̀ pang nǝ ɓe gìr a buì, mana nǝ̀ pà ka. 4 Ɓǝà bang ama nda kani a ɓanza ka, ɓǝ́ pà nǝ̀ duk pǝris ɗàng, acemǝnana apǝris nda kam mǝnana à kǝ pāki aɓoro mana Nggurcau kanì ka. 5 Ban mǝfele mǝnana apǝris kǝ pak túró-pǝris kàm ngga, kànìkìgìr na arǝ mǝɓafoe, sǝ yilǝmi mǝɓafoe mǝnana akanó a kùli ka nda. Mǝnia ka nda gìr mǝnana tsǝa sǝ lang Musa nǝ̀ loasǝ Taragula ka, Ɓakuli nunkiri ama: <<Sǝlǝ fa ama koya gìr ka a pangŋǝni kǝla mǝnana ǝn lǝmdǝò amur nkono ka.>>*8:5 Ɓalli gbal aɓa: Pur 25:40. 6 Sǝ túró-pǝris mǝnana à pè Yesu ka, kàrmúr túró-pǝris mǝ’e nǝ ɓoaro. Kǝla mǝno gbal ka, bǝsa kùrcau mǝnana Yesu yiunǝi nǝban Ɓakuli aban aɓwana male ka, kútì mǝ’e. Nda acemǝnana yì bǝsa kùrcau ka, à kwákítè amur apacau ace agir mǝnana à ɓoari mala kùrcau mǝ’e ka.

7 Ɓǝà bang ama kùrcau mǝdǝmbe ka, kǝ mǝɓane pà kàm arǝì raka, ɓǝ́ à pà nǝ̀ na ce nggaɗe nǝ́ ɓarià ɗàng. 8 Sǝ Mǝtalabangŋo Ɓakuli ka, kum amǝ Isǝrayila nǝ́ mǝɓane mala ɗwanyi kpata nggurcau mǝdǝmbe, sǝ na ama:

<<Ən bangŋǝna,

apwari nda à kǝ yiu ka,

mǝnana mǝ nǝ kùr cau

mǝbǝshe nǝ amǝ Isǝrayila,

sǝ nǝ ɓala mala Yahuda.

9 Pà nǝ̀ pǎ kǝla kùrcau

mǝnana ǝn pê sǝnǝ

akeâ ka ɗàng.

Mǝno yì kùrcau ka

ǝn pê a pwari mǝnana

ǝn bwalia a garabuià,

sǝ ǝn pusǝia aɓa

nzali Masar ka.

Sǝa ma à cam nǝ mǝsǝcau

amur kùrcau mǝnana

ǝn pang nǝia ka ɗàng,

nda sǝ ǝn pǝlǝia wia

nzǝmam ngga.>>

Mǝtalabangŋo nǝ̀ nakiyi

mǝnia yì cau ka.

10 <<Adyan ngga, mǝnia

nda kùrcau mǝnana

mǝ nǝ pang nǝ ɓala

mala Isǝrayila,

aɓalǝ apwari mǝnana à kǝ yiu ka.

Mǝtalabangŋo nǝ nakiyi

mǝnia yì cau ka.

Mǝ nǝ tsǝk angguracau

mem aɓa ɗenyicau malea,

sǝ mǝ nǝ gilǝia a ɓabumia.

Mǝ nǝ duk Ɓakuli malea,

sǝ yia ka, à nǝ̀ duk

aɓwana mem.

11 Kǝ ɓwa pà nǝ̀ kanî

ɓì mǝ’murkala,

ko mǝ’eambi ama,

<Súrǝ̀ Mǝtalabangŋo> ɗàng,

acemǝnana ko

yana ateà ka nǝ̀ súrǝàm,

twalo a ban ɓwamǝkyauwe

kya bwal ban ɓwamǝgule.

12 Sǝ mǝ nǝ twalia wia

ban aɓealɓikea malea,

ɓalǝam pà nǝ̀ kasǝ ɗǝm

arǝ acauɓikea malea ɗàng.>>*8:12 Ɓalli gbal aɓa: Ir 31:31-34.

13 Tunǝo mǝnana Ɓakuli tunǝ mǝnia yì kùrcau ama <<Mǝbǝshe>> ka, lǝmdǝ ama mǝdǝmbe ka, Ɓakuli tsǝngŋǝni pǝlǝna mǝ’e. Sǝ gìr mǝnana nda rǝ e sǝ túró male pà kàm ɗǝm raka, tè malanǝ̀ ndǝrmi.