Yahweh bang ama:

1 <<Pà wun nǝ̀ pàkkî ɓamur rǝ wun ɓekǝ nkul ɗang,*26:1 Ɓalli gbal aɓa: Pur 20:3-4; Ang 81:9. sǝ pà wun nǝ̀ shàr ɓekǝ ɓǝ̀nzál, ko wun nǝ̀ tamsǝ ɓekǝ nggun ko tali, ko wun nǝ̀ tsǝk kǝ kúnamúrú a nzali ma’wun ace mǝnana wun nǝ̀ peri abania ka ɗàng. Mim Yahweh ka, mǝ nda Ɓakuli ma’wun. 2 Dumǝna púp wun nǝ̀ kpata nzongcau mala Sabbat, yì pwari usǝlǝo, sǝ wun nǝ̀ dum nǝ pagulo arǝ Ban Mǝfele mem: Mǝ nda Yahweh.

3 <<Ɓǝ̀ wu bwal anggurcau mem, sǝ wu kpata anzongcau mem, wu pea ka, 4 mǝ nǝ tsǝa mbulo ma’wun nǝ̀ nggǝ nyaka wun a kúnì male, sǝ nzali ma’wun nǝ̀ pusǝa wun ɓǝle, sǝ anggun ɓaban ma’wun nǝ̀ pà ɓǝlea. 5 Kúnì mala nyamessa nǝ̀ sauwa nǝ̀ ká a kúnì mala pwan ɓǝlanggun anap, sǝ kúnì mala pwan ɓǝlanggun anap ka, nǝ̀ sauwa nǝ̀ ká a kúnì mala ɓealɓeale; anggo ka wun nǝ̀ li girlina sheɓǝ̀ wu ɗǝmna ka; wun nǝ̀ do aɓa rǝpwala, kǝ mǝɓane pà nǝ̀ yiu arǝ wun ɗàng. 6 Mǝ nǝ pà wun dorǝpwala aɓa nzali ma’wun, wun nǝ̀ nongnǝ-nongŋo sǝ kǝ ɓwa pà nǝ̀ yipa wun nǝ̀ ɓekǝ gìr pà ɓangciu ɗàng; mǝ nǝ pǝr anyamɓikea ɓǝà upi nzali ma’wun, sǝ nggeabyau mala ɓiu-mǝbura pa nǝ̀ kùtí a nzali ma’wun ɗàng.*26:6 Ɓalli gbal aɓa: Ir 30:10; Ezǝk 34:25,28; Mik 4:4. 7 Wun nǝ̀ pǝrta aɓiwun amǝbura, sǝ nggeabyau ma’wun nǝ̀ gandǝia, à nǝ̀ kpaki a ɓadǝm wun. 8 Aɓwana ma’wun tongno nǝ̀ loasǝtà aɓwana gbǝman, sǝ aɓwana ma’wun gbǝman nǝ̀ loasǝtà aɓwana á-lum, sǝ nggeabyau ma’wun nǝ̀ gandǝ aɓiwun amǝbura, à nǝ̀ sukki a nzali a ɓadǝm wun.*26:8 Ɓalli gbal aɓa: Nggur 3:22; 32:30; Jes 10:19; 23:3,10. 9 Earmúrú mem nǝ̀ sulǝ amur wun, sǝ mǝ nǝ tsǝk wun, wun nǝ̀ ɓǝla, wun nǝ̀ hatǝki; mǝ nǝ bwal kùrcau mem mǝnana ǝn pê nǝ wun ngga. 10 Wun nǝ̀ nggǝ li mǝssa mǝnana wu soe a bah aɓa pǝlǝa mǝnana kútí ka, gandǝa wun nǝ̀ pusǝ mǝssa mǝ’e a bah ace mǝnana wun nǝ̀ so bǝshe ka. 11 Mǝ nǝ tsǝk Taragula mem, yì bando mem*26:11 Ɓalli gbal aɓa: Pur 25:8; 29:45-46; Pǝris 26:44; 1Amur 6:13. aɓalǝ wun sǝ pà mǝ nǝ ɓinǝki wun ɗàng. 12 Mǝ nǝ gya aɓalǝ wun sǝ mǝ nǝ duk Ɓakuli ma’wun, sǝ wun ngga, wun nǝ̀ duk aɓwana mem.*26:12 Ɓalli gbal aɓa: Ir 7:23; Luk 1:68; 2Kor 6:16; Sǝn 21:3. 13 Mǝ nda Yahweh Ɓakuli ma’wun, mǝnana pusǝ wun, wu purî ɓá nzali Masar, ace mǝnana wu kǝa duk aguro malea raka. *26:13 Ko Ən ɓungi rǝcandǝa malea mǝnana par wun ngga, sǝ ǝn panzǝ wun, ǝn tsǝk wun ɓǝ̀ wu gya aɓa makrǝu ɓangciu pà kàm ɗàng.Ən ɓungi agara-bolo mala nggun-rya malea a myal wun, sǝ ǝn tsǝk wun, wu ging pǝrapǝra.

Yahweh bang ama:

14 <<Sǝama ɓǝ̀ wu mgbikamkiru, wu ginǝ bwal anzongcau mem mǝnia kat, 15 sǝ ɓǝ̀ wu ginǝ anê mem, sǝ yilǝmi wun nǝ̀ ɓinǝce anggurcau mem, mǝnana à nǝ̀ kánǝ wun a ɗwanyi kpata atsǝkcau mem, sǝ wun nǝ̀ panzǝki kùrcau mem ngga, 16 Mim a buì mem ngga mǝ nǝ pàkka wun agir mǝnia ka: Mǝ nǝ tasǝ gìr’mur’mwana*26:16 Ɓalli gbal aɓa: Ang 78:33; Ir 15:8. hǝrkit amur wun, mǝ nǝ kwak wun nǝ kwánó mǝnana pà nǝ̀ mal ɗang, andǝ ɓauwa mǝnana nǝ̀ dumsǝ wun a nte*26:16 Ɓalli aɓa: Nggur 28:21. andǝ do-tikimúrú ka. Wun nǝ̀ ɓeal mǝsǝɓeale ma’wun ɓà acemǝnana aɓiwun-amǝbura nǝ̀ ya lì gìr mǝnana ɓǝl ka. 17 Mǝ nǝ pǝlǝa wun nzǝmam,*26:17 KoMǝ nǝ pǝlǝ ɓamǝsǝam arǝ wun. mǝ nǝ ɗeki *26:17 Ɓalli aɓa: Nggur 28:25; Akas 2:14; Ir 19:7.aɓiwun-amǝbura ɓǝà gandǝ wun. *26:17 Ɓalli aɓa: Ang 106:41.Aɓwana mǝnana à ɓinǝmǝsǝ wun ngga, à nǝ̀ duk amǝ’yálmúr wun. Wun nǝ̀ ɓangŋa ko ɓǝ̀ ndo ama kǝɓwa pà kàm kǝ pǝrta wun raka. 18 Sǝ kat andǝ amǝnia yì agir, ɓǝ̀ wu ginǝ okam ngga, mǝ nǝ lidǝmba nǝ pakka wun gìrkwanban ɗǝm mǝnana kàrmúr acauɓikea ma’wun kusǝ tongno-nong-ɓari ka. 19 Nggori andǝ murcandǝa ma’wun ngga mǝ nǝ ɓunni. Mǝ nǝ tsǝk ɓamǝsǝ kùli ma’wun nǝ̀ pàk gbǝrantang kǝla bolo-candǝa, sǝ nzali ma’wun nǝ̀ candǝ kanggǝrang kǝla bolo-bángŋá. 20 Rǝcandǝa ma’wun nǝ̀ malâ sǝ wu pàk kǝ túró ɗang: nzali ma’wun pà nǝ̀ pusǝa wun kǝ gìrɓaban ɗàng, sǝ anggun mǝnana aɓa nzali ma’wun ngga à pà nǝ̀ pà ɓǝlea ɗàng.

21 <<Sǝ ɓǝ̀ wu candǝcau arǝàm, wu ɓinǝ okam ngga, mǝ nǝ hatǝki tanni mǝnana kàrmúr acauɓikea ma’wun kusǝ tongno-nong-ɓari ka. 22 Mǝ nǝ tasǝ anyam-candǝa arǝ wun, à nǝ̀ yia wala wun amuna ma’wun, sǝ à nǝ̀ kiɗikia wun agirkusǝu mana wu kǝ yália ka. Aɓwana bǝti aɓalǝ wun na à nǝ̀ ueo nǝyilǝmu ka. Mǝnia ka nǝ̀ tsǝa aɓwana kpokyak na à nǝ̀ nggǝ gya amur anjargula mala nzali ma’wun ngga.

23 <<Sǝ kat andǝ amǝnia yì agirkwanban, ɓǝ̀ wu ginǝ nyare abanam, wu lidǝmba nǝ mgbicau arǝàm ngga, 24 mim gbal ka mǝ nǝ camba wun a nggaro; mim nǝ nggearǝam mǝ nǝ kwak wun nǝ tanni mana kàrmúr acauɓikea ma’wun kusǝ tongno-nong-ɓari ka. 25 Mǝ nǝ yinǝ lwa amur wun mǝnana nǝ̀ mbwe wun a kúnì mǝɓane mana wu pè, mala yàl anzongcau mana ǝn tsǝka wun aɓa kùrcau mana ǝn pangnǝ wun ngga. Ko ɓǝ̀ wu ɓangŋa wu kutiki aɓalǝ anggea-là ma’wun ngga, mǝ nǝ tasǝ rǝkwana mǝ’kiɗikibanì aɓalǝ wun, sǝ wun nǝ̀ kpa a ɓabù aɓiwun-amǝbura. 26 Mǝ nǝ tamsǝ kum girlina ma’wun, sǝ mǝnia ka nǝ̀ tsǝa ovù mwashat na amamǝna lum nǝ̀ lurǝ bǝredi mǝnana kat à ndanǝi ka. Ɓǝ̀ à nǝ̀ gakki bǝredi ka, ɓwangine na koyan nǝ̀ kum ngga. Wun nǝ̀ li, sǝ pà nǝ̀ kārǝ́ wun ɗàng.

27 <<Sǝ kat andǝ mǝnia ka, ɓǝ̀ pà wun nǝ̀ ok cau mem ɗàng, wu lidǝmba nǝ mgbicau arǝàm ngga, 28 mǝ nǝ gingga wun a mgbasho aɓa nusǝban mala bumlulla mǝɓike, sǝ mim nǝ nggearǝam mǝ nǝ pakka wun gìrkwanban mǝnana kàrmúr acauɓikea ma’wun kusǝ tongno-nong-ɓari ka. 29 Wun nǝ̀ lì nyam amuna-burana andǝ amuna-mamǝna ma’wun.*26:29 Ɓalli aɓa: Nggur 28:53; Ezǝk 5:10; 2Amur 6:29; Keb 4:10. 30 Mǝ nǝ kìɗìki amgbangban ndàka-lú ma’wun, mǝ nǝ kwarki agyangŋan mala pisǝ muku-gìr loasǝ yele mǝ’rǝmɓoarne ma’wun, mǝ nǝ eamsǝki alú wun amúr alú ka nkúl ma’wun, sǝ yilǝmem ngga nǝ̀ ɓinǝce wun. 31 Mǝ nǝ tsǝk *26:31 Ɓalli aɓa: Nehe 2:3; Ir 4:7; 2Amur 25:4-10.anggea-là ma’wun ɓǝà pǝlǝ ɓarwan, sǝ andaka-ankúl ma’wun ɓǝà pak kèlàngkélàng, sǝ mǝ nǝ ɓinǝce rǝmba aɓoro mǝrǝmɓoarne ma’wun. 32 Mǝ nǝ pàk nzali ma’wun kèlàngkélàng, gandǝa aɓiwun-amǝbura mǝnana à yi e a do aɓalǝi ka, nǝ̀ *26:32 Ɓalli aɓa: Nggur 28:37; 1Amur 9:8; Ir 18:16; 19:8; Ezǝk 5:15.kàrmúrià ɓǝ̀ à sǝni ka. 33 Mǝ nǝ mesǝki wun arǝ anzali, mǝ nǝ kwetǝ nggeabyau mem a ndè mǝ nǝ pǝ̀rta wun, nzali ma’wun nǝ̀ pǝlǝ ɓarwan, sǝ anggea-là ma’wun nǝ̀ pǝlǝ gìgí.

34 <<Nda wuni nzali ma’wun nǝ̀ ok banɓoarnado mala apǝlǝa Sabbat*26:34 apǝlǝa Sabbat Ko <<apǝlǝa mala usǝlǝo.>> male aɓalǝ nonggio mǝnana kat nong ɓarwan, sǝ wun ngga wu nda a nzali mala aɓiwun amǝbura ka; pǝlǝa nzali ma’wun nǝ̀ usǝlǝo, sǝ nǝ̀ ok banɓoarnado mala apǝlǝa mala Sabbat male. 35 Aɓalǝ anonggio mǝnana kat nǝ̀ nong ɓarwan ngga, nzalinì nǝ̀ usǝlǝo, usǝlǝo mǝnana kumi raka aɓalǝ apǝlǝa mala Sabbat mana wu nda aban do aɓalǝi ka. 36 Sǝ aɓwana atà wun mǝnana à au ka, mǝ nǝ tasǝia wia ɓabum-ɓungya aɓa ɗenyicau malea arǝ abân mǝnana à umnǝia kàm aɓalǝ anzali mala aɓia-mǝbura ka. Gì dǝurǝo mala mbu-nggun nǝ̀ loasǝtea nǝ mire, sǝ à nǝ̀ ɓangŋa kǝla ɓwa mǝnana à kǝ pǝrte a lwa ka, sǝ à nǝ̀ nggá kpa, ko ɓǝ̀-ndo ama kǝɓwa pà kàm kǝ pǝrtea raka. 37 À nǝ̀ anndǝki arǝarǝia, kǝla aɓwana mana à kǝ ɓangŋa ace apî nggeabyau ka, ko ɓǝ̀-ndo ama kǝɓwa pà kàm kǝ pǝrtea raka. Sǝ pà wun nǝ̀ gandǝ came a ɓadǝmbǝ aɓiwun amǝbura ɗang. 38 Wun nǝ̀ wukio arǝ abǝri-nzali; nzali mala aɓiwun amǝbura nǝ̀ twalta wun. 39 Sǝ cili wun mǝnana à ue nǝyilǝmu arǝ anzali mala aɓiwun amǝbura ka, à nǝ̀ twal eamdǝe atàcau mala ɓealɓikea malea, sǝ atàcau mala aɓealɓikea mala akeâ.*26:39 Ɓalli aɓa: Nggur 28:65; Ezǝk 4:17; 24:23; 33:10.

40 <<Sǝama, ɓǝ̀ à bang ɓealɓikea malea, andǝ ɓealɓikea mala atárrià andǝ mala akeâ, mǝnana à pè nǝ ɗwanyi domǝsǝcau malea abanam, andǝ pǝlǝa mǝnana à pǝlǝ arǝàm, 41 sǝ tsǝa ǝn pǝlǝ arǝia, sǝ ǝn tasǝia a bǝri-nzali, aɓa nzali mala aɓia-mǝbura, sǝ ɓǝ̀ ɓabumia nǝ̀ nying candǝcau malea à nǝ̀ nongsǝmúrià, sǝ à nǝ̀ mbwegìr ace ɓealɓikea malea ka,*26:41 sǝ à nǝ̀ mbwegìr ace ɓealɓikea malea ka Ko <<à nǝ̀ ear ama à pàngŋǝ̀nà cauɓikea ka.>> 42 pǝlǝa mim ngga mǝ nǝ ɗenyinǝ kùrcau mem mǝnana ǝn pê nǝ Yakupu, sǝ mǝ nǝ ɗenyinǝ kùrcau mem mǝnana ǝn pê nǝ Ishaku, andǝ kùrcau mem mǝnana ǝn pê nǝ Ibǝrayim ngga. Mǝ nǝ ɗenyinǝ gir mǝnana ǝn pacau-ace amur nzali man ngga, 43 sǝ mǝ nǝ ɗeki ɓǝ̀ ok banɓoarnado mala apǝlǝa mala Sabbat male arǝ apǝlǝa mǝnana nǝ̀ nong ɓarwan acemǝnana à pà kàm aɓa nzalinì raka, à umna a bǝri-nzali aban mbwegìr ace ɓealɓikea malea acemǝnana à ginǝki acau mem, sǝ yilǝmia ɓinǝce anê mem ngga. 44 Kat andǝ amǝno ka, ɓǝ̀ à nda kano a nzali mala aɓia-mǝbura ka, pà mǝ nǝ ginǝkia ɗàng, sǝ pà mǝ nǝ ɓinǝcea mǝnana nǝ̀ tsǝa mǝ nǝ twaltea ka ɗàng. Pà mǝ nǝ nggaɗikunam arǝ kùrcau mem*26:44 nggaɗikunam arǝ kùrcau mem ko <<panzǝki kùrcau mem>> sǝnǝia ɗàng, acemǝnana mǝ nda Yahweh Ɓakuli malea. 45 Atàcau malea ka ɓalǝam nǝ̀ kasǝa arǝ kùrcau mǝnana ǝn pangnǝ akeâ, mana ǝn pusǝia à purî ɓá nzali Masar, a mǝsǝ aɓwapǝndǝa mala anzali kat, ace mǝnana ɓǝ̀ ǝn duk Ɓakuli malea ka. Mǝ nda Yahweh.>>

46 Amǝno ka à nda ka anê, andǝ akanìgìr andǝ anggurcau mana Yahweh pa anre andǝ amǝ Isǝrayila nǝ bu Musa amur Nkono Saina ka.