1 A lumi-ɓari-bwamdǝ-tongno-nong-ɓaria (27) pǝlǝa mala do-bunomurǝm mala Jerobuam murǝm Isǝrayila ka, Azariya,* muna-ɓwabura mala Amaziya, duk murǝm mala Yahuda. 2 Ndanǝ apǝlǝa lum-bwamdǝ-tongno-nong-mwashat (16) sǝ duk murǝm. Yálmúr aɓwana a Urǝshalima apǝlǝa lumi-tongno-nong-ɓari (52). Lullǝ ngge nda Jekoliya ɓwama Urǝshalima. 3 Azariya pàkki agir mǝnana à pwasǝbum Yahweh ka, kǝla mǝnana tárrí Amaziya pàk ka. 4 Kat andǝ amani ka, kiɗiki amgbangban-peri atà ankúl ɗàng. Amǝ Isǝrayila lidǝmba nǝ pà gìr'nkila andǝ aɓoro amur amgbangban-peri atà ankúl mǝno.

5 Sǝ Yahweh kwak murǝm Azariya nǝ kwánó nggû, sǝ duk mǝkwánó nggû ba pwari lú male.* Dum nǝmurǝì a ɓè ɓala zak. Jotam, muna-ɓwabura male, nda mana bwal ɓala-murǝm sǝ yálmúr aɓwana a nzalinì ka.

6 Acili agir mǝnana à kumban a do-bunomurǝm mala Azariya, kpapi andǝ atúró mǝnana pàkkia kat ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 7 Azariya paklú sǝ à tsǝì atà akê a nggea-là mala Dauda. Muna-ɓwabura male Jotam duk murǝm a bancame male.

8 A lumi-tàrú-bwamdǝ-tongno-nong-tàruià (38) pǝlǝa mala do-bunomurǝm mala Azariya murǝm Yahuda ka, Zakariya, muna-ɓwabura mala Jerobuam, duk murǝm mala Isǝrayila, sǝ yálmúr aɓwana a Samariya azongŋo tongno-nong-mwashat (6). 9 Pàkki agir pas mǝnana à pwasǝbum Yahweh raka, kǝla mǝnana akê pàk ka. Tamsǝ pakki acauɓikea mǝnana Jerobuam, muna-ɓwabura mala Nebat tsǝk Isǝrayila pàkkia ka ɗàng.

10 Pǝlǝa Shallum, muna-ɓwabura mala Jabesh kùrkún amur Zakariya. Wali me a nzali a ɓaɓwa,* wal-luí sǝ ak bunomurǝm, duk murǝm a bancame male. 11 Acili agir mǝnana à kumban a do-bunomurǝm mala Zakariya ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 12 Lú male yinǝ lùmsǝo mala cau mala Yahweh aban Jehu, mǝnana ama: <<Amunio andǝ amǝkeo nǝ̀ do amur buno-murǝm mala Isǝrayila ba inea nza.>>* Anggo sǝ yi kumban.

13 Pǝlǝa Shallum, muna-ɓwabura mala Jabesh tita do-bunomurǝm amur Isǝrayila, a lumi-tàrú-bwamdǝ-tongno-nong-inea (39) pǝlǝa mala yálmúrû mala Murǝm Azariya amur Yahuda. Do-bunomurǝm mala Shallum a Samariya ka, zongŋo mwashat na ɓǝ̀rɓǝ̀r. 14 Sǝ Menahem, muna-ɓwabura mala Gadi, pur a Tǝrza, yiu a Samariya. Yi wal-lú Shallum, muna-ɓwabura mala Jabesh, sǝ ak bancame male kǝla murǝm a Samariya.

15 Acili agir mǝnana à kumban a do-bunomurǝm mala Shallum, andǝ kùrkún mǝnana pè ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

16 A bàkú mǝno Menahem pur a Tǝrza sǝ amur njar aban yiu ka, yi kiɗiki nggea-là Tifsa andǝ aɓwana mǝnana à ndanǝdo a nggea-lê, andǝ amuna-là mǝnana à kàrì banì ka, acemǝnana à ɓinǝ ɓun aɓate. Yale zanzǝki bum amamǝna mǝnana à ndanǝ amuna a bumia ka.

17 Menahem muna-ɓwabura mala Gadi, tita do-bunomurǝm male amur Isǝrayila, a lumi-tàrú-bwamdǝ-tongno-nong-inea (39) pǝlǝa mala do-bunomurǝm mala Azariya a Yahuda. Menahem yálmúr aɓwana a Samariya apǝlǝa lum. 18 Pàkki agir mǝnana amǝɓike na a mǝsǝ Yahweh ka. Aɓa do male kat ka ɓinǝ pǝlǝ nzǝmi arǝ pakki acauɓikea mǝnana Jerobuam, muna-ɓwabura mala Nebat pàkkia, sǝ tsǝk amǝ Isǝrayila à pàkkia ka.

19 Pǝlǝa Pul,* murǝm mala nzali Assuriya, yi kútí nǝ rǝcandǝa mala lwa aɓa nzali Isǝrayila. Sǝ Menahem pè Pul bolo-azǝrfa tyang á-lumi-tàrú-nong-ine (34,000) ace mǝnana ɓǝ̀ Pul pè wi gbasha mala lidǝmba a domurǝm male, andǝ kum rǝcandǝa kàm mala bwalmúr nzali male kàngkàng ngga. 20 Menahem kum bolo-azǝrfa mǝnia ka nǝ cemi amǝkume mǝnana kat aɓa Isǝrayila ka; ak mǝsǝ bolo-azǝrfa lumi-tongno-tongno (50) a bù koyan atea, sǝ pè murǝm Assuriya. Nda sǝ murǝm Assuriya ɗeki cau mala munǝo, nyingŋǝna nzali Isǝrayila ka.

21 Acili agir mǝnana à kumban a do-bunomurǝm mala Menahem andǝ atúró mǝnana pàkkia kat ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 22 Menahem paklú atà akê, sǝ muna-ɓwabura male, Pekahiya duk murǝm a bancame male.

23 Nda a lumi-tongnoia (50) pǝlǝa mala do-bunomurǝm mala Azariya a Yahuda sǝ Pekahiya muna-ɓwabura mala Menahem duk murǝm amur Isǝrayila. Pekahiya yálmúr aɓwana a Samariya apǝlǝa ɓari. 24 Pàk gìr mǝnana mǝɓike na a mǝsǝ Yahweh ka. Ɓinǝ pǝlǝ nzǝmi arǝ pakkia ulang acauɓikea mǝnana Jerobuam, muna-ɓwabura mala Nebat pàkkia, sǝ tsǝk Isǝrayila pàkkia ka. 25 Sǝ Peka muna-ɓwabura mala Remaliya ɓwamǝgule-lwa male, kùrkún amurí, yì Pekahiya. Sǝ nǝ pagbasha mala aɓea aburana lumi-tongno mana à pur a Gilǝyat, andǝ Argop, andǝ Ariye ka, à yinǝ munǝo arǝì a ban-mǝcandǝe mala ɓala-murǝm, mana a Samariya ka, sǝ à wal-lú Pekahiya. Peka pǝlǝa ak bancame male kǝla murǝm.

26 Acili agir mǝnana à kumban aɓa do-bunomurǝm mala Pekahiya, andǝ atúró mǝnana pàkkia kat ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

27 Nda a lumi-tongno-nong-ɓaria (52) pǝlǝa mala do-bunomurǝm mala Azariya a Yahuda sǝ Peka, muna-ɓwabura mala Remaliya, tita yálmúrû a Isǝrayila. Yálmúr aɓwana a Samariya apǝlǝa lumi-ɓari. 28 Peka pàkki agir mǝnana amǝɓike na a mǝsǝ Yahweh ka. Ɓinǝ pǝlǝ nzǝmi arǝ pakki acauɓikea mǝnana Jerobuam, muna-ɓwabura mala Nebat pàkkia sǝ tsǝk Isǝrayila pàkkia ka.

29 Sǝ a bàkú mana Peka, nda murǝm mala Isǝrayila ka, Murǝm Tigǝlat-Pilesa, mala Assuriya, yiu nǝ munǝo arǝ Isǝrayila. Yi ak abu-nzali Ijon, andǝ Abel-Bet-Ma'aka, andǝ Janoha, andǝ Kedesh, andǝ Hazo, andǝ Gilǝyat, andǝ Galili, andǝ bu-nzali Naftali kat. Pwan aɓwana mǝnana aɓalǝ abu-nzali man ngga umnǝia a Assuriya. 30 Pǝlǝa Hosheya, muna-ɓwabura mala Ela, kùrkún amur Peka, muna-ɓwabura mala Remaliya. Yiu arǝì nǝ munǝo, wal-luí, sǝ duk murǝm a Isǝrayila, a lumi-ɓaria pǝlǝa mala yálmúrû mala Jotam, muna-ɓwabura mala Uzziya a Yahuda.

31 Acili agir mǝnana à kumban aɓa do-bunomurǝm mala Peka, andǝ atúró mǝnana pàkkia kat ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

32 A ɓaria pǝlǝa mala yálmúrû mala Peka, muna-ɓwabura mala Remaliya murǝm Isǝrayila ka, Jotam, muna-ɓwabura mala Azariya duk murǝm a Yahuda. 33 Ndanǝ apǝlǝa lumi-ɓari-bwamdǝ-tongno (25), sǝ duk murǝm, sǝ yálmúr aɓwana a Urǝshalima apǝlǝa lum-bwamdǝ-tongno-nong-mwashat. Lullǝ ngge nda Jerusha, ɓoarnsarile Zadok. 34 Yì ka, pàkki agir mǝnana amǝɓoarne na a mǝsǝ Yahweh ka, kǝla mǝnana tárrí Uzziya pàk ka. 35 Kat andǝ amani ka, amgbangban-peri atà ankúl ka, à kiɗikia ɗàng. Amǝ Isǝrayila lidǝmba nǝ pà gìr'nkila andǝ aɓoro amur amgbangban-peri atà ankúl mǝno.

36 Acili agir mǝnana à kumban, a do-bunomurǝm mala Jotam, andǝ atúró mǝnana kat pàkkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 37 (Aɓalǝ anonggio mǝno ka, Yahweh tita tasǝ Rezon murǝm mala Aram,* andǝ Murǝm Peka, muna-ɓwabura mala Remaliya, ɓǝà yinǝ munǝo arǝ Yahuda.) 38 Jotam yi wú sǝ à tsǝì atà akê, a nggea-là mala kè Dauda. Muna-ɓwabura male, Ahaz, duk murǝm a bancame male.