1 Lang Ataliya nggea Ahaziya, ok ama muna-ɓwabura male wuna ka, lo, twalta tau-murǝm puppup. 2 Sǝama *Jehosheba, ɓoarnsarile Murǝm Joram, mǝnana mǝ'nggaula Ahaziya na ka, twal Jehohash muna-ɓwabura mala Ahaziya aɓa sǝmbǝrǝa, sǝ pusǝì aɓalǝ acili amǝtau-murǝm mǝnana zuku à nǝ̀ wal-luia ka. Wario kya sǝmbǝrǝì andǝ mǝ'iulǝe aɓa ndà-nongŋo. Anggo sǝ à sǝmbǝrǝì arǝ Ataliya, sǝ apî lú. 3 Ue aɓa sǝmbǝrǝa andǝ mǝ'iulǝe a ɓala mala Yahweh apǝlǝa tongno-nong-mwashat, mǝnana Ataliya nda mǝ'yálmúr nzali Yahuda ka.

4 A tongno-nong-ɓaria pǝlǝa ka, Jehoyada pǝris mǝgule túrban à tunǝ amǝgulo-lwa amur anggǝsan gbǝman-gbǝman mala amǝ'yáltà murǝm andǝ mala amǝ'yál palta, ɓǝà yiu a baní a ɓala mala Yahweh. Kùrcau andǝia, sǝ tsǝia à kángir mala pù-anzǝm, a ɓala mala Yahweh. Pǝlǝa lǝmdǝia wia muna-ɓwabura mala murǝm. 5 Tsǝkia wia nzongcau ama, <<Mǝnia ka nda gìr mǝnana dumǝna púp wun nǝ̀ pàk ka: mwashat atà anggǝsan ma'wun tàrú mǝnana à nda a túró a pwari Sabbat ka, mwashat aɓa gauwe tàrú mala nggǝsan mǝnia ka, à nǝ̀ yál kún palta mala murǝm. 6 Ɓè gauwe nǝ̀ camyale a kún Njarkutio mǝnana à tunǝi ama Sur ka, sǝ tàruià gauwe nǝ̀ camyale a kún njarkutio mǝnana a nzǝm amǝ'yál palta ka. Wun nǝ̀ yál koya buban mala palta. 7 Anggǝsan ma'wun ɓari mǝnana à pa a túró a pwari Sabbat raka, à nǝ̀ yál ɓala mala Yahweh sǝ à nǝ̀ pakki murǝm [Jehohash] gbasha. 8 Wu gumbǝli murǝm, koya ɓwa ka nǝ agirbura male a buì. Ɓwa mǝnana kat ar-njar dǝshi wun ngga, wu wal-luí. Wu gbashita murǝm a koya ban nǝ̀ ká ka.>>

9 Amǝgulo-lwa pak kǝla mǝnana Jehoyada pǝris tsǝia ɓǝà pak ka: koyan ngga yinǝ aburana male, amǝnana à nda a túró a pwari Sabbat ka, andǝ amǝnana à pa a túró a pwari Sabbat mǝno raka; à yiu kat aban Jehoyada pǝris. 10 Pǝris pe amǝgulo-lwa amur anggǝsan gbǝman-gbǝman mǝnia ka anzo andǝ atongŋo mala Dauda, mǝnana à tsǝia a ɓala mala Yahweh ka. 11 Amǝ'yáltà murǝm twal bancame malea, koyan ngga nǝ agirbura male a bui. À tsaɗi a kunarǝia twal a buì njar-kunmur mala ɓala mala Yahweh kya bwal buì njar-nza; à kàrì gyangŋan andǝ ɓalae, ace yál murǝm a koya buì. 12 Jehoyada pǝlǝa yinǝ muna-ɓwabura mala murǝm a nza, sǝ oasǝi wi jeko-murǝm a múrí, sǝ pe wi Malǝmce Kùrcau sǝ hamnǝi ama nda murǝm. À ɗārǝi sǝ aɓwe wal ɓabuia, à loasǝ gia ama, <<Ɓǝ̀ yilǝmi murǝm sauwa!>>

13 Lang Ataliya ok giu mak-gāwàn mala amǝ'yáltà murǝm andǝ acili aɓwe ka, puro wari aban aɓwe a ɓala mala Yahweh. 14 Peliban sǝ sǝn murǝm aban came a nkanggari ɓè nggun-gbasha, mǝnana nda bancame mala murǝm a ɓala mala Yahweh ka. Amǝgulo-lwa andǝ amǝ'twang-njawe na ban came a nkanggari murǝm, sǝ aɓwe kat mala nzalinì na ban pàk-banɓoarnado, à kǝ twang anjawe. Ataliya bwal daura male sannì,* sǝ mak-zwalo ama, <<Makban! Makban!>>

15 Pǝlǝa Jehoyada pǝris banggi amǝgulo-lwa amur anggǝsan gbǝman-gbǝman ama, <<Wu pùrnǝí a nre ka amǝ'yálban, sǝ ɓǝ̀ kǝɓwa lo nǝ̀ kpate ka, wu wal-luí nǝ nggeabyau.>> Yì pǝris ka bangŋǝna ama, <<Ɓǝà kǝa wal-luí a ɓala mala Yahweh ɗàng.>> 16 Nda à gbami Ataliya sǝ à umnǝi a kún njarkutio mala apǝr aɓa palta, kam sǝ à wal-luí.

17 Jehoyada tsǝk murǝm andǝ aɓwana, à kùrcau andǝ Yahweh ama à nǝ̀ duk aɓwana mala Yahweh; sǝ tsǝk murǝm à kùrcau andǝ aɓwe. 18 Pǝlǝa aɓwana mala nzalinì kat wari a ndà mala Ba'al, à arki. À arki agyangŋan andǝ aɓǝ̀nzál mala Ba'al rǝkǝs-rǝkǝs. Sǝ à wal-lú Matan, pǝris mala Ba'al aɓadǝm agyangŋan mǝno. Pǝlǝa Jehoyada pǝris tsǝk amǝ'camyale amur ɓala mala Yahweh. 19 Twal amǝgulo-lwa mala anggǝsan gbǝman-gbǝman, andǝ amǝ'yáltà murǝm, andǝ amǝ'yál palta andǝ aɓwana mala nzalinì kat, sǝ yia atārǝia à lo a ɓala mala Yahweh ka, à tsǝkta murǝm Jehohash aban ká a palta. À kùtí a ɓala mala murǝm nǝ kún njarkutio mala amǝ'yáltà murǝm. Sǝ murǝm kya eauwe do amur buno-murǝm. 20 Aɓwana mala nzalinì kat pakkiɗire. Nggea-là kat do aɓa rǝpwala anzǝm mana à walna-lú Ataliya a palta nǝ nggeabyau ka. 21 Jehohash ndanǝ apǝlǝa ɓǝlban tongno-nong-ɓari lang duk murǝm ngga.