1 Pwari mwashat ka, nggǝsan mala amǝ'ɓangnǝa ne Elisha ama, <<Sǝni, ban mǝnia sǝm dukiyi kam aɓadǝmbo ka, ɓiki kyapa sǝm. 2 Ida, eara sǝm ɓǝ̀ sǝm kya a Jodan, ace mǝnana koyan atà sǝm ngga ɓǝ̀ kya kasǝ gbǝlang nggun a banì, sǝ sǝm nǝ̀ yia pàkkî ɓamur rǝ sǝm ban mǝnana sǝm nǝ̀ duk kam ngga.>> Sǝ Elisha banggia wia ama, <<Wu kyane.>> 3 Sǝ ɓwa mwashat ateà banggi wi ama, <<Ida, ɓǝ̀ awu nǝ ear ka, kya atà sǝm, sǝm aguro mò.>> Sǝ pea wia eare ama, <<Mǝ nǝ ká.>> 4 Nda wari atea ka. Sǝ lang à bwalǝna Jodan ngga, à tita kasǝki anggun. 5 Sǝ lang ɓeɓwa naban kasǝ nggun ngga, mǝsǝ bero male puro kpa a mùr. Mak'zwalo ama, <<Oi Ɓwamǝgule mem! Ən angnǝ'â.>>

6 Pǝlǝa ɓwa mala Ɓakuli ɗì ama, <<Ake sǝ kpa?>> Lang lǝmdǝni wi banì ka, kasǝ muna gara sǝ túrí a banì, kara tsǝk mǝsǝ bero kyale. 7 Sǝ ne wi ama, <<Twalì.>> Pǝlǝa lǝmdǝ buì twalì.

8 A kǝ pwari, mǝnana murǝm Suriya na aɓa munǝo andǝ Isǝrayila ka, tunǝ kpapi mala tàɓala andǝ amǝtúró male sǝ na ama, <<Mǝ nǝ tsǝk kàttì mem mala kánǝ munǝo a ban man andǝ ban mǝno.>>

9 Sǝama ɓwa mala Ɓakuli túrban nǝ cau aban murǝm Isǝrayila ama: <<Tsǝkiro, cè a kar nǝ ban man ɗang, acemǝnana amǝ'Suriya na ban sulǝ ace ká a banì.>> 10 Sǝ murǝm Isǝrayila tasǝ cau a ban mǝnana mǝɓangnǝa lǝmdǝni wi sǝ nunakiri arǝì ka. Anggo sǝ amsǝ ɓamurì pà kusǝ mwashat ɗang pà kusǝ ɓari ɗàng.

11 Sǝ ɓabum murǝm mala Suriya lul kǝ̀rkǝ́r ace mǝnia yì gìr ka, sǝ tunǝ amǝtúró male sǝ ɗia ama, <<Pà wu nǝ̀ lǝmdǝam ɓwa mǝnana aɓalǝ sǝm, nda atà murǝm Isǝrayila ka re?>> 12 Sǝ mwashat atà amǝtúró male banggi wi ama, <<Ɓwamǝgule mem, murǝm, kǝ ɓwa pà kàm aɓalǝ sǝm ɗang; Elisha na, yì mǝɓangnǝa mǝnana ndanǝdo a Isǝrayila ka. Kǝ banggi murǝm Isǝrayila acau mǝnana kat a ne a ndà-nongŋo mô ka.>>

13 Sǝ murǝm bang ama, <<Wu kyane, wu sǝn ban mǝnana nda kam ngga, ace mǝnana mǝ tasǝ aburana mem ɓǝà kya bwali.>> Sǝ à banggi wi ama, <<Ndanǝdo a Dotan.>> 14 Nda tasǝ apǝr andǝ awaru-pǝr andǝ amǝ'lwa mǝ'làkke, sǝ à wari nǝ du à kya gumbǝli nggea-lê.

15 Lang mǝtúró-ɓadǝm ɓwa mala Ɓakuli lo nǝ dǝmbari ɗiɗyal sǝ pur a nza ka, kara sǝni, amǝ'lwa nǝ apǝr andǝ awaru-pǝr gumbǝlina nggea-là kat. Sǝ banggi ɓwamǝgule male ama, <<Sǝm kutina aɓa tanni, ɓwamǝgule, mana sǝm nǝ̀ pa?>> 16 Ɓwamǝgule male nyesǝî wi ama, <<Cè ɓangciu pakko ɗàng, acemǝnana aɓwana mana atà sǝm ngga, à kútì amǝnana à nda ateà ka.>> 17 Pǝlǝa Elisha pakhiwi ama, <<Yahweh, mǝn mǝsǝi ɓǝ̀ sǝni.>> Yahweh mǝn mǝsǝ lagga man, sǝ sǝni ka, múr ankono lumsǝna nǝ apǝr andǝ awaru-pǝr mala bǝsa, à gumbǝlina Elisha.

18 Sǝ lang amǝ'Suriya sulǝ aban yiu arǝì ka, Elisha pakhiwi aban Yahweh ama, <<Ida, tsǝk aɓwana man ɓǝà pǝlǝ ante.>> Pǝlǝa Yahweh tsǝia à pǝlǝ ante, kǝla mǝnana cau mala Elisha bang ngga.

19 Elisha banggia wia ama, <<Njargulê nda mǝna ɗang, sǝ nggea-lê nda man ɗang; wu yiu atàm, sǝ mǝ nǝ kánǝ wun aban ɓwa mǝnana wu alkiyite ka.>> Sǝ gingnǝia aban kánǝia a Samariya.

20 Lang à kutina aɓa Samariya ka, Elisha pakhiwi ama, <<Yahweh, mǝn mǝsǝ aburana mǝnia ka ace mǝnana ɓǝà sǝnban.>> Sǝ Yahweh mǝn mǝsǝia, à sǝn ɓamuria ka, à nda a tsùrú mala Samariya.

21 Lang murǝm Isǝrayila sǝnia ka, ɗì Elisha ama, <<Tárrám, mǝ wal-luia le?>> 22 Elisha eari wi ama, <<Awo, kǝa wal-luia ɗàng. Awu nǝ wal-lú aɓwana mana a nda mǝnana a bwalia bwalban-guro nǝ nggeabyau andǝ nta mò raka le? Tsǝkia wia girlina andǝ girnùná aɓadǝmbia ɓǝà li sǝ ɓǝà nú, sǝ wu ɗekia ɓǝà nyar aban mǝtala-ɓala malea.>> 23 Nda murǝm pàk girlina-nàtà mǝgule acea; sǝ anzǝm mana à lina sǝ à nùnà ka, tasǝia ɓǝà o, sǝ à nyar aban mǝtala-ɓala malea. Twal a bàkú mǝno ka, amǝ'Suriya tamsǝ yinǝ tǝlliban a Isǝrayila.

24 Nǝnzǝ́mò ka murǝm Ben-Hadat mala Suriya ramba amǝ'lwa male kat, sǝ à wari a Samariya à gumbǝli. 25 Nzal-gula kpa a Samariya, sǝ mǝno yì gumbǝliban ngga lidǝmba gandǝa yi do ama à kǝ mak ɓamur mǝdambǝriso mǝsǝ bolo-azǝrfa lumi-tongno-nong-tàrú (80), sǝ kap mala ciuta-akutu ka, à kǝ mé mǝsǝ bolo-azǝrfa tongno.

26 A ɓè fara murǝm mala Isǝrayila na ban kútí nǝban sheran mala nggea-là, sǝ ɓè ɓwama loasǝ gì bang ama, <<Bwalam nggam, ɓwamǝgule mem, murǝm!>>

27 Sǝ murǝm earî wi ama, <<Ɓǝ̀ Yahweh nda mǝnana nǝ̀ bwalo kàm raka, mana mǝ nǝ gandǝ pá? Mǝ ndanǝ mǝsǝsa a katǝra ko mùr-anap mana mǝ nǝ po ka le?>> 28 Sǝ murǝm ɗi ama, <<Nggearǝ man sàmbó ɗe nǒ?>> Sǝ ɓwame banggi wi ama, <<Ɓè ɓwama banggam ama ɓǝn pà munem ɓǝ̀ sǝm shè yalung, sǝ lí ka sǝm nǝ̀ shak male. 29 Nda sǝm lam mem sǝm shè, sǝ banfana ka, ǝn ne wi nǝma, ɓǝ̀ yinǝ male ɓǝ̀ sǝm shè. Sǝ yì ka, sǝmbǝrǝ male.>>

30 Lang murǝm ok acau mala ɓwame ka, san gìr'nggūrǝu male. Sǝ lang kutio kǝ gya aban ká a nkanggari sheran ngga, aɓwe sǝni ka, daura-ɓalǝu mǝnana oasǝ ka anggubyau-doatú* na. 31 Pǝlǝa bang ama, <<Ɓǝ̀ Ɓakuli ɓashiàm sǝ yale ɓǝ̀ ɓǝsǝlǝi kǝ̀rkǝ́r, ɓǝ̀ ɓamur Elisha, muna-ɓwabura mala Shafat, ue a myali yalung ngga.>>

32 Elisha ka nda ban do a ɓala male atārǝia andǝ aɓwana-mǝgule mala là. Murǝm tasǝ ɓè ɓwabura ɓǝ̀ akidǝmba, sǝ kaniama ɓwê bik ka, Elisha banggi aɓwana-mǝgule mǝno ama, <<Wu sǝni, man yì mǝ'walki-alú ka tasǝna ɓeɓwa ɓǝ̀ yi kasǝ ɓamuram? Lang wu sǝni mǝ'njarnì yina ka, wu gìr kunkurǝm sǝ wu eangnǝ arǝì. Gǝshi kusǝ mǝtala-ɓala male nda mǝno anzǝmi ka re?>> 33 Lang Elisha na ban nacau piu ka, mǝ'njarnì yi tusǝo. Sǝ murǝm bang ama,* <<Wu sǝni, mǝnia yì gìr mǝɓike ka, pur nǝban Yahweh. Palang sǝ mǝ nǝ kundǝ arǝ Yahweh ɗǝm?>>