1 Adyan ngga ɓè ɓwabura na kam à tunǝki ama Naaman,* mǝ'sàrǝ̀ban mala amǝ'lwa mala murǝm Suriya. Ndanǝ gulo sǝ kum earmúrú kǝ̀rkǝ́r a mǝsǝ ɓwamǝgule male, acemǝnana nǝ yì sǝ Yahweh pe Suriya limurǝm. Yì ka kanggǝrang mǝ'lwa na, sǝama mǝkwánó nggû na.

2 A ɓè tǝlliban mǝnana amǝ'Suriya warinǝi amur Isǝrayila ka, amǝ'Suriya twalǝna ɓè muna-ɓwama a nzali Isǝrayila, sǝ yi duk mǝtúró-ɓadǝm mālá Naaman. 3 Muna-ɓwama Isǝrayila man ne mālá-mǝtala'ɓala male ama, <<Ɓǝ̀ ɓwamǝgule mem nǝ̀ gandǝ kum mǝɓangnǝa mǝnana nda a Samariya ka, mǝɓangnǝa mǝno nǝ̀ twalîban dakali male.>>

4 Nda Naaman wario kya banggi murǝm cau mǝnana muna-ɓwama Isǝrayila man bang ngga. 5 Sǝ murǝm Suriya bang ama, <<Kya ado. Mǝ nǝ tasǝ cautera aban murǝm Isǝrayila.>> Nda Naaman wario, sǝ twal amǝsǝ bolo-azǝrfa á-lumi-tàrú (30,000), andǝ amǝsǝ bolo-njengǝlan á-tongno-nong-mwashat (6,000), andǝ abǝsa agir-nggūrǝu lum a buì ka. 6 Aɓa cautera mǝnana Na'aman warinǝi aban murǝm Isǝrayila ka, murǝm Suriya kǝ̀ bang ama, <<Nǝ mǝnia yì cautera ka, ǝn nggǝ tasǝ guro mem Naaman a bano, ace mǝnana wu twaliban kwánó nggû male ka.>>

7 Lang murǝm Isǝrayila ɓal mǝno yì cautera ka, kara san nggea-daura male sǝ na ama, <<Mǝ nda Ɓakuli le? Mǝ nǝ gandǝnǝ wal ɓwa, sǝ mǝ nyesǝ ɓwê nǝyilǝmu ɗǝm le? Palang sǝ murǝm Suriya tasǝ ɓwa abanam ama mǝ twalban dakali mala ɓwê? Usheni, wu sǝni, ndaban altacau arǝàm!>>

8 Sǝama lang Elisha ɓwa mala Ɓakuli ok ama murǝm Isǝrayila san daura male ka, túrban nǝ cau a baní ama, <<Ace mana sǝ a san daura mô? Tasǝ ɓwabure ɓǝ̀ yiu abanam, sǝ nǝ̀ sǝlǝ ama mǝɓangnǝa nakam a Isǝrayila.>> 9 Nda Naaman wario, nǝ apǝr andǝ awaru-pǝr male, sǝ kya cam a kún ɓala mala Elisha ka. 10 Sǝ Elisha túr mǝ'na-túrbân nǝ cau aban Naaman ama, <<Kyane kya sussǝ a Nggeasala Jodan kusǝ tongno-nong-ɓari, sǝ nggūrǝo nǝ̀ nyara-nggunì, sǝ awu nǝ ɓoarnsari.>>*

11 Sǝ Naaman ngga bumi-lullo, nyare o, kǝ na ama, <<Ən twali nǝma, mbak-kàngkàng yì ka nǝ̀ pur abanam, sǝ nǝ̀ came, nǝ̀ pakhiwi nǝ lullǝ Yahweh Ɓakuli male, sǝ nǝ̀ lǝmdǝ buì arǝàm, nǝ̀ twàlâm-ban kwánó-bǝsa. 12 Anggeasala Abana andǝ Farpar, yià anggeasala mala Damaska ka, à ɓoaro-akútì koya nggeasala a Isǝrayila re? Pà mǝ nǝ gandǝnǝ sussǝ aɓalǝia sǝ rǝam nǝ̀ ɓoarnsari ɗang re?>> Nda pǝlǝa, nyare umnǝ bumlulla ka.

13 Sǝama aguro male yiu abaní sǝ à ne wi ama, <<Ɓwamǝgule, ɓǝ̀ mǝɓangnǝa bangŋǝno ama wu pak gìr mǝkwane ka, ɓǝ́ a pangmi re? Ado ka, ace mana sǝ a pà wunǝ nggá sussǝo, kǝla mǝnana banggo, sǝ rǝo nǝ̀ mal ka ɗang?>> 14 Nda Naaman sulǝo wario, lim a mùr kusǝ tongno-nong-ɓari a Nggeasala Jodan, kǝla mǝnana ɓwa mala Ɓakuli ne wi ka, sǝ ngguí nyare pàk kǝla rǝ muna mǝkyauwe, sǝ rǝì ɓoarnsari.

15 Pǝlǝa Naaman nyar aban ɓwa mala Ɓakuli, yì andǝ aburana male mǝnana kat atè ka, sǝ yi came aɓadǝm Elisha. Sǝ bang ama, <<Ado ka, ǝn sǝlǝna ama kǝ ɓè Ɓakuli pà kàm aɓa ɓanza kat ɗàng, she a Isǝrayila! Ida, ak ɓoro a bù guro mò.>>

16 Sǝ Elisha bang ama, <<*Mbak-kàngkàng Yahweh nakam, mǝnana ǝn camgiyi aɓadǝmbi ka, pà mǝ nǝ ak kǝgir ɗàng.>> Sǝ Naaman ɓuaki arǝì ɓǝ̀ é, sǝ Elisha ka ginǝe.

17 Pǝlǝa Naaman bang ama, <<Ɓǝ̀ a pà wunǝ é raka, ida earâm mǝ ɗàrǝ́ nzali ban mǝnia ka kpǝm, ɓǝ̀ bik twalo nzǝm apǝr-mǝdambǝriso ɓari,* ace mǝnana twal ado aban ká a dǝmba ka, mim guro mò ka, pà mǝ nǝ nyare mǝ nǝ pà gir'nkila mala pisǝe kǝring, ko pa ɓoro aban aɓea aɓakuli ɗǝm ɗàng she aban Yahweh. 18 Sǝama ɓǝ̀ Yahweh twàlâm-ban mǝnia yì gìr ka, mim guro mò: Lang mǝ nǝ tsǝkta murǝm aɓa ndà mala Rimmon [ɓakuli male] ace peri a banì, sǝ sǝm nǝ̀ peri sǝnǝi ka, ɓǝ̀ Yahweh twalî guro mò banì ace mani.>> 19 Elisha ne wi ama, <<O aɓa rǝpwala.>>

Sǝama lang Naaman umni wi zak ka, 20 *Gehazi, yì guro mala Elisha ɓwa mala Ɓakuli ka, ne ɓamurì ama, <<Sǝni, ɓwamǝgule mem nyìngŋǝ̀nà Naaman ɓwa'Suriya mǝnia ka, ak kǝgir a buì aɓalǝ agir mǝnana yinǝia ka ɗàng. Mbak-kàngkàng Yahweh nakam ngga, mǝ nǝ ɓangŋa atè, mǝ nggá ak ɓegìr a buì.>>

21 Nda Gehazi ɓangŋa atà Naaman. Sǝ lang Naaman sǝn ɓeɓwa aban ɓangŋa atè ka, sulǝî waru-pǝr male ace kúllí ɓwê, sǝ ɗì ama, <<Jam le?>>

22 Sǝ Gehazi eari wi ama, <<Koman ngga nda jam. Ɓwamǝgule mem túràm, mǝ banggo ama, <Sǝni, alaggana ɓari mala nggǝsan mala amǝ'ɓangnǝa pur a nzali múr ankono mala Ifǝrem, sǝ à yina abanam adyan. Ida, pea wia amǝsǝ bolo-azǝrfa á-tàrú (3,000) andǝ agir-nggūrǝu banì ɓari.> >>

23 Naaman ne wi ama, <<Ida, ak amǝsǝ bolo-azǝrfa á-tongno-nong-mwashat (6,000.)>> Pǝlǝa Naaman tsǝk Gehazi ɓǝ̀ ak agirnì; sǝ kùr amǝsǝ bolo-azǝrfa á-tongno-nong-mwashat (6,000) aɓalǝ aluru ɓari, sǝ atārǝia andǝ agir-nggūrǝu banì ɓari ka, pè ɓari atà aguro male ɓǝà twalî Gehazi, ɓǝà kyanbi wi nǝia aɓadǝmbi. 24 Lang Gehazi bingŋǝna mgbangban ngga, ak agirnì a bù aguronì sǝ tsǝia a ɓala. Pǝlǝa tasǝ aburane ɓǝà nyare. 25 Pǝlǝa Gehazi kutio yi came aɓadǝm ɓwamǝgule male; sǝ Elisha ɗì ama, <<A wari ke, Gehazi?>> Gehazi eari wi ama, <<Guro mò wari a kǝ ban ɗang.>> 26 Sǝ Elisha ne Gehazi ama, <<Bangŋo mem pa atò, lang ɓwabure sulǝî waru-pǝr male ace kúllió ka re? Mǝnia ka nda pwari ak boalo, andǝ agir-nggūrǝu, andǝ mùrú olif, andǝ aɓaban-anap, andǝ anzur, andǝ ajamnda, andǝ aguro aburana andǝ aguro amamǝna le? 27 Acemani ka, dakali mala Naaman nǝ̀ lanzǝ arǝò wunǝ amǝ'keo tàtǝ́k.>>Nda Gehazi purî ɓadǝm Elisha, sǝ *dakali bwali, rǝì pwasǝo kǝla talimbulo ka.