1 A tongno-nong-ɓaria pǝlǝa mala do-bunomurǝm mala Peka muna-ɓwabura mala Remaliya ka, Ahaz muna-ɓwabura mala Jotam duk murǝm amur Yahuda. 2 Apǝlǝa ɓǝlban mala Ahaz ka à nda lumi-ɓari lang tita yálmúrû ka, sǝ yálmúr aɓwana a Urǝshalima arǝ apǝlǝa lum-bwamdǝ-tongno-nong-mwashat. Pàk gìr mǝnana mǝɓoarne na a mǝsǝ Yahweh Ɓakuli male, kǝla mǝnana kè Dauda pàk ka ɗàng. 3 Yì ka kpata kusǝ pakkia agir mala amurǝma mala Isǝrayila. Yale pisǝ muna-ɓwabura male a bǝsa kǝla paɓoro aban ankúl; pè aɓa kpata pakkiagir mala aɓwapǝndǝa mala anzali mǝnana Yahweh pǝria à purî ɓadǝm amǝ Isǝrayila ka. 4 Sǝ pà gìr'nkila andǝ aɓoro amur amgbangban-peri atà ankúl, andǝ múr ankono, sǝ à tǝr koya nggun mǝpwale.

5 A bàkú mǝno ka, Rezin murǝm mala Suriya andǝ Peka muna-ɓwabura mala Remaliya, murǝm mala amǝ Isǝrayila, à yiu ace lwa-lwa arǝ Urǝshalima, sǝ à gumbǝli Ahaz, sǝama à gandǝ limurǝm amurí ɗàng. 6 (A bákuì mǝno ka, Rezin murǝm mala Suriya* ak nggea-là Elat, nyesǝi aɓata nzali Suriya sǝ pǝr aburana mala nzali Yahuda ɓǝà purî ɓá Elat. Sǝ amǝ'Suriya* yiu a Elat, ban mǝnana à yi duk kam ba yalung ngga.) 7 Nda Ahaz tasǝ amǝ'na-túrbân aban Tigǝlat-Pilesa murǝm mala Assuriya ama, <<Mǝ nda guro mò, sǝ mǝ nda munio. Yiu amsǝam a ɓabu murǝm Suriya, sǝ a ɓabu murǝm Isǝrayila, mǝnana à kǝ yinǝ munǝo arǝàm ngga.>> 8 Ahaz gbal ka twal bolo-azǝrfa andǝ bolo-njengǝlan mǝnana à kumi a ɓala mala Yahweh, sǝ aɓalǝ andà-tsǝk agir-ɓoarna mala ɓala-murǝm ngga. Tasǝna ɓoro nǝi aban murǝm Assuriya. 9 Nda murǝm Assuriya pàk gìr mǝnana Ahaz zǝmbì ace ka. Yì andǝ amǝ'lwa male lo sǝ à umnǝ lwa arǝ Damaska, sǝ à kya e, sǝ à pwan aɓwana mana à ndanǝdo a Damaska ka aɓa-nggur, à umnǝia a bǝri-nzali a Kir.* Pǝlǝa à wal-lú Murǝm Rezin.

10 Lang Murǝm Ahaz wari a Damaska nǝ̀ nggá sǝn Tigǝlat-Pilesa murǝm mala Assuriya ka, kya sǝn gyangŋan-peri mǝnana à ɓè a Damaska ka. Sǝ Murǝm Ahaz terǝî Yuriya pǝris nyoulǝa-pa mala gyangŋanì andǝ kutan mala ɓak ulangni gǝ̀rgǝ̀r. 11 Pǝlǝa Yuriya pǝris ɓak gyangŋan mǝno; kpate kǝla mǝnana kat Murǝm Ahaz túrban nǝi a Damaska sǝ à yinǝi ka. Yuriya pǝris mal ɓě sǝɓǝ̀ Murǝm Ahaz nyarî Damaska. 12 Lang murǝm nyarî Damaska sǝ sǝn gyangŋanì ka, sung tù abaní sǝ pà ɓoro mala gìr'nkila amurí. 13 Pa ɓoro male mala pisǝe kǝring, andǝ ɓoro male mala mǝsǝsa. Solǝ ɓoro male mala girnùná, sǝ watsǝki nkila mala pagir male mala do-rǝpwala amur gyangŋanì. 14 Sǝ gyangŋan bolo-bángŋá mǝnana cam aɓadǝm Yahweh ka, Murǝm Ahaz pusǝì a bancame male a ɓadǝm ɓala mala Yahweh, a nre gyangŋan male andǝ ɓala mala Yahweh, sǝ kya tsǝì a bù njar-nza mala gyangŋan male. 15 Murǝm Ahaz pe Yuriya pǝris nzongcau ama, <<Amur gyangŋan mǝgule* ka, awu nǝ pisǝ gir'nkila mala pisǝe kǝring mala dǝmbari, andǝ pagir mala mǝsǝsa mala pwarikpǝra, andǝ pagir mala pisǝe kǝring mala murǝm, andǝ pagir male mala mǝsǝsa, atārǝia andǝ pa girnkila mala pisǝe kǝring mala aɓwana mana à nda aɓa nzali kat ka, andǝ apagir malea mala mǝsǝsa, sǝ apagir malea mala girnùná. Sǝ awu nǝ watsǝki nkila kat mala apagir mala pisǝe kǝring, andǝ nkila kat mala agir'nkila amurí; sǝ gyangŋan bolo-bángŋá ka nda acem mǝ ɗibancau kàm.>> 16 Yuriya pǝris pàk mǝnia ka kat, kǝla mǝnana murǝm Ahaz tsǝki wi nzongcau ka.

17 Murǝm Ahaz kasǝki anggun awaru-ramggite, sǝ pusǝki ankenye mǝnana amuria ka. Pusǝ kaɓa-nkenye mǝnana a nzǝm ajamnda bolo-bángŋá ka, sǝ sulǝì tamsǝì amur akpamgbǝlang tali. 18 Ɗǝm ngga tara mǝnana à tsǝì a ɓala mala Yahweh, mǝnana aɓwe kǝ gya aɓate ace kùtí a ɓala mala Yahweh a pwari Sabbat ka, Ahaz pusǝì, sǝ gìr kunkurǝm nza mǝnana murǝm kǝ kútí kam a ɓala mala Yahweh ka. Pàk mǝnia ka ace pwasǝbum murǝm Assuriya.

19 Adyan ngga, acili agir mǝnana à kumban a do-bunomurǝm mala Ahaz, andǝ atúró mǝnana pàkkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 20 Ahaz paklú atà akê, sǝ à tsǝì atea a nggea-là mala Dauda. Muna-ɓwabura male Hezekiya duk murǝm a bancame male.