2Amurǝma 7

Elisha pacau mala kum girlina

1 Elisha ear ama, <<Wu kwakikir wun arǝ cau mala Yahweh! Yahweh bang ama, <Lí nǝ bu-pwari kǝla man ngga, à nǝ̀ mak tasau mwashat mala muku mǝɓǝlke a kún shekel mwashat, sǝ tasau ɓari mala mǝssa-bálì ka, à nǝ̀ me a kún shekel mwashat, a bankutio aɓa nggea-là Samariya.> >> 2 Sǝ mǝtamurǝm mǝnana pàkkiyi murǝm gbasha ka, bang ama, <<Sǝni, ko ɓǝ̀ Yahweh nǝ̀ mǝngi afongǝran bumkuli ka, mǝna yì gìr ka nǝ̀ pàk le?>> Elisha banggi wi ama, <<Awu nǝ sǝni nǝ mǝsǝo, sǝ a pa wunǝ lì ko bǝti aɓalǝi ɗàng.>>

Amǝ’Suriya ɓangŋa

3 Adyan ngga aburana ine mǝnana amǝkwánó nggû*7:3 Ɓalli aɓa: Pǝris 13; 2Amur 5 na ka, à nda ban do a bankutio mala kún nggea-là. À ne rǝia ama, <<Ace mana sǝ sǝm nǝ̀ duk kani aban kúndǝô sheɓǝ̀ sǝm wukina ka? 4 Ɓǝ̀ sǝm na ama, <Sǝm nǝ̀ kùtí aɓa nggea-là> ka, nzala na aɓa nggea-là, sǝm nǝ̀ nggá wù kàm; sǝ ɓǝ̀ sǝm duk kani ka, sǝm nǝ̀ wù gbal. Ado ka, fa sǝm nǝ̀ umì a kàttì mala amǝ’Suriya, ɓǝ̀ sǝm kya ɓun abania! Ɓǝ̀ à nying sǝm nǝyilǝmu ka, sǝm nǝ̀ auwa; sǝ ɓǝ̀ à wal-lú sǝm ngga, kǝgir pà kàm sǝm nǝ̀ gandǝ pàk ɗàng, sǝm nǝ̀ wǔ.>> 5 Nda à lo nǝ pwarikpǝra, à o a kàttì mala amǝ’Suriya; lang à bwal ban kàttì mala amǝ’Suriya ka, kǝ ɓwa pà kàm ɗàng. 6 Yahweh angŋa-dǝmba tsǝ̀ngŋǝ̀nà amǝ’lwa mala amǝ’Suriya à ok gǝshi awaru-pǝr andǝ gǝshi apǝr, nggearǝ loasǝban mala bundǝo mala amǝ’lwa; sǝ à nea rǝia ama, <<Wu sǝni, murǝm Isǝrayila kúrna amurǝma mala amǝ’Hitti andǝ amurǝma mala amǝ’Masar, ɓǝà yiu arǝ sǝm.>> 7 Acemani ka à lo, sǝ à um nǝ mire nǝ bù pwarikpǝra; à nying agumli malea, andǝ apǝr malea, andǝ amǝdambǝriso malea; sǝ nggearǝ kàttì ka, à nyì atàrǝì, sǝ à ɓangŋa ace amsǝ yilǝmia.

8 Lang amǝkwánó nggû yina a nkanggari kàttì ka, à kùtí aɓa ɓè gumli sǝ à li à nu. À pwan bolo-azǝrfa, andǝ bolo-njengǝlan, andǝ agir-nggūrǝu, sǝ à kya sǝmbǝrǝia. Pǝlǝa à nyare, à yi kútí aɓa ɓè gumli, sǝ à pwan agir kàm gbal, à kya sǝmbǝrǝia.

9 Pǝlǝa à ne arǝia ama, <<Sǝm pà aban pak mǝɓoarne ɗàng. Pwari man yalung ngga, pwari mala bǝsacau mǝɓoarne na, sǝ sǝm ne kǝɓwa ɗàng; ɓǝ̀ sǝm kúndǝô ba kwaro mala ban ngga, girpatanni nǝ̀ kum sǝm. Acemani ka, wu yiu ɓǝ̀ sǝm kya bangce aban amǝ’ɓala mala murǝm.>>

10 Nda sǝ à yi tunǝ amǝ’yál kún nggea-là. À banggia wia ama, <<Sǝm wari a kàttì mala amǝ’Suriya sǝ sǝm sǝni ka, kǝɓwa pà kàm ɗàng. Yale sǝm ok kǝ gì ɓwa ɗàng. Sǝama apǝr andǝ amǝdambǝriso ka, à nda kam piu a ban mǝnana à kùria kam ngga, sǝ agumli ka à nda atàrǝia.>> 11 Pǝlǝa amǝ’yál kún nggea-là tunǝban sǝ à hamnǝ cê aban amǝ’ɓala murǝm. 12 Pǝlǝa murǝm lo nǝ du sǝ banggi amǝtè ama, <<Mǝ nǝ na wun gìr mǝnana amǝ’Suriya pakka sǝm ngga. À sǝlǝna ama sǝm nda aɓa nzala, nda à purî ɓá kàttì malea ace ká sǝmbǝrǝa a ɓawan, nǝ ɗenyicau ama, <Lang à purnì ɓá nggea-là ka, sǝm nǝ̀ bwalkia nǝyilǝmia sǝ sǝm nǝ̀ kùtí aɓa nggea-lê.> >> 13 Mwashat atà amǝtè ear ama, <<Ida, ɓǝ̀ aɓea aburana pwan tongno atà apǝr mǝnana à ue aɓa nggea-là ka, ɓǝà kyane. Ɓǝ̀ à au ka, à nda kǝla cili ɓwabundǝa mala Isǝrayila mǝnana ue aɓa nggea-là ka. Sǝ ɓǝ̀ à wù ka, à nǝ̀ pa kǝla ɓwabundǝa mala Isǝrayila mǝnana à kiɗikina ka. Ɓǝ̀ sǝm tasǝia ɓǝà kya sǝn gìr mǝnana kǝ kumban a kàttì mala amǝ’Suriya ka.>>

14 Nda à twal awaru-pǝr ɓari nǝ apǝr sǝ murǝm turia ɓǝà kya súrǝ̀ mana kum amǝ’lwa mala Suriya; banggia wia ama, <<Wu kyane, wu kya sǝnì.>>

15 À o ateà ɗār aban ká a Nggeasala Jodan. Njargula lumsǝ nǝ agir-nggūrǝu andǝ agirtúró mǝnana amǝ’Suriya sukkia aɓa mire malea ka. Pǝlǝa amǝnjar nyare à yi banggi murǝm.

16 Nda sǝ aɓwe puro à kya pwan gǝna-lwa mǝnana kat ue a kàttì mala amǝ’Suriya ka. À mak tasau mwashat mala muku mǝɓǝlke a kún shekel mwashat, sǝ tasau ɓari mala mǝssa-bálì ka, à me a kún shekel mwashat, kǝla mǝnana Yahweh bang ngga.

17 Adyan ngga murǝm tsǝ̀ngŋǝ̀nà mǝtè mǝnana pàkkiyi wi gbasha ka, ɓǝ̀ duk mǝ’sàrǝ̀ban a kún nggea-là. Sǝama lang ɓwabundǝa na ban ramggi’rǝia ace puro a kún nggea-là ka, à parki, wǔ, kǝla mǝnana ɓwa mala Ɓakuli bang a pwari mǝno murǝm warinǝi a baní ka. 18 Mǝnia yì gìr ka yi kumban kǝla mana Elisha ɓwa mala Ɓakuli angŋa-dǝmba nanì murǝm ama, <<Tasau ɓari mala mǝssa-bálì ka, à nǝ̀ me a kún shekel mwashat, sǝ tasau mwashat mala muku mǝɓǝlke ka, à nǝ̀ me a kún shekel mwashat, lí nǝ bu-pwari kǝla mǝnia ka a bankutio aɓa nggea-là Samariya.>> 19 Sǝama mǝno yì mǝtamurǝm ngga ɓinǝ earnǝ cê; nyesǝî ɓwa mala Ɓakuli ama, <<Ko ɓǝ̀ Yahweh nǝ̀ mǝngi afongǝran bumkuli ka, mǝna yì gìr ka nǝ̀ pàk le?>> Sǝ ɓwa mala Ɓakuli ne wi ama, <<Awu nǝ sǝni nǝ mǝsǝo, sǝ a pa wunǝ lì ko bǝti aɓalǝi ɗàng.>> 20 Anggo sǝ yi kumi; aɓwe parki a kún nggea-là, wǔ.