1 A lum-bwamdǝ-tongno-nong-tàruia pǝlǝa mala yálmúrû mala Jehoshafa murǝm Yahuda ka, Joram* muna-ɓwabura mala Ahap duk murǝm Isǝrayila a Samariya, sǝ yálmúr aɓwana apǝlǝa lum-nong-ɓari. 2 Joram pàk gìr mǝnana mǝɓike na a mǝsǝ Yahweh ka, sǝama pa kǝla mala tárrí andǝ nggé ɗàng, acemǝnana arki kúnamúrú mala Ba'al mǝnana tárrí akdǝmba pè ka. 3 Kat andǝ mǝno ka, lidǝmba nǝ pakki acauɓikea mǝnana Jerobuam muna-ɓwabura mala Nebat peǎ, * sǝ tsǝk Isǝrayila a pě ka; pǝlǝ nzǝmi arǝ peǎ ɗàng.

4 Adyan ngga, Mesha murǝm Mowap ka, mǝlǝsǝ anzur na, sǝ koya pǝlǝa ka, dumǝna púp nǝ̀ mbwe cemi mala amuna-nzur á-gbǝman-mwashat andǝ nggú agam á-gbǝman-mwashat aban murǝm Isǝrayila. 5 Sǝama anzǝm lú mala Ahap ka, murǝm Mowap mgbicau arǝ murǝm Isǝrayila. 6 Acemani ka, Murǝm Joram purî ɓá Samariya a bàkú mǝno, sǝ ramba amǝ'lwa mala Isǝrayila kat. 7 Sǝ túrban nǝ cau aban Jehoshafa murǝm Yahuda ama: <<Murǝm Mowap mgbinacau arǝàm. Awu nǝ ká atàm a munǝo arǝ Mowap le?>>

Sǝ Jehoshafa eari wi ama, <<Mǝ nǝ ká atò. Mim sǝnǝ we ka sǝm nda mwashat. Aɓwana mem ngga aɓwana mò na, sǝ apǝr mem ngga apǝr mò na.>> 8 Pǝlǝa Jehoshafa ɗìban ama, <<Nǝ ya njar sǝ sǝm nǝ̀ kàra?>>

Joram eari wi ama, <<Nǝ njar ɓabondo mala Edom.>>

9 Nda murǝm Isǝrayila pur andǝ murǝm Yahuda andǝ murǝm Edom. Anzǝm mana à pàngŋǝ̀nà nongŋo tongno-nong-ɓari aban gya gumbǝliban ngga, mùr pà kàm ɗǝm acea andǝ agirkusǝu mǝnana ateà ka ɗàng. 10 Pǝlǝa murǝm Isǝrayila bang ama, <<Mbak-kàngkàng, Yahweh yinanǝ sǝm, sǝm amurǝma mǝnia tàrú ka abanɓwáná ace túr sǝm a ɓabù murǝm Mowap.>>

11 Jehoshafa ɗìban ama, <<Kǝ ɓè mǝɓangnǝa mala Yahweh pa akani, mǝnana sǝm nǝ̀ ɗìbancau aban Yahweh nǝbani ka re?>>

Mwashat atà amǝgulo mala murǝm Isǝrayila ear ama, <<Elisha muna-ɓwabura mala Shafat na kani. Muna-ɓala mala Iliya na ɗiɗyal.>>

12 Jehoshafa bang ama, <<E, Elisha ka, ndanǝ cau mala Yahweh a kúni.>> Nda murǝm Isǝrayila andǝ Jehoshafa andǝ murǝm Edom wari aban Elisha ka.

13 Sǝ Elisha ne murǝm Isǝrayila ama, <<Mana kpapiam sǝnǝ we? Kya aban amǝ'ɓangnǝa mala tárró andǝ amǝ'ɓangnǝa mala nggò.>>

Sǝ murǝm Isǝrayila ear ama, <<Awo, Yahweh na yinǝ sǝm, sǝm amurǝma mǝnia tàrú ka abanɓwáná ace túr sǝm a ɓabù Mowap.>>

14 Sǝ Elisha bang ama, <<Mbak-kàngkàng Yahweh, Mǝtala Abangŋo, mǝnana ǝn camgiyi aɓadǝmbi nakam ngga, ɓǝ̀ pa ace mǝnana ǝn nggǝ pè Jehoshafa murǝm Yahuda gulo raka, ɓǝ́ pà mǝ nǝ falǝ nǝ we ko mǝ nǝ sǝno ɗàng. 15 Sǝama adyan ngga, wu yinǝam nǝ mǝ'wal jerang.>> Sǝ lang mǝ'wal jerang naban wal jerang ngga, bù Yahweh sulǝ amur Elisha. 16 Sǝ bang ama, <<Mǝnia ka nda cau mǝnana Yahweh bang ngga: <Mǝ nǝ tsǝk myalmur mǝ'ime man ɓǝ̀ lùmsǝ nǝ atūli-mùr,> 17 acemǝnana mǝnia ka nda cau mǝnana Yahweh kǝ na ka, <Pà wu nǝ̀ ok ɓua mala gung ɗàng, sǝ pà wu nǝ̀ sǝn kǝ mbulo ɗàng, sǝ kat andǝ amani ka, myalmur mǝnia nǝ̀ lùmsǝ nǝ mùr, sǝ wun nǝ̀ nu, wun wunǝ andá ma'wun andǝ acili agirkusǝu ma'wun.> 18 Mǝnia ka gìr mǝhalkuǐ na a mǝsǝ Yahweh; ɗǝm ngga nǝ̀ túr amǝ'Mowap a ɓabù wun. 19 Wun nǝ̀ soa munǝo arǝ koya kanggǝrang nggea-là, andǝ koya là mǝgule. Wun nǝ̀ mak koya nggun mǝɓoarne, sǝ wun nǝ̀ lùmsǝki atūli-mùr kat nǝ atali, sǝ wun nǝ̀ kiɗiki koya ɓaban mǝɓoarne nǝ atali.>>

20 Lang ban fana, nǝ bu-pwari mala pà gìr'nkila ka, kara mùr pur nǝ njar Edom, sǝ nzali lumsǝ nǝ mur.

21 Lang amǝ'Mowap kat ok ama amurǝma yina ace munǝo arǝia ka, à ram rǝia abanɓwáná; koya ɓwabura, lagga andǝ ɓwamǝgule mǝnana kārǝ́na nǝ̀ twal girbura ka, à puro sǝ à kya came a nzong-nzali malea. 22 Sǝ lang à lo nǝ dǝmbari ɗiɗyal ka, pwari tǎ amur mùr, sǝ amǝ'Mowap sǝn mùr mǝnana a ɓadǝmbia ka báng bìng-bìng kǝla nkila. 23 Amǝ'Mowap na ama, <<Man ngga nkila na; mbak-kàngkàng amǝno yì amurǝma ka à munǝna arǝarǝia sǝ à walna-lú rǝarǝia. Adyan ngga, wun amǝ'Mowap wu fa, ɓǝ̀ sǝm kya pwan gǝna-lwa!>>

24 Sǝama lang à yiu a kàttì mala Isǝrayila ka, amǝ'Isǝrayila lo arǝia nǝ munǝo sǝ à walia. Amǝ'Mowap ɓangŋa aɓadǝm amǝ'Isǝrayila, sǝ amǝ'Isǝrayila kùtí aɓa nzali mala amǝ'Mowap aban walia. 25 À kiɗiki anggea-là mala amǝ'Mowap, sǝ koya ɓwabura ka túr tali aɓa koya ɓaban mǝɓoarne, à gìr múrí nǝ atali. À lùmsǝki atūli-mùr kat, sǝ à makki anggun mǝɓoarne kat. Kǝ nggea-là mǝnana ueo nǝmurǝi aɓa nzali Mowap ka nda Kir-Hareset. Amǝ'túr-ntamso gumbǝli, sǝ à munǝ arǝì. 26 Lang murǝm Mowap sǝni ama munǝo no kǝ gandǝi ka, pwan amǝ'lwa gbǝman-tongno-nong-ɓari (700) atè nǝ anggeabyau sǝ ɓariki nǝ̀ sana ace ɓangŋa nǝ̀ ká aban murǝm Edom,* sǝama à gandǝi ɗàng. 27 Pǝlǝa murǝm bwal muna-ɓwabura muna-dǝmba male mǝnana nǝ̀ duk murǝm anzǝmi ka, sǝ pana ɓoro mala pa'girnkila mala pisǝe kǝring nǝi [aban ɓakuli mala amǝ'Mowap] amur sheran mala nggea-lê. Kara bumlulla mǝkǝ̀rkǝ́rnì lo arǝ Isǝrayila, sǝ Isǝrayila nyarnǝte arǝ munǝe, sǝ à nyar a nzali malea.