1 Pǝlǝa Murǝm Josiya tunǝ aɓwana-mǝgule mala Yahuda andǝ mala Urǝshalima ɓǝà ramba abaní. 2 Sǝ murǝm wari a ɓala mala Yahweh andǝ aburana mala Yahuda kat, andǝ amǝ'do aɓa Urǝshalima atè; apǝris, andǝ amǝ'ɓangnǝa, andǝ aɓwana kat, amuna andǝ aɓwana-mǝgule. Pǝlǝa ɓallià wia, acau kat mala Malǝmce mala Kùrcau, mǝnana à kumi a ɓala mala Yahweh ka, à oè a kiria. 3 Pǝlǝa murǝm cam a nkanggari nggun-gbasha [mala murǝm],* * sǝ kùrcau aɓadǝm Yahweh, ama nǝ̀ kpata Yahweh, nǝ̀ bwal anzongcau male, andǝ anggurcau male, andǝ anê male, nǝ ɓabumi kat andǝ yilǝmi kat. Pàcau ama nǝ̀ tsǝk acau mala kùrcau mǝnia ka aɓa túrô, kǝla mǝnana à gilǝì aɓa mǝnia yì malǝmce ka. Sǝ aɓwana kat paɓamuria, à eare à nǝ̀ kùti aɓa mǝnia yì kùrcau ka.

4 Pǝlǝa murǝm pà nzongcau aban Hilkiya pǝris mǝgule, andǝ acili apǝris mana à kwaɗite ka, andǝ amǝ'ɗenyinǝ kun-nda ama, agir mǝnana kat à pea ace peri aban Ba'al, andǝ Ashera, sǝ ace peri aban anleuro mala bumkuli, mǝnana à nda a ɓala mala Yahweh ka, ɓǝà pusǝkia kat a nza, ɓǝà purî ɓala mala Yahweh; sǝ murǝm kya pisǝ agir mǝnia ka kat anzǝm nggea-là Urǝshalima, a ban mǝnana nda tù a ban Ɓangŋaban Kidǝron ngga, sǝ pwan tú mala agir mǝnia à pisǝia ka, umnǝia a Betel. 5 Apǝris mala ankúl mǝnana amurǝma mǝdǝmbe mala Yahuda twalia ɓǝà kǝ pàɓoro amur agyangŋan-peri aɓalǝ anggea-là mala Yahuda, andǝ abân mǝnana à kàrì Urǝshalima ka, Murǝm Josiya sulǝia kat; yià andǝ amǝnana à pisǝ aɓoro mala loasǝ yele mǝrǝmɓoarne aban Ba'al, andǝ pwari, andǝ zongŋo, andǝ asabisa, andǝ anlero mǝnana kat a kùli ka. 6 Pǝlǝa twal tondong mala Ashera mǝnana a ɓala mala Yahweh ka, umnǝi a Ɓangŋaban Kidǝron, anzǝm nggea-là Urǝshalima, sǝ kya pisǝì kàm. Pǝlǝa goe pǝlǝ muku, sǝ mesǝki tuí amur aɓembe mala aɓwana. 7 Sǝ arki akurǝm mǝnana aburana amǝ'gyatarǝu duk kam a ɓala mala Yahweh, a ban mǝnana amamǝna kǝ tāki alagìr-gbarban ace Ashera ka.

8 Apǝris mǝnana kat à ndanǝdo aɓalǝ alá mala Yahuda, mǝnana à kǝ pāki aɓoro amur amgbangban-peri arǝ abân mǝno ka, Josiya yinǝia kat a Urǝshalima, sǝ kiɗiki agyangŋan-peri malea, tite a Geba kya bik Biyasheba. Sǝ nggearǝ amgbangban-peri mǝnana a nkanggari bankutio a kun-nggealà [Biyasheba], mǝnana Jesǝwa, nggwamna mala nggea-lê ɓè ka, Josiya bǝbbǝrikia.

9 Earî apǝris mala agyangŋan-peri mǝno ɓǝà pàk túró-pǝris amur gyangŋan mala Yahweh mǝnana a Urǝshalima ka ɗàng. Sǝama earia wia ɓǝà li bǝredi mǝnana burè pà arǝì raka, mǝnana à pà ace aɓia apǝris ka.

10 Ɗǝm ngga, Murǝm Josiya kiɗiki gyangŋan mala Tofet * mǝnana a Ɓangŋaban Hinom ngga, ace mǝnana kǝɓwa ɓǝkǝa pà gir'nkila nǝ muna-ɓwabura ko muna-ɓwama male kǝla pàgir mala pisǝe kǝring aban nkúl Molek ɗàng. 11 Ɗǝm ngga, pisǝ apǝr* mǝnana amurǝma mǝɗiɗyalni mala Yahuda tamsǝkia a bankutio a ɓala mala Yahweh ace peri aban pwari ka; amǝno yì apǝr mǝnana à camgi a nkanggari kurǝm mala ɓè mǝgulo lullǝi ama Natan-Melek ka, pisǝia. Josiya pǝlǝa pisǝ awaru-pǝr mǝnana à tària ace peri aban pwari ka. 12 Agyangŋan mana amurǝma mala Yahuda akdǝmba à ɓakkia a múr-kurǝm mala kurǝm-kuli mala Murǝm Ahaz ka, Murǝm Josiya arkia, sǝ arki agyangŋan mǝnana Murǝm Manasa ɓakkia aɓalǝ apatal ɓari mǝnana a ɓala mala Yahweh ka. Josiya goea à pǝlǝ mukuì sǝ sukki túià a Ɓangŋaban Kidǝron. 13 Anzǝm mǝno ka, Murǝm Josiya kiɗiki amgbangban-peri a takuli mala Urǝshalima, nǝban njar-kunmur mala Nkono mala Kiɗiki, yì amgbangban-peri mǝnana Murǝm Solomon akdǝmba pea ace peri aban Ashtarot, gìrɓeami, yì mā-ɓakuli mala amǝ'Sidon, andǝ Kemosh, gìrɓeami, yì ɓakuli mala amǝ'Mowap, andǝ Molek, gìrɓeami, yì ɓakuli mala amǝ'Amon. 14 Arki akúnamúrú, mesǝkia mwashat-mwashat, kwarki ɓǝ̀nzál mala Ashera kasǝki, sǝ lúmsǝ́ banì nǝ amú ɓwapǝndǝa.

15 A Betel ka, bǝbbǝriki gyangŋan andǝ mgbangban-peri mǝnana Jerobuam muna-ɓwabura mala Nebat pè, sǝ tsǝk Isǝrayila aɓa cauɓikea ka; pisǝ agir mala mgbangban-perini sǝ goea à pǝlǝ muku; pǝlǝa pisǝ ɓǝ̀nzál mala Ashera. 16 Lang Murǝm Josiya pǝlǝ rǝì, pelǝban ngga, sǝn aɓembe abanì amur mgbangban. Pǝlǝa pà nzongcau ama ɓǝà pusǝki amú mana aɓalǝia ka, sǝ pisǝia amur gyangŋanì, pǝndǝki ɓǝ̀ pǝlǝ gìrɓeami. Mǝnia ka nda lùmsǝ cau mala Yahweh mǝnana akdǝmba hamnǝi nǝ kún ɓwa mala Ɓakuli mǝnana hamnǝ acau mala agir mǝnia ka.*

17 Pǝlǝa murǝm ɗiban ama, <<Ya tali-ɓembe na mǝno, ǝn nggǝ sǝni ka?>> Aburana mala nggea-lê banggi wi ama, <<Mǝno ka nda ɓembe mala ɓwa mala Ɓakuli, mana pur a Yahuda, sǝ yi hamnǝ acau mala mǝnia yì gìr a pe adyan arǝ gyangŋan mala Betel ka.>>

18 Josiya pǝlǝa pa eare ama, <<Wu ɗeki, kǝɓwa ɓǝkǝa je amuí ɗàng.>> Nda sǝ à ɗeki amuí à jea ɗàng, andǝ amu mǝɓangnǝa mana pur a Samariya ka.

19 Ɗǝm ngga, aɓala mala amgbangban-peri aban ankúl mǝnana amurǝma mǝɗiɗyalni mala Isǝrayila akdǝmba ɓakia, aɓalǝ anggea-là mala Samariya, sǝ lulbum Yahweh ka, Josiya bǝbbǝrikia kat. Pangnǝia kǝla mǝnana pè a Betel ka.

20 Apǝris mala amgbangban-peri mǝnana à nda arǝ abân mǝno ka, Josiya wal-luia kat amur agyangŋan malea, sǝ pisǝ amuia amur agyangŋanì. Pǝlǝa nyare o a Urǝshalima.

21 Sǝ Murǝm Josiya pà nzongcau aban aɓwe kat, ama: <<Dumǝna púp, wun nǝ̀ pàk lamsan Yàlîmurû aban Yahweh, Ɓakuli ma'wun, kǝla mǝnana à gilǝì aɓa mǝnia yì Malǝmce mala Kùrcau ka.>> 22 Murǝm pà mǝnia yì hama ka acemǝnana lamsan mala Yàlîmurû kǝla mǝnia ka, aɓwe pè a kǝ fara ɗàng: ko a bàkú mana akasǝla yálmúr Isǝrayila, ko arǝ anza mala amurǝma mala Isǝrayila andǝ mala Yahuda ɗàng. 23 Sǝama, a lum-bwamdǝ-tongno-nong-tàruia pǝlǝa mala do-bunomurǝm mala Josiya ka, à pàk mǝnia yì lamsan mala Yàlîmurû ka ace gusǝlǝ Yahweh, a Urǝshalima.

24 Ɗǝm ngga, amǝ'ɗikalú, andǝ amǝ'monzǝo kat, andǝ ankúl mala ɓala andǝ aɓǝ̀nzál peri kat, andǝ agir'ɓeami mǝnana kat à sǝnia aɓa nzali Yahuda andǝ Urǝshalima ka, Josiya twaltea ɗǝɗak. Yì ka, pàk mǝnia ka anggo, ace mǝnana ɓǝ̀ lùmsǝ cau mala agir mǝnana à gilǝia aɓa malǝmce mana Hilkiya pǝris kumi a ɓala mala Yahweh ka. 25 Kǝ murǝm pà kàm kǝla Josiya, a dǝmba nǝi, mǝnana pǝlǝ aban Yahweh, nǝ ɓabumi kat, andǝ yilǝmi kat, andǝ rǝcandǝa male kat, nǝ̀ kpata Nggurcau mala Musa puppup ka ɗàng; sǝ kǝ ɓè pà kàm kǝla yì, mǝnana lo anzǝmi ka ɗàng.

26 Kat andǝ amani ka, Yahweh pǝlǝ nzǝmi arǝ ukkio mala nggea bumlulla-mǝɓike male ɗàng, yì bumlulla-mǝɓike male mǝnana pì arǝ nzali Yahuda, atàcau mala agir-lulbum mǝnana kat Murǝm Manasa akdǝmba peǎ, sǝ lullabumi nǝia ka. 27 Nda sǝ Yahweh bang ama, <<Mǝ nǝ pusǝ Yahuda ɓǝ̀ upì ɓamǝsǝàm, kǝla mǝnana ǝn pusǝ Isǝrayila, nying ɓamǝsǝàm ngga; sǝ mǝ nǝ ɓinǝki Urǝshalima, yì nggea-là mǝnana ǝn tarì, andǝ ɓala mǝnia mǝnana ǝn bangcau amurí ama, <Akano sǝ Lullǝam nǝ̀ pak> ka.>>*

28 Acili agir mǝnana à kumban a do-bunomurǝm mala Josiya, andǝ agir mǝnana kat pàkkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda.

29 A bàkú mala yálmúrû mala Josiya ka, Firona Neko, murǝm mala Masar puro andǝ amǝ'lwa male aban ká je andǝ murǝm mala Assuriya a Nggeasala Yiufǝretis. Murǝm Josiya andǝ amǝ'lwa male pur'atè à nǝ̀ nggá kumi nǝ munǝo. Sǝ lang à je a Megido ka, Firona Neco wal-luí. 30 Amǝtúró male twal luí a Megido aɓa waru-pǝr, à yinǝi a Urǝshalima, sǝ à yi tsǝî a ɓembe-ɓa-tali male. Sǝ aɓwana mala nzalinì twal Jehowahaz muna-ɓwabura mala Josiya, à ɗārǝi, duk murǝm a bancame mala tárrí.

31 Jehowahaz ka, ndanǝ apǝlǝa lumi-ɓari-nong-tàrú (23) sǝ duk murǝm. Yálmúr aɓwana a Urǝshalima azongŋo tàrú. Lullǝ nggé nda Hamutal, muna-ɓwama mala Irmya ɓwa Libǝna. 32 Yì ka, pàkki agir mǝnana amǝɓike na a ɓadǝm Yahweh ka, kǝla mǝnana kat akê pàk ka.*

33 Firona Neco yi gbami Jehowahaz, túrrí a ndàkurban a Ribǝla, a nzali Hamat, ace mǝnana ɓǝkǝa duk murǝm a Urǝshalima raka. Sǝ tsǝk nzali Yahuda ɓǝ̀ mbwe cemi mala bolo-azǝrfa tyang á-tàrú nǝ gbǝman-ine (3,400), andǝ bolo-njengǝlan tyang lumi-tàrú-nong-ine (34). 34 Pǝlǝa Firona Neco, tsǝk Eliyakim, ɓè muna-ɓwabura mala Josiya, ɓǝ̀ duk murǝm a kúnì tárrí Josiya, sǝ nggaɗi lullǝ Eliyakim, tunǝi ama, Jehoyakim. Sǝ Jehowahaz ka, Firona Neco twali umnǝi a Masar aɓa nsolo, nda kya paklú kàm ngga. 35 Jehoyakim mbwe Firona Neco bolo-azǝrfa andǝ bolo-njengǝlan, kǝla mǝnana tsǝki wi ɓǝ̀ mbwe ka. Sǝama she lang cemina aɓwe a nzalinì ka sǝ kum bolo-azǝrfa andǝ bolo-njengǝlan mǝno. Tsǝk koyan ngga, mbwe gìr mǝnana karǝa arǝ kume male ka.

36 Jehoyakim ngga, ndanǝ apǝlǝa lumi-ɓari-bwamdǝ-tongno (25), sǝ duk murǝm. Yálmúr aɓwana apǝlǝa lum-nong-mwashat a Urǝshalima. Lullǝ nggé nda Zebida, muna-ɓwama mala Pedaya, ɓwa Ruma. 37 Jehoyakim pàkki agir mǝnana amǝɓike na aɓadǝm Yahweh ka, kǝla mǝnana kat akê pàk ka.