2Amurǝma 22

Josiya duk murǝm a Yahuda

1 Apǝlǝa ɓǝlban mala Josiya na tongno-nong-tàrú lang duk murǝm ngga, sǝ yálmúr aɓwana a Urǝshalima arǝ apǝlǝa lumi-tàrú-nong-mwashat (31). Lullǝ ngge nda Jedida, muna-ɓwama mala Adaya, ɓwama Bozǝkat. 2 Josiya pàk gìr mǝnana mǝɓoarne na ka, aɓadǝm Yahweh, sǝ ging pepè a njar mala kè Dauda, kyang a bu-mǝli ko a bu-mǝnggare ɗàng.

Hilkiya kum Malǝmce Nggurcau mala Ɓakuli

3 A lum-bwamdǝ-tongno-nong-tàruia pǝlǝa mala do-bunomurǝm male ka, Murǝm Josiya túr mǝgilǝgir Shafan, muna-ɓwabura mala Azaliya, mǝkà Meshulam, a ɓala mala Yahweh nǝ cau ama: 4 <<Kya ban Hilkiya pǝris mǝgule, banggi wi ɓǝ̀ ɓal boalo mǝnana aɓwe yinǝi a ɓala mala Yahweh sǝ amǝ’ɗenyinǝ kun-nda rambi ka; 5 banggi wi ɓǝ̀ pa boale a bu aɓwana mana à tsǝia ace sǝntà-túrô ɓala mala Yahweh ka, ace mǝnana ɓǝà mbwe ka amǝ’túró mana à kǝ pàk túró ace gilǝki abân mana à kiɗiki arǝ ɓala mala Yahweh ka, 6 yia amǝ’gbàlì-gìr, andǝ amǝ’ɓǎ, andǝ amǝ’ɓakɓa-tali. Ɗǝm ngga, nea wia ɓǝà paktúró nǝ boale ace kúr agbǝlang nggun, andǝ atali mǝnana à shàrkinia ka ace gilǝki ɓalae. 7 Sǝama ɓǝkǝa na ama à nǝ̀ ɗice bǝltakusǝ boalo mǝnana à pea wia ka ɗàng, acemǝnana yia ka, à kǝ paktúró pepè nǝ mǝsǝcau.>>

8 Pǝlǝa Hilkiya, yì pǝris mǝgule banggi Shafan mǝgilǝgir ama, <<Ən kumǝna Malǝmce mala Nggurcau a ɓala mala Yahweh.>> Pǝlǝa Hilkiya pe Shafan malǝmcenî, sǝ ɓallià wia. 9 Pǝlǝa Shafan mǝgilǝgir wari aban murǝm, yinǝì murǝm nǝ cau ama, <<Aguro mò twalǝna boalo mǝnana kat à kumi a ɓala mala Yahweh ka, sǝ à pànì a bu amǝtúró, amǝ’ɗenyinǝ agir a ɓala mala Yahweh.>> 10 Pǝlǝa Shafan mǝgilǝgir banggi murǝm ama, <<Ɓè malǝmce nia Hilkiya pǝris mǝgule pam ngga.>> Pǝlǝa Shafan mǝgilǝgir ɓal malǝmcenî bwāng, aɓadǝm murǝm.

11 Lang murǝm ok acau mala Malǝmce Nggurcau ka, kara san nggea-daura male. 12 Pǝlǝa murǝm banggi Hilkiya pǝris mǝgule, andǝ Ahikam, muna-ɓwabura mala Shafan, andǝ Akbo, muna-ɓwabura mala Mikaya, andǝ Shafan mǝgilǝgir, andǝ Asaya, mǝtúró-ɓadǝm murǝm ama: 13 <<Wu kyane, wu ɗibancau a ban Yahweh, acem, sǝ ace aɓwe, sǝ ace Yahuda kat, amur cau mǝnana nda a gilǝe aɓa mǝnia yì malǝmce, mana à kumi ka; acemǝnana, nggea bumlulla-mǝɓike mala Yahweh ka, ndarǝ earki-bǝsa amur sǝm, atàcau mala ɗwanyi okiru mala aká sǝm, mǝnana à kpata agir mǝnana à gilǝia aɓa mǝnia yì malǝmce ka raka; sǝ sǝm ngga, sǝm pàk gìr mǝnana kat bang ama dumǝna púp ɓǝ̀ sǝm pè ka ɗàng.>>

14 Nda Hilkiya pǝris mǝgule, andǝ Ahikam, andǝ Akbo, andǝ Shafan, andǝ Asaya, wari ace ɗibancau a ban māɓangnǝa Hulda, mǝnana ndanǝdo a Ɓaria Buban mala Urǝshalima ka. Burí Shallum muna-ɓwabura mala Tikva, mǝkà Harhas ka, nda mǝ’ɗenyinǝ adaura-pǝris. À bangcau nǝ Hulda.

15 Pǝlǝa Hulda banggia wia ama, <<Mǝnia ka, nda cau mǝnana Yahweh, yì Ɓakuli mala Isǝrayila bang ngga: <Wu banggi ɓwabura mǝnana túr wun abanam ngga, ama, 16 mǝnia ka, nda cau mǝnana Yahweh bang ngga, ama: Wu sǝni, mǝ ndo mǝ nǝ yinǝ gir’murmwana amur ban mǝnia ka, sǝ amur aɓwana mǝnana à ndanǝdo aɓalǝi ka, kǝla mǝnana à gilǝì aɓa malǝmce mana murǝm mala Yahuda ɓalli ka. 17 Mǝnia ka nǝ̀ kumban acemǝnana yia ka, à ginǝkiam, à pàɓoro mala pisǝgir ace loasǝ yele aban aɓea aɓakuli, à lulbumam nǝ ankul mǝnana à pea nǝ buia ka. Acemani ka, bumlulla-mǝɓike mem nǝ̀ earke amur ban mǝnia ka, sǝ pà mǝ nǝ sukki bumam ɗàng.>

18 <<Sǝ wu banggi murǝm mala Yahuda mǝnana túr wun ɓǝ̀ wu ɗibancau a ban Yahweh ka, ama, <Mǝnia ka, nda cau mǝnana Yahweh, yì Ɓakuli mala Isǝrayila, bang amur cau mǝnana a ok ka: 19 Acemǝnana a ndanǝ ɓabum pwanzali, sǝ a nongsǝmuro aɓadǝm Yahweh, lang a ok cau mǝnana ǝn bang arǝ ban mǝnia andǝ aɓwana mana à ndanǝdo aɓalǝi, ama à nǝ̀ pǝlǝ ɓarwan andǝ suban, sǝ a san daura mô, a ɓua aɓadǝmbam ngga, mim gbal ka ǝn ongŋǝna ɓua mô, mim Yahweh. 20 Acemani ka, sǝni, mǝ nǝ nyio, awu nǝ wǔ aɓa rǝpwala, atà akeô, sǝ à nǝ̀ tsǝo a ɓembe mô. Mǝsǝo pà nǝ̀ sǝn agir’murmwana mǝnana mǝ nǝ yinǝia amur mǝnia yì ban ngga ɗàng.> >> Sǝ à nyesǝ cau mǝnia ka aban murǝm.