1 Adyan ngga, mālá ɓe ɓwabura a nggǝsan mala amǝ'ɓangnǝa warinǝ ɓua male aban Elisha ama, <<Guro mò, yì burém ngga wuna, sǝ a sǝlǝna ama yì ka mǝɓanggi Yahweh na. Sǝama ɓwa mǝnana kǝ kpata burém tangna ka, ndya yiu ace pwan amuna mem ɓari, ɓǝà pǝlǝa aguro male ka.>>

2 Sǝ Elisha ɗì ama, <<Mana a kǝ earce mǝ pakko? Banggam, mana a ndanǝi a ɓala?>>

Ɓwame earî Elisha ama, <<Guro mò pànǝ kǝgir a ɓala ɗàng, shekǝ mùrú olif bǝti na ue aɓa muna-dù ka.>>

3 Pǝlǝa Elisha ne wi ama, <<Kya alta ankwaring mǝnana kǝgir pa aɓalǝia raka a ban aɓio amǝ'murkala. Kǝa alta ankwaring bǝti ɗàng. 4 Sǝ we wunǝ amuna-burana mô ka, wu kùtí a kurǝm sǝ wu gìr kun-nda. Solǝ mùrú olif mǝno ka aɓalǝ ankwaringnì kat. Nkwaring mǝnana lumsǝ ka, tusǝi tsǝi a nkanggariban.>>

5 Pǝlǝa ɓwame upi ban Elisha, sǝ yì andǝ amuna-burana male kùtí a kurǝm sǝ à gìr kun-nda. À yinǝi wi nǝ ankwaring sǝ camarǝ solǝ mùrú aɓalǝia. 6 Lang ankwaring lumsǝkina nǝ mùrú ka, ne muna-ɓwabura male ama, <<Wu yinǝam nǝ ɓè nkwaring.>>

Sǝ muna-ɓwabure earî wi ama, <<Ɓè nkwaring pà kàm ɗàng.>> Kara solǝo mala mùrú kasǝa.

7 Pǝlǝa puro kya ne Elisha ɓwa mala Ɓakuli, sǝ Elisha banggi wi ama, <<Kya mak mùruî sǝ wu mbwe atangna mò, sǝ cili ka nda aceo wunǝ amunio.>>

8 A ɓè pwari ka, Elisha wari a Shunem, a ban mǝnana ɓè ɓwama mǝkume nakam nǝdo ka. Ɓwama man ɓuakiarǝ Elisha ɓǝ̀ lì girlina. Sǝ yi do ama, pwari mǝnana kat Elisha kútí nǝ njargula mǝno ka, nǝ̀ kàr ace lì girlina. 9 Ɓwama man pǝlǝa ne burí ama, <<Sǝni, ǝn sǝlǝna ama ɓwa mǝnia kǝ kútí nǝ njargula man pwari-pwari ka, ɓwa mǝfele mala Ɓakuli na.>> 10 Ɓǝ̀ sǝm ɓakkî wi muna-kurǝm a múr-kurǝm ma'sǝm nǝ asheran, sǝ ɓǝ̀ sǝm tsǝki wi gyangŋan-nongŋo, andǝ kpamgbang-tsǝk-agir, sǝ pitǝla aɓalǝi, ace mǝnana ɓǝ̀ aya pwari sǝ yiu aban sǝm ngga, nǝ̀ sulǝ a banì.

11 A ɓè pwari ka, Elisha yiu sǝ kútí aɓa ndà mǝno, sǝ usǝlǝ kam. 12 Pǝlǝa ne Gehazi muna-ɓala male ama, <<Tunǝ ɓwama Shunem man.>> Lang tunǝni ka, ɓwame yi came aɓadǝm Elisha. 13 Sǝ Elisha banggi Gehazi ama, <<Ida ɗì ama, <Sǝni, a ɗenyina nǝ sǝm nǝ agir mǝnia kat a pea ace sǝm ngga. Mana a kǝ earce ɓǝà pakko? A kǝ earce mǝ nacau nǝ murǝm ko mǝ'sàrǝ̀ban mala amǝ'lwa aceo le?> >>

Ɓwame ear ama, <<Mim ngga mǝ ndanǝdo aɓalǝ aɓwana mem.>>

14 Sǝ Elisha ɗì Gehazi ama, <<Mana ado à nǝ̀ pà aceì?>>

Gehazi eari wi ama, <<Pànǝ muna-ɓwabura ɗàng, sǝ burí ka ena.>>

15 Elisha ama, <<Tunǝi ɓǝ̀ yiu ɗǝm.>> Sǝ lang Gehazi tunǝni ka, ɓwame yi came a kun-nda. 16 Sǝ Elisha ne wi ama, <<A kúnì kǝla man a pǝlǝa mǝnana kǝ yiu ka, awu nǝ bwal muna-ɓwabura a buo.>>

Sǝ ɓwame na ama, <<Awo, ɓwamǝgule mem, we ɓwa mala Ɓakuli, kǝa ne guro mò nyir ɗang.>>

17 Sǝama muna kpa a bum ɓwame, sǝ lang pǝlǝa kàrna a karǝa mala kúnì ka, ɓǝl muna-ɓwabura, kǝla mǝnana Elisha banggi wi ka.

18 Lang munê gulna ka, o atà tárrí a ɓaban aban amǝ'pwan-gìrɓaban, a ɓè pwari. 19 Sǝ munê ɓua aban tárrí ama, <<Oi, ɓamuram, ɓamuram!>>

Tárrí ne mwashat atà amǝ'túró-ɓala male ama, <<Twali kyan nǝi aban nggè.>> 20 Sǝ lang twalni yinanǝi aban nggè ka, munê nong a byal nggè bà pwarizǝkya, sǝ paklú. 21 Ɓwame eauwe wario kya nongsǝ munê amur gyangŋan-nongŋo mala ɓwa mala Ɓakuli, gìr kún ndà amurí, sǝ puro.

22 Pǝlǝa tunǝ burí sǝ ne wi ama, <<Ida, tàsǝâm mwashat atà amǝ'túró-ɓala, sǝ mǝdambǝriso mwashat, ace mǝnana mǝ kya aban ɓwa mala Ɓakuli akaurǝa sǝ mǝ nyare.>>

23 Sǝ burí ɗì ama, <<Palang sǝ awu nǝ ká abaní yalung? Yalung ngga, pwari mǝdǝmbe mala *Bǝsa Zongŋo na ɗang, sǝ pwari Sabbat na gbal ɗàng.>>

Ɓwame ear ama, <<Koman ngga nda jam.>>

24 Pǝlǝa ɓwame tsǝk buno-nzǝm a nzǝm mǝdambǝriso, sǝ ne guro male ama, <<Fá akaurǝa; kǝa amsǝ larri ɗàng she ɓǝn nano ka.>> 25 Nda ɓwame lo sǝ wari aban ɓwa mala Ɓakuli a Nkono Kamel.

Lang ɓwa mala Ɓakuli sǝni kuko aban yiu ka, ne Gehazi guro male ama, <<Sǝni, ɓwama Shunem no kǝ yiu ka. 26 Ɓangŋa kya kúllí ado, sǝ wu ɗî ama, <A nda jam le? Burio ka nda jam? Sǝ munio ka nda jam le?> >>

Sǝ ɓwame ear ama, <<Koman ngga nda jam.>>

27 Lang yina aban ɓwa mala Ɓakuli a nkono ka, yi kùrì arǝ akusǝi. Gehazi wario nǝ̀ jambǝrǝ ɓwame. Sǝ ɓwa mala Ɓakuli ne wi ama, <<Ɗeki, kǝa pǝrki ɗàng! Nda aɓa bumkiɗikea mǝlime, sǝ Yahweh sǝmbǝrǝam cê, nam ɗàng.>>

28 Pǝlǝa ɓwame bang ama, <<Ɓwamǝgule mem, ǝn zǝmbo nǝma wu pam muna-ɓwabura le? Ən banggo mbak nǝma, <Kǝa swarkiam ɗang> re?>>

29 Pǝlǝa Elisha banggi Gehazi ama, <<Kàr nggea-daura mô, kùrì a taɓuno, sǝ wu twal gara mem a buo, sǝ wu ɓangŋa. Ɓǝ̀ wu je wunǝ kǝɓwa a njar ka, kǝa makki-wi-kún ɗàng, sǝ ɓǝ̀ kǝɓwa makko-kún ngga, kǝa akì wi ɗàng. Nongsǝ gara mem a múrbum munê.>>

30 Sǝama nggea muna bang ama, <<Mbak-kàngkàng Yahweh nakam nǝyilǝmu, sǝ mbak-kàngkàng a ndakam nǝyilǝmu ka, pa mǝ nǝ nyio ɗàng.>> Nda Elisha lo o atà ɓwame ka.

31 Gehazi akia wia dǝmba, sǝ kya nongsǝ gara a múrbum munê, sǝama munê nacau ɗàng, sǝ dǝurǝ rǝì ɗàng. Acemani ka, Gehazi nyar aban Elisha, sǝ banggi wi ama, <<Mune lo ɗàng.>>

32 Lang Elisha yi kutina a ɓalae ka, yi sǝni ka, munê wuna sǝ à nongsǝni amur gyangŋan-nongŋo male. 33 Pǝlǝa kutio sǝ gìr kun-nda amúria nǝ mbup-ɓàriá, sǝ pakhiwi aban Yahweh. 34 Pǝlǝa eauwe nongŋo amur munê, sǝ tsǝk kúni arǝ kún munê, amǝsǝi amur amǝsǝ munê, sǝ abui amur abú munê. Sǝ lang sárǝ́ rǝì amur munê ka, rǝ muna pak lùlù. 35 Pǝlǝa lo, sǝ gya kàrìban aɓa kurǝm. Sǝ nyare sárǝ́ rǝì amur muna ɗǝm. Muna pàk-atǝsho kusǝ tongno-nong-ɓari, sǝ mǝn amǝsǝi. 36 Elisha pǝlǝa tunǝ Gehazi, sǝ ne wi ama, <<Tunǝ ɓwama Shunem man!>> Pǝlǝa Gehazi tunǝ ɓwame. Lang ɓwame yina abaní ka, Elisha ne wi ama, <<Twal munio.>> 37 Ɓwame kutio sǝ kpa a kusǝ Elisha, ɓun a nzali. Pǝlǝa twal muni sǝ puro.

38 Elisha wari ɗǝm a Gilgal. Nzal-gula nakam aɓa nzalinì. Sǝ lang nggǝsan mala amǝ'ɓangnǝa naban do aɓadǝmbi ka, banggi guro male ama, <<Tsǝk nkwaring mǝgule a bǝsa, sǝ wu lam mbú-gbǝlya ace aburana man.>>

39 Ɓeɓwa aɓalǝia wari a ɓabondo ace alta ambúgir, sǝ kya kum mbwàrio-lâ-alú. Pǝlǝa pwan aɓǝla mbwàrio mǝno sǝ yi kasǝkia aɓa nkwaring, sǝ súrǝ̀ girnì ɗàng. 40 Pǝlǝa à solǝ mbuî ace aburane ɓǝà li. Sǝ lang à tita lili ka, à ɓua ama, <<Ɓwa mala Ɓakuli, barya nakam aɓa mbú mǝnia!>> À gandǝ li ɗàng.

41 Sǝ Elisha na ama, <<Wu yinǝam nǝ muku.>> Pǝlǝa soe amur mbuî aɓa nkwaring, sǝ na ama, <<Wu pe aɓwana ɓǝà li.>> Sǝ à kum kǝgìr mǝɓike aɓa mbuî ɗǝm ɗàng.

42 Ɓè ɓwabura pur a Ba'al-Shalisha, sǝ yinǝì ɓwa mala Ɓakuli agbatali bǝredi lumi-ɓari mǝnana à pè nǝ mǝssa-bálì mǝnana tita ɓǝla a ɓaban ngga, atārǝia andǝ akir mǝssa mǝpwale aɓa buku. Sǝ Elisha bang ama <<Pe aɓwana ɓǝà li.>>

43 Sǝ guro male na ama, <<Lang sǝ mǝ nǝ tsǝk girlina mǝnia [bǝti] ka aɓadǝm aburana gbǝman-mwashat?>>

Sǝ Elisha nyare ne wi ama, <<Pe aɓwana ɓǝà li. Mǝnia ka nda cau mǝnana Yahweh bang ngga, <À nǝ̀ li, sǝ cili nǝ̀ ueo.> >> 44 Pǝlǝa guro male tsǝk girline aɓadǝmbia, à li, sǝ à nying cili, kǝla mǝnana cau mala Yahweh bang ngga.