2Amurǝma 13

Jehowahaz yálmúr Isǝrayila

1 Nda aɓa lumi-ɓari-nong-tàruià (23) pǝlǝa mala do-bunomurǝm mala Jehohash muna-ɓwabura mala Ahaziya murǝm Yahuda sǝ Jehowahaz muna-ɓwabura mala Jehu duk murǝm amur Isǝrayila a Samariya, sǝ yálmúr aɓwana apǝlǝa lum-bwandǝ-tongno-nong-ɓari (17). 2 Yì ka, pàkki agir mǝnana amǝɓike na a mǝsǝ Yahweh ka. Kpata pàkki acauɓikea mǝnana Jerobuam, muna-ɓwabura mala Nebat pàk ka, cauɓikea male mǝnana tsǝk Isǝrayila pè ka. Nying buì arǝ peǎ ɗàng. 3 Nda sǝ bum Yahweh lul kǝ̀rkǝ́r arǝ amǝ Isǝrayila, sǝ camarǝ tasǝia a ɓabu Hazayel murǝm mala amǝ Suriya, sǝ a ɓabu Ben-Hadat muna-ɓwabura mala Hazayel ka.

4 Pǝlǝa Jehowahaz zǝm ɓwamuru a ban Yahweh, sǝ Yahweh ok hiwi male, acemǝnana Yahweh sǝn parban mǝnana amǝ Isǝrayila na aɓate ka; yì parban mǝnana murǝm Suriya kǝ parna Isǝrayila nǝi ka. 5 (Pǝlǝa Yahweh yinǝì Isǝrayila mǝ’akmúrià sǝ à kum panzǝban a ɓabu rǝcandǝa mala Suriya. Acemani ka, amǝ Isǝrayila do aɓalǝ alá malea kǝla mana ɗiɗyal ka, jam. 6 Kat andǝ amani ka, à gapitarǝia andǝ acauɓikea mala ɓala mala Jerobuam ɗàng, acauɓikea male mǝnana tsǝk Isǝrayila pè ka; à lidǝmba aɓalǝia. Tondong mala Ashera ue kam aɓa Samariya.) 7 Kǝ amǝ’lwa ueo a bù Jehowahaz ɗàng shé amǝpǝr lumi-tongno, andǝ awaru-pǝr lum, andǝ asoje-kusǝu á-lum; acilia kat ka murǝm Suriya kiɗikinia sǝ parkinia a ɓakusǝi kǝla tú.

8 Adyan ngga acili agir mǝnana à kumban a do-bunomurǝm mala Jehowahaz, andǝ atúró mǝnana kat pàkkia, andǝ rǝcandǝa male ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 9 Jehowahaz paklú sǝ à tsǝk-luí a Samariya. Muna-ɓwabura male Jehohash ak bancame male kǝla murǝm.

Jehohash duk murǝm Isǝrayila

10 A lumi-tàrú-bwamdǝ-tongno-nong-ɓaria (37) pǝlǝa mala do-bunomurǝm mala Johash amur Yahuda ka, Jehohash muna-ɓwabura mala Jehowahaz duk murǝm mala Isǝrayila, yálmúr aɓwana a Samariya apǝlǝa lum-bwamdǝ-tongno-nong-mwashat (16). 11 Yì ka, pàk gìr mǝnana mǝɓike na a mǝsǝ Yahweh ka. Pǝlǝ nzǝmi arǝ acauɓikea kat mala Jerobuam muna-ɓwabura mala Nebat ɗàng, acauɓikea male mǝnana tsǝk Isǝrayila pè ka; Jehohash lidǝmba aɓalǝ acauɓikea mǝno. 12 Adyan ngga acili agir mǝnana à kumban a do-bunomurǝm mala Jehohash, atúró mǝnana kat pàkkia, andǝ rǝcandǝa male mǝnana munǝ nǝi arǝ Amaziya murǝm Yahuda ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 13 Johash paklú atà akê, sǝ à tsǝì a Samariya atà amurǝma mala Isǝrayila. Sǝ Jerobuam eau a buno-murǝm male.

Lú mala Elisha

14 Adyan ngga, Elisha twal nǝ rǝkwana mǝnana nǝ̀ kánǝi a lú ka, pǝlǝa Johash murǝm Isǝrayila wari a baní sǝ ɓua aɓadǝmbi, kǝ na ama, <<Oi dâ! Oi dâ! Awaru-pǝr mala Isǝrayila andǝ amǝpǝr male!>>

15,16 Elisha banggi wi ama, <<Twal nta andǝ amundi.>> Sǝ Johash twal nta andǝ amundi. Elisha tsǝk abui amur abú murǝm 17 sǝ bang ama, <<Mǝn mǝsǝkurǝm mǝnana sǝn takuli ka.>> Sǝ yì gbal ka mǝni. Pǝlǝa Elisha bang ama, <<Túr mundi!>> Johash túr mundi, sǝ Elisha na ama, <<Mǝno ka nda mundi mala limurǝm mala Yahweh, andǝ mundi mala limurǝm amur Suriya. Awu nǝ gandǝ amǝ’Suriya a munǝo a Afek ba a kiɗikinia kat-kat ka.>>

18 Sǝ Elisha bang ama, <<Bwal acili amundi sǝ wu zuɓiki nzali nǝia.>> Pǝlǝa Johash bwalia sǝ zuɓiki nzali nǝia kusǝ tàrú, sǝ came. 19 Bum ɓwa mala Ɓakuli lul arǝì, sǝ banggi wi ama, <<Ɓǝ́ a zuɓikina nzali kusǝ tongno ko tongno-nong-mwashat wuni; anggo ka ɓǝ́ a gandǝna Suriya sǝ a kiɗikini kat-kat. Sǝ ado ka kusǝ tàrú ɓǝ̀rɓǝ̀r na awu nǝ gandǝ Suriya ka.>>

20 Elisha yi paklú sǝ à tsǝì a ɓembe.

Adyan ngga anggǝsan mala amǝ’tǝllìban mala amǝ’Mowap kǝ kútí nǝ lúllô aɓa nzalinì koya tita pǝlǝa. 21 A ɓè fara ka, aɓea aburana na ban tsǝklú ɓè ɓwabura, kara à sǝn ɓè nggǝsan mala amǝ’tǝllìban, pǝlǝa à túr lú ɓwabure a ɓembe-ɓa-tali mala Elisha. Lang lú ɓwabure je ka amú Elisha ka, kara lo nǝyilǝmu, cam amur akusǝi.

Isǝrayila nyare-ak anggea-là a bù Suriya

22 Adyan ngga, Hazayel murǝm Suriya par Isǝrayila aɓa do-bunomurǝm mala Jehowahaz kat. 23 Sǝama Yahweh ɓwamuria, sǝn mǝsǝswatǝr malea. Lǝmdǝia wia earmúrú atàcau mala kùrcau male andǝ Ibǝrayim, andǝ Ishaku, andǝ Yakupu. Earce ama, nǝ̀ kiɗikia ko nǝ̀ pusǝia ɓǝà purî ɓadǝmbi ɗàng ba yalung. 24 Lang Hazayel murǝm Suriya wuna ka, Ben-Hadat muna-ɓwabura male duk murǝm a bancame male. 25 Pǝlǝa Jehohash muna-ɓwabura mala Jehowahaz nyare-ak anggea-là mǝnana ɗiɗyal Ben-Hadat muna-ɓwabura mala Hazayel lia a bù tárrí Jehowahaz ka. Johash lì nǝ munǝo kusǝ tàrú, pǝlǝa nyare-ak anggea-là mala Isǝrayila.