2Amurǝma 24

Aɓiu-mǝbura ak nggea-là Urǝshalima

1 A nza mala yálmúrû mala Jehoyakim ngga,*24:1 Ɓalli gbal aɓa: 2Acau 36:6; Ir 25:1,9; Dan 1:1 . Nebukaneza murǝm Babila yi kútí nǝ rǝcandǝa-lwa aɓa nzali Yahuda sǝ e. Murǝm Jehoyakim nongsǝmúrí aɓata Nebukaneza sǝ tsǝì mbwe cemi abaní arǝ apǝlǝa tàrú. Sǝama nǝnzǝ́mò ka, Murǝm Jehoyakim pǝlǝa arǝì, mgbicau arǝì. 2 Yahweh pǝlǝa tasǝ amǝ’tǝllìban mala amǝ’Babila,*24:2 Ɓalli aɓa: Ir 32:28,29; 35:11. andǝ mala amǝ’Suriya, andǝ mala amǝ’Mowap arǝ Jehoyakim. Tasǝia ɓǝà kiɗiki nzali Yahuda, kǝla mǝnana cau male bang nǝ kún aguro male amǝ’ɓangnǝa ka.*24:2 Ɓalli aɓa: 2Amur 20:17; 21:12-14; 23:27 . 3 Mbak-kàngkàng Yahweh na, mǝnana bangcau sǝ gìr mǝnia kum nzali Yahuda ka, ace mǝnana nǝ̀ pusǝia ɓǝà purî ɓadǝmbi, atàcau mala acauɓikea mǝnana kat Manasa peǎ ka,*24:3 Ɓalli aɓa: 2Amur 21:11; 23:26 . 4 sǝ ɗǝm ngga ace nkila mala amǝ’kunpwasǝa mǝnana sukkì ka; yì Manasa ka lùmsǝ Urǝshalima nǝ nkila mala amǝ’kunpwasǝa,*24:4 Ɓalli gbal aɓa: 2Amur 21:16 . sǝ Yahweh ear ama nǝ̀ twalbani ɗàng.

5 Acili agir mǝnana à kumban a yálmúrû mala Jehoyakim, andǝ agir mǝnana kat peǎ ka, à nda aɓa gilǝe aɓa Malǝmce mala Acau-ɓaraɓara mala Amurǝma mala Yahuda. 6 Jehoyakim usǝlǝo atà akê. Sǝ muna-ɓwabura male Jehoyacin duk murǝm a bancame male.

7 Adyan ngga murǝm Masar nyare purî ɓá nzali male [ace ká lwa] ɗǝm ɗàng, acemǝnana murǝm Babila lina bu-nzali mǝnana nda aɓata murǝm Masar ɗiɗyal ka, twal a myalmúr nzong-nzali Masar aban ká a Nggeasala Yiufǝretis.

Jehoyacin murǝm Yahuda

8 Apǝlǝa mala Jehoyacin na lum-bwamdǝ-tongno-nong-tàrú (18) lang duk murǝm ngga, sǝ yálmúr aɓwana a Urǝshalima azongŋo tàrú. Lullǝ nggé nda Nehushta ɓoarnsarile Elnatan mala Urǝshalima. 9 Pàk gìr mǝnana mǝɓike na a mǝsǝ Yahweh ka, kǝla mǝnana tárrí pàk ka.

À pwan Isǝrayila à umnǝia a bǝri-nzali a Babila

10 A nza mǝno ka, amǝ’sàrǝ̀ban-lwa mala Murǝm Nebukaneza mala Babila yinǝ munǝo arǝ Urǝshalima sǝ à gumbǝ́lì aɓalǝu.*24:10 Ɓalli gbal aɓa: Dan 1:1 . 11 Nebukaneza murǝm Babila yiu lang amǝ’sàrǝ̀ban-lwa male na ban gumbǝli nggea-là Urǝshalima ka. 12 Jehoyacin murǝm mala Yahuda puro, atārǝia andǝ nggè, andǝ amǝtúró male, andǝ amǝtè, andǝ amǝgulo male, andǝ amǝtúró palta male, sǝ à kya ɓun aban murǝm Babila. Sǝ murǝm Babila gbami Jehoyacin bwalban-guro. Agir mǝnia ka, à kumban a tongno-nong-tàruià pǝlǝa mala do-bunomurǝm mala Nebukaneza.

13 Kǝla mǝnana Yahweh akdǝmba bang ngga, Nebukaneza pwan agir-gǝna mala ɓala mala Yahweh kat, andǝ agir-gǝna mala palta mala murǝm kat a ban mǝno. Atanggǝla mala bolo-njengǝlan mǝnana kat Murǝm Solomon mala Isǝrayila akdǝmba peǎ ace ɓala mala Yahweh ka,*24:13 Sǝni aɓa: 1Amur 7:48-50 . kasǝkia mgbeatuk-mgbeatuk. 14 Pwan ɓwabundǝa mala Urǝshalima kat,*24:14 Ɓalli gbal aɓa: Ir 24:1. aɓwana á-lum (10,000), umnǝia a bǝri-nzali; kat andǝ amǝgulo, andǝ akanggǝrang aburana kat, andǝ amǝ’túróbù kat, andǝ amǝ’ntùl kat. Nying kǝɓwa ɗàng shé amǝ’tǝ̀r mala nzalinì. 15 Umnǝ Jehoyacin a Babila, atārǝia andǝ nggeà murǝm andǝ amāmí, andǝ amǝtúró palta male, andǝ amǝgulo mala nzalinì. Pwania a Urǝshalima sǝ umnǝia a bǝri-nzali a Babila. 16 Akanggǝrang aburana kat ka, à nda á-tongno-nong-ɓari (7,000), sǝ amǝ’túróbù andǝ amǝ’ntùl ka, à nda á-mwashat (1,000). Yià kat ka à nda dwat sǝ à kārǝ́na pùr lwa; yià mǝnia ka, murǝm Babila pwania kǝla aguro, umnǝia a Babila. 17 Murǝm Babila tsǝk Mataniya, mǝ’eam tár Jehoyacin ɓǝ̀ duk murǝm a bancame mala Jehoyacin, sǝ nggaɗi wi lullǝu ama Zedekiya.

Yálmúrû mala Zedekiya a Yahuda

18 Apǝlǝa ɓǝlban mala Zedekiya ka à nda lumi-ɓari-nong-mwashat (21) lang duk murǝm ngga. Yálmúr aɓwana a Urǝshalima arǝ apǝlǝa lum-nong-mwashat (11). Lullǝ nggé nda Hamutal, ɓoarnsarile Irmya ɓwa Libǝna. 19 Pàk gìr mǝnana mǝɓike na a mǝsǝ Yahweh ka, kǝla mǝnana Jehoyakim akdǝmba pàk ka.

20 Amǝnia yì agir ka à yi kumban atàcau mala bumlulla mala Yahweh arǝ aɓwana mala Urǝshalima andǝ Yahuda, sǝ a masǝlǝate ka yi pusǝia à purî ɓadǝmbi, ramtea ɓǝà o arǝ anzali mǝnana amalea na raka.