1 A lum-nong-ɓaria pǝlǝa mala do-bunomurǝm mala Ahaz murǝm Yahuda ka, Hosheya muna-ɓwabura mala Ela tita yálmúrû amur Isǝrayila. Yálmúr aɓwana a Samariya arǝ apǝlǝa tongno-nong-ine. 2 Pàk gìr mǝnana mǝɓike na a mǝsǝ Yahweh ka, sǝama pà kǝla mala amurǝma mala Isǝrayila mǝnana à akidǝmba ka ɗàng. 3 Shalmanesa murǝm mala Assuriya yinǝ munǝo arǝ Hosheya, sǝ Hosheya pà ɓamúrì aɓate, kǝ mbwe boalo-cemi a baní. 4 Sǝ murǝm mala Assuriya yi sǝlǝa ama Hosheya na arǝ kanì nǝ̀ mgbicau. Hosheya angŋa-dǝmba tasǝna amǝ'na-túrbân aban So murǝm mala Masar, sǝ ɓinǝna mbwe boalo-cemi aban murǝm mala Assuriya, kǝla mǝnana pakkiyi ɗiɗyal koya pǝlǝa ka. Acemani ka, murǝm mala Assuriya gbami Hosheya sǝ túrrí a ndàkurban.

5 Murǝm mala Assuriya andǝ amǝ'lwa male yi kútí aɓa nzali Isǝrayila kat nǝ rǝcandǝa mala lwa. Lang à yi bingŋǝna nggea-là Samariya ka, à gumbǝlì, à kasǝkun anjar kat, puro pà kàm ɗàng sǝ kutio pà kàm ɗàng, kya bik apǝlǝa tàrú. 6 A tongno-nong-inea pǝlǝa mala do-bunomurǝm mala Hosheya ka, nggea-là Samariya kpa aɓa rǝcandǝa mala murǝm mala Assuriya. Bwalki amǝ Isǝrayila pusǝia aɓa nzali malea nǝ rǝcandǝa, umnǝia a nzali Assuriya. Wario kya dumsǝ aɓea aɓwana ateà a Hala, ɓè ban tù nǝ kún Nggeasala Habo, a bu-nzali Gozan, sǝ acilia ka dumsǝia aɓalǝ alá mala amǝ Medes.

7 Mǝnia yì gìr mur'mwana ka yiu amur amǝ Isǝrayila acemǝnana à pàkkî Yahweh Ɓakuli malea cauɓikea, yì Ɓakuli mǝnana pusǝia à purî ɓá nzali Masar, sǝ panzǝia aɓata rǝcandǝa mala Firona murǝm mala Masar ka. À peri aban aɓea aɓakuli; 8 à bwal akúncau mala aɓwapǝndǝa mala anzali mǝnana Yahweh pǝria ɓǝà nyinggi wia ban ngga, sǝ à kpata akúncau mǝnana amurǝma mala Isǝrayila yinǝia ka. 9 Sǝ amǝ Isǝrayila pàkkî Yahweh Ɓakuli malea agir mǝɓike aɓa sǝmbǝrǝa, agir mǝnana ɓoaro ɓǝà pea raka. À ɓakkî ɓamuria amgbangban-peri atà ankúl arǝ alá malea kat, twal arǝ amuna-là aban ká arǝ kanggǝrang nggea-là. 10 À tamsǝî ɓamuria akúnamúrú andǝ atondong mala peri aban Ashera, amur koya mgbangban andǝ tǝrtà koya nggun mǝpwale. 11 À pāki agir'nkila amur amgbangban-peri atà ankúl kat, kǝla mala aɓwapǝndǝa mala anzali mana Yahweh loasǝtea ɓǝà nyinggia wia ban ngga. À pakkiagir mǝɓike mǝnana lulbum Yahweh ka. 12 À peri aban ankúl, kat andǝ mani ama Yahweh bangŋǝnia wia ama, <<Pà wu nǝ̀ pàk gìr mǝnia ka ɗàng.>> 13 Yahweh nunakir Isǝrayila andǝ Yahuda tùtù nǝ kún koya mǝɓangnǝa andǝ koya mǝ'sǝna ama, <<Wu vwakibu wun arǝ anjar mala ɓealɓikea ma'wun, sǝ wu bwal anzongcau mem andǝ anê mem, yì nggurcau mǝnana ǝn tsǝki aká wun nzongcau nǝma ɓǝà kpate, sǝ ǝn tasǝa wuni nǝ bu aguro mem amǝ'ɓangnǝa ka.>>

14 Sǝama yia ka, à kwakikiria ɗàng, à dumnǝ ɓamurcandǝa kǝla ɓamurcandǝa mala akeâ, mana à earnǝ Yahweh Ɓakuli malea raka. 15 À ginǝki anê andǝ kùrcau mǝnana pè andǝ akeâ ka, sǝ à ɓǝsǝki anunkiru mǝnana pea wia ka. À kpata ankul ɓana, sǝ acemani ka à pǝlǝ aɓwaɓana, à twalkusǝ aɓwapǝndǝa mala anzali mǝnana à gumbǝlia ka, kat andǝ amani ama Yahweh angŋa-dǝmba tsǝngŋǝnia wia nzongcau ama ɓǝà kǝa pàk kǝla yia raka. 16 À vwakibuia arǝ anzongcau mala Yahweh Ɓakuli malea kat; à ɓakkî ɓamuria aɓǝ̀nzál-bolo mala amuna-ndá ɓari; à pàk tondong mala Ashera. À peri aban pwari andǝ zongŋo andǝ anlero, sǝ à kpata Ba'al. 17 À pisǝ amuna-burana andǝ amuna-mamǝna malea a bǝsa kǝla apa'girnkila. À pàkkiagir nggár andǝ agir monzǝo sǝ à mak ɓamuria aban pakki agir mǝnana amǝɓike na a mǝsǝ Yahweh, sǝ à lulbumi ka. 18 Acemani ka, bum Yahweh lul kǝ̀rkǝ́r arǝ Isǝrayila, sǝ pǝria à purî ɓadǝmbi. Kǝɓwa ue ɗang, shekǝ taù mala Yahuda.

19 Yahuda gbal ka bwal anzongcau mala Yahweh Ɓakuli malea ɗàng; à gya aɓalǝ akúncau mǝnana Isǝrayila yinǝia ka. 20 Nda Yahweh ginǝki amǝkà Isǝrayila kat, túriá aɓa tanni sǝ tasǝia a ɓabu amǝ'tǝllìban, she lang pusǝnia à purni ɓadǝmbi ka.

21 Lang Yahweh sanǝna Isǝrayila arǝ ɓala mala Dauda ka, amǝ Isǝrayila tsǝk Jerobuam muna-ɓwabura mala Nebat duk murǝm. Sǝ Jerobuam nun Isǝrayila à ɗeki kpata Yahweh, sǝ tsǝia à pàk cauɓikea mǝgule. 22 Amǝ Isǝrayila gya aɓalǝ acauɓikea mǝnana Jerobuam pàk ka kat. À nyingbuia arǝia ɗàng, 23 she lang Yahweh pusǝnia à purnì ɓadǝmbi, kǝla mǝnana akdǝmba bangŋi nǝ kún aguro male amǝ'ɓangnǝa kat ka. Nda à pwan amǝ Isǝrayila à umnǝia a bǝri-nzali a Assuriya ba yalung ngga.

24 Murǝm mala Assuriya yinǝ aɓwana mǝnana à lo a Babila, a Kuta, a Avva, a Hamat andǝ Sefarvayim ngga, sǝ dumsǝia aɓalǝ anggea-là mala Samariya a kúnì amǝ Isǝrayila. Sǝ à akban aɓa Samariya kat, à do arǝ anggea-là malea. 25 Lang à tita do kano ka, à ɓanggi Yahweh ɗàng. Acemani ka, Yahweh tasǝ a'im a ɓālǝia, a'im wal-lú aɓea aɓwana ateà. 26 Pǝlǝa à banggi murǝm mala Assuriya ama, <<Aɓwapǝndǝa mala anzali mǝnana a yinǝia sǝ a dumsǝia aɓalǝ anggea-là mala Samariya ka, à súrǝ̀ nggurcau mala ɓakuli mala lě ɗàng. Ace mǝno ka, tasǝna a'im a ɓālǝia; a'im na kǝ wal-luia ka, acemǝnana à súrǝ̀ nggurcau mala ɓakuli mala lě ɗàng.>> 27 Pǝlǝa murǝm mala Assuriya pà nzongcau ama, <<Wu twal mwashat atà apǝris mǝnana wu pwania kano ka; sǝ tasǝì ɓǝ̀ kyane, ɓǝ̀ kya duk kam sǝ ɓǝ̀ kania wia nggurcau mala ɓakuli mala lě.>> 28 Pǝlǝa mwashat atà apǝris mǝnana à pwania a Samariya ka yiu sǝ kya do a Betel, sǝ kania wia lang sǝ à nǝ̀ ɓanggi Yahweh.

29 Sǝama komǝye atà aɓwapǝndǝa mǝno ka, à pàk aɓakuli malea sǝ à tsǝkia aɓalǝ andaka-ankúl mala amgbangban-peri mǝnana amǝ Samariya akdǝmba ɓakkia ka; koya aɓwapǝndǝa ka, à pàk mǝnia ka arǝ anggea-là malea mǝnana à duk kam ngga. 30 Amǝ'Babila pàk Sukkot-Benot, amǝ'Kuta pàk Nergal, amǝ'Hamat pàk Ashima, 31 sǝ amǝ'Avva pàk Nibaz andǝ Tartak; sǝ amǝ'Sefarvayim pisǝ amunia a bǝsa aban Adǝramelek andǝ Anamelek, aɓakuli mala Sefarvayim. 32 À ɓanggi Yahweh, sǝama à twal aɓwana ɗàngɗáng aɓa ɓinalea ɓǝà duk apǝris mala andaka-ankúl amur amgbangban-peri, sǝ apǝris man pāki agir'nkila acea aɓalǝ andaka-ankúl mala agyangŋan-peri ka. 33 Anggo sǝ à ɓanggi Yahweh, sǝama, à kpata aɓakuli malea gbal; à pè kǝla mǝnana à kǝ pe arǝ anzali mana à pwania kàm ngga.

34 Anggo sǝ à lidǝmba nǝ pe kǝla pě mǝ'ɗiɗyali malea ba yalung. À peri aban Yahweh ɗàng, acemǝnana à kpata anê, ko akanìgìr, ko anggurcau, ko anzongcau, mana Yahweh pè amǝkà Yakupu mǝnana tunǝi ama Isǝrayila ka ɗàng. 35 Lang Yahweh kùrcau nǝia ka, pea wia mǝnia yì nzongcau ka ama, <<Pà wun nǝ̀ ɓanggi aɓea aɓakuli, ko wun nǝ̀ ɓun a ɓadǝmbia, ko wun nǝ̀ kpata acau malea, ko wun nǝ̀ pà gir'nkila mala pisǝe kǝring abania ɗàng. 36 Wun nǝ̀ ɓanggi Yahweh, mǝnana pusǝ wun wu purî ɓá nzali Masar nǝ kaɓa rǝcandǝa andǝ mazo mala nggwarbui ka. Abaní sǝ wun nǝ̀ ɓunno, sǝ abaní sǝ wun nǝ̀ pà gir'nkila mala pisǝe kǝring. 37 Sǝ anê, andǝ akanìgìr, andǝ anggurcau, andǝ anzongcau, mǝnana gilǝa wunia ka, dumǝna púp wun nǝ̀ kpatea, wun nǝ̀ peǎ nǝ tsǝkiru arǝ apwari kat. Pà wun nǝ̀ ɓanggi aɓea aɓakuli ɗang. 38 Pà wun nǝ̀ lorǝ kùrcau mǝnana ǝn kur sǝnǝa wun ngga ɗang. Pà wun nǝ̀ ɓanggi aɓea ɓakuli ɗang. 39 A kún mani ka, wun nǝ̀ ɓanggi Yahweh Ɓakuli ma'wun, sǝ yì ka nǝ̀ amsǝ wun a ɓabu aɓiwun-amǝbura kat.>> 40 Kat andǝ amani ka, à kwakikiria ɗàng, à kpata anjar mǝ'e malea.

41 Anggo sǝ aɓwapǝndǝa mala anzali man ɓanggi Yahweh, sǝ à kpata acau mala aɓǝ̀nzál malea mǝnana à shària ka gbal. Amuna malea pàk anggo, amǝ'keà pàk kǝ gìrnî gbal. À lidǝmba nǝ pe kǝla mǝnana akeâ pàk ka ba yalung.