1 A tàruià pǝlǝa mala do-bunomurǝm mala Hosheya muna-ɓwabura mala Ela murǝm mala Isǝrayila ka, Hezekiya muna-ɓwabura mala Ahaz murǝm mala Yahuda tita yálmúrû. 2 Ndanǝ apǝlǝa lumi-ɓari-bwamdǝ-tongno (25) lang duk murǝm ngga, sǝ do a bunomurǝm a Urǝshalima arǝ apǝlǝa lumi-ɓari-bwamdǝ-tongno-nong-ine (29). Lullǝ ngge nda Abi ɓoarnsarile Zakariya. 3 Pàk gìr mǝnana pwasǝbum Yahweh ka, kǝla mǝnana kè Dauda pàk ka. 4 Kiɗiki amgbangban-peri atà ankúl, arki akúnamúrú, sǝ kwarki atondong peri mala Ashera. Ɗǝm ngga n'yau bolo-bángŋá mǝnana Musa pè ka, ɓungi gucik-gucik, acemǝnana ba pwari mǝno ka amǝ Isǝrayila kǝ pāki aɓoro a baní; à tunǝi ama Nehushtan.* 5 Murǝm Hezekiya Guli arǝ Yahweh Ɓakuli mala Isǝrayila. Kǝɓwa pà kàm kǝla yì atà amurǝma kat mala Yahuda ɗàng, ko anzǝmi ko a dǝmbi. 6 Bwal kàngkàng arǝ Yahweh, sǝ pǝlǝ nzǝmi arǝ kpate ɗàng. Bwal anzongcau mǝnana Yahweh pè Musa ka. 7 Yahweh na atè koya pwari. Ɓǝ̀ aya ban sǝ pǝlǝ ka, kǝ hangǝli. Mgbicau arǝ murǝm Assuriya, ginǝ kpate. 8 Lì amǝ'Filisti a lwa aban ká ɗār a Gaza andǝ abân aɓa nzong-nzali male, lo a muna-là* aban ká a nggea-là mǝnana à gumbǝlia nǝ sheran ngga.

9 A inea pǝlǝa mala do-bunomurǝm mala Hezekiya, mǝnana nda tongno-nong-ɓaria pǝlǝa mala yálmúrû mala Murǝm Hoshiya muna-ɓwabura mala Ela mala Isǝrayila ka, Shalmanesa murǝm mala Assuriya yiu nǝ lwa arǝ Isǝrayila a Samariya, sǝ gumbǝli nggea-lê. 10 A masǝlǝata apǝlǝa tàrú ka, Shalmanesa ak nggea-là Samariya. Aɓa tongno-nong-mwashatia pǝlǝa mala do-bunomurǝm mala Hezekiya, a tongno-nong-inea pǝlǝa mala yálmúrû mala Hoshiya a Isǝrayila ka, Samariya kpa. 11 Murǝm mala Assuriya pwan amǝ Isǝrayila umnǝia a nzali Assuriya. Kya dumsǝ aɓea aɓwana ateà a Hala, ɓè là tù nǝ kún Nggeasala Habo, a bu-nzali Gozan. Acilia ka dumsǝia aɓalǝ alá mala amǝ Medes. 12 (Mǝnia yì gìr ka, kumban acemǝnana à oaki Yahweh Ɓakuli malea ɗang; à pàk kpakpak arǝ kùrcau male mǝnana pàk andǝia ka. Agir mǝnana kat Musa guro mala Yahweh banggia wia ka, à ginǝ okiru, sǝ à lùmsǝia ɗàng.)

13 Aɓa lum-nong-inea pǝlǝa mala do-bunomurǝm mala Murǝm Hezekiya ka,* Murǝm Senakerip mala amǝ Assuriya wari nǝ munǝo arǝ akanggǝrang nggea-là mala amǝ Yahuda, sǝ ea. 14 Murǝm Hezekiya túrban arǝ murǝm mala Assuriya a Lakish ama, <<Ən ɓwarkina; nyesǝ amǝ'lwa mô ɓǝà purî banam; mǝ nǝ mbweo cemi mǝnana kat a nam ama ɓǝn mbwe ka.>> Nda murǝm mala Assuriya tsǝk Murǝm Hezekiya mala Yahuda ɓǝ̀ mbwe tyang á-lum (10,000) mala bolo-azǝrfa andǝ tyang á-mwashat (1,000) mala bolo-njengǝlan ngga. 15 Sǝ Hezekiya pe wi bolo-azǝrfa mǝnana kat nda kam a ɓala mala Yahweh andǝ mana aɓalǝ andà-tsǝk agir-ɓoarna mǝnana a palta ka. 16 A bàkú mǝno ka, Hezekiya fasǝki bolo-njengǝlan mǝnana à gìrna múr alǝpi kunakurǝm mala ɓala mala Yahweh nǝi ka, andǝ bolo-njengǝlan mǝnana yì nǝ ɓamurì akdǝmba gìrna rǝ anggun-kúnakurǝm nǝi ka, sǝ pè murǝm mala Assuriya.

17 Pǝlǝa murǝm mala Assuriya túr murǝm-lwa male, andǝ ɓwamǝgule-palta male andǝ mǝ'ak-kúní aban Murǝm Hezekiya a Urǝshalima. À lo a Lakish, nǝ amǝ'lwa mǝlakke-pas ateà aban ká a Urǝshalima. À eauwe sǝ à yiu a Urǝshalima. Lang à bingŋǝna ka, à yi cam a ban dā'ngal mala guguri mǝnana a kwàrban ngga, amur njargula ká a patal mala mǝ'láki-anggubyau. 18 À tunǝ murǝm, sǝ Eliyakim muna-ɓwabura mala Hilkiya, mǝnana nda ɓwamǝgule-palta ka, puro atārǝia andǝ Shepna mǝgilǝgir, andǝ Jowa muna-ɓwabura mala Asap mǝ'twalcau aɓa malǝmce, ace ká kumia.

19 Ɓwamǝgule-lwa mala Assuriya banggia wia ama:

<<Wu banggi Hezekiya: Mǝnia ka nda cau mǝnana murǝm mǝgule, yì murǝm mala Assuriya kǝ na ka: Mana a gūlì arǝì mǝnana po mǝnia yì mǝsǝkàngkàngŋa ka? 20 A kǝ sǝni kǝla cau a mburkun ngga nda kutan andǝ rǝcandǝa mala lwa le? Yan a gūlikiyi arǝì mǝnana tsǝo a mgbicau arǝàm ngga? 21 Ado ka, Masar na a kǝ gūlì arǝì ka re? Masar ka kùrrí mǝ'arre na mǝnana ɓǝ̀ ɓwa eangnǝ arǝì ka, nǝ̀ swàrì a buì ka! Anggo sǝ Firona murǝm Masar pa aban aɓwana mǝnana kat à gūlì arǝì ka. 22 Sǝ ɓǝ̀ wu banggam ama, Yahweh Ɓakuli ma'wun na wu kǝ gūlì arǝì ka, yì nda mǝnana mbak Hezekiya bǝbbǝriki amgbangban-peri andǝ agyangŋan male, sǝ banggi aɓwana mala Yahuda andǝ Urǝshalima ama, <Dumǝna púp wun nǝ̀ peri a ban gyangŋan mǝnia a Urǝshalima> ka re? 23 Ado ka, yiu, wu earcau wunǝ mǝtala-ɓala mem murǝm mala Assuriya, sǝ mǝ nǝ po apǝr á-ɓari (2,000), ɓǝ̀ awu nǝ gandǝ kum amǝ'koea ka. 24 Lang sǝ awu nǝ gandǝ pǝr ɓwa mwashat atà arítǎu mala amǝgulo-lwa mala mǝtala-ɓala mem, mǝnana gūliarǝu mò ka nda arǝ Masar ɓǝ̀ po awaru-pǝr andǝ amǝpǝr ka?* 25 Ko a kǝ sǝni kǝla yiu mem nǝ munǝo a ban mǝnia ace kiɗike ka, nê mala Yahweh na re? Yahweh na mǝnana banggam ama, <Eauwe kya arǝ nzali man, kya kiɗiki ka.> >>

26 Pǝlǝa Eliyakim muna-ɓwabura mala Hilkiya andǝ Shepna sǝ Jowa banggi Ɓwamǝgule-lwa mala Assuriya ama, <<Ida, na sǝm cau, sǝm aguro mò, nǝ kún Aram, acemǝnana sǝm ok kúni cim. Kǝa na sǝm cau nǝ kún Ibǝru ɗàng, acemǝnana aɓwana mǝnana à cam amur sheran ngga à nǝ̀ oè.>>

27 Sǝ Ɓwamǝgule-lwa nea wia ama:

<<Pà aban wun andǝ murǝm ma'wun nǝmurǝ wun sǝ mǝtala-ɓala mem túrǎm mǝ bang acau mǝnia ka ɗàng; nda gbal aban aɓwana mǝnana à cam amur sheran ngga, mana wun wunǝia ka, wun nǝ̀ lì ciuta wun sǝ wun nǝ̀ nu sanzǝata wun ngga.>>

28 Pǝlǝa Ɓwamǝgule-lwa lo cam-nǝ-came sǝ loasǝ gì kpǝm bangcau nǝ kún Ibǝru ama:

<<Wu kwakikir wun arǝ cau mala murǝm mǝgule, yì murǝm mala Assuriya. 29 Murǝm ama: Wu kǝa earî Hezekiya ɓǝ̀ swarki wun ɗàng, acemǝnana pà nǝ̀ gandǝ amsǝ wun a ɓabuam ɗàng. 30 Wu kǝa earî Hezekiya ɓǝ̀ ɓosǝki wun, wu gūlì arǝ Yahweh ama, <Mbak-kàngkàng, Yahweh nǝ̀ amsǝ sǝm; nggea-là mǝnia pà nǝ̀ kpa a ɓabu murǝm mala Assuriya ɗàng.> 31 Wu kǝa kwakikir wun arǝ Hezekiya ɗàng! Mǝnia nda cau mǝnana murǝm mala Assuriya bang ngga ama: <Wu purî ɓá nggea-là, wu yiu abanam, wu alta dorǝpwala nǝ mim, sǝ koyan atà wun ngga, nǝ̀ lì ɓǝlanggun anap andǝ ɓǝla-vwari male, sǝ nǝ̀ nu mùr a tūli-mùr male. 32 Pǝlǝa mǝ nǝ yia kánǝ wun a ɓè nzali mǝnana nda kǝla ma'wun ngga, nzali mǝnana ndanǝ mǝsǝsa andǝ bǝsa mùr-anap mǝɓoarne ka, nzali mǝnana ndanǝ girlina andǝ aɓaban-anap, nzali mǝnana ndanǝ anggun olif andǝ mur'nyi ka. Anggo ka wun nǝ̀ dum nǝyilǝmu, pà wun nǝ̀ wù ɗàng! Wu kǝa kwakikir wun arǝ Hezekiya ɓǝ̀ ɓosǝki wun ama, <<Yahweh nǝ̀ amsǝ sǝm>> ɗang. 33 Kǝ ɓè atà aɓakuli mala anzali na kam, mǝnana akmúr nzali male a bù murǝm mala Assuriya a kǝ fara ka le? 34 Aɓakuli mala anggea-là Hamat andǝ Arpat na ke? Sǝ aɓakuli mala alá Sefarvayim andǝ Hena andǝ Ivva na ke? À gandǝ akmúr Samariya a ɓabuam le? 35 Mǝye na atà aɓakuli mala amǝno yì anzali ka, amsǝ nzali male a buam? Sǝ lang sǝ Yahweh nǝ̀ akmúr Urǝshalima a ɓabuam?> >>

36 Sǝ aɓwe ka à pwal piu; kǝɓwa nyesǝ kǝ cau ɗàng, acemǝnana murǝm angŋa-dǝmba pànà nzongcau ama, <<Kǝɓwa ɓǝkǝa pǝlǝi wi kǝ cau ɗàng.>>

37 Pǝlǝa Eliyakim muna-ɓwabura mala Hilkiya, mǝnana nda ɓwamǝgule-palta, atārǝia andǝ Shepna mǝgilǝgir, andǝ Jowa muna-ɓwabura mala Asap mǝ'twalcau aɓa malǝmce, nyar aban Hezekiya. Koyan atea ka sàn daura mǝnana arǝì ka [aɓa bumkiɗikea], sǝ à kùtí aban Hezekiya, à ne wi gìr mǝnana kat Ɓwamǝgule-lwa mala Assuriya bang ngga.