1 A ɓaria pǝlǝa mala do-bunomurǝm mala Johash muna-ɓwabura mala Jehowahaz murǝm Isǝrayila ka, Amaziya muna-ɓwabura mala Johash duk murǝm a Yahuda. 2 Ndanǝ apǝlǝa lumi-ɓari-bwamdǝ-tongno (25) lang tita do-bunomurǝm ngga, sǝ yálmúr aɓwana a Urǝshalima apǝlǝa lumi-ɓari-bwamdǝ-tongno-nong-ine (29). Lullǝ ngge nda Jehowadin, ɓwama Urǝshalima. 3 Amaziya pàkki agir pas mǝnana à pwasǝbum Yahweh ka, kat andǝ amani ka, pà kǝla mala kè Murǝm Dauda ɗàng. Aɓa koman kat ka, kpata kusǝ tárrí Johash. 4 Sǝama amgbangban-peri atà ankúl ka kiɗikia ɗàng; amǝ Isǝrayila lidǝmba nǝ ká pà gìr'nkila andǝ aɓoro amur amgbangban-peri atà ankúl mǝno.

5 Lang Amaziya kumǝna kusǝu-came kàngkàng kǝla murǝm ngga, wal-lú ka amǝ'tamurǝm mǝnana à wal-lú tárrí ka. 6 Sǝama wal-lú ka amuna-burana mala aɓwana mana à wal-lú tárrí ka ɗàng. Kpata nzongcau mala Yahweh, kǝla mǝnana à gilǝì aɓa Malǝmce Nzongcau mala Musa, mana aɓalǝi ka Yahweh tsǝk nzongcau ama, <<Atárru ka, à pà nǝ̀ wal-luia atàcau mala amuna malea ɗàng, sǝ amuna gbal ka, à pà nǝ̀ wal-luia atàcau mala atárrià ɗang; koyan ngga, nǝ̀ wǔ atàcau mala cauɓikea male.>>

7 Amaziya wal-lú ka amǝ'lwa mala amǝ Edom á-lum (10,000), a Ɓangŋaban Tuɓamur. Limurǝm amur là Sela a munǝo, sǝ nggaɗi lullǝ lê, à tunǝi ama, Jokteel, lullǝu mǝnana nda kam ba yalung ngga. 8 Pǝlǝa Amaziya tasǝ amǝ'na-túrbân aban Jehohash, muna-ɓwabura mala Jehowahaz, muna-ɓwabura mala Jehu, murǝm Isǝrayila, nǝ cau ama, <<Yiu, ɓǝ̀ sǝm je ɓamǝsǝu andǝ ɓamǝsǝu.>>

9 Sǝ Jehohash, murǝm Isǝrayila, nyesǝî Amaziya cau ama, <<Zwe mǝnana a Lebano ka, tasǝ cau aban nggun-seda a Lebano ama, <Pà ɓoarnsarileo aban muna-ɓwabura mem ɓǝ̀ duk māmí.> Sǝ ɓè nyam-bondo mala Lebano, puro nǝ̀ ya kútí ka, parki zwenì a nzali! 10 Mǝsǝcau na ama a gandǝna Edom, sǝ gìrnî no po jali ka. Sǝama do a là, pàk-banɓoarnado mala limurǝm mò. Palang ado, sǝ awu nǝ altacau, mǝnana nǝ̀ yinǝ kpa mô, andǝ kpa mala Yahuda atò ka?>>

11 Sǝ Amaziya ka, falǝnǝ nunkiru mǝno ɗang, nda Jehohash, murǝm Isǝrayila pur atè. Sǝ yì andǝ Amaziya murǝm Yahuda, à yi je-munǝo ɓamǝsǝu andǝ ɓamǝsǝu, a Bet-Shemesh, aɓa Yahuda. 12 Amǝ'lwa mala Isǝrayila gandǝ amǝ'lwa mala Yahuda, sǝ koya mǝ'lwa mala Yahuda ka ɓangŋa o a gumli male. 13 Jehohash murǝm Isǝrayila gbami Amaziya murǝm Yahuda, muna-ɓwabura mala Jehohash, mǝkà Ahaziya, a Bet-Shemesh. Sǝ yì andǝ amǝ'lwa male wari a Urǝshalima, à arki sheran mala Urǝshalima bik ɓakusǝu gbǝman-tongno-nong-mwashat (600), tite a Kún-la Ifǝrem, kya bwal ban Kún-la Bankara. 14 Pwan bolo-njengǝlan andǝ bolo-azǝrfa kat, andǝ atanggǝla mǝnana kat à kumia a ɓala mala Yahweh, sǝ aɓalǝ andà-tsǝk agir-ɓoarna mala ɓala-murǝm ngga, sǝ pwan aɓwana aɓa nggúr, umnǝia kat a Samariya.

15 Acili agir mǝnana à kumban aɓa do-bunomurǝm mala Jehohash, andǝ atúró mǝnana kat pàkkia, andǝ agir-zǝ́kíban male, andǝ amunǝki-amunǝo male andǝ Amaziya, murǝm Yahuda ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila.

16 Jehohash usǝlǝ atà akê, sǝ à tsǝkluí a Samariya, atà amurǝma mala Isǝrayila. Sǝ muna-ɓwabura male, Jerobuam, duk murǝm a bancame male. 17 Murǝm Amaziya muna-ɓwabura mala Johash, mala Yahuda, dum nǝyilǝmu apǝlǝa lum-bwamdǝ-tongno (15), anzǝm lú mala Jehohash muna-ɓwabura mala Jehowahaz, murǝm Isǝrayila. 18 Acili agir mǝnana à kumban aɓa do-bunomurǝm mala Amaziya ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda.

19 Aɓwana kùrkunarǝia amur Amaziya a Urǝshalima, nda ɓangŋa o a Lakish. Sǝama à tasǝ amǝ'wal-lú atè a Lakish, à kya wal-luí abanì. 20 À twal luí a nzǝm apǝr sǝ à yi tsǝî a ɓembe a Urǝshalima atà akê a nggea-là mala Dauda.

21 Pǝlǝa amǝ Yahuda kat twal Azariya,* mǝnana a bàkú mǝno ka ndanǝ apǝlǝa lum-bwamdǝ-tongno-nong-mwashat (16) ka, sǝ à tsǝì duk murǝm, a bancame mala tárrí, Amaziya. 22 Azariya yi ɓǝsǝlǝ ɓak là Ela, sǝ nyesǝi aɓata domurǝm mala Yahuda anzǝm mǝnana murǝm [tárrí Amaziya] wuna à tsǝ̀ngŋǝ̀nì atà akê ka.

23 A lum-bwamdǝ-tongnoia pǝlǝa mala do-bunomurǝm mala Amaziya, muna-ɓwabura mala Johash murǝm Yahuda ka, Jerobuam, muna-ɓwabura mala Johash, duk murǝm mala Isǝrayila, sǝ yálmúr aɓwana a Samariya apǝlǝa lumi-ine-nong-mwashat (41). 24 Pàkki agir mǝnana amǝɓike na a mǝsǝ Yahweh ka. Tamsǝ pakkia ulang acauɓikea mala Jerobuam, muna-ɓwabura mala Nebat mǝnana kat tsǝk amǝ Isǝrayila à pàkkia ka ɗàng. 25 Sǝ yì nda ɓwa mǝnana nyesǝ anzong-nzali mala Isǝrayila, twal a Lebo-Hamat a njar-nza, aban ká a kún nggeamùr mala Araba, a njar-kúnmur, kǝla mǝnana cau mala Yahweh, Ɓakuli mala Isǝrayila bangŋi nǝ kún guro male Yunana, muna-ɓwabura mala Amittai, mǝɓangnǝa, mǝnana pur a Gat Hefa ka.

26 Yahweh ka, sǝnǝna tanni mǝkǝ̀rkǝ́rnì mǝnana koyan a Isǝrayila kǝ nu ka, ko guro, ko ɓwa mana aguro na raka; kǝɓwa pà kàm mǝnana nǝ̀ bwalì Isǝrayila ka ɗàng. 27 Sǝ acemǝnana Yahweh bangma ama, nǝ̀ esǝki lullǝ Isǝrayila a ɓanza raka, amsǝia nǝ bu Jerobuam, muna-ɓwabura mala Johash [murǝm Isǝrayila].

28 Adyan ngga acili agir mǝnana à kumban a do-bunomurǝm mala Jerobuam, atúró mǝnana kat pàkkia, andǝ rǝcandǝa male, andǝ alimurǝm male a lwa, kpapi andǝ nyesǝe mǝnana nyesǝ anggea-là Damaska andǝ Hamat, mǝnana ɗiɗyal amala nzali Yahuda na ka, aɓata Isǝrayila ka, à nda kam a gilǝe aɓa Malǝmce mala Acau-ɓaraɓara mala Amurǝma mala Isǝrayila. 29 Jerobuam yi paklú atà akê, amurǝma mala Isǝrayila. Muna-ɓwabura male, Zakariya, duk murǝm a bancame male.