1 Lang Yesu sùlǝ́nì múr nkono ka, ɓwabundǝa pas kana atè. 2 Ɓè mǝdakali yiu a baní yi ɓunno a ɓadǝmbi sǝ na ama, <<Ɓwamǝgule, ɓǝ̀ a nǝ ear ka, a nǝ twàlâm-ban rǝkwana man ɓǝ̀ rǝam ɓoarnsari.>>

3 Sǝ Yesu lǝmdǝ buì je ɓwabure sǝ na ama, <<Ən earǝna, ɓǝ̀ rǝo ɓoarnsari.>> Àkǝ̀ banì kara kwánó dakali nying rǝì. 4 Sǝ Yesu ne wi ama, <<Kǝa ne kǝɓwa ɗàng. We ka, kyane kya lǝmdǝ rǝo a ban pǝris, sǝ wu pa ɓoro mǝnana Musa bang ama ɓǝà pà ka, mǝnana nǝ̀ lǝmdǝ twalban rǝkwana mo a bania ka.>>*8:4 Ɓalli gbal aɓa: Pǝris 14:1-32.

5 Kutio mala Yesu aɓa nggea-là Kapanahum ka, ɓè ɓwamǝgule mala asoje yiu a baní kǝ zǝmbi wi 6 ama, <<Ɓwamǝgule, muna-ɓala mem na ban nongŋo a ɓala nǝ kwánó rǝwuna, nda aɓa tanni kǝ̀rkǝ́r.>>

7 Yesu ne wi ama, <<Mǝ nǝ ká mǝ nǝ twali wi ban rǝkwane.>>

8 Ɓwamǝgule soje pǝlǝa eari wi ama, <<Ɓwamǝgule, ǝn kārǝa wu yiu a ɓala mem ɗang. Ne kwane cau, sǝ muna-ɓala mem ngga rǝì nǝ̀ mala. 9 Nggearǝ mim ngga mǝ nda aɓata ɓeɓwa sǝ mǝ ndanǝ asoje a ɓatam. Kani ɓǝ̀ ǝn ne mǝnia ama, <Kyane> ka, nǝ̀ ká; sǝ ɓǝ̀ ǝn ne mǝno ama, <Yiu> ka, nǝ̀ yiu. Ɓǝ̀ ǝn ne guro mem ama, <Pak ani> ka, nǝ̀ pa.>>

10 Lang Yesu ok cau mǝnia ka, ce nî pe wi ndali. Sǝ pǝlǝa ne amǝkpate ama, <<Ən nggǝ na wun mǝsǝcau, ǝn malaká kum kǝɓwa aɓa nzali Isǝrayila nǝ gūliarǝu mǝgule kǝla man ɗang. 11 Mǝ ndarǝ bangga wun, a ɓwana pas nǝ̀ purkio arǝ aban ɗàngɗáng a bum ɓanza à nǝ̀ yia do a Domurǝm mala kùli, à nǝ̀ lìli banɓoarnado atǎ Ibǝrayim, andǝ Ishaku, andǝ Yakupu.*8:11 Ɓalli gbal aɓa: Luk 13:29. 12 Sǝ aɓwana mana ɓǝ́ à nda à nǝ̀ duk amǝ’ɓala-murǝm ngga à nǝ̀ ramtea a nza aɓa pǝndǝa. À nǝ̀ ɓua à nǝ̀ nǝmnggi munabuia.>>

13 Yesu pǝlǝa ne ɓwamǝgule soje ama, <<O a ɓala. Kǝla mǝnana a pa ɓabumo arǝì ka, anggo sǝ nǝ̀ pa.>>

Akǝ̀ ɓá nacau mǝno ka rǝ munê mala.

14 Yesu wari a ɓala mala Bitǝrus. Yi kum nkil Bitǝrus mǝɓwame aban nongŋo nǝ kwánó ɓauwa. 15 Sǝ Yesu je a garabui, kara ɓauwa mali rǝì. Pǝlǝa lo pe Yesu girlina.

16 Nǝ pwarikpǝra mǝno ka à yiu nǝ aɓwana pas a baní, amǝnana nǝ akukwar a rǝia ka. Pusǝ akukwar mǝno nǝ cau. Sǝ amǝkwánó ka twalia wia ban arǝkwana malea kat. 17 Yesu pak mǝnia yì gìr ka ace mǝnana ɓǝà lùmsǝ ɓangnǝa mala Ishaya mǝnana ama:

<<Yi ak arǝpangŋa ma’sǝm

sǝ twal akwánó ma’sǝm.>>*8:17 Ɓalli gbal aɓa: Isha 53:4.

18 Lang Yesu sǝn làkkì mala aɓwana mǝnana à yiu a baní ka, tsǝk alaggana male ɓǝà yàle a ɓè nkaring Garang. 19 Ɓè mǝkani Nggurcau yiu a baní sǝ ne wi ama, <<Malǝm, mǝ nǝ ká atò ko aya ban a nǝ ká kam ngga.>>

20 Yesu ne wi ama, <<Amǝ’nzǝgban ndanǝ atūli, sǝ amuna-nyal mana à kǝ gya kùli ka, à ndanǝ andea, sǝ Muna mala Ɓwa ka, pànǝ ban mǝnana nǝ̀ nong kam ngga ɗàng.>>

21 Ɓè mǝkpate yi ne wi ama, <<Ɓwamǝgule, nyem ɓǝ̀ ǝn kyane mǝ kya tsǝk lú tárrám peatu sǝ mǝ nyare mǝ nǝ yia kpato.>>

22 Sǝ Yesu ne wi ama, <<Nying alú ɓǝà tsǝk alú malea, sǝ we ka kpatam.>>

23 Pǝlǝa Yesu kutio aɓa waru sǝ alaggana male eauwe atè. 24 Puro malea aɓa nggeamùr ka, kara nggea gung mǝcandǝe loarǝia, mur kǝ ali aɓa waru. Sǝ Yesu ka nda a ntulo. 25 Alaggana male wario à kya loasǝi sǝ à ne wi ama, <<Ɓwamǝgule, amsǝ sǝm, sǝm nda sǝm nǝ̀ limge!>>

26 Sǝ nea wia ama, <<Wun ngga, gūlì ma’wun arǝ Ɓakuli kyau fat. Palang sǝ ɓangciu pakka wun?>> Pǝlǝa lo sà arǝ gung andǝ eaki-nkono mala nggeamùr. Kara ban pwal ateà ɗǝong.

27 Sǝ aɓwana mǝnia ka à ndali sǝ à na ama, <<Ya ulang ɓwa nda mǝnia, mǝnana gung andǝ eaki-nkono mala nggeamùr à kǝ oki wi ka?>>

28 Lang Yesu yi eauna a nkaring garang, a bu-nzali mala amǝ Gadara ka, yi je andǝ aburana ɓari mǝnana à ndanǝ akukwar a rǝia ka. À pur aɓalǝ aɓembe sǝ à kǝ yiu a baní. Ɓiki lúllô malea tsǝa kǝɓwa kǝ kar a njargula mǝno ɗang. 29 À loasǝ già arǝ Yesu ama, <<Mana a alkiyite arǝ sǝm, we Muna mala Ɓakuli? A yiua pa sǝm tanni sǝ pwari malaká karǝ ɗang le?>>

30 Abania tù ka atǝmbǝrǝm-ɓala nia pas à kǝ lìli a domwan malea ka. 31 Akukwar nì pǝlǝa à zǝmbi Yesu ama, <<Ɓǝ̀ a nǝ pusǝ sǝm ngga, tasǝ sǝm aɓa domwan mala atǝmbǝrǝm-ɓala.>>

32 Yesu nea wia ama, <<Wu kyane!>> Sǝ akukwar nì puro, à kya kutio arǝ atǝmbǝrǝm-ɓala. Pǝlǝa domwan mǝnia kat ka tù atārǝia nǝ mire, à kya ɓunno a kun gwanyi, a sukkio a mùr à wukio. 33 Amǝ’yál atǝmbǝrǝm-ɓala twal mire aban o a là. À kya bang gìr mǝnana kum atǝmbǝrǝm-ɓala ka andǝ cau mala aburana ɓari mǝnana à pusǝ akukwar arǝia ka. 34 Sǝ là pur kat, à yiu aban Yesu. À nǝ̀ yia sǝn Yesu ka, à ɓuakia rǝì ɓǝ̀ nying bu-nzali malea.