ዒዝራ ማፃኣፖ 6

ቂኢሮሴ ዓይሤ ዓይሢፆ ኮዒ ዴንቆናሢ

1 ባብሎኔይዳ ካኣቱሞ ማኣራ ዓኣ ፃኣፒ ጌሦና ባካ ቢያ ኮይ ዛጊንታንዳጉዲ ካኣቲ ዳኣሪዮሴ ዓይሤኔ፤ 2 ጋዓንቴ ዬይ ባካ ባብሎኔይዳቱዋንቴ ዒዞ ዓጮኮ ሜዶኔይዳ «ዓህሚታ» ጌይንታ ካታማይዳ ፔቴ ቢራና ጌይንታያ ማሪንቴ ባኣዚዳ ጴዼኔ፤ ዬኖ ጋራ ፃኣፒንቴ ባካ፦

3 «ቂኢሮሴ ካኣታዼ ቤርታሳ ሌዖና ዬሩሳላሜይዳ ዓኣ ጌኤዦ ማኣሮይዳ ፆኦሲም ሚቺ ዒንጎ ዒንጊፆንታ ሜሌ ዱማ ዱማ ዒንጊፃ ዒንጊንታንዳጉዲ ጌኤዦ ማኣራ ጊንሣ ማዢንታንዳጉዲ ዓይሤኔ፤ ዬያ ጌኤዦ ማኣሮኮ ዖዶሱማ ላሂታሚ ዋዻ፥ ጋሮ ዳልጉማኣ ላሂታሚ ዋዻ ማዓንዳያ ኮይሳኔ። 4 ዲራ ሃይሦ ሺርሺ ሹቻ ኬልቂ ዲርቆናያ ዬያ ኬኤሎ ዲፆኮ ቶኦካ ፔቴ ሺርሺ ጫርጊ ዲርቆና ሚሢ ዲርሲ ዓኣያ ማዖንጎ፤ ዬያ ማዾም ቢያ ኮይሳ ሚኢሻ ካኣቱሞ ማኣራ ሚኢሾ ጌሦ ኬኤፃፓ ዒንጊንቶንጎ። 5 ዬያጉዲ ሃሣ ሃያኮ ቤርታ ካኣቲ ናብካዳናፆኦሬ ዬሩሳላሜይዳ ዓኣ ጌኤዦ ማኣራፓ ዲዒ ኬሴ ዎርቆና ቢሮ ዓንጎናይዳፓ ኮሺንቴ፥ ጌኤዦ ማኣሮይዳ ማዺንቶ ሜሃ ጊንሣ ማዒ ዬሩሳላሜይዳ ማዢንታ ጌኤዦ ማኣሮይዳ ኮይሳ ቤዛ ጌሢንቶንጎ» ጋዓያኬ።

6 ዬያሮ ዳኣሪዮሴ ሃካፓ ዴማ ዓኣ ኪኢቶ፦ «ዔፕራፂሴኮ ዓባ ኬስካ ባንፆና ዓኣ ዓጮ ዎይሣ ታቴናዬና ሼታርቦዝናዬናም፥ ዔፕራፂሴኮ ዓባ ጌላ ባንፆይዳ ዒንሢና ዎላ ዓኣዞንሢም ቢያ፤ ጌኤዦ ማኣሮ ባንሢ ዑኪፖቴ፥ 7 ማዻ ማዺንቱዋጉዲ ዹቂፆዋ ሃሹዋቴ፥ ዪሁዳ ዓጮ ዎይሣሢና ዓይሁዶ ዓሶኮ ሱኡጎና ፆኦሲኮ ጌኤዦ ማኣሮ ሚና ቤርታ ዓኣ ቤዞይዳ ጊንሣ ማዦንጎ። 8 ሃይማና ጌኤዦ ማኣሮ ማዾ ኮሺ ዒንሢ ዔያቶ ማኣዳንዳጉዲ ታ ዒንሢ ዓይሣኔ። ዬያሮ ዬያ ማዾ ማዺሾንዶ ሚኢሾ ቢያ ዔፕራፂሴኮ ዓባ ኬስካ ባንፆና ዓኣ ዓጫፓ ካኣቲኮ ጊኢሮ ማዒ ቡኩሶና ሚኢሾፓ ዑኬና ኬሲንቲ ዔያቶም ዒንጊንቶጎ፤ ማዻ ዹቂንቲ ዔቃንዳያ ኮይሱዋሴ። 9 ቃሲ ሃሣ ዬሩሳላሜይዳ ዓኣ ቄኤሳ ዒንሢም ኬኤዛ ጎይፆ ኬላ ኬላ ጫሪንጫ ናንጋ ፆኦዛሢም ዔያታ ዒንጋ ዒንጊፆም ኮዓ ዚዮ ጌማታ፥ ማራቶ ዓዳ፥ ማራናኣቶ ዓዳ፤ ዬያጉዲ ሃሣ ዒንጊፆማ ማዓ ዛርጋሢ፥ ሶኦጋ፥ ዎይኖ ዑዦንታ ሪሚታፓ ኮሾ ዛይቶዋ ቢያ ዔያቶም ዒንጉዋቴ። 10 ዬይ ቢያ ያዺ ማዺንታኒ ኮይሳሢ ጫሪንጮ ፆኦዛሢ ዎዛና ዔካ ዒንጊፆ ቢያ ሺኢሺሢና ታኣና ታ ናኣቶና ሼምፓሢም ዔያታ ሺኢቃንዳጉዲኬ፤ 11 ዬያ ሌሊቱዋንቴ ሜሌ ታ ዔርዛኒ ኮዓ ባኣዚ ዓይጎዳይ ጌዔቴ፦ ሃያ ታ ዓይሢፆ ዔኩዋኣያና ዋይዙዋይ ዓይጎ ዓሲታቶዋ ዒዛኮ ማኣሮ ቱርቱራፓ ፔቴ ቱጊንቲ ዓርሲ ዓጪሴስካፓ ጫርጊ ዒዛ ሱፆንጎ፤ ዬካፓ ማኣራ ዒዛኮ ሻሂንቲ ቡኡራ ላኣሎ ቤሲ ማዖንጎ። 12 ሃያ ዓይሢፆ ዋይዞ ዒፂ ዬሩሳላሜይዳ ዓኣ ፆኦሲኮ ጌኤዦ ማኣሮ ሻሃኒ ማላ ዓይጎ ካኣቲ ማዔቴያ ዴሬ ዒዛኮ ሱንፃ ዔኤሊንታ ቤሲ ማዓንዳጉዲ ዶኦሬ ፆኦዛሢ ዬያ ባይዞንጎ፤ ሃያ ኪኢቶ ዓይሢፆ ዳኬሢ ታና፥ ዳኣሪዮሴ ማዔሢሮ ጉቤ ባካ ማዺንቲ ኩማንዳያ ኮይሳኔ» ጌይ ዳኬኔ።

ጌኤዦ ማኣራ ማዢንቲ ጋፔሢሮ ቦንቾና ቦንቾ

13 ዬካፓ ዓጮ ዎይሣ ታቴናዬንታ ሼታርቦዝናዬንታ ዔያቶና ዎላ ቢታንታ ዓኣ ዓሳ ካኣቲ ዔያቶ ዓይሤ ጎይፆና ቢያ ባኮ ማዺ ኩንሤኔ። 14 ዓይሁዶ ዓሶኮ ሱኡጎንታ ፆኦሲ ማሊፆ ኬኤዛ ሃጌና ዛካሪያሴና ዔያቶ ዶዲሺ ዶዲሺ ጌኤዦ ማኣሮ ማዾ ዑካሴኔ፤ ዒስራዔኤሌ ፆኦዛሢ ማሊፆጉዲ ፓርሴ ካኣታ ቂኢሮሴንታ ዳኣሪዮሴንታ ዓርፄክሲሴንታ ዓይሤ ጎይፆ ጌኤዦ ማኣሮ ማዾ ማዺ ጋፒሴኔ፤ ✝6፡14 ሃኣጌ 1፡1፤ ዛካ. 1፡1። 15 ዬያ ጌኤዦ ማኣሮ ዔያታ ማዢ ጋፒሴሢ ዳኣሪዮሴ ካኣታዼንቴ ላሃሳ ሌዖኮ ዓዳሬ ጌይንታ ዓጊና ፄኤሬም ሃይሣሳ ኬሎናኬ። 16 ዬካፓ ዒስራዔኤሌ ዴራ፥ ቄኤሶንታ ሌዊ ዓሶንታ፤ ዬያጉዲ ዲዒንቶፓ ማዔ ሃንጎ ዓሳ ቢያ ጌኤዦ ማኣራ ማዢንቲ ጋፔሢሮ ቦንቾ ኬሊ ዎዛና ቦንቼኔ። 17 ዔያታ ዒማና ቢያ ዬያ ቦንቾ ኬሎም ማዓያ ፔቴ ፄኤታ ዚያ ጌማይ፥ ላምዖ ፄኤታ ዓዴ ማራይ፥ ዖይዶ ፄኤታ ማራናይ ዓዴ ዒንጎ ዒንጊሢ ማሂ ሺኢሼኔ፤ ሃሣ ጎሜ ጌኤሺሢ ዛላ ዒንጎ ዒንጊሢ ማዓ ታጶ ላምዖ ኮላይ ፔቴ ፔቴ ዒስራዔኤሌ ዓሶኮ ፃጶ ሱንፆና ሺኢሼኔ። 18 ዬካፓ ሙሴኮ ዓሶ ዎይሦ ዎጋ ፃኣፒንቴ ጎይፆ ዬሩሳላሜይዳ ማዢንቴ ጌኤዦ ማኣሮ ማዾም ቄኤሶና ሌዊ ዓሶና ዔያታ ፔ ቤዛ ቤዛ ማሂ ጊኢጊሼኔ።

ዑሣ ዓኣዺፆ ቦንቾ ኬሎ

19 ዲዒንታፓ ማዔ ዓሳ ቤርታሳ ዓጊኖኮ ታጶ ዖይዳሳ ኬሎና ዑሣ ዓኣዺፆ ቦንቾ ቦንቼኔ። ✝6፡19 ኬሲ. ማፃ 12፡1-20። 20 ዒማና ቄኤሶና ሌዊ ዓሶና ቢያ ዎጎ ጎይፆ ዳምቦና ፔ ቶኦኮ ጌኤሼኔ፤ ሃሣ ሌዊ ዓሳኣ ቦንቾ ኬሎይዳ ዲዒንታፓ ማዔ ዴሮና ቄኤሶናም፤ ዬያጉዲ ሃሣ ፔ ቶኦኮም ዔያታ ሺኢሼ ቆልሞዋ ሹኬኔ። 21 ዒንጎ ዒንጊፆዋ ቢያ ዲዒንታፓ ማዔ ዒስራዔኤሌ ዓሳ፤ ዬያጉዲ ሃሣ ዬኖ ዓጮይዳ ናንጋ ሜሌ ዓሶ ዳምቦ ሃሺ ናንጊና ናንጋ ጎዳ ማዔ ዒስራዔኤሌ ፆኦዛሢ ካኣሽካ ዓሳኣ ቢያ ሙዔኔ። 22 ናንጊና ናንጋ ጎዳ ፔኤሮ ዓሶኦሬ ካኣቲ ዔያቶ ናሽካንዳጉዲና ናንጊና ናንጋ ጎዳ ማዔ ዒስራዔኤሌ ፆኦዛሢ ጋላቲንታ ጌኤዦ ማኣሮ ጊንሣ ዔያታ ማዣንዳጉዲ ማዾና ቢያ ዔያቶ ዒ ማኣዳንዳጉዲ ማሄሢሮ ላኣዳ ሙዒ ቦንቾ ኬሎ ላንካይ ኬሊ ኩሙሢ ዼኤፒ ዎዛና ዔያታ ቦንቼኔ።