1 ዬካፓ ሙሴና ዒስራዔኤሌ ዴሮና ሃካፓ ሊካ ዓኣ ዓይኑሞ ናንጊና ናንጋ ጎዳ ቦንቺ ዓይናዼኔ፦

«ፓራሢንታ ፓራሢና ዖላ ዓሶንታ ባዞይዳ ዔኪ ኬኤሪ

ዼግ ዼግ ጌዒ ቦንቺንቴሢሮ

ናንጊና ናንጋ ጎዳም ታ ዓይናዻንዳኔ። ✝15፡1 ዮሃ. ፆፔዻ 15፡3።

2 ናንጊና ናንጋ ጎዳ ታኣኮ ዎልቃሢኬ፤

ታ ዒዛ ቦንቺ ዓይናዻኔ፤

ታና ዒዚ ዻቂሻያ ማዔኔ፤

ዒዚ ታኣኮ ፆኦዛሢኬ፤ ዬያሮ ታ ዒዛ ጋላታኔ።

ታ ዓዶ ፆኦዛሢኬ፥ ታ ዒዛ ዼጊዲ ቦንቻኔ። ✝15፡2 ዓይኑ. 118፡14፤ ዒሲ. 12፡2።

3 ናንጊና ናንጋ ጎዳ ዶዲ ዖላያኬ፤

ሱንፃኣ ዒዛኮ ናንጊና ናንጋ ጎዳኬ።»

4 «ጊብፄ ዓጮኮ ዖሎ ዓሶ

ሳርጌሎ ዖይቶና ዎላ ባዞይዳ ኬኤሬኔ፤

ፖኦሊሶ ዓይሣ ዶኦሪንቴ ዓሳኣ ዞቄ ባዞና ሙይንቴኔ።

5 ሚርጌና ዔታዼ ባዛ ዔያቶ ዱኡኪ ባይዜኔ፤

ሹቺጉዲ ዔያታ ኮላዺ ባዞ ዔቶ ኬዴኔ።»

6 «ናንጊና ናንጋ ጎዳሢዮ! ኔኤኮ ሚዛቆ ኩጫ

ዎልቄና ቦንቺንቴኔ፤ ሞርኮዋ ባይዜኔ።

7 ኔኤኮ ዼኤፒ ማዔ ዎልቆና ኔና ዒፃ ሞርኮ ኔ ባሼኔ፤

ኔኤኮ ዻጋ ታሚጉዲ ዔኤቴሢሮ ዲኢሪጉዲ ዔያቶ ሙዔኔ።

8 ባዞ ኔኤኒ ዑኡዜ ዎዶና

ዋኣፃ ኩሊንቴኔ፥ ዓዳ ኮጬጉዲ ፒዝ ጌዒ ዔቄኔ፤

ዼኤፖ ዔቶይዳ ዓኣ ዋኣፃ ቶርጳዺ ዴዔኔ።

9 ሞርኬ ማላዖ፦ ‹ዳውሲ ታ ዔያቶ ዓርቃንዳኔ፤

ቆሎዋ ታ ዔያቶኮ ጊሽታንዳኔ፤

ታ ሼና ጌዔሢጉዴያ ታ ዔካንዳኔ፤

ታኣኮ ዓፓሮና ታ ዔያቶ ዎዻንዳኔ› ሂዚ ጌዔኔ።

10 ጋዓንቴ ናንጊና ናንጋ ጎዳሢዮ!

ኔ ፔቴና ዑኡዛዛ ባዛ ዔያቶ ዔኤዼኔ፤

ባዞይዳ ዓንጊጉዲ ዔያታ ጌሊ ባይቄኔ።

11 ናንጊና ናንጋ ጎዳሢዮ! ካኣሽኪንታ ፆኦዞይዳፓ ቢያ

ኔናጉዴያ ዖናዳይ? ጌኤሹሞና ሄርሺሳይ ቦንቾናኣ ዒጊቻይ፤

ኔ ዎልቄና ማዺንታ ሄርሺሳ ባኮ

ማዻንዳይ ኔጉዴያ ዖናዳይ?

12 ሚዛቆ ኩጮ ኔ ዔቂሴ ዎዶና ሳዓ ኑ ሞርኮ ዔኤዼኔ፤

13 ናንጊና ናንጋ ናሹሞና ኔ ዓውሴ ዴሮኮ ቤርታ ኔ ዓርና ማዔኔ፤

ኔኤኮ ዶዱሞና ኔኤም ዱማዼ ሳዔሎ ዔያቶ ኔ ጌልዜኔ፤

14 ሜሌ ዴራ ቢያ ዬያ ዋይዜ ዎዶና ዒጊቹሞና ጎጋይቄኔ፤

ፒሊስፄኤሜ ዓጮ ዓሳ ዲቃቲሢና ጎይሢ ባይዜኔ፤

15 ዔዶኦሜ ዓጮ ሱኡጋ ኮሺ ዑሣ ዓኣዼ ሜታዼኔ፤

ሞዓኣቤ ዓጮኮ ዼኤፖ ዓሳ ዒጊጪ ጎጋይቄኔ፤

ካኣናኔ ዓጮ ዴሮኮዋ ሄርሺንቶ ማሊፃ ባይቄኔ።

16 ዲቃቲሢና ዒጊቹሞና ዔያቶይዳ ጌሌኔ፤

ናንጊና ናንጋ ጎዳሢዮ! ኔኤኮ ዎልቆ ዔያታ ዛጌሢሮ

ዓይላታፓ ኔኤኒ ኬሴ ኔኤኮ ዴራ

ዖኦኪ ዓኣዻንዳያ ሄላንዳኣና ዔያታ ዲቃቲሢና ሹቺጉዲ ዚቲ ጌዔኔ።

17 ናንጊና ናንጋ ጎዳሢዮ! ኔኤኒ ዎርቃኒ ማዤ ቤዞይዳ

ኔኤኮ ኩጫ ማዤ ጌኤዦ ማኣሮይዳ

ኔ ዴኔ ማዔ ዹኮይዳ

ኔ ዴሮ ዔኪ ሙኪ ዒኢካ ኔኤኒ ጌሣንዳኔ።

18 ናንጊና ናንጋ ጎዳሢዮ!

ኔኤኒ ናንጊና ካኣቲ ማዒ ናንጋንዳኔ።»

19 ዒስራዔኤሌ ዓሳ ፃኣዺ ሳዓና ባዞ ቲቂ ፒንቄኔ፤ ጋዓንቴ ጊብፄ ካኣቲኮ ፓራሢ፥ ሳርጌሎ ዖይታ፥ ፓራሢና ዖላ ዓሳኣ ቢያ ባዞይዳ ጌላዛ ናንጊና ናንጋ ጎዳ ዋኣፆ ጊንሣ ማሄም ዋኣፃ ዔያቶ ሙዔኔ።

20 ዓኣሮኔኮ ጌሮ፥ ፆኦሲ ማሊሢ ኬኤዛ፥ ማይራሞ ጎዖስኬና ካራቤ ዔኬኔ፤ ሜሌ ላኣላኣ ዬኖ ጎይፆ ፔኤኮ ታምቡሮ ዔኪ ባዒ ኮርጊ ኮርጊ ዒዞ ጊንፆ ዓኣዺሢ ዓርቄኔ፤ 21 ማይራማ ዓይኑሞ ዔያቶም ዴንሢ፦

«ፓራሢንታ ፓራሢና ዖላ ዓሶ ባዞይዳ ኬኤሪ

ዼኤፒ ባሺሢ ዒ ዴንቄሢሮ

ናንጊና ናንጋ ጎዳም ዓይናዹዋቴ» ጌይሢና ዓይናዼኔ።

22 ሙሴ ዒስራዔኤሌ ዴሮ ዞቄ ባዞ ጊዴና ፒንሢ ሹኡሬ ጌይንታ ዓሲ ናንጉዋ ዳውሎ ዔኪ ዓኣዼኔ፤ ዬኖ ጎይፆ ሃይሦ ኬሊ ጉቤ ዔያታ ሃንቴኔ፤ ጋዓንቴ ፔቴታዖ ዋኣሢ ዔያታ ዴንቂባኣሴ። 23 ዬካፓ ማኣራ ጌይንታ ቤሲ ዔያታ ሙኪ ሄሌኔ፤ ጋዓንቴ ዒዞ ቤዞይዳ ዓኣ ዋኣፃ ጫንቺ ማዔሢሮ ዑሽካኒ ዔያታ ዳንዳዒባኣሴ፤ ማኣራ ጌይንቴሢያ ዬያሮኬ። 24 ዒማና ዴራ ሙሴ ዑፆይዳ ጉንዱሚ፦ «ዓካሪ ኑኡኒ ዓይጎ ዑሽካንዳይ?» ጌዒ ዒዛ ዖኦጬኔ። 25 ሙሴያ ዼኤፒ ዒላቲና ናንጊና ናንጋ ጎዳ ሺኢቃዛ፥ ናንጊና ናንጋ ጎዳ ዒዛም ፔቴ ሚሢ ዻዌኔ፤ ዬኖ ሚፆ ዔኪ ዋኣፃ ዒዚ ዓጋዛ ዋኣፃ ዓኣፂ ዑሺም ጊኢጋያ ማዔኔ።

ናንጊና ናንጋ ጎዳ ዔያታ ዎርቃንዳ ዎጌ ዬኖ ቤዞይዳ ዔያቶም ዒንጌኔ፤ ሃሣ ዔያታ ዒዛም ዓይሢንታቴያ ዓይሢንቱዋቴያ ዒኖ ዔያቶኮ ሙሪ ዛጌኔ፤ 26 ሂዚ ዔያቶም ዒ ጌዔኔ፦ «ታ ቤርታ ኮሺ ማዔ ባኣዚ ማዺሢና ታኣኮ ዓይሢፆዋ ካፒሢና ጉቤ ዒናፓ ታኣም ዒንሢ ዓይሢንቴቴ ጊብፄ ዓጮ ዓሶ ዑፃ ታ ዔኪ ዬዔ ዶርዓሢዳፓ ፔቴናታዖ ታ ዒንሢ ሜታሳዓኬ፤ ዒንሢ ዻቂሻ፥ ናንጊና ናንጋ ጎዳሢያ ታናኬ።»

27 ዬካፓ ዔሊሜ ጌይንታ ቤዞ ዔያታ ሙኬኔ፤ ዒዞ ቤዞይዳ ታጶ ላምዖ ዋኣሢ ዓልቃ ቤሲና ላንካይታሚ ታሚሬ ጌይንታያ፥ ሜኤፄ ማላ ሙዖ ሚሢ ዓኣኔ፤ ዴራ ዒዞ ዋኣፆ ዓጮይዳ ዱንኪ ዴዔኔ።