ኬሲ ማፃኣፔ 31

ባስሊዔኤሌና ዔኤሊያቤና

1 ናንጊና ናንጋ ጎዳ ሙሴም፦ 2 «ሃይሾ ታኣኒ ዪሁዳ ማኣራፓ ሁኡሬ ጎዖሢኮ ናኣዚ ናዖ ማዔሢ፥ ዑኡሬ ናኣዚ፥ ባስሊዔኤሌ ዶኦሬኔ፤ 3 ዓይጎ ባኣዚያ ማዖም ኩቺ ማዾ ሃኣማቶ ዔራንዳጉዲ ጶቂሥሢና ጪንጩሞና፤ ሃሣ ዔራ ማዓንዳጉዲ ታኣኮ ዓያኖንታ ዎልቄያ ታ ዒዛም ዒንጌኔ፤ 4 ዬያሮ ጪንጩሞና ማዾንዶ ጎይሢ ማሊ ኬሲ ዎርቄይዳፓ፥ ቢራና ሞኦኖ ዓንጎናይዳፓ ዱማ ዱማ ባኣዚ ዒ ኮሻንዳኔ። 5 ዬያጉዲ ፓልሞም ማዓ ሚዛጶ ሹጮ ቆኦቂ ኮሻኒ፥ ሚሢያ ዓርሳኒ፥ ሜሌ ማዾ ቢያ ዔራቶና ማዻኒ ዒ ዳንዳዓኔ። 6 ዒዛና ዎላ ሃሣ ማዻንዳጉዲ ዳኣኔ ማኣሮይዳፓ ዓይሳማኬ ናኣዚ ዔኤሊያቤ ታ ዶኦሬኔ፤ ታ ኔና ዓይሤ ባኮ ቢያ ዔያታ ማዻንዳጉዲ ኩቺ ሃኣማቶ ዓኣ ሜሌ ዓሶማኣ ቢያ ዼኤፒ ዔራቶ ታኣኒ ዒንጌኔ። 7 ማዺንታንዳጉዲ ታ ዓይሤ ባካ ያዺኬ፦ ታኣኒ ዒንሢና ካኣማ ዓፒሎና ማዢንታ ማኣሮ፥ ጫኣቁሞ ታኣቦቶንታ ዎዾ ካሮንታ፥ ዓፒሎና ማዢንታ ማኣሮ ጋራ ማዾ ባኮ ቢያ፥ 8 ዼጌ ዳልጎ ሎኦዦንታ ዬያም ኮይሳ ባኮ፥ ጌኤዦ ዎርቃፓ ኮሺንታ ፖዖ ጌሦ ሻርኖና ዬያም ኮይሳ ባኮ ቢያ፥ ዑንጆ ዒንጊፃ ዒንጊንታ ቤዞ፥ 9 ሚቺ ዒንጎ ዒንጊፆም ማዓ ቤዞና ዬያም ኮይሳ ባኮ ቢያ፥ ዋኣፆ ማስቶ ሳኣኖንታ ጌሦ ቤዞንታ፥ 10 ዓኣሮኔና ዒዛኮ ናኣቶና ቄኤሴ ማዒ ማዻኣና ዔያታ ማኣዓንዳ ሚዛጶ ዱማዼ ማኣዓሢ፥ 11 ቲዦ ዛይቶና ታኣም ዱማዼ ቤዞም ማዓ ኮዦ ሳውማ ዓኣ ዑንጆ፥ ዬያ ቢያ ባኮ ዔያታ ማዻንዳሢ ታ ኔና ዓይሤ ጎይፆማኬ» ጌዔኔ።

ሃውሾም ዶኦሪንቴ ኬሎ

12 ናንጊና ናንጋ ጎዳ ሙሴ ዓይሣዖ፦ 13 «ዒስራዔኤሌ ናኣቶም ሂዚ ጌዒ ኬኤዜ፦ ሃውሾ ኬሊ ማሂ ታ ዶኦሬ ቦንቾ ኬሎ ካፑዋቴ፤ ዓይጎሮ ጌዔቶ ዬይ ታኣኒ፥ ናንጊና ናንጋ ጎዳ ታኣም ዱማዼ ዴሬ ማሂ ዒንሢ ዶኦሬያ ማዒፆ ዔርዛያ ማዒ ሙካ ሾይንቶ ቢያይዳ ታኣና ዒንሢናኮ ባኣካ ዶዲ ናንጋንዳ ማላታ ማዔሢሮኬ። 14 ታኣም ዱማዼያ ማዔሢሮ ሃውሾ ኬሎ ቦንቾ ኬሊ ማሂ ቦንቹዋቴ፤ ዬያ ቦንቾ ኬሎ ካፑዋዖ ማዾ ኬሊ ማሃ ዓሲ ቢያ ዎዎዺንቶንጎ። 15 ዒንሢ ዒንሢኮ ማዾ ማዻንዳ ላሆ ኬሊ ዒንሢም ዓኣኔ፤ ላንካሳ ኬላ ጋዓንቴ ታኣም ዱማዼ ሃውሺሢ ኬሊኬ፤ ዬኖ ኬሎና ማዾ ማዻሢ ቢያ ዎዎዺንቶጎ። ✝31፡15 ኬሲ. ማፃ 20፡8-11፤ 23፡12፤ 34፡21፤ 35፡2፤ ሌዊ. ዓኬ 23፡3፤ ላሚ. ዎማ 5፡12-14። 16 ዒስራዔኤሌ ዴራ ዬኖ ኬሎ ዶዲ ናንጋ ጫኣቁሞ ማላታ ማሂ ካፖንጎ፤ 17 ዬይ ታኣና ዒስራዔኤሌ ዴሮናኮ ባኣካ ናንጊና ዶዲ ናንጋ ማላታ ማዖንጎ፤ ዓይጎሮ ጌዔቶ ታኣኒ ናንጊና ናንጋ ጎዳ ጫሪንጮና ሳዖና ላሆ ኬሊዳ ማዢ ኩርሴስካፓ ላንካሳ ኬሌሎ ማዾ ታኣኒ ሃሼ ኬሎታሢሮኬ» ጌዔኔ። ✝31፡17 ኬሲ. ማፃ 20፡11።

18 ናንጊና ናንጋ ጎዳ ሙሴና ሲና ዹኮይዳ ጌስቴስካፓ ፆኦሲ ፔኤሮ ፔ ዓይሢፆ ፃኣፔ ላምዖ ዓርሲንቴ፥ ማርኮ ማዓ ሹጮንሢ ሙሴም ዒንጌኔ።