ሂዚቄኤሌ ማፃኣፖ 27

ፂሮሴ ዓጮ ቃዪንቴ ቃዬ

1 ናንጊና ናንጋ ጎዳ ታኣም ሂዚ ጌዔኔ፦ 2 «ዓሲ ናዓሢዮ! ፂሮሴ ዓጮ ሂዚ ጌዒ ቃዬ፤ 3 ዳልጎ ባዞ ዋኣፆ ባንሢ ጌላ ካሮ ጎይፆይዳ ዴዒ ዱማ ዱማ ዓጮኮ ዛጳ ዓኣ ካታማፓ ሙካ ኮርሞ ዓሶ ዎላ ካንሣያ ማዔ ፂሮሴ ዓጮም ናንጊና ናንጋ ዼኤፖ ጎዳ ሂዚ ጋዓኔ ጌይ ኬኤዜ፤

ዔዞ ፂሮሴ! ‹ታኣኒ ሃይማ ፓጬኔ ጎዑዎ ጎይሢ ሚዛጲኬ ኔ ኔና ጋዓኔ።

4 ኔኤኮ ናንጎ ቤዛ ዳልጎ ዋኣፆይዳኬ፤

ኔና ማዤ ዓሳ ሚዛጲ ዋኣሢ ካኣሚሌጉዲ ኮሼኔ።

5 ካሮ ዎዾሢ ኔኤኮ ኮሺንቴሢ ሄርሞኔ ዹካ ዓኣ ዚቢቆናኬ፤

ቱርቱራኣ ኔኤኮ ኮሺንቴሢ ሊባኖኦሴ ሚፆናኬ።

6 ዋኣፆና ፒንቆ ጎንጎ ዒሾ ሚፃ ኮሺንቴሢ

ባኣሳኔ ዓጫ ዓኣ ሻኣቦናኬ፤

ኔኤኮ ዋኣፆና ፒንቆ ጎንጎኮ ጋሮ ሳዓ ኮሺንቴሢ

ቆጲሮሴ ዓጫ ዓኣ ዱማ ማዔ ዚቢቆናኬ፤

ዙላ ማዓ ካሮና ዳርሲ ዓቺና ጳርቂንቴኔ።

7 ኔኤኮ ዋኣፆ ካኣሚሎኮ ዳልጎ ሻራሢ ዓፒላ

ዬይያኣ ዓዳ ኔኤኮ ባንዲሮ ማዔኔ፤

ኩጮና ማዦና ጊብፄ ዓጮኮ ሻኣዦ ዓፒሎጉዲ

ኔኤኮ ጎኦቦ ዓፒላ ቆጲሮሴ ዓጫፓ ሙኬ

ሚርጌና ሚዛጳ ጮልዔ ዲንኮ ሼኤሞና ኮሺንቴያኬ፤

8 ኔኤኮ ዋኣፆና ፒንቆ ጎንጎ ዒሻ ዓሳ ሲዶናና ዓርዋዴ ጌይንታ ካታማፓ ሙኬያኬ፤

ዔዞ ፂሮሴ! ኔኤኮ ሃኣሞ ዓሳ

ዋኣፆ ካኣሚሎይዳ ዓኣ ዓሶ ዓይሣ ዓሶኬ።

9 ዋኣፆና ፒንቆ ጎንጎኮ ፑርቴሢ ኮሻኒ ጌባሌ ዓጮይዳ ዔሬ ሃኣሞ ዓሳ ኔ ባኣካይዳ ዓኣኔ፤

ዋኣፆ ካኣሚሎ ዓሳ ፔኤኮ ዋኣፆ ካኣሚሎና ጌዒ

ኔኤኮ ዋኣፆ ካኣሚላ ዔቃ ቤዞ ሙኪ ሙኪ ኔኤና ዎላ ኮርሞ ኮርማኔ።›»

10 «ፓርሴ ዓጫፓ፥ ሊዲያንታ ሊቢያ ዓጮንታፓ ሙኬ ፖኦሊሳ ኔኤኮ ዖላ ዓሶ ባኣካ ማዻኔ፤ ዔያቶኮ ጊቲሞና ቶኦካ ዓጎ ዓንጎ ቆኦቦ ኔኤኮ ዖሎ ዖላ ዓሳ ዓኣ ጶኦካ ዔያታ ሱፄኔ፤ ዔያታ ኔና ቦንቺሴ ዓሶኬ። 11 ዓርዋዴ ዓጫፓ ሙኬ ፖኦሊሳ ኔኤኮ ኬኤሎ ዲፆ ካፓኔ፤ ጋማዲሜ ዓጫፓ ሙኬ ዓሳኣ ኔኤኮ ዋርዲዮ ቤዞ ካፓኔ፤ ዔያታ ጊቲሞ ፔኤሲ ሹጮና ኮሾና ኬኤሎ ዑፃ ሱፄኔ፤ ኔና ሚዛጲሴሢያ ዔያቶኬ።»

12 «ኔኤኮ ዖርጎቹማ ሚርጌሢዳፓ ዔቄያና ቴርሴሴ ዓጮና ዎላ ኔኤኒ ኮርሚ ኮርሚ ኔ ሜሆ ዛሎ ዒዞይዳፓ ኔኤኒ ቢራ ዓንጊ፥ ቆርቆሬንታ ዒርሳሴ ጌይንታ ባኮዋ ዔካኔ። 13 ጊሪኮ ዓሶንታ ቱባሌንታ ሜሼኬ ዓሶንታ ዎላ ኔኤኒ ኮርሞ ኮርማኔ፤ ካራሞ ማዓ ዓሶንታ ሞኦኖ ዓንጎና ኮሺንታ ሜሆዋ ኔኤኒ ዔኪ፥ ዬያ ዛሎ ኮርማ ኮርሚንታ ዱማ ዱማ ባኮ ዔያቶም ኔኤኒ ዒንጋኔ፤ 14 ቤትቶጋርማ ዓጫፓ ዓሲ ናንጎዋ ዳውሎ ዓጮ ፓራሢንታ ዖሎ ዖላ ፓራሢንታ ባቁሎንታ ኔኤኒ ዔኪጋፓ ዱማ ዱማ ኮርሞ ባኮ ዔያቶም ኔኤኒ ዒንጋኔ። 15 ሮዴ ዓጮ ዓሶና ዎላ ኮርሞ ኔኤኒ ኮርማኔ፤ ዳልጎ ባዞ ዋኣፆ ዓጫ ዓኣ ዓጮ ዴራ ኔኤኮ ኮርሚ ኮርሚ ዓፒሎ ዔካዖ ዬያ ዛሎ ዳርሲ ዓቺና ዞጲ ጌይንታ ዶዶ ሚፆ ዔኪ ኔኤም ሙካኔ። 16 ሶኦሪያ ዓጮ ዴራ ኔኤኮ ኮርሞ ዓፒሎ ቢያና ሜሌ ሚርጌ ሜሄ ኔኤፓ ሻንቃኔ፤ ዔያታ ዬያ ዔኬ ሜሆ ዛሎ ቤሉሬ ጌይንታ ሚዛጶ ሹጮንታ ኩጮና ማዢ ሚዛጲሶና ጮልዔ ማኣዓሢንታ ጉኡፂሲ ሱኪ ዹይሶና ዓፒሎና ኪቤይዳፓ ኮሺንቴ ፓልማሢንታ ዞቄ ሚዛጶ ሹጮዋ ዔያታ ኔኤም ሻንቻኔ፤ 17 ዪሁዳና ዒስራዔኤሌ ዓጮኮ ኮርሞ ኮርማ ዓሳ ኔኤኮ ኮርሞ ባኮ ዛሎ ሚኒቴ ዓጮ ዛርጋሢ፥ ዳይሳሢ፥ ዔኤዞ፥ ሪሚቶ ዛይቶንታ ዱማ ዱማ ሳውቃ ዼኤሾ ኔኤም ጪጋኔ። 18 ዴማስቆ ዓጮ ዴራ ኔኤኮ ኮርሞ ባኮንታ ሜሌ ሜሆ ዛሎ ሄልቦኔ ዓጮ ዎይኖ ዑዦንታ ሳሆሬ ዓጫፓ ሺኢሾ ማራቶ ጋፓኖ ኔኤም ዔያታ ሻንቻኔ። 19 ዑዛሌ ጌይንታ ዓጫ ናንጋ ዳኣኔ ዓሶንታ ጊሪኬ ዓሶንታ ሜሆ ኔኤኮ ሻንቃኒና ኮርማኒ ዎላ ጌስቲ ቱኬኔ፤ ዔያታ ኔኤኮ ኮርሞ ባኮ ዛሎ ሼኤሺ ኮሺንቴ ዓንጎንታ ዱማ ዱማ ሳውቃ ዼኤሾንታ ዳጅሳኣሮዋ ኔኤም ዒንጋኔ። 20 ሃሣ ዴዳኔ ዓጮ ዴራ ኔኤኮ ኮርሞ ባኮ ዛሎ ኮኦራ ጊላሴ ዔኪ ኔኤም ዬዓኔ። 21 ዓሬቦንታ ቄዳሬ ዓጮ ሱኡጋ ቢያ ኔኤኮ ኮርሞ ሜሆ ዛሎ ማራናኣቶና ዋኒናኣቶዋ ኔኤም ዔኪ ሙካኔ፤ 22 ሳኣባና ራዒማ ዓጮ ኮርሞ ዓሳ ኔኤኮ ኮርሞ ባኮ ዛሎ ሚዛጶ ሹጮንታ ዎርቆንታ፥ ዶኦሪንቴያ ማዔ ዱማ ዱማ ሳውቃ ዼኤሾ ኔኤም ዒንጋኔ። 23 ካኣራኔ፥ ካኔሄንታ ዔዴኔ ካታሞንታ ሳኣባ ዓጮኮ ኮርሞ ኮርማ ዓሶንታ ጊንሣ ሃሣ ዓሹርናንታ ኪልማዴ ካታሞንታ ዬይ ቢያ ኔኤና ዎላ ኮርሞ ኮርማኔ። 24 ሚዛጲሶና ማኣዓሢንታ ጮልዔ ዓፒሎንታ ኩጮና ሚዛጲሲ ማዦና ማኣዓሢንታ ጋሮይዳ ሂኢሦ ሚዛጶ ባኮንታ ኮሺ ሱኮና ሻሺና ዶዲሺ ቱኪ ኔኤም ዔያታ ሻንቻኔ። 25 ቴርሴሴ ዓጮኮ ዋኣፆ ካኣሚላ ሜሆ ኔኤኮ ጫኣኒፆና ኔና ማኣዳኔ።»

«ኔኤኒ ዳልጎ ባዞ ዋኣፆ ሳዛ ሚርጌ ኮርሞ ባኮና ኩሜ ዓጪኬ፤ ✝27፡25 ዮሃ. ፆፔዻ 18፡11-19።

26 ዋኣፆና ፒንቆ ጎንጎ ዒሺ ዓኣዻ ዓሳ ባዞ ቁልባሢ ባንሢ ዔኪ ኔና ዓኣዼኔ፤

ዼኤፖ ዓባ ኬስካ ባንፆ ዢባራ ባዞ ዋኣፆይዳ ኔና ሜንሤኔ።

27 ኔኤኮ ኮርሞ ባካ ቢያ

ዋኣፆ ካኣሚሎ ዒሻ ዓሳ ቢያ

ዋኣፆ ካኣሚሎይዳ ማዻ ዓሳኣ ቢያ

ዬያ ኮሻ ዓሶንታ ኮርሞ ኮርማ ዓሳ ቢያ

ዬኖ ዋኣፆ ካኣሚሎይዳ ዓኣ ፖኦሊሳ ቢያ

ዋኣፆ ካኣሚላ ኔኤኮ ሜቃኣና ቢያሢ ባዞ ቁልባሢዳ ዔኤዺንታንዳኔ።

28 ዋኣፆ ካኣሚላ ዓኣ ዓሳ ባዞ ቁልባሢዳ ጌሊ ዔኤዺንታኣና ዒላቴ ዒላታ

ዳልጎ ባዞ ዓጮይዳ ዓኣ ዓጮ ዓጊሤኔ።»

29 «ዬኖ ዎዶና ሜሌ ዋኣፆ ካኣሚሎ ዔኪ ዓኣዻ ዓሳ

ዬያ ዒሻ ዓሶንታ ዋኣፆ ካኣሚሎይዳ ማዻ ዓሶ ዓይሣ ዓሳኣ ቢያ

ኬስኪ ዳልጎ ባዞ ዓጫ ዔቄኔ።

30 ዒማና ዔያታ ቢያ ፔኤኮ ቶኦኮይዳ ሲላሊ ዋሂ

ዲቢንሢዳ ቡምባሊ ቡምባሊ

ዑኡዞ ፔኤሲ ዼጊዲ ኔ ዛሎ ዓሽኮ ፔኤሲ ዱኡዚ ዬኤካንዳኔ።

31 ኔ ዛሎ ዖዪሢና ቶኦኮ ጋሞ ፔኤኮ ጉኡሊ ሲዬ ፓቲሌያኣ ማይንታንዳኔ፤

ዒናፓ ሜቂ ዖዪሢና ኔና ዔያታ ዬኤካንዳኔ።

32 ዔያታ ፔኤኮ ዖዪፆና ሱንፆ ኔኤኮ ዔኤሊ ዔኤሊ ዬኤካንዳኔ፤

ኔ ዛሎ ቃዪያ ዔያታ ቃያንዳኔ፤ ዬያ ቃያሢና ሂዚ ዔያታ ጋዓንዳኔ፦

‹ዳልጎ ባዞ ዋኣፆ ሳዛ ዔኤዺንቲ

ዑኡሲ ባይቄ ዓጪ

ፂሮሴጉዲ ዓይጎ ዓጪዳይ?

33 ኔኤኮ ኮርሞ ኮርሞ ባካ ዱማ ዱማ ዓጮ ዳኪንታኣና

ዬይ ዱማ ዱማ ዓጮ ዴራ ኮዓ ባኮ ዔያቶም ኩኩንሣኔ፤

ኔኤም ጊዲ ዑሣ ዓኣዼ ቆሎንታ ኮርሞ ባኮናኣ

ሳዖ ካኣቶ ኔኤኒ ዖርጎጪሴኔ።

34 ሃሢ ኔኤኒ ጋዓንቴ ዔቶ ዳልጎ ባዞይዳ ሜቂ ዓቴኔ፤

ኔኤኮ ኮርሞ ሜሆንታ ኔኤም ማዻ ዓሳኣ ቢያ ኔኤና ዎላ ባይቄኔ፤›

35 «ዳልጎ ባዞ ዋኣፆ ዓጫ ናንጋ ዓሳ ቢያ ኔ ዑፃ ማዔ ፑርቶ ባኮይዳፓ ዔቄያና ዲቃቴኔ፤ ዔያቶኮ ካኣታኣ ዓቱዋዖ ዎኦቶንዶ ካራ ባይዜኔ፤ ፔቴ ፔቴሢኮዋ ዓኣፖ ካራ ዲቃቲሢና ዒጊቹሞ ማላታና ጴዻኔ። 36 ዓካሪ ሜሌ ዴሮኮ ኮርሞ ኮርማ ዓሳ ኔና ቦሂ ሚኢጫንዳኔ፤ ጋፒንፃኣ ኔኤኮ ዲቃሣያ ማዔኔ፤ ናንጊና ኔኤኒ ጋፒ ባይቃንዳኔ።»