ዒሲያሴ ማፃኣፖ 18

ፆኦሲ ዒቶጲያ ዓጮ ዛሎ ኬኤዜ ቃኣላ

1 ዒቶጲያኮ ዎሮ ሱካ፥ ዡኡዣ ጋኣሲ ዑኡሲ ዋይዚንታ ዓጬሎም ባዴዔ! ✝18፡1 ሶፖ. 2፡12። 2 ዬና ዓጬላ ኪኢቶ ዓሶ ማጫሬና ኮሺንቴ ዋኣፆና ፒንቆ ጎንጊ ዓባዬ ዎሮና ዳካኔ፤ ዴራ ዒዞኮ ዖዶሲ፥ ዑፃኣ ሺኢቺ፤ ዓጫ ዔያቶኮ ዎርዚና ፓቂንቴያ፥ ዶዲ ጊንሣ ሃሣ ዎልቄና ዓኣያ ማዔያታሢሮ ዓጮ ቢያይዳ ናንጋ ዓሶ ባንሢ ዒንሢ ሩኡራ ኪኢቶ ዓሳ ዓኣዹዋቴ።

3 ሳዖይዳ ናንጋ ዓሳ ቢያ ዋይዙዋቴ! ዹኮ ቶኦካ ዾቂንቴ ባንዲራ ዓጊፃኣና ማሊ ጶቂሡዋቴ! ዛዬ ዋርቂንታኣናኣ ዋይዙዋቴ፤ 4 ናንጊና ናንጋ ጎዳ ታኣም ሂዚ ጌዔኔ፦ «ዓባ ሳዛ ማዔ ዎዶና ሜታ ባኣያ ፖዓ ዓቢጉዲ፥ ሃሣ ማኣሎ ቡሮ ዓጊኖና ሱኡላ ዋኣንቶ ኬዳ ዖልኬጉዲ ታኣኒ ታኣኮ ጫሪንጫ ናንጋ ኬኤፃፓ ዓጊፁዋዖ ዚቲ ጌይ ዛጋንዳኔ። 5 ዎይና ካፄም ቲቂ ዔኮንዶሢኮ ቤርታ ቡና ዲኢኒ ዓሚ ካፄ ዎዶና ዎይኖ ሚፆኮ ሶያ ዓንጊና ቲቂንቲ ኬኤሪንታሢጉዲ ፆኦሲ ዬኖ ዓጬሎ ዴሮ ቲቂ ባይዛንዳኔ። 6 ዔያቶ ፖኦሊሶኮ ሌዛ ጫሪንጮ ካፖና ዓሳ ናንጉዋ ዳውሎ ቦዖም ሙኡዚ ማዓንዳኔ፤ ዖጎፆና ካፓ፥ ባርጎና ሃሣ ካዮ ቦዓ ሙዒ ሻኣጫንዳኔ።»

7 ቢያ ባኮ ዎይሣ ጎዳ ማዔ ፆኦዛሢ ዓጮ ቢያ ዲቃሢ ዒጊቻ ዎልቃ ዓኣ፥ ዑፃ ሺኢቺ ማዔ፥ ዔጳኣ ዖዶሲ፥ ዎልቄና ዶዲ ማዔ፥ ዎሮና ፓቂንቴ ሳዓ ዓኣ ዬያ ዴሮይዳፓ ዒንጎ ባኣዚ ዔኪንታ ኬሊ ሙካንዳኔ፤ ዔያታ ቢያ ባኮ ዎይሣ ጎዳ ማዔ ፆኦዛሢ ካኣሽኪንታ ፂዮኔ ጌሜሮ ዬዓንዳኔ።